ಯಾರನ್ನೂ ಕೇಳಲಾಗದು!

21 Jan 16

ಸಖೀ,
ನೀನು ಹೇಗಿರುವೆ ಎಂದು
ನಾನು ಬೇರೆ ಯಾರನ್ನೂ ಕೇಳಲಾಗದು,
ನಮ್ಮನ್ನು ಬಿಟ್ಟರೆ ಇನ್ನಾರಿಂದಲೂ
ನೀನು ಹೇಗಿರುವೆ ಎಂದು ಅರಿಯಲಾಗದು;

ನೀನು ನಕ್ಕರೂ ನಗುವಿನ ಹಿಂದಿನ
ನಿನ್ನ ನೋವನ್ನು ನಾನಷ್ಟೇ ಅರಿಯಬಲ್ಲೆ,
ನೀನು ಅತ್ತರೆ ನಿನ್ನ ಅಳುವಿನ ಹಿಂದಿನ
ನೋವಿನ ಆಳವನ್ನೂ ನಾನಷ್ಟೇ ಗ್ರಹಿಸಬಲ್ಲೆ!

‪#‎ಆಸುಮನ‬


ಕಂಗಳು ತುಂಬುವವೇಕೆ?

21 Jan 16

ಸಖೀ,
ನನ್ನ ಹಸ್ತದೊಳಗೆ ನಿನ್ನ ಹಸ್ತ ಇರಿಸಿದಾಗ
ನಮ್ಮ ಹೃದಯಗಳು ಕರಗುವವೇಕೆ?
ನಿನ್ನ ಕೆನ್ನೆಯ ಮೇಲೆ ಮುತ್ತನ್ನೊತ್ತುವಾಗ
ನಿನ್ನ ಕಂಗಳು ತುಂಬಿ ಬರುವವೇಕೆ?

‪#‎ಆಸುಮನ‬


ಅಳಿದ ಮೇಲೆ ಕೊಂಡಾಡುವರು!

14 Jan 16
ಸಖೀ,
ನಾವು ದೂರವಾಗಿದ್ದೇವೆಂಬ ಕೊರಗು ಇಲ್ಲ ಎಳ್ಳಷ್ಟೂ
ಇನ್ನೂ ಹತ್ತಿರವಾಗುತ್ತೇವೆ ಜನರು ದೂರ ಎಳೆದಷ್ಟೂ;
 
ಪ್ರೀತಿ ಹೆಚ್ಚಾಗುವುದಂತೆ ದೈಹಿಕ ದೂರ ಹೆಚ್ಚಾದಂತೆ
ನಾವು ಸತ್ತರೂ ಜಗದಲ್ಲಿ ನಮ್ಮ ಪ್ರೀತಿ ಅಮರವಂತೆ;
 
ಇಂದಾಡಿಕೊಳ್ಳುವವರು ನಾಳೆಯೂ ಆಡಿಕೊಳ್ಳುವರು
ತೆಗಳುವವರೂ ನಾವಳಿದ ಮೇಲೆ ಕೊಂಡಾಡುವರು!
 
#ಆಸುಮನ

ನೋವೇ ಇಲ್ಲ!

14 Jan 16
ಸಖೀ,
ದುಃಖವನು ತುಂಬಿಕೊಂಡು ಭಾರವಾಗಿಹುದು ಹೃದಯ
ಆದರೂ ಕಣ್ಣುಗಳು ಹೂಡಿವೆ ಸಂಪು, ಹರಿಸವು ಹನಿಯ;

ಯಾರತ್ತಲೋ ಹೂಡಿದ ಬಾಣ ತಾಕಿದ್ದು ನನ್ನ ಎದೆಯನ್ನು
ನೋವಿಗೂ ಮಿತಿ ಇದೆ, ನೋವೇ ಆದ ಹಾಗಿಲ್ಲ ನನಗಿನ್ನೂ!

‪#‎ಆಸುಮನ‬


ಪುರುಸೊತ್ತಿಲ್ಲ!

14 Jan 16

ಸಖೀ,
ನಿನ್ನೊಳಗೆ ಇರುವಷ್ಟೇ ಕೊರಗು ಇಲ್ಲಿ ನನ್ನೊಳಗೂ ಇದೆ,
ಬಿಡುವಿಲ್ಲದ ದಿನಚರಿಯಿಂದ ಈ ಮನ ರೋಸಿ ಹೋಗಿದೆ,

ಯಾವುದರ ನಿರೀಕ್ಷೆ, ಎತ್ತ ಈ ಪಯಣ ಅರಿಯದಾಗಿದೆ,
ಮಾತುಕತೆಯಿಲ್ಲ ಸಂಪರ್ಕ ಸಂದೇಶಕ್ಕೆ ಸೀಮಿತವಾಗಿದೆ,

ಸಂದೇಶಗಳ ರವಾನೆಗೂ ಸಾಕಷ್ಟು ಪುರುಸೊತ್ತು ದಕ್ಕುತ್ತಿಲ್ಲ,
ಎಲ್ಲಾದರೂ ಹೋಗೋಣ ಎಂದು ಮನ ಅನ್ನುತಿಹುದಲ್ಲಾ?

ಅಂಟಿಕೊಂಡಿದ್ದಷ್ಟೂ ಅಂಟಾಗುತ್ತದೆ ಬಿಡಿಸಿಕೊಳ್ಳಲು ಕಷ್ಟ,
ಹೇಳಿಬಿಡು ನೋಡೋಣ ನಿನ್ನ ಮನಸಿಗೆ ಯಾವುದು ಇಷ್ಟ!

‪#‎ಆಸುಮನ‬


ನದಿಯಂತೆ ಬಾಳು!

08 Jan 16

ಸಖೀ,
ನದಿಯ ಹಾಗೆಯೇ ಇದೆ ನಮ್ಮೀ ಬಾಳು
ಆತನನು ಸೇರುವವರೆಗೂ ದಿನಾ ಗೋಳು,

ಹತ್ತಾರೂರು ಗುಡ್ಡ ಕಣಿವೆಗಳನು ಸುತ್ತಾಡಿ
ಆತನನೇ ಸೇರುವುದೀ ದೇಹಾತ್ಮದ ಜೋಡಿ;

ದೇಹವ ತೊರೆದಾತ್ಮ ಪರಮಾತ್ಮನಲಿ ಲೀನ,
ಮಣ್ಣಿನ ಈ ದೇಹ ಮತ್ತೆ ಮಣ್ಣಲ್ಲೇ ವಿಲೀನ;

ಹುಟ್ಟು ಸಾವಿನ ನಡುವೆ ಬರಿಯ ಹಾರಾಟ
ಫಲವ ತಿನ್ನಲಾಗದಿದ್ದರೂ ಸದಾ ಹೋರಾಟ!

‪#‎ಆಸುಮನ‬


ಸೆಲ್ಫೀ!

08 Jan 16

ಸಖೀ,
ಸದಾ ನಿನ್ನನ್ನೇ ಹಿಂಬಾಲಿಸುತ್ತಿರುವ ನನಗೆ
ನನ್ನ ಗೋಜೂ ಇರುವುದಿಲ್ಲ ಒಮ್ಮೊಮ್ಮೆ,

ನನ್ನತ್ತ ನಾನೇ ಗಮನಹರಿಸಿಕೊಳ್ಳಲೆಂದೇ
“ಸೆಲ್ಫೀ”ಯ ಮೊರೆಹೋಗುವೆ ಕೆಲವೊಮ್ಮೆ!

‪#‎ಆಸುಮನ‬


Follow

Get every new post delivered to your Inbox.

Join 65 other followers