ಮರೆಯಬೇಕು ಕೆಟ್ಟ ಗಳಿಗೆಗಳ!!!

22 ಜುಲೈ 09
ಸಖೀ,

ನಗುವುದಕೇ
ನಕ್ಕು ನಗಿಸುವುದಕೇ
ಸಮಯ ಸಾಲದಿರುವಾಗ
ದುಡುಕು ಬಿಗುಮಾನಗಳಲೇಕೆ
ವ್ಯರ್ಥ ವ್ಯಯಿಸುವೆ ಜೀವನದ
ಈ ಅಮೂಲ್ಯ ಕ್ಷಣಗಳನು

ಮರೆತು ಬಿಡು ವ್ಯಥೆಯ
ನಿನ್ನೆಯ ಆ ಹಳೆ ಕತೆಯ

ಮರೆತಿಲ್ಲವೇ ಆ ಸೂರ್ಯ
ಗ್ರಹಣ ಹಿಡಿಸಿದ ಚಂದ್ರನನು

ಕ್ಷಮಿಸಿ ಬೆಳಗುತಿಲ್ಲವೇ ತನ್ನ
ಪ್ರಭೆಯಿಂದಲೇ ಆತನನು

ಮರೆತಿಲ್ಲವೇ ಆ ಶಶಿ
ಸೂರ್ಯನಿಗೆ ಅಡ್ಡ
ನಿಂತಿದ್ದ ಭೂಮಿಯನು

ಚೆಲ್ಲುತಿಲ್ಲವೇ ಸದಾ
ಭೂಮಿಯುದ್ದಗಲಕೂ
ಬೆಳದಿಂಗಳನು

ಮರೆಯಬೇಕು
ಕೆಟ್ಟ ಗಳಿಗೆಗಳ
ದುಃಖದ ಕತೆಗಳ

ಮನ್ನಿಸಬೇಕು
ಮನ್ನಿಸಿ ಬೆರೆಯಬೇಕು

ರಾತ್ರಿ ಕಳೆದ ಮೇಲೆ
ಬೆಳಕು ಹರಿಯುವಂತೆ
ದುಃಖವದು ಅಳಿದ ಮೇಲೆ
ಸುಖದ ಆಗಮನವಂತೆ
*-*-*-*-*-*-*-*