ನರ್ಸಮ್ಮನ ಸಿಡಿಯ ನಕಲು ಇನ್ನೂ ಇದೆ ಆತುರ ಬೇಡ!

08 ಆಕ್ಟೋ 10

 

ಯಡ್ಡಿ ನಿನ್ನೆ ರೇಣುವಿನ ಕಿವಿಗಳಲ್ಲಿ ಒಂದು ಮಂತ್ರವನ್ನು ಉಸುರಿದರಲ್ಲಾ
ರೇಣುವಿನ ಉಸಿರೇ ನಿಂತುಹೋಗಿ ಸ್ವರವೇ ಬದಲಾಗಿ ಬಿಟ್ಟಿದೆಯಂತಲ್ಲಾ

ರಾತ್ರಿಯಿಡೀ ಯೋಚಿಸುತ್ತಾ ಮಲಗಿದ್ದೆ ಮುಂಜಾವಿಗೆ ಜ್ಞಾನೋದಯವಾಯ್ತು
ಯಡ್ಡಿ ಹೆಚ್ಚೇನೂ ಹೇಳಿರಲಿಕ್ಕಿಲ್ಲ ಹೇಳಿರಬಹುದು ಇಲ್ಲಿರುವ ಇದಿಷ್ಟೇ ಮಾತು

ನರ್ಸಮ್ಮ ಐದುಕೋಟಿ ಹೊತ್ಕೊಂಡು ಹೋಗಿದ್ದು ಸತ್ಯವೇ ಕಣೋ ಮೂಢ
ಆದ್ರೆ ಆಕೆ ಕೊಟ್ಟು ಹೋದ ಸಿಡಿಯ ನಕಲು ಇನ್ನೂ ನನ್ನಲ್ಲಿದೆ ಆತುರ ಬೇಡ

****

ಕುಮಾರ ಕಳೆದ ಬಾರಿ ಮೋಸ ಮಾಡಿದ್ದು ಬರೀ ಯಡ್ಡಿಗೆ ಮತ್ತು ಭಾಜಪಕ್ಕೆ
ಇಂದು ಹಾಗಲ್ಲ ಇಡೀ ರಾಜ್ಯಕ್ಕೇ ದ್ರೋಹ ಬಗೆದು ಪಡಬೇಕಾಗಿದೆ ನಾಚಿಕೆ

ತಮ್ಮ ಪಾತ್ರವೇನೂ ಇಲ್ಲ ಎನ್ನುತ್ತಲೇ ಗೋವಾಕ್ಕೆ ತೆರಳಿದನಾದರೂ ಏಕೆ
ಭಿನ್ನರ ರಕ್ಷಣೆಗೆ ಹೋಗುವೆನೆಂದವನು ಜೊತೆಗೆ ಪೋಲೀಸರ ಒಯ್ದಿಲ್ಲ ಏಕೆ

ಹದಿಮೂರು ಶಾಸಕರ ರಕ್ಷಣೆ ಓರ್ವನೇ ಮಾಡಲು ಈತನೇನು ದಾದಾನೇ
ಗೋವಾ ಪೋಲೀಸರಿಗೆ ಕರೆ ಮಾಡಿ ಹೇಳಿದ್ದರೆ ಸಿಗ್ತಿತ್ತು ರಕ್ಷಣೆ ತಂತಾನೇ

****

ಸೋನಿಯಾ ಸಿದ್ದನ ಕೇಳಿದಳು “ಓಹ್ ಆರ್ ಯೂ ಸಿದ್ಧ?” ಎಂದು ದಿಲ್ಲಿಯಲ್ಲಿ
“ಹೌದು ನಾನು ಸಿದ್ಧ, ನಾಲ್ಕು ವರ್ಷಗಳಿಂದ ಮುಖ್ಯಮಂತ್ರಿಯಾಗಲು ಇಲ್ಲಿ”

ಮುಖಕ್ಕೆ ಮಂಗಳಾರತಿ ಮಾಡಿ ಹೊರಗಟ್ಟಿದ್ದಾಳೆ ಸೋನಿಯಾ “ಹೋಗು
ಒಂದಾದರೂ ಕ್ಷೇತ್ರದಲ್ಲಿ ನಮ್ಮವರ ಗೆಲ್ಲಿಸಿ ಬಾ ಆಲಿಸುತ್ತೇನೆ ನಿನ್ನ ಕೂಗು

ವಿರೋಧದ ನಡುವೆಯೂ ವಿರೋಧಪಕ್ಷದ ನಾಯಕನ ಪಟ್ಟ ನೀಡಿದ್ದೇ ಹೆಚ್ಚು
ನಿಜಕ್ಕೂ ಹೇಳುತ್ತೇನೆ ಕರ್ನಾಟಕದಲ್ಲಿ ನನಗೆ ಆಸ್ಕರ್ ಮಾತ್ರ ಅಚ್ಚುಮೆಚ್ಚು”

****


ಮಾನ್ಯ ಯಡ್ಯೂರಪ್ಪನವರಿಗೊಂದು ಕಿವಿಮಾತು!

13 ಜುಲೈ 10

ಇದ್ಯಾವ ಮೋಹದ ಮಾಯೆ ನಿಮ್ಮನ್ನಾವರಿಸಿದೆ ಯಡ್ಯೂರಪ್ಪನವರೇ?

ನಿಮ್ಮನ್ನು ನೀವೇ ಈ ರೀತಿ ಬಲಿಕೊಡುತ್ತಿರುವುದೇಕೆ ಹೇಳಲಾರಿರೇ?

 

ಮೂರ್ನಾಲ್ಕು ದಶಕಗಳ ಹೋರಾಟದ ಆ ನಿಮ್ಮ ರಾಜಕೀಯ ಜೀವನ

ಗಣಿಧೂಳಿನೊಂದಿಗೆ ಬೆರೆತು ಮರೆಯಾಗುವುದ ಕಾಣದೇ ನಿಮ್ಮ ಕಣ್ಮನ?

 

ಯುವ ಪ್ರೇಮಿಗಳು ಹೆತ್ತವರ ಪ್ರೀತಿಯ ಮಾತನ್ನು ಕಡೆಗಣಿಸಿ ನಡೆವಂತೆ

ನೀವೂ ನಾಡಿನ ಜನತೆಯ ಮರೆತಿರಿ ಅದ್ಯಾವುದೋ ಸೆಳೆತದಲ್ಲಿರುವಂತೆ

 

ನಿಮ್ಮನ್ನು ಈ ರೀತಿ ಬಲಹೀನನಾಗಿಸಿಹ ಅದೃಶ್ಯ ಶಕ್ತಿ ಯಾವುದದು ಹೇಳಿ

ಸತ್ಯ ನುಡಿದರೆ ಇಡೀ ನಾಡೇ ನಿಮ್ಮ ಜೊತೆಗಿಹುದು ಸ್ವಲ್ಪ ಧೈರ್ಯ ತಾಳಿ

 

ಕೆಂಗಲ್, ಅರಸು, ನಿಜಲಿಂಗಪ್ಪ, ಹೆಗಡೆಯಂಥವರು ಕೂತಿದ್ದ ಘನ ಕುರ್ಚಿಯದು

ಅದರ ಘನತೆ ಕೆಡಿಸಿದರೆ ನಿಮಗೆ ಇಹ ಪರ ಎರಡೂ ಕಡೆ ನೆಮ್ಮದಿಯೇ ಸಿಗದು

 

ಕುರ್ಚಿಯ ಘನತೆಯನು ನೀವು ಉಳಿಸಿದರೆ ನಿಮ್ಮ ಘನತೆಯೂ ಉಳಿದೀತು

ಅದಕ್ಕೇ ಬೆಲೆ ನೀಡದಿದ್ದರೆ ಸದ್ಯದಲೇ ನಿಮ್ಮ ಬದುಕೂ ಮೂರಾಬಟ್ಟೆಯಾದೀತು

 

ನಾಳೆ ನೀವೊಂಟಿಯಾಗಿ ಅಳುವಾಗ ಬರಲಾರರ್ಯಾರೂ ಸಾಂತ್ವನ ಹೇಳಲು

ರಾಜಕೀಯದಲ್ಲಿ ಎಲ್ಲರ ಜೀವನ ಬಾಳೆಲೆಯಂತೆ ಬರೀ ಹಾಸ್ಯುಂಡು ಎಸೆಯಲು

 

ಇನ್ನಾದರೂನಿಮ್ಮ ನಿದ್ದೆಗೆಡಿಸುವ ನಿಮ್ಮದೇ ಮನದ ಮಾತನ್ನು ಕೇಳಿ ನೋಡಿ

ಮೈಕೊಡವಿ ಎದ್ದು ನಿಂತು ತೋರಿಸಿದರೆ ನಾಡ ಜನತೆ ಹೊಗಳುವರು ಕೊಂಡಾಡಿ

 

ರಾಜಕೀಯವೆಂದರೆ ಭ್ರಷ್ಟರ ಕೂಟ ಎಂದು ಇಂದು ಜನ ಆಡಿಕೊಂಡಿಹರು ನಿತ್ಯ

ಕೆಸರಿನಲ್ಲಿ ಕಮಲವೂ ಅರಳುವುದೆಂದು ತೋರಿಸಿಕೊಟ್ಟರೆ ನಿಮಗೆ ಬೆಲೆ ಸತ್ಯ

*************************************


ರಾಜ್ಯದ ಅರಾಜಕತೆ ಕೊನೆಗೊಳಿಸಲು ಇಲ್ಲಿದೆ ಸೂತ್ರ!!!

17 ನವೆಂ 09

ನಮ್ಮ ನಾಡಿನೀ ಅರಾಜಕತೆಗೆ ಇಲ್ಲಿದೆ ಒಂದು ಸೂತ್ರ

ಇದನೊಪ್ಪಿ ನಡೆದರೆ ಚುನಾವಣೆವರೆಗೆ ಎಲ್ಲಾ ಸುಸೂತ್ರ

 

ಕರುಣಾಕರ ರೆಡ್ಡಿಯ ಮಾಡಿರೀ ರಾಜ್ಯದ ಮುಖ್ಯಮಂತ್ರಿ

ಅವರ ಒಬ್ಬೊಬ್ಬ ಬೆಂಬಲಿಗನೂ ಆಗಿ ಬಿಡಲಯ್ಯ ಮಂತ್ರಿ

 

ಅಭಿವೃದ್ದಿಯ ಮಾತ ಬಿಡಿ ಈಗಲೂ ಇಲ್ಲ ಏನೂ ಅಭಿವೃದ್ಧಿ

ಅವರೆಲ್ಲ ನೆಮ್ಮದಿಯಿಂದ ಇದ್ದರೆ ರಾಜ್ಯದಲ್ಲೆಲ್ಲೂ ನೆಮ್ಮದಿ

 

ತಾನು ಸಾಚಾ ಎಂದು ಕೊಳ್ಳುವವರಿಗೆಲ್ಲ ಇದ್ದಾರೆ ಕಳ್ಳ ಮಕ್ಕಳು

ಹೊರತಲ್ಲ ಇದಕೆ ಸಾಚಾ ಎನಿಸಿದ್ದ ಎಂಪಿ ಪ್ರಕಾಶರ ಮಕ್ಕಳೂ

 

ನಮಗೆ ಗೌಡರೇನು, ಯಡ್ಡಿಯೇನು ಅಲ್ಲಾ ಆ ರೆಡ್ಡಿಗಳಾದರೇನು

ಈ ಕರುನಾಡಿನ ಉದ್ಧಾರ ಯಾರು ಬಂದರೂ ಆಗಲಿಕ್ಕುಂಟೇನು

 

ಒಮ್ಮೆ ಎಲ್ಲ ಲೂಟಿ ಹೊಡೆದು ಖಾಲಿ ಮಾಡಿ ಬಿಡಲಿ ಖಜಾನೆ

ಆಮೇಲೆ ರಾಜ್ಯಭಾರ ನಡೆಸಲು ಬೇಕು ಒಬ್ಬ ನಿಷ್ಠಾವಂತನೇ

 

ಮುಂದಿನ ಚುನಾವಣೆಯಲ್ಲಿ ನಿಷ್ಠಾವಂತನಿಗೆ ಹಾಕೋಣ ಮತ

ಯಾರು ನಿಸ್ವಾರ್ಥನಾಗಿ ಕಾಪಾಡುತ್ತಾನೋ ಈ ನಾಡಿನ ಹಿತ

****************************************


ಮಂತ್ರಿಯಾಗುವಾಸೆ ಬೀದಿ ನಾಯಿಗಳಿಗೇಕೆ???

13 ನವೆಂ 09

 

 

ನೆರೆ ಪರಿಹಾರದ ಕೆಲಸಕ್ಕೆ ಖರ್ಚಾಗಲಿವೆ ಸಾವಿರಾರು ಕೋಟಿ ರೂಪಾಯಿಗಳು

ಅದಕ್ಕೇ ಮನದಲ್ಲಿ ಮಂತ್ರಿಯಾಗುವಾಸೆ ತುಂಬಿಕೊಂಡಿವೆ ಬೀದಿ ನಾಯಿಗಳು

 

ಅಲ್ಲಿನ ಸಾವಿರ ಸಾವಿರದಲ್ಲಿ ಒಂದೆರಡು ತಮ್ಮ ಕಿಸೆಗೆ ಸೇರಿಸಿಕೊಂಡರೂ ಸಾಕು

ಮುಂದಿನ ಐದಾರು ತಲೆಮಾರೂ ನಿಶ್ಚಿಂತೆಯಿಂದ ನಡೆಸಬಹುದು ತಮ್ಮ ಬದುಕು

 

ಸಭಾಪತಿಯಂತಹ ಗೌರವಾನ್ವಿತ ಹುದ್ದೆಯೂ ಯಾರಿಗೂ ಬೇಡವಾಗಿದೆ ಇಂದು

ಗೌರವ ಬೇಕಿಲ್ಲ ಎಲ್ಲರೂ ಕೇಳುವುದು ದುಡ್ಡು ಮಾಡಲಾಗೋ ಹುದ್ದೆ ಬೇಕೆಂದು

 

ಜನತೆಗೆ ಸಮೀಪವಾಗಿ ಸ್ಪಂದಿಸಿದಷ್ಟೂ ಕಿಸೆಗೆ ಕಾಸು ಸೇರುತ್ತಾ ಇರುತ್ತದೆ ಸರಾಗ

ಕಾಸು ಮಾಡಿಕೊಂಡರೆ ತಾನೇ ಮಂದಿನ ಚುನಾವಣೆಯಲ್ಲಿ ಗೆಲ್ಲಬಹುದು ನೀವಾಗ

 

ಶೋಭ ಇದ್ದಿದ್ದರೆ ಕಾಸು ಮಾಡಲಾಗುತ್ತಿರಲಿಲ್ಲ ಎನ್ನುವುದೆಲ್ಲರಾಡುವ ಪಿಸುಮಾತು

ಆದರೆ ಯಡ್ಡಿ ಮಕ್ಕಳೂ ಇದರಲ್ಲಿ ಕಡಿಮೆ ಇಲ್ಲ ಎನ್ನುವುದೀಗ ಬೀದಿ ಬೀದಿ ಮಾತು

 

ದೇವರಾಣೆ ಹಾಕಿ ಮತ್ತೆ ಮಗನನ್ನು ಸಂಸದನನ್ನಾಗಿಸಿದ ಯಡ್ಡಿಯ ಆ ಮಹಾ ತಪ್ಪು

ಸಾರ್ವಜನಿಕವಾಗಿ ಕಣ್ಣೀರಿಳಿಸುವಂತೆ ಮಾಡಿತೀಗ ಮೋರೆಗೆ ಬಳಿದಂತೆ ಮಸಿ ಕಪ್ಪು

**********************************************


ಯಡ್ಡಿಗಳೇ ದಯವಿಟ್ಟು ರಾಜೀನಾಮೆ ನೀಡಿ!!!

12 ನವೆಂ 09

ಯಡ್ಡಿಗಳೇ ಘನಸ್ತಿಕೆಯನ್ನು ಉಳಿಸಿಕೊಂಡು ಕೂಡಲೇ ರಾಜೀನಾಮೆ ನೀಡಿ

ನಿಮ್ಮದಲ್ಲದೇ ಇದ್ದರೂ ಹುದ್ದೆಯ ಘನಸ್ತಿಕೆ ಬಗ್ಗೆ ಕೊಂಚ ಯೋಚಿಸಿ ನೋಡಿ

 

ಮುಖ್ಯಮಂತ್ರಿಯನ್ನುಳಿದು ಎಲ್ಲರೂ ಬೇಕಾಬಿಟ್ಟಿ ಮಾತಾಡುವವರೇ ಈಗ

ನಿಮ್ಮ ಬಾಯಿಗೆ ಮಾತ್ರ ಹೈಕಮಾಂಡ್ ಜಡಿದಿದ್ದಾರೇನೋ ದೊಡ್ಡ ಬೀಗ

 

ಸರಕಾರಕ್ಕೆ ಸೇರುವವರು ಯಾರೆಂಬ ಬಗ್ಗೆ ಹೇಳುತ್ತಾನೆ ರೇಣೂಕಾಚಾರ್ಯ

ಎಲ್ಲರೂ ಮನಬಂದಂತೆ ನಡೆದು ಕೊಳ್ಳುತ್ತಿರಲು ನಿಮ್ಮದೇನಿದೆಯೋ ಕಾರ್ಯ

 

ಗೂಂಡಾಗಳ ಗುಂಪಿನಲ್ಲೂ ಕೆಲವು ನಿಯಮಗಳಿವೆ ಎಂದು ಎಲ್ಲರಿಗೂ ಗೊತ್ತು

ನಿಯಮಗಳೇ ಇಲ್ಲದ ಗೂಂಡಾ ಮಂತ್ರಿಗಳಿಗೆ ನೀವಾಗಿದ್ದೀರೀಗ ಬರೀ ತೊತ್ತು 

 

ಗ್ರೆಗ್ ಚಾಪೆಲ ಎಂಬ ತರಬೇತುದಾರ ಅಂದು ಅಂಟಿಕೊಂಡಿದ್ದನಲ್ಲ ತನ್ನ ಹುದ್ದೆಗೆ

ತಂಡದ ಸದಸ್ಯರೆಲ್ಲಾ ತನ್ನ ವಿರುದ್ಧವಾಗಿದ್ದರೂ ಇದ್ದು ಬಿಟ್ಟ ತಾನು ತನ್ನ ಪಾಡಿಗೆ

 

ಮುಂದೊಂದು ದಿನ ಹೇಳ ಹೆಸರಿಲ್ಲದೆ ಗ್ರೆಗ್ ಚಾಪೆಲ ಚಾಪೆ ಮಡಿಸಿಟ್ಟು ಹೊರಟ

ನೀವೂ ಎಚ್ಚೆತ್ತು ಕೊಳ್ಳದಿದ್ದರೆ ನಿಮ್ಮ ಕೈಗೂ ನೀಡುತ್ತಾರೆ ಮುಂದೊಮ್ಮೆ ಕರಟ

 

ಸಮಾಜ ಸೇವೆ ಮಾಡುವುದಕ್ಕೆ ಹಲವು ಮಾರ್ಗಗಳಿವೆ ಚಿಂತೆಯೇ ಬೇಡ ನಿಮಗೆ

ನಿಮ್ಮ ಮಗನಿದ್ದಾನೆ ಕೊಳ್ಳೆ ಹೊಡೆಯುವುದಕ್ಕೆ ನೀವು ಸದ್ಯ ಹೊರಟು ಬಿಡಿ ಮನೆಗೆ

 

 

 

 

 

 

 

 

 

 

 

 



“ಲಾಡಿ” – “ಲೇಡಿ”

09 ನವೆಂ 09

“ಲಾಡಿ” – “ಲೇಡಿ”!!!

ಜಾರಿ

ಹೋಗುತ್ತಿದ್ದ

ನಿಮ್ಮ

ಪೈಜಾಮವನ್ನು

ಎತ್ತಿ ಕಟ್ಟಿದ್ದಾರೆ

ಆಕೆ ನೀಡಿ

ಹೊಸ ಲಾಡಿ,

 

ಇನ್ನೊಮ್ಮೆ

ತಪ್ಪು ಮಾಡಿ

ಎಲ್ಲೆಲ್ಲೋ

ಜಾರಿಸಿಕೊಂಡರೆ

ನೆರವಿಗೆ

ಬರಲಾರರು

ದೆಹಲಿಯ

ಆ “ಲೇಡಿ”!!!

********

 

ಖುಷಿ ಪಡದಿರಿ!!!

ಖುಷಿ ಪಡದಿರಿ

ವೈಷ್ಣೋದೇವಿ

ಮತ್ತು

ದೆಹಲಿಯ

ಸುಷ್ಮಾ

ಪಾರು

ಮಾಡಿದರೆಂದು

ನಿಮ್ಮನ್ನು

ಈ ಬಾರಿ

ಕಷ್ಟದಿಂದ,

 

ನೆರೆಪೀಡೀತ

ಪ್ರದೇಶದ

ಮಹಿಳೆಯರು

ನಿಮ್ಮನ್ನು 

ಕ್ಷಮಿಸಲಾರರು

ಪಾರು

ಮಾಡದಿದ್ದರೆ

ಅವರನ್ನು

ನೀವೀಗ

ಸಂಕಷ್ಟದಿಂದ!!!

**********

 

ನಮ್ಮೆಲ್ಲರ ಬಂಧುವಾಗಿ!!!

ಸಾರ್ವಜನಿಕವಾಗಿ

ಕಣ್ಣೀರಿಳಿಸಿ

ಇಬ್ಬರ ಬಗ್ಗೆ

ನಿಮ್ಮ

ಬಂಧು ಪ್ರೇಮದ

ಅನವಶ್ಯಕ

ಪ್ರದರ್ಶನ

ಮಾಡಿದ್ದು

ಸಾಕು

ಯಡ್ಡಿಗಳೇ

ಅಂದು,

  

ರಾಜ್ಯದೆಲ್ಲಾ

ಜನತೆಯ

ಸಮಸ್ಯೆಗಳಿಗೂ

ಸ್ಪಂದಿಸಿ

ಮರುಗಿ

ತೋರಿಸಿಕೊಡಿ

ನೀವು

ನಮ್ಮೆಲ್ಲರ

ಬಂಧುವಾಗಿ

ಮುಂದೂ!!!

******


ಬಿಜೆಪಿ ಸರಕಾರ ನಿರಾತಂಕವಾಗಿರಬೇಕೇ…?!

13 ಆಕ್ಟೋ 09

ರಾಜ್ಯದ ಬಿಜೆಪಿ ಸರಕಾರ ನಿರಾತಂಕವಾಗಿ

ನಡೆಯಬೇಕೆಂದಿದ್ದರೆ ಇನ್ನು ನಾಲ್ಕು ವರುಷ

ನನ್ನಲ್ಲಿ ಒಂದು ಯೋಜನೆ ಇದೆ ಕೇಳಿ ಅದು

ನಿಮಗೆಲ್ಲರಿಗೂ ನೀಡಬಹುದೇನೋ ಹರುಷ

 

ಉಗ್ರಪ್ಪ, ಸಿದ್ಧರಾಮಯ್ಯ, ಡಿಕೆ ಶಿವಕುಮಾರ

ಗೌಡರು, ಕುಮಾರಸ್ವಾಮಿ ಮತ್ತು ಆ ರೇವಣ್ಣ

ಈ ಷಡ್ವೈರಿಗಳನ್ನು ಸರಕಾರದ ಖರ್ಚಿನಲ್ಲೇ

ವಿದೇಶ ವಿಹಾರಕ್ಕೆ ಕಡ್ಡಾಯ ಕಳುಹಿಸಬೇಕಣ್ಣ

 

ಆ ಆರು ಮಂದಿಗೂ ಅಲ್ಲಿ ಯಾವ ಚಿಂತೆಯೂ

ಇಲ್ಲದೆ ನಾಲ್ಕು ವರುಷ ಪುಕ್ಕಟೆಯಾಗಿ ಗಮ್ಮತ್ತು

ರಾಜ್ಯದ ಖಜಾನೆ ಸ್ವಲ್ಪ ಖಾಲಿ ಆದೀತಾದರೂ

ಜನತೆಯ ನೆಮ್ಮದಿಗೆ ಕಿಂಚಿತ್ತೂ ಬಾರದು ಕುತ್ತು

 

ಮುಂದಿನ ಚುನಾನಾವಣೆಯ ಸಮಯ ಎಲ್ಲರೂ

ಮರಳಿ ಬಂದರಾಯ್ತು ಅದೃಷ್ಟ ಪರೀಕ್ಷಿಸುವುದಕೆ

ಚುನಾವಣೆಯಲ್ಲಿ ಪರಸ್ಪರರ ಮೇಲೆ ಕೆಸರೆರಚಿ

ಯಾರು ಪರಿಶುದ್ಧರೆಂದು ಅರಿತು ಕೊಳ್ಳುವುದಕ್ಕೆ

 

ಅಭಿವೃದ್ದಿ ತೊರಿಸಿದ್ದರೆ ಯಡ್ಡಿಗೆ ಜನರು ಮತ್ತೆ

ಮತ ನೀಡಿ ಅಧಿಕಾರಕ್ಕೇರಿಸಿ ಕೂರಿಸಬಹುದು

ಸೋತರೆ ಶೋಭಾಹೀನರಾಗದೆ ಗದ್ದುಗೆ ಬಿಟ್ಟು

ರಜೆಯಲ್ಲಿ ತಾವೂ ವಿಹಾರಕ್ಕೆ ತೆರಳಿಬಿಡಬಹುದು