ಸಂದೇಶ ತಿನ್ನಿ!

12 ಆಗಸ್ಟ್ 12

 

ಅಕ್ಕಿ, ಗೋಧಿ 
ಸಕ್ಕರೆ, ಎಣ್ಣೆ 
ಬೇಳೆಗಳ
ಬೆಲೆಗಳು
ಗಗನಕ್ಕೇರಿ 
ಸಿಗದಿದ್ದರೆ
ಏನಂತೆ ಕೈಗೆ,

ಸರಕಾರ
ನೀಡಲಿದೆಯಂತೆ 

ಮೊಬೈಲು
ಪ್ರತಿ ಮನೆಗೆ,

ಬೇಕೆಂದಾಗ
ಹುಸಿ ಕರೆಯ
ಮಾಡಿಕೊಂಡಿದ್ದು
ಮೂರು ಹೊತ್ತೂ
ಹೊಸ ಹೊಸ 
ಸಂದೇಶಗಳನ್ನು
ತಿನ್ನಿ, ತಿನ್ನಿಸಿ
ಮಂದಿಗೆ!
******

 


ಈ ರಾಜ್ಯದ ಸಂಸತ್ ಸದಸ್ಯರಲ್ಲಿ ನಂದೊಂದು ಬಿನ್ನಹ!

15 ಆಕ್ಟೋ 10

ರಾಜ್ಯದ ಸಂಸತ್ ಸದಸ್ಯರಲ್ಲಿ ನನ್ನದೊಂದು ಬಿನ್ನಹ, ನಮ್ಮೆಲ್ಲರ ಶಾಂತಿಗಾಗಿ,
ನಮ್ಮನ್ನು ಇಲ್ಲಿ ನಮ್ಮಷ್ಟಕ್ಕೆ ಬಿಟ್ಟು, ದೆಹಲಿಯಲ್ಲೇ ಕೆಲಸಮಾಡಿ ಈ ರಾಜ್ಯಕ್ಕಾಗಿ;

ರಾಜ್ಯದಲ್ಲಿ ನಾವು ಆರಿಸಿ ಕೂರಿಸಿರುವ ಸರಕಾರ ಇರುವುದು ನಮ್ಮೆಲ್ಲರಿಗಾಗಿ,
ಆ ಸರಕಾರ ತನ್ನ ಅವಧಿ ಪೂರ್ತಿ ಕೆಲಸಮಾಡಲು ಬಿಡಿ, ರಾಜ್ಯದ ಏಳಿಗೆಗಾಗಿ;

ದಿನ ಬೆಳಗಾದರೆ, ಹೊಸ ಹೊಸ ಕೀಟಲೆ ಕೊಡುವುದನ್ನು ಇನ್ನಾದರೂ ನಿಲ್ಲಿಸಿ,
ಈ ನಾಡಿನ ಜನತೆಯ ಶಾಂತಿಗಾಗಿ, ನೀವೂ ದಯವಿಟ್ಟು ಕೊಂಚ ಸಹಕರಿಸಿ;

ರೋಸಿ ಹೋಗಿದ್ದಾರೆ ಜನತೆ, ನಿಮ್ಮ ಈ ಪುರುಸೊತ್ತಿನ ದೊಂಬರಾಟಗಳಿಂದ,
ನಿಮಗಾದರೆ ಅದುವೇ ಕಾಯಕ, ನಮಗೆ ದಿನವೂ ಬರೀ ಕಿರಿಕಿರಿ ಅವುಗಳಿಂದ;

ಕಳೆದ ಎರಡೂವರೆ ವರ್ಷಗಳಲ್ಲಿ ನಾವು ಅನುಭವಿಸಿದ್ದು, ನಿಜಕ್ಕೂ ನಿಮ್ಮಿಂದಾಗಿ,
ನಿಮ್ಮನ್ನು ಆರಿಸಿದ್ದು ದೆಹಲಿಯಲ್ಲಿ ಕಾರ್ಯ ಮಾಡಲು, ನಮ್ಮ ಪ್ರತಿನಿಧಿಗಳಾಗಿ;

ಕೆಲಸವಿಲ್ಲದ ಆಚಾರಿ ಮಗುವಿನ ಅಂಡನ್ನು ಕೆತ್ತಿದನೆಂಬುದು ಹಳೇ ಗಾದೆಮಾತು,
ನೀವು ಆಡಿದ ಆಟವೂ ರಾಜ್ಯಕ್ಕೆ ಬಲು ನಷ್ಟಮಾಡಿದೆ, ಇದೂ ಸತ್ಯವಾದ ಮಾತು;

ಏನೂ ಅಭಿವೃದ್ಧಿಯಾಗಿಲ್ಲ ಎನ್ನುವುದಕ್ಕೆ ಮೊದಲು, ಮಾಡಲು ಬಿಟ್ಟಿದ್ದೀರಾ ಹೇಳಿ,
ನಿಮ್ಮ ತಂತ್ರಗಳಿಗೆ ಪ್ರತಿತಂತ್ರ ಹೂಡುವುದರಲ್ಲೇ ಕಾಲ ಕಳೆದು ಹೋಯ್ತು ಕೇಳಿ;

ನೀವು ಹೀಗೇ ಆಡುತ್ತಿದ್ದರೆ, ನಿಮ್ಮೆಲ್ಲರ ಭವಿಷ್ಯವನ್ನೂ ಈ ಜನರೇ ನಿರ್ಧರಿಸುತ್ತಾರೆ,
ಇಂದಿನ ಸದಸ್ಯತ್ವ ಖಾಯಂ ಅಲ್ಲ, ಮುಂದಿನ ಬಾರಿ ನಿಮ್ಮನ್ನೂ ಸೋಲಿಸುತ್ತಾರೆ!
*********


ಮಾನ್ಯ ಯಡ್ಯೂರಪ್ಪನವರಿಗೊಂದು ಕಿವಿಮಾತು!

13 ಜುಲೈ 10

ಇದ್ಯಾವ ಮೋಹದ ಮಾಯೆ ನಿಮ್ಮನ್ನಾವರಿಸಿದೆ ಯಡ್ಯೂರಪ್ಪನವರೇ?

ನಿಮ್ಮನ್ನು ನೀವೇ ಈ ರೀತಿ ಬಲಿಕೊಡುತ್ತಿರುವುದೇಕೆ ಹೇಳಲಾರಿರೇ?

 

ಮೂರ್ನಾಲ್ಕು ದಶಕಗಳ ಹೋರಾಟದ ಆ ನಿಮ್ಮ ರಾಜಕೀಯ ಜೀವನ

ಗಣಿಧೂಳಿನೊಂದಿಗೆ ಬೆರೆತು ಮರೆಯಾಗುವುದ ಕಾಣದೇ ನಿಮ್ಮ ಕಣ್ಮನ?

 

ಯುವ ಪ್ರೇಮಿಗಳು ಹೆತ್ತವರ ಪ್ರೀತಿಯ ಮಾತನ್ನು ಕಡೆಗಣಿಸಿ ನಡೆವಂತೆ

ನೀವೂ ನಾಡಿನ ಜನತೆಯ ಮರೆತಿರಿ ಅದ್ಯಾವುದೋ ಸೆಳೆತದಲ್ಲಿರುವಂತೆ

 

ನಿಮ್ಮನ್ನು ಈ ರೀತಿ ಬಲಹೀನನಾಗಿಸಿಹ ಅದೃಶ್ಯ ಶಕ್ತಿ ಯಾವುದದು ಹೇಳಿ

ಸತ್ಯ ನುಡಿದರೆ ಇಡೀ ನಾಡೇ ನಿಮ್ಮ ಜೊತೆಗಿಹುದು ಸ್ವಲ್ಪ ಧೈರ್ಯ ತಾಳಿ

 

ಕೆಂಗಲ್, ಅರಸು, ನಿಜಲಿಂಗಪ್ಪ, ಹೆಗಡೆಯಂಥವರು ಕೂತಿದ್ದ ಘನ ಕುರ್ಚಿಯದು

ಅದರ ಘನತೆ ಕೆಡಿಸಿದರೆ ನಿಮಗೆ ಇಹ ಪರ ಎರಡೂ ಕಡೆ ನೆಮ್ಮದಿಯೇ ಸಿಗದು

 

ಕುರ್ಚಿಯ ಘನತೆಯನು ನೀವು ಉಳಿಸಿದರೆ ನಿಮ್ಮ ಘನತೆಯೂ ಉಳಿದೀತು

ಅದಕ್ಕೇ ಬೆಲೆ ನೀಡದಿದ್ದರೆ ಸದ್ಯದಲೇ ನಿಮ್ಮ ಬದುಕೂ ಮೂರಾಬಟ್ಟೆಯಾದೀತು

 

ನಾಳೆ ನೀವೊಂಟಿಯಾಗಿ ಅಳುವಾಗ ಬರಲಾರರ್ಯಾರೂ ಸಾಂತ್ವನ ಹೇಳಲು

ರಾಜಕೀಯದಲ್ಲಿ ಎಲ್ಲರ ಜೀವನ ಬಾಳೆಲೆಯಂತೆ ಬರೀ ಹಾಸ್ಯುಂಡು ಎಸೆಯಲು

 

ಇನ್ನಾದರೂನಿಮ್ಮ ನಿದ್ದೆಗೆಡಿಸುವ ನಿಮ್ಮದೇ ಮನದ ಮಾತನ್ನು ಕೇಳಿ ನೋಡಿ

ಮೈಕೊಡವಿ ಎದ್ದು ನಿಂತು ತೋರಿಸಿದರೆ ನಾಡ ಜನತೆ ಹೊಗಳುವರು ಕೊಂಡಾಡಿ

 

ರಾಜಕೀಯವೆಂದರೆ ಭ್ರಷ್ಟರ ಕೂಟ ಎಂದು ಇಂದು ಜನ ಆಡಿಕೊಂಡಿಹರು ನಿತ್ಯ

ಕೆಸರಿನಲ್ಲಿ ಕಮಲವೂ ಅರಳುವುದೆಂದು ತೋರಿಸಿಕೊಟ್ಟರೆ ನಿಮಗೆ ಬೆಲೆ ಸತ್ಯ

*************************************


ಹೆಣ್ಣು-ಹೊನ್ನು-ಮಣ್ಣು ಈ ಮೂರಕ್ಕೂ ಸೋಲುತ್ತಿದ್ದಾರೆ ನಾಯಕರು!!

03 ಮೇ 10

 

ಅನುಮಾನಾಸ್ಪದ ರೀತಿಯಲ್ಲಿ ಅಂದು ರಘುಪತಿ ಭಟ್ರ ಪತ್ನಿಯ ಸಾವು

ನರ್ಸ್-ರೇಣುಕಾಚಾರ್ಯರ ಕತೆಯಿಂದ ಎಲ್ಲರಿಗೂ ಬಂತು ತಲೆನೋವು

 

ಲಂಚ ತೆಗೆದುಕೊಳ್ಳುವಾಗ ಸಿಕ್ಕಿಬಿದ್ದ ಸಂಪಂಗಿಯದು ನಿರ್ಲಜ್ಜ ಕಥೆ

ಮಹಿಳಾ ಮಂತ್ರಿಯ ಕೈಬಿಡಬೇಕಾದುದರ ಹಿಂದೆಯೂ ಇತ್ತಲ್ಲ ವ್ಯಥೆ

 

ರಾಜ್ಯದ ಗಣಿಸಂಪತ್ತನ್ನು ಅಕ್ರಮವಾಗಿ ಸೂರೆಮಾಡೋ ಮಂತ್ರಿಗಳು ಅಲ್ಲಿ

ತನ್ನ ಸ್ನೇಹಿತನ ಪತ್ನಿಯನ್ನೇ ಅತಿಕ್ರಮಿಸಿ ಕೆಡಿಸಿದ ಈ ಮಂತ್ರಿಯ ಕತೆ ಇಲ್ಲಿ

 

ಅಂದು ಎಲ್ಲರಿಗೆ ನೈತಿಕತೆಯ ಪಾಠ ಹೇಳಿಕೊಂಡು ತಿರುಗುತ್ತಿತ್ತು ಆ ಪಕ್ಷ

ಇಂದು ಅದೇ, ಅನೈತಿಕತೆಗೆ ಉದಾಹರಣೆಯಾಗಿ ನಿಂತಿಹ ದೊಡ್ಡ ಪಕ್ಷ

 

ಬಹುತೇಕ ಜನರ ಹಲವು ದಿನಗಳ ಕನಸಾಗಿತ್ತು ಈ ಭಾಜಪ ಸರಕಾರ

ಅದೇ ಜನರ ಕನಸನ್ನು ನುಚ್ಚು ನೂರಾಗಿಸುವಂತಿಹುದು ನಮ್ಮಗ್ರಹಚಾರ

 

ಹೆಣ್ಣು-ಹೊನ್ನು-ಮಣ್ಣು ಇವು ಮೂರಕ್ಕೂ ಸೋಲುತ್ತಿದ್ದಾರೆ ನಮ್ಮೀ ನಾಯಕರು

ತನ್ನದು ಪರರದು ಎನ್ನದೇ, ಅತಿಕ್ರಮಿಸಿ ತಮ್ಮದಾಗಿಸಿಕೊಂಬ ಹುಂಬರು!!!

*********

 

 


ಮಾನ್ಯ ಲೋಕಾಯುಕ್ತರೇ ದಯವಿಟ್ಟು ರಾಜೀನಾಮೆ ನೀಡಿ!!!

02 ಮಾರ್ಚ್ 10

 

“ಬೆಂಗಳೂರು, ಮಾ.1 : ಲಂಚ ಸ್ವೀಕರಿಸುತ್ತಿರುವಾಗ ಲೋಕಾಯುಕ್ತ [^]ರ ಕೈಯಲ್ಲಿ ರೆಡ್ ಹ್ಯಾಂಡಾಗಿ ಸಿಕ್ಕಿ ಬಿದ್ದಿದ್ದ ಕೆಜಿಎಫ್ ಶಾಸಕ ವೈ ಸಂಪಂಗಿ ಆರೋಪದಿಂದ ಮುಕ್ತರಾಗಿದ್ದು, ಶಾಸಕರ ವ್ಯಕ್ತಿತ್ವಕ್ಕೆ ಧಕ್ಕೆ ತರಲು ಯತ್ನಿಸಿದ ಫಾರೂಕ್ ಎಂಬುವವರ ವಿರುದ್ಧ ವಾಗ್ದಂಡನೆ ವಿಧಿಸಬೇಕು ಎಂದು ಪ್ರಕರಣಕ್ಕೆ ಸಂಬಂಧಿಸಿ ಸರಕಾರ ರಚಿಸಿದ್ದ ಸದನ ಸಮಿತಿ ವರದಿ ನೀಡಿದೆ. ..”

 http://thatskannada.oneindia.in/news/2010/03/01/bribe-case-kgf-mla-sampangi-gets-clean-chit.html

ಈ ಸುದ್ದಿಯನ್ನು ಓದಿ, ಕೇಳಿ, ನೋಡಿ, ತಿಳಿದಾಗ ನನ್ನ ಮನದಲ್ಲಿ ಮೂಡಿದ ಅನಿಸಿಕೆಗಳಿವು.

ಅವುಗಳನ್ನು ಇಲ್ಲಿ ಅಕ್ಷರ ರೂಪದಲ್ಲಿ ಹೊರಹಾಕುತ್ತಿದ್ದೇನೆ :

 “ಮಾನ್ಯ ಲೋಕಾಯುಕ್ತರೇ ದಯವಿಟ್ಟು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿ.

ಲಂಚ ಸ್ವೀಕರಿಸುತ್ತಿದ್ದಾಗ ನಿಮ್ಮ ತಂಡದ ಕೈಗೆ ಸಿಕ್ಕಿ ಬಿದ್ದಾತನನ್ನು ಆರೋಪ ಮುಕ್ತ ಗೊಳಿಸಿದ ಮತ್ತು ಆತನ ಮೇಲೆ ದೂರು ನೀಡಿದವರ ವಿರುದ್ಧ ವಾಗ್ದಂಡನೆ ವಿಧಿಸಬೇಕು ಎಂದು ಶಿಫಾರಸು ಮಾಡಿರುವ, ಸರಕಾರವೇ  ರಚಿಸಿರುವ ಸಮಿತಿಯ ವರದಿ, ಪರೋಕ್ಷವಾಗಿ ನಿಮ್ಮನ್ನೇ ತರಾಟೆಗೆ ತೆಗೆದುಕೊಂಡಿದೆ ಅಂತ ಅನ್ನಿಸುವುದಿಲ್ಲವೇ? ದೂರು ನೀಡಿದ್ದು ತಪ್ಪು ಅಂತಾದರೆ ಆ ತಪ್ಪು ದೂರಿನನ್ವಯ ಕಾರ್ಯಾಚರಣೆ ನಡೆಸಿದ್ದೂ ತಪ್ಪು ಅಂದ ಹಾಗಾಯ್ತು.

ನೀವು ಮತ್ತು ನಿಮ್ಮ ಲೋಕಾಯುಕ್ತ ತಂಡ ನಡೆಸುವ ಕಾರ್ಯಾಚರಣೆಗಳಿಗೆ ಮತ್ತು ಸಲ್ಲಿಸುವ ವರದಿ ಶಿಫಾರಸ್ಸುಗಳಿಗೆ ಕಿಂಚಿತ್ತೂ ಬೆಲೆ ನೀಡದ ಈ ಜಾಣ ಕಿವುಡು ಸರಕಾರ ನೀಡುವ ಸಂಬಳ ಪಡೆದು, ಅದೇ ಕೆಲ್ಸದಲ್ಲಿ ಮುನ್ನಡೆಯುವ ಅಸಹಾಯಕತೆ ನಿಮಗೇನಿದೆ? ಈ ಹುದ್ದೆಯಲ್ಲಿದ್ದು ನೀವಿನ್ನು ಸಾಧಿಸಬೇಕಾದ್ದು ಏನಿದೆ? ಏನನ್ನಾದರೂ ಸಾಧಿಸಲು ಬಿಟ್ಟಾರೇ? 

ಮುಂದೊಂದು ದಿನ ಈ ಭ್ರಷ್ಟಾಚಾರಿ ರಾಜಕಾರಣಿಗಳ ದಂಡು ನಿಮ್ಮ ತಲೆಯ ಮೇಲೇ ಗೂಬೆ ಕೂರಿಸಿ ನಿಮ್ಮ ಮುಖಕ್ಕೇ ಮಸಿ ಬಳಿಯುವ ಪ್ರಯತ್ನ ಮಾಡದಿರದು ಎಂದು ನಂಬುವುದು ನಮ್ಮಿಂದ  ಅಸಾಧ್ಯ. ಆ ಕರಾಳ ದಿನವನ್ನು ನೋಡುವ ಮೊದಲೇ, ನಿಮ್ಮಲ್ಲಿ ಈ ಕಳಕಳಿಯ ವಿನಂತಿ ಮಾಡುತ್ತಿದ್ದೇನೆ.

ಮಾನ್ಯ ಲೋಕಾಯುಕ್ತರೇ ದಯವಿಟ್ಟು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿ”.

– ಆತ್ರಾಡಿ ಸುರೇಶ ಹೆಗ್ಡೆ.

 


ಯಡ್ಡಿಗಳೇ ದಯವಿಟ್ಟು ರಾಜೀನಾಮೆ ನೀಡಿ!!!

12 ನವೆಂ 09

ಯಡ್ಡಿಗಳೇ ಘನಸ್ತಿಕೆಯನ್ನು ಉಳಿಸಿಕೊಂಡು ಕೂಡಲೇ ರಾಜೀನಾಮೆ ನೀಡಿ

ನಿಮ್ಮದಲ್ಲದೇ ಇದ್ದರೂ ಹುದ್ದೆಯ ಘನಸ್ತಿಕೆ ಬಗ್ಗೆ ಕೊಂಚ ಯೋಚಿಸಿ ನೋಡಿ

 

ಮುಖ್ಯಮಂತ್ರಿಯನ್ನುಳಿದು ಎಲ್ಲರೂ ಬೇಕಾಬಿಟ್ಟಿ ಮಾತಾಡುವವರೇ ಈಗ

ನಿಮ್ಮ ಬಾಯಿಗೆ ಮಾತ್ರ ಹೈಕಮಾಂಡ್ ಜಡಿದಿದ್ದಾರೇನೋ ದೊಡ್ಡ ಬೀಗ

 

ಸರಕಾರಕ್ಕೆ ಸೇರುವವರು ಯಾರೆಂಬ ಬಗ್ಗೆ ಹೇಳುತ್ತಾನೆ ರೇಣೂಕಾಚಾರ್ಯ

ಎಲ್ಲರೂ ಮನಬಂದಂತೆ ನಡೆದು ಕೊಳ್ಳುತ್ತಿರಲು ನಿಮ್ಮದೇನಿದೆಯೋ ಕಾರ್ಯ

 

ಗೂಂಡಾಗಳ ಗುಂಪಿನಲ್ಲೂ ಕೆಲವು ನಿಯಮಗಳಿವೆ ಎಂದು ಎಲ್ಲರಿಗೂ ಗೊತ್ತು

ನಿಯಮಗಳೇ ಇಲ್ಲದ ಗೂಂಡಾ ಮಂತ್ರಿಗಳಿಗೆ ನೀವಾಗಿದ್ದೀರೀಗ ಬರೀ ತೊತ್ತು 

 

ಗ್ರೆಗ್ ಚಾಪೆಲ ಎಂಬ ತರಬೇತುದಾರ ಅಂದು ಅಂಟಿಕೊಂಡಿದ್ದನಲ್ಲ ತನ್ನ ಹುದ್ದೆಗೆ

ತಂಡದ ಸದಸ್ಯರೆಲ್ಲಾ ತನ್ನ ವಿರುದ್ಧವಾಗಿದ್ದರೂ ಇದ್ದು ಬಿಟ್ಟ ತಾನು ತನ್ನ ಪಾಡಿಗೆ

 

ಮುಂದೊಂದು ದಿನ ಹೇಳ ಹೆಸರಿಲ್ಲದೆ ಗ್ರೆಗ್ ಚಾಪೆಲ ಚಾಪೆ ಮಡಿಸಿಟ್ಟು ಹೊರಟ

ನೀವೂ ಎಚ್ಚೆತ್ತು ಕೊಳ್ಳದಿದ್ದರೆ ನಿಮ್ಮ ಕೈಗೂ ನೀಡುತ್ತಾರೆ ಮುಂದೊಮ್ಮೆ ಕರಟ

 

ಸಮಾಜ ಸೇವೆ ಮಾಡುವುದಕ್ಕೆ ಹಲವು ಮಾರ್ಗಗಳಿವೆ ಚಿಂತೆಯೇ ಬೇಡ ನಿಮಗೆ

ನಿಮ್ಮ ಮಗನಿದ್ದಾನೆ ಕೊಳ್ಳೆ ಹೊಡೆಯುವುದಕ್ಕೆ ನೀವು ಸದ್ಯ ಹೊರಟು ಬಿಡಿ ಮನೆಗೆ

 

 

 

 

 

 

 

 

 

 

 

 



ಕಲಸು ಮೇಲೋಗರ…!!!

10 ಆಗಸ್ಟ್ 09
 
 
 
ಅಂತೂ ಇಂತೂ ತಿರುವಳ್ಳುವರ್ ಪ್ರತಿಮೆಯ ಸ್ಥಾಪಿಸಿ
ಸರಕಾರ ನಗುತಿದೆ ನೋಡಿ ವಿಜಯ ಪತಾಕೆ ಹಾರಿಸಿ
 
ಕನ್ನಡ ಪರ ಸಂಘಟನೆಗಳು ಸೋತರೂ ಸೋತಂತಲ್ಲ
ಅವುಗಳ ಶಕ್ತಿ ಏನೆಂಬುದು ಎಲ್ಲರಿಗೂ ಗೊತ್ತಾಯಿತಲ್ಲಾ
 
*******************************
 
ಟೀವಿಯ ಸ್ವಯಂವರದಿ ಈಲೇಶನನು ವರಿಸಿದಳು ರಾಖಿ
ಉಳಿದ ಆಕಾಂಕ್ಷಿಗಳ ಕೈಗಳಿಗೆ ರಾಖಿ ಕಟ್ಟಿದಳೋ ರಾಖಿ
 
ಎಷ್ಟೇ ಆದರೂ ಒಪ್ಪಿ ಮೆಚ್ಚಲೇ ಬೇಕು ಆಕೆಯ ತಲೆಯನ್ನು
ಹಾಕಿಕೊಂಡಳಲ್ಲ ತನ್ನ ಬಲೆಗೆ ಭರ್ಜರಿ ತಿಮಿಂಗಿಲವನ್ನು
 
*******************************
 
ಮೃತಳಾದ ಪುಣೆಯ ಹೆಮ್ಮಗಳು ಜ್ವರ ಹರಡಿದಳೆಂಬುದೇಕೆ
ತಾನಾಗಿಯೇ ಸಾಯಬೇಕೆಂದೇನೂ ಬಯಸಿರಲಿಲ್ಲವಲ್ಲ ಆಕೆ
 
ಮಂತ್ರಿಯಾದರೇನು ಇರಬೇಕು ಮಾತಿನಲ್ಲಿ ಕೊಂಚ ಹಿಡಿತ
ಹೀಗೆಯೇ ಆಡಿದರೆ ತಿನ್ನಬೇಕಾದೀತಾತ ಜನರಿಂದ ಒದೆತ
 
********************************
 
ಯಾರಾದರೂ ಸೀನಿದರೆ ಕೆಮ್ಮಿದರೆ ನಿಮ್ಮೆದುರು ನಿಂದು
ಮುಖ ಮುಚ್ಚಿ ಕೊಳ್ಳಿ ಕೂಡಲೇ ಆ ಜ್ವರ ಹರಡದಿರಲೆಂದು
 
ಈ ಮಹಾಮಾರಿ ಇನ್ನೂ ಸಾಕಷ್ಟು ಜೀವಗಳ ತೆಗೆಯಲಿದೆ
ಸ್ವಲ್ಪ ಯಾಮಾರಿದರೂ ನಿಜದಿ ನಮ್ಮ ಜೀವ ಅಳಿಯಲಿದೆ
 
********************************