ಯಾನ್ ದಾಯೆ ನನ ತುಳುಟ್ ಬರೆಯರೆಗ್ ಬಲ್ಲಿ..?!

16 ಜೂನ್ 09
ತುಳುನಾಡ್ಡ್ ಪುಟ್ಟುದ್ ನಲ್ಪತ್ತೇಳ್ ವರ್ಷ ಆಂಡಲಾ
ಬರೆಯರೆ ಸುರುಮಲ್ತ್ ದ್ ಮುಪ್ಪತ್ತರಡ್ಡ್ ವರ್ಷ ಆಂಡಲಾ
ದಾಯೆ ತುಳುಟ್ ಬರೆಯಂದೆ ಒರಿಯೆ ಇತ್ತೆ ನೆಟ್ಟಲಾ
 
ಎಂಕ್ ಎಲ್ಯೆಡೇ ಕನ್ನಡದ ಮರ್ಲ್ ಕಟ್ಟಾಯಿನಕ್ಲು
ಇಂಗ್ಲೀಸ್ದ ಪೊರ್ಲುನು ಅಂಚ ತೆರಿಪಾಯಿನಕ್ಲು
ತುಳುಟ್ ಬರೆಲಾ ಅಂದ್ ಪಂಡಿಜೆರತ್ತಾ ಅಕ್ಲು
 
ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ನಾಲ್ ಪದ್ಯ ಓದಿನ ನೆನಪುಂಡು
ಮಡಂಗ್ ಮದ್ಮಲ್ ಅಬ್ರೊಣಿ ಮದ್ಮಯೆನ ನೆನಪಾಪುಂಡು
 
ತುಳು ಬಾಷೆದ ಬೇತೆ ಪುಸ್ತಕೊಲೆನ್ ತೂತಿನ ನೆನಪಿಜ್ಜಿ
ತುಳು ಭಾಷೆಟ್ ಒಂಜಿ ಕತೆನ್ಲಾ ಯಾನ್ ಓದಿನ ನೆನಪಿಜ್ಜಿ
 
ಯಾನ್ ದಾಯೆ ನನ ತುಳುಟ್ ಬರೆಯರೆಗ್ ಬಲ್ಲಿ
ನಮ್ಮ ಭಾಷೆದ ಮಹಿಮೆನ್ಲಾ ಕೊಂಡಾಡ್ರೆಗ್ ಬಲ್ಲಿ