ಸುಷ್ಮಾ .. ನಿಮ್ಮ ಮಕ್ಕಳಿಗೆ ಬುದ್ಧಿ ಹೇಳ್ರಮ್ಮಾ…!

20 ಆಗಸ್ಟ್ 10

 

“ಅಮ್ಮಾ
ಬಾರಮ್ಮಾ,
ಸುಷ್ಮಾ
ಬಾರಮ್ಮಾ,
ಬಳ್ಳಾರಿ
ಜನತೆಗೆ
ನಗುಮುಖವ
ತೋರಮ್ಮಾ…”

ಹೀಗೆಂದು ಹಾಡಿ,
ಆ ಬಳ್ಳಾರಿಯ
ರೆಡ್ಡಿ ಸಹೋದರರು
ಮತ್ತು ಶ್ರೀರಾಮುಲು
ನಿಮ್ಮನ್ನು
ಸ್ವಾಗತಿಸಿದರೆ,
ನನಗೆಳ್ಳಷ್ಟೂ
ಚಿಂತೆ ಇಲ್ಲ ನಿಜದಿ;

ಅವರು
ಸಮರ್ಪಿಸುವ
ಲಕ್ಷ್ಮಿಯ ಜೊತೆಗೆ
ದಿಲ್ಲಿಗೆ ಮರಳುವ
ಮೊದಲು, ನಿಮ್ಮ
ಆ ನಾಲ್ಕು ಮಕ್ಕಳಿಗೆ
ಸ್ವಲ್ಪ ಬುದ್ಧಿ ಹೇಳಿ
ಎಂಬಾಶಯ ಈ ಮನದಿ;

ಕರ್ನಾಟಕದ
ಮಂತ್ರಿಗಳವರು,
ಬರೀ ಬಳ್ಳಾರಿಯ
ದಂಡನಾಯಕರಲ್ಲ,
ಅಭಿವೃದ್ಧಿ ಪಡಿಸಲಿ
ಈ ನಾಡನ್ನೂ, ಬರೀ
ಬಳ್ಳಾರಿಯಷ್ಟನ್ನೇ ಅಲ್ಲ;

ನಾಡಿನುದ್ದಗಲಕ್ಕೂ
ಅಮಾಯಕ ಜನರು,
ಡೆಂಗಿ ಮತ್ತು ಹಂದಿ
ಜ್ವರದಿಂದ ನರಳಿ,
ಸಾಯುತ್ತಿದ್ದಾರೆ
ಸಾಮೂಹಿಕವಾಗಿ,
ಆದರೆ ಅತ್ತ
ಆ ಆರೋಗ್ಯಮಂತ್ರಿ
ಪೌರೋಹಿತ್ಯ
ವಹಿಸಿಕೊಂಡು,
ವಿವಾಹ ನಡೆಸುತ್ತಿದ್ದಾರೆ
ಸಾಮೂಹಿಕವಾಗಿ;

ಆಗಲೇ ಎರಡು
ವರ್ಷಗಳಾದವು,
ಇನ್ನಾದರೂ ಬಳ್ಳಾರಿಯ
ಬಿಟ್ಟು ಹೊರಬರಲು ಹೇಳಿ,
ನಾಲ್ಕಾರಾದರೂ ಸರಕಾರೀ
ಆಸ್ಪತ್ರೆಗಳ ಹೆಸರುಗಳನ್ನು
ಕಂಠಪಾಠಮಾಡಿಕೊಂಬಂತೆ
ಆತನಿಗೆ ಬುದ್ಧಿಮಾತು ಹೇಳಿ;

ಬಳ್ಳಾರಿಯ ಹೊರಗೂ
ಕರ್ನಾಟಕವಿದೆ ಇನ್ನೂ,
ಬಳ್ಳಾರಿಯ ಹೊರಗೂ
ನಿಮ್ಮ ಮತದಾರರು
ಇದ್ದಾರೆ ಇನ್ನೂ,

ಹೀಗೇಯೇ ಮುಂದುವರೆದರೆ,
ಮುಂದೊಂದು ದಿನ ಸೋಲಿನ
ರುಚಿ ಕಾಣಬೇಕಾಗಬಹುದು,
ಭಾರತೀಯ ಜನತಾ ಪಕ್ಷ,
ಬಳ್ಳಾರಿ ಜನತಾ ಪಕ್ಷವಾಗಿ
ಬಹಳ ಹಿಂದುಳಿದುಬಿಡಬಹುದು,
ಸುಷ್ಮಾ ನಿಮ್ಮ ಪಾಲಿಗೆ ಇದು
ಸ್ವರಾಜವಾಗಿ ಉಳಿಯದೇ
ಪರರಾಜ್ಯವಾಗಿ ಬಿಡಬಹುದು!
***************


ರಾಜ್ಯದ ಅರಾಜಕತೆ ಕೊನೆಗೊಳಿಸಲು ಇಲ್ಲಿದೆ ಸೂತ್ರ!!!

17 ನವೆಂ 09

ನಮ್ಮ ನಾಡಿನೀ ಅರಾಜಕತೆಗೆ ಇಲ್ಲಿದೆ ಒಂದು ಸೂತ್ರ

ಇದನೊಪ್ಪಿ ನಡೆದರೆ ಚುನಾವಣೆವರೆಗೆ ಎಲ್ಲಾ ಸುಸೂತ್ರ

 

ಕರುಣಾಕರ ರೆಡ್ಡಿಯ ಮಾಡಿರೀ ರಾಜ್ಯದ ಮುಖ್ಯಮಂತ್ರಿ

ಅವರ ಒಬ್ಬೊಬ್ಬ ಬೆಂಬಲಿಗನೂ ಆಗಿ ಬಿಡಲಯ್ಯ ಮಂತ್ರಿ

 

ಅಭಿವೃದ್ದಿಯ ಮಾತ ಬಿಡಿ ಈಗಲೂ ಇಲ್ಲ ಏನೂ ಅಭಿವೃದ್ಧಿ

ಅವರೆಲ್ಲ ನೆಮ್ಮದಿಯಿಂದ ಇದ್ದರೆ ರಾಜ್ಯದಲ್ಲೆಲ್ಲೂ ನೆಮ್ಮದಿ

 

ತಾನು ಸಾಚಾ ಎಂದು ಕೊಳ್ಳುವವರಿಗೆಲ್ಲ ಇದ್ದಾರೆ ಕಳ್ಳ ಮಕ್ಕಳು

ಹೊರತಲ್ಲ ಇದಕೆ ಸಾಚಾ ಎನಿಸಿದ್ದ ಎಂಪಿ ಪ್ರಕಾಶರ ಮಕ್ಕಳೂ

 

ನಮಗೆ ಗೌಡರೇನು, ಯಡ್ಡಿಯೇನು ಅಲ್ಲಾ ಆ ರೆಡ್ಡಿಗಳಾದರೇನು

ಈ ಕರುನಾಡಿನ ಉದ್ಧಾರ ಯಾರು ಬಂದರೂ ಆಗಲಿಕ್ಕುಂಟೇನು

 

ಒಮ್ಮೆ ಎಲ್ಲ ಲೂಟಿ ಹೊಡೆದು ಖಾಲಿ ಮಾಡಿ ಬಿಡಲಿ ಖಜಾನೆ

ಆಮೇಲೆ ರಾಜ್ಯಭಾರ ನಡೆಸಲು ಬೇಕು ಒಬ್ಬ ನಿಷ್ಠಾವಂತನೇ

 

ಮುಂದಿನ ಚುನಾವಣೆಯಲ್ಲಿ ನಿಷ್ಠಾವಂತನಿಗೆ ಹಾಕೋಣ ಮತ

ಯಾರು ನಿಸ್ವಾರ್ಥನಾಗಿ ಕಾಪಾಡುತ್ತಾನೋ ಈ ನಾಡಿನ ಹಿತ

****************************************


ಯಡ್ಡಿ ಇನ್ನೂ ಶೋಭಾಯಮಾನ!!!

29 ಆಕ್ಟೋ 09

ರೆಡ್ಡಿ

ಬಂಧುಗಳು

ಹಿಡಿದೆಳೆದು

ಜಗ್ಗಾಡುತ್ತಿದ್ದರೆ

ಯಡ್ಡಿಯ

ಚಡ್ಡಿ,

 

ಯಡ್ಡಿ

ಈಗಲೂ

ಹಿಂದಿನಂತೆಯೇ

ಶೋಭಾಯಮಾನ

ತನಗೇನೂ

ಆಗದೆಂಬಂತೆ

ಅಡ್ಡಿ!!!

 ******

 

ಪಕ್ಷಾಧ್ಯಕ್ಷ

ರಾಜನಾಥರೇ

ಈತನಿಗೆ

ಬೆಲೆಕೊಡದೇ

ಮಾಡುತ್ತಿರಲು

ಪದೇ ಪದೇ

ಮುಖ ಭಂಗ,

 

ದಿಲ್ಲಿಯಿಂದಿಲ್ಲಿಗೆ

ಸಂಧಾನ

ಮಾಡಿಸಲು

ಬಂದಿರುವ

ಆ ಅರುಣ ಜೇಟ್ಲಿ

ಹಿಂತಿರುಗುವನೇ

ಆಗಿ ಮಂಗ?!

 ********

 

ಬಾಯಿಯಲಿ

ಸಮಾಜಸೇವೆಯ

ಮಂತ್ರ

ಮನದೊಳಗೊಳಗೆ

ಅಧಿಕಾರ ದಾಹದ

ಕುತಂತ್ರ,

 

ಯಡ್ಡಿಯಾದರೇನು

ರೆಡ್ಡಿಯಾದರೇನು

ಗೌಡರಾದರೇನು

ಶೆಟ್ಟರಾದರೇನು

ಈಗ ಎಲ್ಲರದೂ

ಜಾಹೀರು ಸರ್ವತ್ರ!!!

************

 

ಸದಾಕಾಲ

ನಿದ್ರೆಯಲ್ಲಿರುತಿದ್ದ

ದೊಡ್ಡ ಗೌಡರ

ಮುಖದಲ್ಲೂ

ಮೊನ್ನೆ ನಾನು

ಮಂದಹಾಸವ ಕಂಡೆ,

 

ಮಾಜೀ ಮುಖ್ಯಮಂತ್ರಿಯ

ಸಹೋದರನನ್ನೂ

ಮುಖ್ಯ ಅಲ್ಲದಿದ್ದರೂ

ಉಪ ಮುಖ್ಯಮಂತ್ರಿ

ಮಾಡಿಸಬಹುದೇ

ಎಂಬ ಅನುಮಾನ

ನಾ ಮನದಲ್ಲಿ

ಮೂಡಿಸಿಕೊಂಡೆ!!!

****************


ಹೀಗೇಯೇ ನಡೆದರೆ ಐದು ವರ್ಷ ಉಳಿಯುವುದಿಲ್ಲ!!!

16 ಜೂನ್ 09
ನಮ್ಮ ಸರ್ಕಾರಕ್ಕೆ ಅದೇಕೋ ಇದೀಗ ಕೆಟ್ಟ ಕಾಲ
ರೆಡ್ಡಿಗಳು ನೋಡಿ ನಿಧಾನಕ್ಕೆ ಬಿಚ್ಚುತ್ತಿದ್ದಾರೆ ಬಾಲ
 
ಸಿರಿಯೊಂದಿಗೆ ಅಧಿಕಾರವೂ ಸೇರಲು ಅಧೋಗತಿ
ತನ್ನವರಿಗೇ ಜನರು ಕಾಣಿಸದೇ ಇರಲಾರರು ಗತಿ
 
ಗಣಿ ದೊರೆಗಳಿಗೆ ಗುಟ್ಟು ರಟ್ಟಾಗುವುದೆಂಬ ಭಯ
ಕೇಂದ್ರದ ತನಿಖೆಯಿಂದ್ಯಾರೂ ನೀಡುತ್ತಿಲ್ಲ ಅಭಯ
 
ತಮಗೇನು ಬೇಕೆಂಬುದನೇ ಇವರು ಅರಿತಂತಿಲ್ಲ
ತಾವು ಕುಳಿತ ಮರದ ರೆಂಬೆಯ ಕಡಿಯುತಿಹರಲ್ಲ
 
ಅಧಿಕಾರದ ಗದ್ದುಗೆಯೇರಿ ವರುಷವಾದುದಕೆ ಈಗ
ಸಂಭ್ರಮವೇಕೆ ಇರಲಾರರೇ ಐದು ತುಂಬುವಾಗ
 
ಅಭಿವೃದ್ಧಿ ಕಾರ್ಯಗಳ ಲೆಕ್ಕ ಗಣನೆಗೇ ಸಿಗುವುದಿಲ್ಲ
ಆದರೂ ಮರ್ಯಾದೆ ಬಿಟ್ಟವರಂತೆ ವರ್ತಿಸುತಿಹರಲ್ಲ
 
ಕುಮಾರಿ ಅಲ್ಲಿ ಅತ್ತು ಕೆಡಿಸಿದರೂ ಸಭೆಯ ಶೋಭೆ
ನಾ ನಿನ್ನ ಬಿಡಲಾರೆ ಎನುತಿಹನಲ್ಲಾ  ಮುದಿಗೂಬೆ
 
ಎಲ್ಲಾ ಸಫಲ ಪುರುಷರ ಹಿಂದೆ ಹೆಣ್ಣಿರುವಳೆಂಬಂತೆ
ಈತನ ಮಹಾಪತನವೂ ನಿಜದಿ ಈಕೆಯಿಂದಲಂತೆ
 
ಎಷ್ಟು ಒದೆ ತಿಂದರೂ ಬುದ್ಧಿ ಬರುವಂತೆ ಕಾಣುತ್ತಿಲ್ಲ
ಹೀಗೇಯೇ ನಡೆದರೆ ಐದು ವರ್ಷ ಉಳಿಯುವುದಿಲ್ಲ