ಅಮ್ಮನಿಲ್ಲದ ಒಂದು ವರುಷ!

ಕೈತುತ್ತು ನೀಡುವ ಅಮ್ಮನಿರಲು ನಮ್ಮ ಈ ಮನೆಯೇ ಸ್ವರ್ಗದಂತೆ
ನಮ್ಮಮ್ಮನಿಗೆ ಮಾತ್ರ ವರುಷದಿಂದೀಚೆಗೆ ಸ್ವರ್ಗವೇ ಮನೆಯಂತೆ!

ಕಳೆದ ವರುಷದ ಮಾರ್ಚ್ ಒಂದರ ಮುಂಜಾನೆ, ಐದು ಐದೂವರೆಯ ಸುಮಾರಿಗೆ ಕೆಟ್ಟ ಕನಸು. ಕೈಕಾಲು ಜೋರಾಗಿ ಹೊಡೆದುಕೊಳ್ಳುತ್ತಿದ್ದೆ. ಯಾರೋ ಹಿಡಿದೆಳೆಯುತ್ತಿದ್ದ ಅನುಭವ.

ನನ್ನಾಕೆ ನನ್ನನ್ನು ನಿದ್ದೆಯಿಂದ ಎಬ್ಬಿಸಿ ಕೂರಿಸದೇ ಇದ್ದರೆ, ಬಹುಶಃ ಏನಾಗುತ್ತಿತ್ತೋ ದೇವರಿಗೇ ಗೊತ್ತು.

ಏನೋ ಕೆಟ್ಟ ಕನಸು ಅನ್ನುವ ನಂಬಿಕೆಯೊಂದಿಗೆ ಮಾಮೂಲು ದಿನಚರಿಯನ್ನು ಮುಂದುವರಿಸಿದೆವು. ಏಳು ಘಂಟೆಯಾಗುವಷ್ಟರಲ್ಲಿ ಊರಿನಿಂದ ನನ್ನ ತಮ್ಮನ ಪತ್ನಿಯಿಂದ ಕರೆ ಬಂತು.

ಎಲ್ಲರೂ ಮುಂಜಾವಿನ ದಿನಚರಿಯಲ್ಲಿ ವ್ಯಸ್ತವಾಗಿರುವ ಆ ಹೊತ್ತಿನಲ್ಲಿ ಕರೆಯ ನಿರೀಕ್ಷೆ ಇರುವುದೇ ಇಲ್ಲ. ಆ ಹೊತ್ತಲ್ಲದ ಹೊತ್ತಿನಲ್ಲಿ ಕರೆ ಬಂದಾಗಲೇ, ನನ್ನ ಕೈನಡುಗಲು ತೊಡಗಿತ್ತು. ಫೋನ್ ಕೈಗೆತ್ತಿಕೊಂಡು, ಅರೆಕ್ಷಣದಲ್ಲಿ ಅರಿವಾಗಿತ್ತು. ನನ್ನ ಆ ಕನಸಿಗೆ ಅರ್ಥ ಕಂಡುಕೊಂಡಿದ್ದೆ.

ಕೂಡಲೇ ಹೊರಟರೂ, ಸೋದರಳಿಯ ಹಾಗೂ ಅಕ್ಕನವರನ್ನು ಸೇರಿಕೊಂಡು ಊರು ತಲುಪುವಾಗ ಸಾಯಂಕಾಲವಾಯ್ತು.

ಮಾರನೇ ಮುಂಜಾನೆ ಸ್ನಾನ ಮಾಡಿಸುವಾಗ, ನೀರಿನ ಬಿಸಿ ತಾಗಿ ಅಮ್ಮ ಎದ್ದು ಕೂರಲಿ ಎಂಬಾಸೆ. ಚಿತೆಯ ಜ್ವಾಲೆಗಳು ಆಕಾಶದತ್ತ ನಾಲಿಗೆ ಚಾಚಿದಾಗ, ಇನ್ನೊಮ್ಮೆ, ಆ ಬಿಸಿಗೆ ಎದ್ದು ಕೂರುತ್ತಾರೆ ಅನ್ನುವ ಆಸೆ ಮನದೊಳಗೆ. ಆದರೆ ಅಮ್ಮ ಏಳಲೇ ಇಲ್ಲ. ವಿಚಿತ್ರ ಸದ್ದಿನೊಂದಿಗೆ, ತಲೆಯ ಚಿಪ್ಪು ಒಡೆದು ಹೋದಾಗ, ಕಣ್ಣೀರ ಕೋಡಿ ಹರಿದು ನನ್ನ ಪಾದಗಳನ್ನು ತೋಯಿಸತೊಡಗಿತ್ತು.

ಚಿತೆಯತ್ತ ನನ್ನ ಚಿತ್ತ ಹರಿದಾಗ, ನನ್ನ ಮಗಳತ್ತ ಮನಸ್ಸು ಎಳೆಯುತ್ತಿತ್ತು.

ಉಳಿದುಬಿಟ್ಟೆ.

ಅಮ್ಮ, ಇನ್ನು ಸಾಕು, ಬಂದು ಬಿಡಿ, ವರುಷವಾಯ್ತು ಅಲ್ಲಿ.

ನನಗೂ ಸಾಕಾಗಿದೆ ಇಲ್ಲಿ…

ಪುಸ್ತಕ ಬೇಡ ಅಂತಾಳೆ!

“ಸಖೀ,
ನನ್ನ ಕತೆ ಕವಿತೆಗಳ ಪುಸ್ತಕಗಳ 
ಪ್ರಕಟಿಸಬೇಕೆಂದಿರುವೆ ಹೇಳು
ಈ ಬಗ್ಗೆ ನಿನ್ನ ಅಭಿಪ್ರಾಯವೇನು?”

“ರೀ, ನಿಮ್ಮ ದಮ್ಮಯ್ಯ ಹಾಕ್ತೀನಿ
ಆ ಕೆಲಸ ಬೇಡ, ಸುಮ್ಮನಿರಿ ನೀವು 
ಅನ್ನುವ ಸಲಹೆ ನೀಡುವೆ ನಾನು,
ಪುಸ್ತಕ ಬರೆದು, ಪ್ರಶಸ್ತಿ ಗಿಟ್ಟಿಸಿಕೊಂಡು
ಬುದ್ಧಿಜೀವಿಗಳಾಗಿ ದಿನ ಬೆಳಗಾದರೆ
ಎಲ್ಲರಿಂದ ಬೈಸಿಕೊಳ್ಳುತ್ತಿರುವುದನ್ನು 
ಕೇಳಿ ಕೇಳಿ ಸುಸ್ತಾಗಿದ್ದೇನೆ, ಒಂಥರಾ
ಭಯಭೀತಳಾಗಿದ್ದೇನೆ ಕಣ್ರೀ ನಾನು!”

ಬಜೆಟ್ ಚುಟಕಗಳು!

ಬಲೂನು-ಪಂಚೆ!

ಸಖೀ, ಎರಡು ತಿಂಗಳಿನಿಂದೀಚೆಗೆ ಬಜೆಟ್ ಎಂಬ ಆ ಬಲೂನಿಗೆ ಗಾಳಿ ತುಂಬಿಸುತ್ತಾ ಇದ್ದರಂತೆ,
ಇಂದು ಆ ಬಲೂನಿನ ಗಾಳಿ ಒಮ್ಮೆಗೇ ಹೊರಬಂದ ರಭಸಕ್ಕೆ ಸಡಿಲಾದ ಪಂಚೆ ಹಾರಿಹೋದಂತೆ!

*******

ತೆರಿಗೆ – ಚೆರಿಗೆ!

“ಸಖೀ, ಮನೆಗಾಗಿ ಸಾಲ ಮಾಡೋಣ, ಕಟ್ಟುವ ಬಡ್ಡಿಗೆ ನೀಡಬೇಕಾಗಿಲ್ಲ ತೆರಿಗೆ”
“ರೀ… ಆದರೆ ಏರಿರುವ ಬೆಲೆಗಿನ್ನು ಖಾಲಿ ಹೊಟ್ಟೆಯೊಂದಿಗೆ ಮನೆಯಲ್ಲಿನ ಚೆರಿಗೆ!”

ದೀಪದ ಕೆಳಗೆ ಕತ್ತಲು!

ತನಗರ್ಥವಾಗದ ಆಂಗ್ಲ ಸಿನೇಮಾ ನೋಡಿದ ಪ್ರೇಕ್ಷಕನೋರ್ವ, 
ತನ್ನಿಂದರಿಯಲಾಗದ ತನ್ನೂರಿನ ಜಾನಪದವನ್ನು ದೂರಿದಂತೆ;

ಸುಗಂಧ ದ್ರವ್ಯದಿಂದ ಘಮಿಸುವ ಸ್ನೇಹಿತೆಯ ತೆಕ್ಕೆಯಲ್ಲಿರುವಾತ,
ಹೊಗೆವಾಸನೆ ತುಂಬಿದ ಸೀರೆ ಸುತ್ತಿಕೊಂಡಬ್ಬೆಯ ದೂಷಿಸಿದಂತೆ!

ಹಿಂದೂ ಸಂಸ್ಕೃತಿ ಹಾಗೂ ಸಮಾಜದ ಬಗ್ಗೆ ಈರ್ವರು ಮಹಾನುಭಾವರದೆಂದು ಉಲ್ಲೇಖಿಸಲಾಗಿರುವ ಈ ಕೆಳಗಿನ ಮಾತುಗಳನ್ನು  ಓದಿದಾಗ ನನಗೆ ಅನಿಸಿದ್ದು ಹೀಗೆ.

‘‘ಹಿಂದೂ ಸಮಾಜ ಅಸಮಾನತೆಯ ತವರು. ಅದು ಏಣಿ ಇಲ್ಲದ ಪ್ರವೇಶ ದ್ವಾರವಿಲ್ಲದ ಅನೇಕ ಮಹಡಿಗಳುಳ್ಳ ಗೋಪುರ. ಒಂದು ಮಹಡಿಯಲ್ಲಿ ಹುಟ್ಟಿದ ಜನ ಅಲ್ಲಿಯೇ ಸತ್ತು ಕೊಳೆಯಬೇಕು’’
_ಡಾ.ಬಿ.ಆರ್. ಅಂಬೇಡ್ಕರ್

ಹಿಂದೂ ಎಂದರೆ ಇದಲ್ಲೇ ಬಿದ್ದಿರು ಎಂದೇ ಅರ್ಥ.
_ದೇವನೂರ ಮಹಾದೇವ

ನಾನಲ್ಲದ ನಾನು ಸ್ವೀಕೃತನೇ ನಿನಗೆ?

ಸಖೀ,
ಪ್ರಶ್ನೆಗಳನ್ನು ಕೇಳಿ ಕಾಯುತ್ತಿರಬೇಡ ಉತ್ತರಗಳಿಗಾಗಿ ನೀನು
ನಿನ್ನ ಪ್ರಶ್ನೆಗಳಿಂದ ಬೇಸತ್ತು ಬೆರಗಾಗಿ ನಿರುತ್ತರನೀಗ ನಾನು

ನಿನ್ನ ಪ್ರಶ್ನೆಗಳಿಂದ ಕಡಿದಂತಾಗುತ್ತಿದೆ ನನ್ನ ಯೋಚನಾಲಹರಿ
ನನ್ನ ಸೃಜನಶೀಲತೆಯ ಕಾದಿರಿಸುವುದು ನಿನ್ನದೇ ಜವಾಬ್ದಾರಿ

ಬರೆಯದೇ ಉಳಿದರೆ ನಾನು ನಾನಾಗಿ ಉಳಿಯಲಾರೆ ಕೇಳು
ನಾನಲ್ಲದ ನಾನು ನಿನಗೆ ನಿಜವಾಗಿಯೂ ಸ್ವೀಕೃತನೇ ಹೇಳು!

ಅಧರಗಳಿಂದ ಸ್ಪರ್ಶಿಸು ನೀನು!

(ಇದು ಹಿಂದೀ ಗೀತೆಯ ಭಾವಾನುವಾದದ ಯತ್ನ)

ನಿನ್ನಧರಗಳಿಂದ ಸ್ಪರ್ಶಿಸಿ ನೀನು
ನನ್ನ ಗೀತೆಯನಮರಗೊಳಿಸು
ನನ್ನ ಸಂಗಾತಿಯಾಗಿ ಬಂದು ನೀ
ನನ್ನ ಒಲವನ್ನು ಅಮರಗೊಳಿಸು

ವಯಸ್ಸಿನ ಹಂಗು ಇಲ್ಲದಿರಲಿ
ಜಾತಿಯ ಬಂಧನವೂ ಇಲ್ಲದಿರಲಿ
ಪ್ರೀತಿ ಮಾಡುವವರು ಕೇವಲ
ಮನಗಳನ್ನಷ್ಟೇ ಅರಿತುಕೊಂಡಿರಲಿ
ಒಂದು ಹೊಸ ರೀತಿಗೆ ನಾಂದಿ ಹಾಡಿ
ನೀನೀ ರೀತಿಯನ್ನೇ ಅಮರಗೊಳಿಸು

|| ನಿನ್ನಧರಗಳಿಂದ ಸ್ಪರ್ಶಿಸಿ ನೀನು
ನನ್ನ ಗೀತೆಯನಮರಗೊಳಿಸು||

ಆಗಸದ ನೀರವತೆ ತುಂಬಿಹುದು 
ನನ್ನೀ ಏಕಾಂಗಿ ಮನದಲ್ಲಿ
ಗೆಜ್ಜೆಗಳ ಸದ್ದಿನೊಂದಿಗೆ ಬಾ
ನೀನು ನನ್ನ ಈ ಜೀವನದಲ್ಲಿ
ನಿನ್ನುಸಿರನ್ನು ನೀಡಿ ನೀನು ಈ
ಸಂಗೀತವನು ಅಮರಗೊಳಿಸು
ಸಂಗೀತವನು ಅಮರಗೊಳಿಸು
ನನ್ನ ಗೀತೆಯನಮರಗೊಳಿಸು!

ನನಗೆ ಪ್ರಿಯವೆನಿಸಿದ್ದನ್ನು ನನ್ನಿಂದ
ಈ ಜಗವೇ ಕಸಿದುಕೊಂಡಿಹುದು
ಎಲ್ಲರೂ ನನ್ನಿಂದಾಗಿ ಜಯಿಸಿದರು
ಸೋಲಷ್ಟೇ ನನ್ನ ಪಾಲಿಗುಳಿದಿಹುದು
ನೀನಾದರೂ ನಿನ್ನ ಮನಸೋತು
ನನ್ನ ಗೆಲುವನ್ನು ಅಮರಗೊಳಿಸು
ನೀನಾದರೂ ನಿನ್ನ ಮನಸೋತು
ನನ್ನ ಗೆಲುವನ್ನು ಅಮರಗೊಳಿಸು

|| ನಿನ್ನಧರಗಳಿಂದ ಸ್ಪರ್ಶಿಸಿ ನೀನು
ನನ್ನ ಗೀತೆಯನಮರಗೊಳಿಸು||

 

ಮೂಲ ಗೀತೆ:

ನನ್ನಿಂದ ಬಾಳಲಾಗದು!

ನೀನಿಲ್ಲದೇ ನನ್ನಿಂದ ಬಾಳಲಾಗದು
ನಿನ್ನ ಪ್ರೀತಿಯಲಿ ನಾ ಬೇಯುತಿರುವೆ
ನಿನ್ನ ನಿರೀಕ್ಷೆಯಲೇ ಕಾದು ಕೂತಿರುವೆ
ಯಾರಲ್ಲೂ ದುಗುಡವ ಹೇಳಲಾಗದು
ನೀನಿಲ್ಲದೇ ನನ್ನಿಂದ ಬಾಳಲಾಗದು

ನನ್ನೊಲವು ನಿನ್ನನ್ನು ಹುಡುಕುತಿಹುದು
ಸಂಗಾತಿ ನೀನೆಲ್ಲಿರುವೆ ಎನ್ನುತಿಹುದು
ನನ್ನ ಕಣ್ಣೀರೇ ಇಲ್ಲಿ ಕವನವಾಗಿಹುದು
ನನ್ನ ನಿಟ್ಟುಸಿರೇ ಸಂಗೀತವಾಗಿಹುದು
ನೀನಿಲ್ಲದೇ ನನ್ನಿಂದ ಬಾಳಲಾಗದು

ಮನವ ಕಾಡುತಿಹವು ನಿನ್ನ ನೆನಪುಗಳು
ರಾತ್ರಿ ಕಳೆದರೂ ನಿದಿರೆ ಸುಳಿಯದಿಹಳು
ವಿರಹದಲಿ ನೊಂದು ನಾ ಕಾಯುತಿರುವೆ
ಈ ಕಂಗಳೆರಡು ದೀಪವಾಗಿ ಬೆಳಗುತಿವೆ
ನಿನ್ನ ಪ್ರೀತಿಯಲಿ ನಾ ಬೇಯುತಿರುವೆ
ನಿನ್ನ ನಿರೀಕ್ಷೆಯಲೇ ಕಾದು ಕೂತಿರುವೆ
ಯಾರಲ್ಲೂ ದುಗುಡವ ಹೇಳಲಾಗದು
ನೀನಿಲ್ಲದೇ ನನ್ನಿಂದ ಬಾಳಲಾಗದು

ನನ್ನಾಸೆಯಾಗಸದ  ನಕ್ಷತ್ರಗಳು ಮರೆಯಾಗಿವೆ
ನಿನ್ನ ದ್ವಾರವನೀ ಕಾಲ್ಗಳು ಸೇರದೇ ಉಳಿದಿವೆ
ನನ್ನವರೆಂಬವರು ಯಾರೂ ಇಲ್ಲ ಈಗ ನನಗೆ
ತೀರ ದೂರವಿದೆಯೆನುತಿದೆ ದೋಣಿಯೇ ನನಗೆ
ನಿನ್ನ ಪ್ರೀತಿಯಲಿ ನಾ ಬೇಯುತಿರುವೆ
ನಿನ್ನ ನಿರೀಕ್ಷೆಯಲೇ ಕಾದು ಕೂತಿರುವೆ
ಯಾರಲ್ಲೂ ದುಗುಡವ ಹೇಳಲಾಗದು
ನೀನಿಲ್ಲದೇ ನನ್ನಿಂದ ಬಾಳಲಾಗದು

 https://www.youtube.com/watch?v=sA1FzaqFBKQ

ಮಿಡಿವ ಹೃದಯ ಸಾಕು!

ಸಖೀ,
ಪಟ್ಟಿ ಮಾಡುತ್ತಾ ಹೋದರೆ
ಸಿಗುತ್ತಿರುತ್ತವೀ ಬದುಕನ್ನು
ಒಮ್ಮೆಗೇ ಕೊನೆಗಾಣಿಸಲು
ಇಲ್ಲಿ ನೂರಾರು ಕಾರಣಗಳು;

ಒಲವಿನಿಂದ ಮಿಡಿವ ಒಂದು 
ಹೃದಯ ಇದ್ದರೆ ಸಾಕು ನಾವು
ಹೀಗೆ ಮುಂದುವರಿಸಿಕೊಂಡು
ಹೋಗಲು ನಮ್ಮ ಈ ಬಾಳು!

ಯಾಕಿಷ್ಟವೋ?

ಸಖೀ,
ಹುಸಿ ಮುನಿಸಿನಿಂದ
ಒಣ ಸಿಡುಕಿನಿಂದ
ದೂರವಾದಂತಿದ್ದ
ಅಂದಿನ ದಿನಗಳಲ್ಲಿ,
ನಗು ಮಾತಿನಿಂದ
ಸೆಳೆವ ಒಲವಿನಿಂದ
ಹತ್ತಿರವಾದಂತಿರುವ
ಇಂದಿನ ದಿನಗಳಲ್ಲಿ,
ಅದೇನು ಅಂತರವೋ
ಯಾಕೆಮಗಷ್ಟಿಷ್ಟವೋ?

ಏಕಿದೆ ಈ ವರ್ತಮಾನ?

ಸಖೀ,
ಅದೇಕೋ ಈ ಜೀವನವೇ ಕನಸಿನಂತೆ ಕಾಡುತ್ತಲಿದೆ ನನ್ನನ್ನು
ಎಚ್ಚರದಲ್ಲಿರುವಾಗಲೇ ಬೆಚ್ಚಿಬೀಳುತ್ತೇನೆ ಕಂಡಂತೆ ಕನಸನ್ನು

ಎಲ್ಲವೂ ನಡೆಯುತ್ತದೆ ಸೊಗಸಾಗಿ ನನಸಾಗಿ ಈ ಜೀವನದಲ್ಲಿ
ಮರುಕ್ಷಣ ಎಲ್ಲವೂ ಭಯಾನಕವಾಗಿ ಭಯ ತುಂಬುತ್ತದೆದೆಯಲ್ಲಿ

ನಂಬಿಕೆಯ ಮೇಲೆ ಕಟ್ಟಿದ ಸ್ನೇಹಸೌಧಗಳು ಕುಸಿದು ಬೀಳುತ್ತಿವೆ
ಬಾಂಧವ್ಯಗಳಾರ್ಥಿಕತೆಯನವಲಂಬಿಸಿ ಅರ್ಥಹೀನವಾಗುತ್ತಿವೆ

ಮುಂದಡಿಯಿಡಲು ತಯಾರಾದಾಗ ಭೂತಗಳೆನ್ನನೆಳೆಯುತ್ತವೆ
ಭೂತಕ್ಕೆ ಮರಳಲೇ, ಜವಾಬ್ದಾರಿಗಳೆನ್ನ ಭವಿಷ್ಯಕ್ಕೆ ತಳ್ಳುತ್ತಲಿವೆ

ಭೂತ ಭವಿಷ್ಯಗಳ ನಡುವೆನ್ನ ವರ್ತಮಾನ ಅಸುನೀಗುತ್ತಿದೆಯೇ
ನಾನಸುನೀಗಿದ ಮೇಲೆ ಉಳಿಸಿಹೋಗಲೀ ವರ್ತಮಾನವಿದೆಯೇ