ಯುವಜನತೆಗೆ ಯಾರಿದ್ದಾರೆ ಆದರ್ಶಪ್ರಾಯರು?

 

ನಮ್ಮ ನಾಡಿನುದ್ದಗಲಕ್ಕೂ, ಸೋಂಕಿನಂತೆ ಪ್ರತಿ ಮನೆಗೂ ಹರಡಿರುವ ಭ್ರಷ್ಟಾಚಾರವೆಂಬ ಈ ವ್ಯಾಧಿಯನ್ನು ಬೇರುಸಹಿತ ಕಿತ್ತು, ಒದ್ದೋಡಿಸುವ ನಿಟ್ಟಿನಲ್ಲಿ ಜನ ಜಾಗೃತಿ ಮೋರ್ಛಾಗಳು ಹಾಗೂ ಸತ್ಯಾಗ್ರಹಗಳು ಆರಂಭವಾದುವೇನೋ ನಿಜ. ಆದರೆ ಅವುಗಳ ಜೊತೆ ಜೊತೆಗೇ, ಸಮಾಜದ ಪ್ರತಿರಂಗದಲ್ಲೂ ಧೀಮಂತ ವ್ಯಕ್ತಿತ್ವಗಳು ನಾಗರಿಕರ ಮುಂದೆ ತಮ್ಮ ಅನೈತಿಕ ಹಾಗೂ ಭ್ರಷ್ಟ ನಡತೆಯಿಂದಾಗಿ ನಗ್ನವಾಗುತ್ತಲೇ ಸಾಗುತ್ತಿವೆ. ಇದಿಷ್ಟೇ ಆಗಿದ್ದಿದ್ದರೆ ಸಮಸ್ಯೆ ಇದ್ದಿರಲಿಲ್ಲ. ಈ ಲೇಖನವೂ ಅವಶ್ಯಕ ಎಂದೆನಿಸುತ್ತಿರಲಿಲ್ಲ. ನಮ್ಮ ಮನಸ್ಸಿಗೆ ತೀರ ಘಾಸಿ ಉಂಟು ಮಾಡುವ ವಿಚಾರವೆಂದರೆ ಅಪವಾದ ಹೊರಿಸುವವರು, ಆರೋಪ ಎದುರಿಸುತ್ತಿರುವವರು, ವಿಚಾರಣೆ ನಡೆಸುವವರು, ಎಲ್ಲರೂ ಪರಸ್ಪರರ ಮೇಲೆ, ಪ್ರಾಥಮಿಕ ಶಾಲಾ ವಿದ್ಯಾರ್ಥಿಗಳ ಮಟ್ಟಕ್ಕಿಳಿದು, ಅವಮಾನಕರ ಹೇಳಿಕೆಗಳನ್ನು ನೀಡುತ್ತಿರುವುದು.

ನಿವೃತ್ತ ನ್ಯಾಯಮೂರ್ತಿಯಾದರೇನು ಹಾಗೂ ನಿವೃತ್ತ ಲೋಕಾಯುಕ್ತರಾದರೇನು, ಪೋಲೀಸ್ ಇಲಾಖೆಯ ಅಧಿಕಾರಿಗಳಾದರೇನು, ಎಲ್ಲರ ಬಗ್ಗೆಯೂ ಮುಲಾಜಿಲ್ಲದೇ, ಮಾಜೀ ಹಾಗೂ ಹಾಲಿ ಮುಖ್ಯಮಂತ್ರಿಗಳು, ಮಂತ್ರಿಗಳು, ಅಧಿಕಾರಿಗಳು ತಮ್ಮ ಮನಕ್ಕೆ ಬಂದ ರೀತಿಯಲ್ಲಿ ಅವಮಾನಕರ ಮಾತುಗಳನ್ನು  ಹೊರಹಾಕುತ್ತಾರೆ. ಎರಡು ದಿನ ಬಿಟ್ಟು, ಮತ್ತೆ  ಇವರು ಅವರೆಲ್ಲರ ಮಾತುಗಳಿಗೆ ಉತ್ತರಿಸುತ್ತಾ ಹೋಗುತ್ತಾರೆ. ಓರ್ವ ಮಾಜಿ ಮುಖ್ಯಮಂತ್ರಿಯಂತೂ, ತಾನು ಅದೆಷ್ಟೇ ಅನೈತಿಕ ಹಾಗೂ ಭ್ರಷ್ಟ ನಡತೆಯ ಆರೋಪಗಳ ಕೂಪದಲ್ಲಿ ಮುಳುಗಿದ್ದರೂ, ಅನ್ಯರು ಅದ್ಯಾವ ಹುದ್ದೆಯಲ್ಲಿದ್ದರೂ ಲೆಕ್ಕಿಸದೇ, ಅವರೆಲ್ಲರ ಮಾನ ಹರಾಜು ಹಾಕುವ ಮಾತನ್ನಾಡುತ್ತಾನೆ. ಆತನ ಅಥವಾ ಆತನ ಕುಟುಂಬದ ಮೇಲೆ ಆರೋಪಗಳು ಬಂದಾಗಲೆಲ್ಲಾ, ಆರೋಪ ಹೊರಿಸಿದವರ ಹಾಗೂ ವಿಚಾರಣೆ ನಡೆಸುವವರ ಪೂರ್ವಾಪರಗಳನ್ನು ಸದ್ಯವೇ ಸಾರ್ವಜನಿಕವಾಗಿ ಬಿಚ್ಚಿಡುತ್ತೇನೆ ಎಂಬ ಬೆದರಿಕೆಯನ್ನು ಒಡ್ಡುತ್ತಲೇ ಸಾಗುತ್ತಾನೆ. ಬಿಚ್ಚಿಡುತ್ತೇನೆ ಎಂದುದರ ಪಟ್ಟಿ ಅದೆಷ್ಟೇ ದೊಡ್ಡದಿದ್ದರೂ, ಸಾಕ್ಷಿ ಸಮೇತವಾಗಿ ಬಿಚ್ಚಿಟ್ಟ ದಾಖಲೆಗಳು ಮಾತ್ರ ಇದುವರೆಗೂ ಅಪ್ರಾಮುಖ್ಯವಾಗಿಯೇ ಉಳಿದಿವೆ. ಇವನ್ನೆಲ್ಲಾ ನೋಡುವಾಗ, ಕೇಳುವಾಗ, ಇವರೆಲ್ಲಾ ಆ ಪ್ರಾಥಮಿಕ ಮಕ್ಕಳ ಮಟ್ಟದಿಂದ ಇನ್ನೂ ಮೇಲೇರಿ ಬಂದಿಲ್ಲವೇನೋ ಎಂದನಿಸುತ್ತದೆ, ಅಲ್ಲವೇ?

ಭ್ರಷ್ಟ ನಾಯಕರುಗಳು ಜಾಮೀನು ಪಡೆದು ಮನೆಗೆ ಬಂದರೆ, ದಾರಿಯುದ್ದಕ್ಕೂ ಮಾಧ್ಯಮದವರ ಕ್ಯಾಮೆರಾ ಕಣ್ಣುಗಳು ಹಿಂಬಾಲಿಸುತ್ತವೆ. ಯುದ್ಧವನ್ನು ಗೆದ್ದುಬಂದ ಯೋಧರಂತೆ ವಿಜಯದ ನಗೆ ಬೀರುವ ಈ ನಾಯಕರುಗಳ ಹಿಂಬಾಲಕರುಗಳ ವಿಜಯಘೋಷ ಮುಗಿಲು ಮುಟ್ಟುತ್ತದೆ. ಭ್ರಷ್ಟಾಚಾರದ ಆರೋಪ ಹೊತ್ತಿರುವ ನೆರೆರಾಜ್ಯದ ಮುಖ್ಯಮಂತ್ರಿ ನ್ಯಾಯಾಲಯದಲ್ಲಿ ವಿಚಾರಣೆಗಾಗಿ ಹಾಜರಾಗಲು ಬಂದರೆ, ಸ್ವಾಗತಕ್ಕೆ ನಮ್ಮ ರಾಜಧಾನಿಯಲ್ಲಿ, ರಾತ್ರಿ ಬೆಳಗಾಗುವುದರ ಒಳಗೆ,  ಸ್ವಾಗತ ಕಮಾನುಗಳು, ಸ್ವಾಗತ ಫಲಕಗಳು, ಎದ್ದು ನಿಲ್ಲುತ್ತವೆ. ಭ್ರಷ್ಟರೊಂದಿಗೆ ಗುರುತಿಸಿಕೊಳ್ಳಲು ಇಂದು ಯಾರೂ ಹಿಂಜರಿಯುತ್ತಿಲ್ಲ. ಅನೈತಿಕತೆಯ ಆರೋಪಗಳನ್ನೆಲ್ಲಾ ದುಡ್ಡಿನ ಕಂತೆಗಳಲ್ಲಿ ಮುಚ್ಚಿಟ್ಟು ಆರೋಪ ಹೊರಿಸಿದವರೊಂದಿಗೆ ರಾಜಿ ಮಾಡಿಕೊಂಡು, ರಾಜಾರೋಷವಾಗಿ ಅಡ್ಡಾಡುವವರು ನಮ್ಮ ಪಾಲಿಗೆ ಇಂದು ನಾಯಕರುಗಳಾಗಿದ್ದಾರೆ. ಈ ನಾಯಕರುಗಳು ಯಾರಿಗೆ ಆದರ್ಶಪ್ರಾಯರಾದಾರು?  

ಶಾಲಾ ಕಾಲೇಜುಗಳಲ್ಲಿ ಅಭ್ಯಾಸ ನಡೆಸುತ್ತಿರುವ ವಿದ್ಯಾರ್ಥಿಗಳಿಗೆ ಹಾಗೂ ಈ ಸಮಾಜದಲ್ಲಿರುವ ಯುವ ಜನತೆಗೆ ಈ ಹಿರಿಯ ನಾಯಕರುಗಳು ಅಥವಾ ಅಧಿಕಾರಿಗಳು ಯಾವ ರೀತಿಯ ಮಾರ್ಗದರ್ಶನ ನೀಡುತ್ತಿದ್ದಾರೆ? ಕಿರಿಯ ಜನಾಂಗ ತಮ್ಮ ಭವಿಷ್ಯವನ್ನು ರೂಪಿಸಿಕೊಳ್ಳುವ ನಿಟ್ಟಿನಲ್ಲಿ ಇಂದು ಯಾರ ಆದರ್ಶವನ್ನು ಪಾಲಿಸಬೇಕು? ಶತಕಗಳ ಅಥವಾ ದಶಕಗಳ ಹಿಂದೆ ಇಂದಿನದಕ್ಕಿಂತ ತೀರ ಭಿನ್ನವಾದ ಅದ್ಯಾವುದೋ ಸಾಮಾಜಿಕ ವ್ಯವಸ್ಥೆಯ ನಡುವೆ ಜೀವಿಸಿ ಗತಿಸಿಹೋದವರ ಜೀವನಾದರ್ಶಗಳನ್ನಷ್ಟೇ ಪಾಲಿಸಬೇಕೇ? ಆದರ್ಶ ವ್ಯಕ್ತಿಗಳೇ ಸಿಗದ ವಾತಾವರಣ ಏಕೆ ನಿರ್ಮಾಣವಾಗುತ್ತಿದೆ?

ನಿಷ್ಠಾವಂತರೆಂಬ ಹೆಸರು ಗಳಿಸಿದ್ದವರೂ ದಿನಬೆಳಗಾಗುವಷ್ಟರಲ್ಲಿ ಬಣ್ಣ ಕಳಚಿಕೊಳ್ಳುತ್ತಿದ್ದಾರೆ. ನಿನ್ನೆಯ ತನಕ ಯಾರನ್ನು ತಮ್ಮ ಆದರ್ಶ ಎಂದು ಯುವ ಜನತೆ ಪರಿಗಣಿಸುತ್ತಿತ್ತೋ, ಆ ವ್ಯಕ್ತಿಗಳು ಇಂದು ಸಮಾಜದೆದುರು ತಮ್ಮ ಕುಕೃತ್ಯಗಳಿಂದಾಗಿ ನಗ್ನರಾಗುತ್ತಿದ್ದಾರೆ. ನೀತಿ ಪಾಠ ಮಾಡುವ ಮಾಧ್ಯಮ ಲೋಕದ ಧೀಮಂತ ವ್ಯಕ್ತಿತ್ವಗಳೂ ಈ ಧಂಧೆಯಲ್ಲಿ ಸಿಲುಕಿಕೊಂಡು ತಮ್ಮ ಭ್ರಷ್ಟ ಹಾಗೂ ಅನೈತಿಕ ಜೀವನದ ಮಗ್ಗುಲನ್ನು ಸಮಾಜಕ್ಕೆ ಪರಿಚಯಿಸುತ್ತಾ ಸಾಗುತ್ತಿವೆ.  ಸಾಹಿತಿಗಳಲ್ಲಿ ಯಾರಿಗಾದರೂ ಪ್ರಶಸ್ತಿ ನೀಡಿ ಗೌರವಿಸಿದರೆ, ಆ ಸಾಹಿತಿಯನ್ನು ಒಪ್ಪದ, ಸಾಹಿತಿಗಳದೇ ಇನ್ನೊಂದು ವರ್ಗ ಆ ಸಾಹಿತಿಯ ಅವಹೇಳನೆಗೆ ಮುಂದಾಗುತ್ತದೆ. ಪ್ರಶಸ್ತಿ, ಸನ್ಮಾನಗಳೆಂಬ ಗೌರವಗಳೆಲ್ಲಾ ಮಾರಾಟಕ್ಕಿಟ್ಟ ವಸ್ತುಗಳಂತಾಗುತ್ತಿವೆ. ರಾಜಕೀಯ ಪುಢಾರಿಗಳೂ ಇನ್ಯಾರೋ ಬರೆದುಕೊಟ್ಟ ಸಾಹಿತ್ಯವನ್ನು ತಮ್ಮದೆಂದು ಪ್ರಕಟಿಸಿ, ಅವಕ್ಕೂ ಪ್ರಶಸ್ತಿಗಿಟ್ಟಿಸಿಕೊಂಡು ಹೆಮ್ಮೆ ಪಡುತ್ತಾರೆ. ಸಾರಸ್ವತ ಲೋಕದಲ್ಲಿ ತಮ್ಮ ಹೆಸರಗಳನ್ನು ಅಮರಗೊಳಿಸಿದೆವೆಂದು ಬೀಗುತ್ತಾರೆ. ತಮ್ಮ ಬೆನ್ನುಗಳನ್ನು ತಾವೇ ತಟ್ಟಿಕೊಳ್ಳುತ್ತಾರೆ. ವಿದ್ಯಾಲಯಗಳಲ್ಲಿನ ಅಧ್ಯಾಪಕ ವೃಂದವೂ ದಿನಗಳೆದಂತೆ ತನ್ನ ಜವಾಬ್ದಾರಿಯನ್ನು ನಿರ್ವಹಿಸುವಲ್ಲಿ ವಿಫವಾಗುತ್ತಾ ಸಾಗಿದೆ. ಉತ್ತಮ ಬಾಳನ್ನು ಕಟ್ಟಿಕೊಡುವ ವಿದ್ಯೆ ನೀಡುವ ಬದಲು, ಉತ್ತಮ ಹಣಗಳಿಕೆಯ ನೌಕರಿ ಪಡೆಯುವುದಕ್ಕಾಗಿ, ಉತ್ತಮ ಅಂಕಗಳೊಂದಿಗೆ ಉತ್ತೀರ್ಣರಾಗುವುದಷ್ಟೇ ಪ್ರಾಮುಖ್ಯ ಎಂದು ಹೇಳಿಕೊಡುತ್ತಿವೆ. ಜೀವನದ ಅರ್ಥ, ಬರೀ ಅರ್ಥ ಗಳಿಕೆಯಲ್ಲಿಯೇ ಇದೆ ಎಂದು ಸಾರುತ್ತಿದೆ.   

ನೈತಿಕತೆ ಹಾಗೂ ಪ್ರಾಮಾಣಿಕತೆಯೊಂದಿಗೆ ಯಾವುದೇ ನೌಕರಿ ಮಾಡುವ ಅಥವಾ ಜೀವನ ಸಾಗಿಸುವ ಪರಿಸ್ಥಿತಿ ಈಗ ಬಹುಶಃ ಎಲ್ಲೂ ಇಲ್ಲ. ಭ್ರಷ್ಟರ ನಡುವೆ, ಅನೀತಿವಂತರ ನಡುವೆ, ತನ್ನತನವನ್ನು ಉಳಿಸಿಕೊಂಡು ಬಾಳುವವರ ಪಾಲಿಗೆ, ಉಸಿರುಗಟ್ಟಿಸಿಕೊಂಡು ಸಾಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗುತ್ತಿದೆ.

ಸಾಮಾಜಿಕ ಜಾಗೃತಿ ಮೂಡಿಸುವ ಪಣತೊಟ್ಟು ಮುಂದಾಳುತನ ಹೊತ್ತು ಸಾಗುವವರ ಮೇಲೇ ದಿನ ಬೆಳಗಾದರೆ ಹೊಸ ಹೊಸ ಆಪಾದನೆಗಳನ್ನು ಹೊರಿಸಿಯೋ, ಹಲ್ಲೆ ನಡೆಸಿಯೋ, ಅವರನ್ನು ಅವರ ಗುರಿಯಿಂದ ವಿಮುಖಗೊಳಿಸುವ ಪ್ರಯತ್ನ ಸದಾ ಸಾಗುತ್ತಿದೆ. ಇದಕ್ಕೆಲ್ಲ ಭ್ರಷ್ಟ ಪಟ್ಟಭದ್ರ ಹಿತಾಸಕ್ತಿಗಳೇ ಕಾರಣ ಎನ್ನುವುದೂ ಜಗಜ್ಜಾಹೀರು.

ಇದರಿಂದ ಯುವ ಜನತೆಗೆ ಒಮ್ಮೆಗೇ ಭ್ರಮ ನಿರಸನವಾದಂತಾಗಿದೆಯಾದರೆ ಆಶ್ಚರ್ಯವಿಲ್ಲ.  ರಾಜಕೀಯವೂ ಬೇಡ, ಸಾಮಾಜಿಕ ಸೇವೆಯೂ ಬೇಡ, ಸಾಹಿತ್ಯವೂ ಬೇಡ, ಯಾವ ಓದೂ ಬೇಡ. ನಾವು ನಮಗಿಷ್ಟ ಬಂದ ರೀತಿಯಲ್ಲಿ ಬದುಕೋಣ ಎಂಬ ನಿರ್ಧಾರ ತೆಗೆದುಕೊಳ್ಳುತ್ತಿದ್ದಾರೆ. “ಎಲ್ಲರೂ ಕಳ್ಳರೇ …  ಹಾಗಾಗಿ, ನಾವೂ ಕಳ್ಳರಾಗೋಣ; ಎಲ್ಲರೂ ಭ್ರಷ್ಟರೇ … ಹಾಗಾಗಿ, ನಾವೂ ಭ್ರಷ್ಟರಾಗೋಣ”. ಎನ್ನುವ ಮನಸ್ಥಿತಿಯನ್ನು ಯುವ ಜನತೆಯಲ್ಲಿ ತುಂಬುತ್ತಾ ಸಾಗುತ್ತಿದೆ ಈ ಸಮಾಜ.

ಹಾಗಾಗಿ  “ನಾವು ಯಾರನ್ನು ಹಿಂಬಾಲಿಸಬೇಕು… ಹಾಗೂ ಯಾರಿದ್ದಾರೆ ನಮಗೆ ಆದರ್ಶಪ್ರಾಯರು?” ಎಂದು  ಯುವ ಜನತೆ ಕೇಳುತ್ತಿರುವ ಈ ಪ್ರಶ್ನೆಗೆ ಉತ್ತರ ಯಾರಲ್ಲಿದೆ? ನಮ್ಮಲ್ಲಿದೆಯೇ ಅಥವಾ ನಿಮ್ಮಲ್ಲಿದೆಯೇ? 

4 Responses to ಯುವಜನತೆಗೆ ಯಾರಿದ್ದಾರೆ ಆದರ್ಶಪ್ರಾಯರು?

  1. K Venkatesh Karanth ಹೇಳುತ್ತಾರೆ:

    One must aware constantly himself before seeking or following leaders

  2. Parthasarathy Narasingarao ಹೇಳುತ್ತಾರೆ:

    ಆಸುರವರೆ
    ಮೇಲೆ ಶ್ರೀದರ್ ಹೇಳಿರುವದನ್ನು ಒಪ್ಪಬಹುದು
    ಜೊತೆಗೆ ನನಗೆ ಅನ್ನಿಸುವಂತೆ ಯುವಜನತೆ ಯಾವಾಗಲು ಅವರದೆ ಲೋಕದಲ್ಲಿರುತ್ತಾರೆ ಅವರು ಅವರ ಆದರ್ಶಗಳನ್ನು ಅವರ ಉಪದ್ಯಾಯರಲ್ಲೊ ಸಿನಿಮ ನಟರಲ್ಲೊ ಕ್ರಿಕೆಟ್ ನಲ್ಲೊ ಅವರ ಸ್ವಭಾವಕ್ಕೆ ತಕ್ಕಂತೆ ಕಂಡುಕೊಳ್ಳುತಾರೆ
    ಆದರೆ ನಿಜವಾದ ಮಾನಸಿಕ ಸಮಸ್ಯೆ ಎದುರಿಸುತ್ತಿರುವವರು ನಾವು ನೀವು ಎಂದೆ ನನಗೆ ಅನ್ನಿಸುತ್ತೆ. ಯಾವ ಕಡೆಯು ನೆಮ್ಮದಿ ತರುವ ಸುದ್ದಿಯಿಲ್ಲ, ಎಲ್ಲಡೆಯು ಹೊಲಸು , ನಿಜಕ್ಕು ನಮ್ಮ ನಿಮ್ಮ ಮನಗಳು ಅಂದರೆ ನಡುವಯಸ್ಸು ದಾಟುತ್ತಿರುವವರ ಮನಗಳು ಆತಂಕದಲ್ಲಿದೆ ನಮ್ಮ ಸಮಾಜದ ಆಗು ಹೋಗುಗಳ ಬಗ್ಗೆ

  3. hariharapurasridhar ಹೇಳುತ್ತಾರೆ:

    ನಿಮ್ಮ ಕಳಕಳಿ ಸರಿಯಾಗೇ ಇದೆ. ಆದರೆ ಈ ಕೆಳಗಿನ ಮಾತಿನಲ್ಲಿ ಸ್ವಲ್ಪ ತಿದ್ದುಪಡಿ ಸೂಕ್ತ

    “ಎಲ್ಲರೂ ಕಳ್ಳರೇ … ಹಾಗಾಗಿ, ನಾವೂ ಕಳ್ಳರಾಗೋಣ; ಎಲ್ಲರೂ ಭ್ರಷ್ಟರೇ … ಹಾಗಾಗಿ, ನಾವೂ ಭ್ರಷ್ಟರಾಗೋಣ”

    ಎಲ್ಲರೂ ಕಳ್ಳರೇ, ನಾವು ಸುಮ್ಮನಿರೋಣ. ಅಂತಾ ತುಂಬಾ ಜನರಿದ್ದಾರೆ. ಅದೇ ಆಗಿರುವ ತೊಂದರೆ. ಕಳ್ಲ ಕಾಕರೇ ಹೆಚ್ಚಿರುವಾಗ ಸತ್ಯವಂತರು ಮೌನವಾಗಿ ಬಿಡುತ್ತಾರೆ!!

    • Shama, Nandibetta ಹೇಳುತ್ತಾರೆ:

      “ಎಲ್ಲರೂ ಕಳ್ಳರೇ, ನಾವು ಸುಮ್ಮನಿರೋಣ. ಅಂತಾ ತುಂಬಾ ಜನರಿದ್ದಾರೆ. ಅದೇ ಆಗಿರುವ ತೊಂದರೆ. ಕಳ್ಲ ಕಾಕರೇ ಹೆಚ್ಚಿರುವಾಗ ಸತ್ಯವಂತರು ಮೌನವಾಗಿ ಬಿಡುತ್ತಾರೆ!!” This is true & dangerous…..

ತಮ್ಮ ಪ್ರತಿಕ್ರಿಯೆ ನೀಡಿ.

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Google photo

You are commenting using your Google account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s

%d bloggers like this: