ಶಾಂತಿಯೇನೆಂದು ಅರಿತಿಲ್ಲ ನಾನು!

16 ಸೆಪ್ಟೆಂ 12

ಶಾಂತಿಯೇನೆಂದು ಅರಿತಿಲ್ಲ ನಾನು

ಕೊರತೆಗಳಿಹವು ನನ್ನೊಳಗೆ
ನನ್ನ ಹೊರಗೂ ಇರುವಂತೆ

ಒಳಹೊರಗಿನೀ ಕೊರತೆಗಳ
ನೀಗಿಸಿಕೊಳ್ಳುವ ಹಂಬಲವು 
ನನ್ನೀ ಮನದೊಳಗಿಹುದಂತೆ

ಶಾಂತಿಯನು ಒಪ್ಪಿಕೊಂಡಿಲ್ಲ ನಾನು!

ಈ ಪ್ರಯತ್ನದಲಿ ನಾನು ನನ್ನ
ಆಯುಷ್ಯವನ್ನೇ ಸವೆಸಿಹೆನು

ಜಗವೂ ಅಲ್ಲಿಯೇ ಇಹುದು
ನಾನೂ ಅಲ್ಲಿಯೇ ಇಹೆನು

ಅದು ನನ್ನ ಹೆಡ್ಡತನವಾಗಿತ್ತೇ?
ಎಂದೀಗೀಗ ಯೋಚಿಸುತ್ತಿಹೆನು

ಶಾಂತಿಯೇನೆಂದು ಅರಿತಿಲ್ಲ ನಾನು

ಆದರೂ 

ನಿರಾಶನಾಗಲೇಕೆ ನಾನು?
ನನ್ನೀ ಯತ್ನಗಳ ಹಿಂದೆ 
ಆತ್ಮಸ್ಥೈರ್ಯ ಇಲ್ಲವೇನು?
ಜಗದ ಮುಂದೆ ಸೋಲನ್ನು
ಒಪ್ಪಿಕೊಂಡರೂ ನಾನು,
ಸೋಲೊಪ್ಪಿಕೊಂಡಿಲ್ಲ
ನನ್ನಲ್ಲಿ ನಾನು,
ಶಾಂತಿಯೇನೆಂದು ಅರಿತಿಲ್ಲ ನಾನು
*********************

(ಅಮಿತಾಭ್ ಬಚ್ಚನ್ ರವರ ಪಿತ, ದಿ. ಹರಿವಂಶ್ ರಾಯ್ ಬಚ್ಚನ್‍ರವರ ಈ ಕವಿತೆಯ ಭಾವಾನುವಾದದ ಒಂದು ಯತ್ನ)


ಬಾಳಿನಲ್ಲಿ ಸುಖಶಾಂತಿ ನೆಲೆಯೂರಿರಲಿ!

23 ಮಾರ್ಚ್ 12

ಒಂದು ಯುಗಾದಿ ಮತ್ತೊಂದು ಯುಗಾದಿಯ ನಡುವೆ ನಿಜಕ್ಕೂ ಹೊಸತಿದೆ

ಈ ಜೀವನಪಯಣದಲ್ಲಿ ಜೊತೆಯಾದ ಸ್ನೇಹಿತರ ಹೊಸ ಹೊಸ ಸ್ನೇಹವಿದೆ

 

ಅಳಿದು ಹೋದವರ ಕಹಿನೆನಪಿನ ಬೇವು ಮನದಲ್ಲಿ ಮಾಡುತ್ತಿದ್ದರೂ ಘಾಸಿ

ಹೊಸ ಬಂಧು-ಮಿತ್ರರು ತಮ್ಮ ಹೊಸತನದಿ ಮಾಡುತಿಹರು ನೋವ ವಾಸಿ

 

ಬೇವು ಬೆಲ್ಲಕ್ಕೆ ಇಂದಷ್ಟೇ ಅಲ್ಲ ದಿನ ಪ್ರತಿದಿನ ನಮ್ಮೆಲ್ಲರ ಬಾಳಿನಲ್ಲಿದೆ ಪಾಲು

ಪ್ರತಿ ಹೆಜ್ಜೆಯಲ್ಲೂ ಮಿಶ್ರ ಅನುಭವ ನೀಡುತ್ತಲೇ ಇರುತ್ತದೆ ನಮಗೆ ಈ ಬಾಳು

 

ಸಿಹಿ-ಕಹಿ ಹಂಚಿಕೊಂಡು ಬಾಳುವ ಸಮಚಿತ್ತ ಇಂದಿಗಷ್ಟೇ ಸೀಮಿತವಾಗದಿರಲಿ

ಬಾಳಿನ ಏಳು ಬೀಳುಗಳನ್ನು ಸ್ಥೈರ್ಯದಿಂದ ಎದುರಿಸುವ ಸಮಚಿತ್ತ ಸದಾ ಇರಲಿ

 

ನಂದನನಾಮ ಸಂವತ್ಸರ ನಿಮ್ಮ ನಮ್ಮೆಲ್ಲರ ಬಾಳನ್ನು ನಂದನವನವನ್ನಾಗಿಸಲಿ

ಹೊಸ ವರುಷವಿಡೀ ನಿಮ್ಮ ನಮ್ಮೆಲ್ಲರ ಬಾಳಿನಲ್ಲಿ ಸುಖಶಾಂತಿ ನೆಲೆಯೂರಿರಲಿ!

************************


ಸದ್ದು ಗದ್ದಲ ಬೇಡ ಬರೀ ದೀಪಗಳ ಬೆಳಕಿರಲಿ!

04 ನವೆಂ 10

 

ಸದ್ದು ಗದ್ದಲ ಬೇಡ ಬರೀ ದೀಪಗಳ ಬೆಳಕಿರಲಿ
ಮಾತು ಮಾತಿನಲೂ ಪ್ರೀತಿಯಾ ಸೆಲೆಯಿರಲಿ
 
ಪಟಾಕಿ ಸುಡುಮದ್ದುಗಳಿಗೆ ಬೇಡ ಬೇಡಾ ಅನ್ನಿ
ವಾಯು-ಶಬ್ದ ಮಾಲಿನ್ಯಕ್ಕೆಮ್ಮ ಅಸಹಕಾರ ಅನ್ನಿ
 
ಅಲ್ಲಿ ಕಾರ್ಖಾನೆಗಳಲ್ಲಿ ಬಾಲಕಾರ್ಮಿಕರ ಗೋಳು
ಇಲ್ಲಿ ಸದ್ದುಗದ್ದಲದಿಂದೀ ಕಿವಿಗಳಾಗುತ್ತವೆ ಹಾಳು
 
ಇದರಲ್ಲಿ ಗುಣಾತ್ಮಕ ವಿಷಯಗಳೇ ಇಲ್ಲವಿದು ಸತ್ಯ
ಅವುಗಳಿಂದ ಆಗುವ ನಷ್ಟಗಳ ಮಾತು ಅಲ್ಲ ಮಿಥ್ಯ
 
ನಮ್ಮ ಮನೆಯಲ್ಲಿ ದೀಪಾವಳಿಗೆ ಬರೀ ದೀಪಗಳೇ
ಪಟಾಕಿ ಬೇಡ ಅನ್ನಲು ಬೆಂಬಲಿಸುವಳೆಮ್ಮ ಮಗಳೇ
 
ಒಂದು ದೀಪದಿಂದ ಇನ್ನೊಂದು ದೀಪವನು ಹಚ್ಚಿದರೆ
ನೋಡಿ ಬೆಳಕಿನಿಂದ ಹೇಗೆ ಝಗಮಗಿಸುವುದು ಈ ಧರೆ
 
ಒಂದು ಹೃದಯದಿಂದ ಇನ್ನೊಂದು ಹೃದಯಕ್ಕೆ ಪ್ರೀತಿ
ಹರಿಯುತ್ತಿದ್ದರೆ ಜಗದಲ್ಲೆಲ್ಲೂ ಸ್ಥಾಪನೆಯಾದೀತು ಶಾಂತಿ!
****


ಈ ರಾಜ್ಯದ ಸಂಸತ್ ಸದಸ್ಯರಲ್ಲಿ ನಂದೊಂದು ಬಿನ್ನಹ!

15 ಆಕ್ಟೋ 10

ರಾಜ್ಯದ ಸಂಸತ್ ಸದಸ್ಯರಲ್ಲಿ ನನ್ನದೊಂದು ಬಿನ್ನಹ, ನಮ್ಮೆಲ್ಲರ ಶಾಂತಿಗಾಗಿ,
ನಮ್ಮನ್ನು ಇಲ್ಲಿ ನಮ್ಮಷ್ಟಕ್ಕೆ ಬಿಟ್ಟು, ದೆಹಲಿಯಲ್ಲೇ ಕೆಲಸಮಾಡಿ ಈ ರಾಜ್ಯಕ್ಕಾಗಿ;

ರಾಜ್ಯದಲ್ಲಿ ನಾವು ಆರಿಸಿ ಕೂರಿಸಿರುವ ಸರಕಾರ ಇರುವುದು ನಮ್ಮೆಲ್ಲರಿಗಾಗಿ,
ಆ ಸರಕಾರ ತನ್ನ ಅವಧಿ ಪೂರ್ತಿ ಕೆಲಸಮಾಡಲು ಬಿಡಿ, ರಾಜ್ಯದ ಏಳಿಗೆಗಾಗಿ;

ದಿನ ಬೆಳಗಾದರೆ, ಹೊಸ ಹೊಸ ಕೀಟಲೆ ಕೊಡುವುದನ್ನು ಇನ್ನಾದರೂ ನಿಲ್ಲಿಸಿ,
ಈ ನಾಡಿನ ಜನತೆಯ ಶಾಂತಿಗಾಗಿ, ನೀವೂ ದಯವಿಟ್ಟು ಕೊಂಚ ಸಹಕರಿಸಿ;

ರೋಸಿ ಹೋಗಿದ್ದಾರೆ ಜನತೆ, ನಿಮ್ಮ ಈ ಪುರುಸೊತ್ತಿನ ದೊಂಬರಾಟಗಳಿಂದ,
ನಿಮಗಾದರೆ ಅದುವೇ ಕಾಯಕ, ನಮಗೆ ದಿನವೂ ಬರೀ ಕಿರಿಕಿರಿ ಅವುಗಳಿಂದ;

ಕಳೆದ ಎರಡೂವರೆ ವರ್ಷಗಳಲ್ಲಿ ನಾವು ಅನುಭವಿಸಿದ್ದು, ನಿಜಕ್ಕೂ ನಿಮ್ಮಿಂದಾಗಿ,
ನಿಮ್ಮನ್ನು ಆರಿಸಿದ್ದು ದೆಹಲಿಯಲ್ಲಿ ಕಾರ್ಯ ಮಾಡಲು, ನಮ್ಮ ಪ್ರತಿನಿಧಿಗಳಾಗಿ;

ಕೆಲಸವಿಲ್ಲದ ಆಚಾರಿ ಮಗುವಿನ ಅಂಡನ್ನು ಕೆತ್ತಿದನೆಂಬುದು ಹಳೇ ಗಾದೆಮಾತು,
ನೀವು ಆಡಿದ ಆಟವೂ ರಾಜ್ಯಕ್ಕೆ ಬಲು ನಷ್ಟಮಾಡಿದೆ, ಇದೂ ಸತ್ಯವಾದ ಮಾತು;

ಏನೂ ಅಭಿವೃದ್ಧಿಯಾಗಿಲ್ಲ ಎನ್ನುವುದಕ್ಕೆ ಮೊದಲು, ಮಾಡಲು ಬಿಟ್ಟಿದ್ದೀರಾ ಹೇಳಿ,
ನಿಮ್ಮ ತಂತ್ರಗಳಿಗೆ ಪ್ರತಿತಂತ್ರ ಹೂಡುವುದರಲ್ಲೇ ಕಾಲ ಕಳೆದು ಹೋಯ್ತು ಕೇಳಿ;

ನೀವು ಹೀಗೇ ಆಡುತ್ತಿದ್ದರೆ, ನಿಮ್ಮೆಲ್ಲರ ಭವಿಷ್ಯವನ್ನೂ ಈ ಜನರೇ ನಿರ್ಧರಿಸುತ್ತಾರೆ,
ಇಂದಿನ ಸದಸ್ಯತ್ವ ಖಾಯಂ ಅಲ್ಲ, ಮುಂದಿನ ಬಾರಿ ನಿಮ್ಮನ್ನೂ ಸೋಲಿಸುತ್ತಾರೆ!
*********


ನನ್ನ ಆ ಅಪರಿಚಿತ ಅಭಿಮಾನಿ ಇನ್ನಿಲ್ಲ!!!

04 ಜನ 10

ಸಖೀ,

ಕಳೆದೆರಡು ತಿಂಗಳಿಂದ ಜಂಗಮ ದೂರವಾಣಿಯಲಿ ಸಂದೇಶಗಳ ರವಾನಿಸುತ್ತಿದ್ದಾಕೆ

ಅಪರಿಚಿತ ಅಭಿಮಾನಿ ಆಗಿಯೇ ಉಳಿದು ಸದಾ ನನ್ನ ಕವನಗಳ ಕೊಂಡಾಡುತ್ತಿದ್ದಾಕೆ

 

ಇಹಲೋಕ ತ್ಯಜಿಸಿ ಅದಾಗಲೇ ಎರಡು ದಿನಗಳಾಗಿವೆ ಎಂಬ ಸುದ್ದಿ ಬಂದಿದೆ ಇಂದು

ನನ್ನ ಕಿವಿಗಳ ನಂಬಲಾಗದೇ ಮಾತು ಹೊರಡದೇ ಯೋಚಿಸಿದೆ ಸುಮ್ಮನೇ ನಿಂದು

 

ಯಾರಾಕೆ, ಅದ್ಯಾಕೆ ನನ್ನ ಮನದ ಕದ ಬಡಿದು ಕಿಟಕಿಯಲಿ ಇಣುಕಿ ಮರಳಿದಳವಳು

ನಾನಿನ್ನು ಈ ಜೀವನ ಪೂರ್ತಿ ನೆನೆ ನೆನೆದು ಕೊರಗುವಂತೆ ಮಾಡಿ ಹೋದಳವಳು

 

ಮುಖವ ನಾ ಕಂಡಿಲ್ಲ, ಮಾತೊಂದನೂ ಆಡಿಲ್ಲ, ಬರಿಯ ಸಂದೇಶಗಳೇ ಪರಿಚಯ

ಅಂದಿದ್ದಳಾಕೆ, ಕಾಯುತ್ತಿರಿ ಸದ್ಯವೇ ಬರಬಹುದು ಮಾತನಾಡುವ ಸುವರ್ಣ ಸಮಯ

 

ಮಾತಿಲ್ಲ ಕತೆಯಿಲ್ಲ ಹೋಗುವಾಗ ಹೋಗುತ್ತೇನೆಂಬ ಸುಳಿವು ನೀಡದೆಯೇ ಹೋದಳು

ಎಲ್ಲಾ  ಸಂದೇಶಗಳನ್ನು ಅಳಿಸಿಯಾಗಿದೆ ಮನದಲಿನ್ನು ಬರೀ ನೆನಪಾಗಿಯೇ ಉಳಿವಳು

 

ಆಕೆಗೆನ್ನ ದೂರವಾಣಿ ಸಂಖ್ಯೆ ನೀಡಿದವರಾದರೂ ಏನು ಪರಿಚಯ ನೀಡಿಯಾರು ನನಗೆ

ಇನ್ನು ಏನ ನೀಡಿದರೂ ನಿಜದಿ ಏನು ಮತ್ತು ಹೇಗೆ ಪ್ರಯೋಜನ ಹೇಳು ಅವುಗಳಿಂದೆನಗೆ

 

ಅಗಲಿದ ಆಕೆಯಾತ್ಮಕ್ಕೆ ಚಿರ ಶಾಂತಿಯ ನೀಡಿರೆಂದು ಕೋರುವೆ ನಾನು ಆ ಭಗವಂತನಲ್ಲಿ

ಇನ್ನೆಂದೂ ಈ ತೆರನಾದ ಆಟ ನಡೆಯದಿರಲಿ ದೇವ ಎನ್ನುವೆ ಮುಂದಿನ ಜೀವನ ಕಾಲದಲ್ಲಿ!!!

************************************************************

ಆಕೆಯ ಬಗ್ಗೆ ನಾನಿಲ್ಲಿ ಬರೆದಿದ್ದೆ:  ನನ್ನ ಆ ಅಪರಿಚಿತ “ಫ್ಯಾನು”

 

 


ನೋಬೆಲ್ ಪ್ರಶಸ್ತಿ ಒಬಾಮಾನಿಗೋ ಒಸಾಮಾನಿಗೋ…?!

12 ಆಕ್ಟೋ 09

ಪ್ರತಿಷ್ಠಿತ ನೋಬೆಲ್ ಪ್ರಶಸ್ತಿ ಅದೇಕೋ ಇಂದೀಗ

ತನ್ನ ಪ್ರತಿಷ್ಠೆಯನ್ನೆಲ್ಲಾ ಕಳೆದುಕೊಂಡ ಹಾಗಾಯ್ತು

ಒಬಾಮಾನ ಮುಡಿಯೇರಿದ ಈ ನೋಬೆಲ್ ಪ್ರಶಸ್ತಿ

ಪರೋಕ್ಷವಾಗಿ ಒಸಾಮಾನನ್ನು ಸೇರಿದ ಹಾಗಾಯ್ತು

 

ಒಸಾಮಾ ಮುಂದೆ ಮುಂದೆ ಸಾಗಿದ ಎಡೆಯೆಲ್ಲಾ

ಅಮೇರಿಕಾದ ಸೇನಾಪಡೆಗಳು ಸಾಗುತ್ತಲೇ ಇವೆ

ಶಾಂತಿ ಕೆಡಿಸಲಾತ ನಡೆಸಿದ ಹಿಂಸೆಯ ವಿರುದ್ಧ

ಇವರಿಂದಲೂ ಹಿಂಸಾಚಾರಗಳು ನಡೆಯುತ್ತಲಿವೆ

 

ಉಗ್ರರ ನಿಗ್ರಹಕ್ಕೆ ಪಾಕಿಗೆ ಒಬಾಮಾ ನೀಡುತಿರುವ

ನೆರವೆಲ್ಲಾ ನಮ್ಮ ನಾಡಿನ ಶಾಂತಿ ಕೆಡಿಸುತ್ತಲಿಹುದು

ಅದನಾತ ಅರಿತಿದ್ದರೂ ಪಾಕಿಗೆ ಆತನ ರಾಶಿ ರಾಶಿ

ಧನ ಸಹಾಯ ಸರಾಗವಾಗಿ ಮುಂದುವರಿದಿಹುದು

 

ಶಾಂತಿದೂತ ಮಹಾತ್ಮನ ನಾಮ ಸ್ಮರಣೆಯೊಂದೇ

ಪ್ರಶಸ್ತಿಗೆ ಕಾರಣವಾದಂತೆ ಕಂಡು ಬರುತಿಹುದಲ್ಲಾ

ಶಾಂತಿ ಸ್ಥಾಪನೆಯ ಹೆಸರಲ್ಲಿ ನಡೆದ ಎಲ್ಲಾ ಕೊಲೆ

ಅನಾಚಾರಗಳು ನಗಣ್ಯವಾದಂತೆಯೇ ಇಹುದಲ್ಲಾ

 

ಪರೀಕ್ಷೆ ಬರೆಯಬೇಕು ಎಂದೆಣಿಸಿಕೊಂಡಿದ್ದವನಿಗೆ

ಕರೆದು ಪದವಿ ಪ್ರದಾನ ಮಾಡಿದ ಹಾಗಿದೆ ಇದು

ಭರ್ಜರಿಯಾಗಿ ಭಾಷಣ ಮಾಡುತ್ತಾ ಇದ್ದವನನ್ನು

ಸಭಿಕರು ಚಪ್ಪಾಳೆ ತಟ್ಟಿ ನಿಲ್ಲಿಸಿ ಬಿಟ್ಟಂತಿದೆ ಇದು

 

ಏನಾದರೂ ಸಾಧಿಸಿ ತೋರಿಸುವ ಮೊದಲೇ ಹೀಗೆ

ಬಹು ಪರಾಕ್ ಘೋಷಣೆಯ ಅಗತ್ಯ ಏನಿತ್ತು ಹೇಳಿ

ಇನ್ನು ಸಾಧಿಸಲು ಏನೂ ಉಳಿದಿಲ್ಲದಿರಲು ಆತನ

ಒಳಗೆ ಇನ್ನು ಸಾಧಿಸುವ ಕಿಚ್ಚು ಉಳಿದೀತೇ ಹೇಳಿ

 

ಮನುಜನಿಗೆ ಬಾಳಿನಲ್ಲಿ ಅತೀ ಬೇಗ ಅತೀ ಹೆಚ್ಚು

ದೊರಯಬಾರದು ಎನ್ನುತ್ತಿದ್ದರಂದು ನಮ್ಮಜ್ಜಂದಿರು

ಒಂದೊಂದೇ ಮೆಟ್ಟಲೇರುವ ಶ್ರಮ ಅರಿತವನಿಗಷ್ಟೇ

ಅನ್ಯರ ಪರಿಶ್ರಮದ ಅರಿವೂ ಆಗಬಹುದೆಂದೆಂದರು