ತೊರೆದು ಬಂದಿಹ ನನ್ನೂರೇ!

12 ಆಗಸ್ಟ್ 12

ತೊರೆದು ಬಂದಿಹ ನನ್ನ ಊರೇ
ದೂರವಾಗಿಹ ಮನೆಯಂಗಳವೇ
ನಿನಗರ್ಪಣವೀ ಹೃದಯವು
ನೀನೇ ನನ್ನ ಹಂಬಲವು
ನೀನೇ ನನ್ನ ಮಾನವು
ನೀನೇ ನನ್ನ ಪ್ರಾಣವು

ನನ್ನ ಊರನು ಬಳಸಿ ಬರುವ ಗಾಳಿಗೆ ವಂದಿಸುವೆನು
ನನ್ನ ಊರ ಹೆಸರ ನುಡಿವ ಮುಖಕೆ ನಾ ಮುತ್ತಿಡುವೆನು
ನನ್ನೂರ ಮುಂಜಾನೆ ಸೊಗಸು, 
ಸಂಜೆಗೆ ಸೋಲುವುದು ಮನಸು
ನಿನಗರ್ಪಣವೀ ಹೃದಯವು

ಅಮ್ಮನ ಹೃದಯದಂತೆನ್ನೆದೆಯ ಅಪ್ಪಿಕೊಳ್ಳುವೆ ನೀನು
ನನಗೆ ನನ್ನ ಮಗಳಿನಂತೆ ನೆನಪು ಆಗುತ್ತಿರುವೆ ನೀನು
ನನಗೆ ನೆನಪಾದಷ್ಟೂ ನೀನು,
ಬಿಡದೆ ಪರಿತಪಿಸುವೆನು ನಾನು
ನಿನಗರ್ಪಣವೀ ಹೃದಯವು

ಊರ ತೊರೆದಿಷ್ಟೊಂದು ದೂರ ನಾನೇನೋ ಬಂದಿಹೆ
ಅದರೂ ನಿನ್ನ ತೊರೆಗಳಾಣೆಗೂ ಈಗ ನಾ ನುಡಿದಿಹೆ
ನಾ ಜನಿಸಿದ ನನ್ನೂರಿನಲ್ಲೇ
ನನ್ನ ಉಸಿರು ತೊರೆಯಲೆನ್ನ
ನಿನಗರ್ಪಣವೀ ಹೃದಯವು
**************

ಇಂದು ಮುಂಜಾನೆ ದೂರದರ್ಶನದ ರಂಗೋಲಿ ಕಾರ್ಯಕ್ರಮದಲ್ಲಿ ಕೇಳಿದ ಈ ಹಾಡನ್ನು (Aye Mere Pyaare Vatan, Aye Mere Bichhade Chaman) ನನ್ನೂರಿನ ನೆನಪಿನ ಜೊತೆಗೆ, ನನ್ನದೇ ವಾಸ್ತವದ ಭಾವ ಸಂಯೋಜನೆಯೊಂದಿಗೆ, ಕನ್ನಡಕ್ಕೆ ಇಳಿಸಿದ್ದೇನೆ.

ಕಾಲಗರ್ಭದಲಿ ಮರೆಯಾಗುತಿಹುದು ಮತ್ತೊಂದು ವರುಷ!

21 ಡಿಸೆ 10

ಕಾಲಗರ್ಭದಲಿ ಮರೆಯಾಗುತಿಹುದು ಈಗ ಮತ್ತೊಂದು ವರುಷ,
ನೋವು ಇದ್ದಿದ್ದರೂ, ತಂದಿತ್ತು ನಮ್ಮ ಬಾಳಲ್ಲಿ ಬಹಳಷ್ಟು ಹರುಷ;

ಆರ್ಥಿಕ ಹಿಂಜರಿತ ಹೋಗಿ, ತೂಗತೊಡಗಿತು ಸಂತಸದ ತೊಟ್ಟಿಲು,
ವೈದ್ಯೆಯಾಗುತ್ತಿರುವ ಮಗಳು ಏರಿಹಳು ಈಗ ಎರಡನೇ ಮೆಟ್ಟಿಲು;

ಅಲ್ಲಿ ಅಮ್ಮನವರ ಆರೋಗ್ಯ ಏರುಪೇರಿಲ್ಲದೇ ಒಂದೇ ಸಮನಾಗಿದೆ,
ಸದ್ಯಕ್ಕೆ ಮನೆಯಲ್ಲಿ, ಆರೋಗ್ಯ ನೆಮ್ಮದಿ ಮನೆ ಮಾಡಿರುವಂತೆ ಇದೆ;

ನ್ಯಾಯವಾದಿ ತಮ್ಮ, ನೋಟರಿಯಾಗಿ ಮೂಡಿಸಿದ ಈ ಮನದಿ ಹೆಮ್ಮೆ,
ಮಗನಿಲ್ಲದೆನಗೆ ಮಗನಲ್ಲವೇ ಆತ, ಎಂಬ ಭಾವನೆ ನನ್ನಲ್ಲಿ ಒಮ್ಮೊಮ್ಮೆ;

ಹೊಸ ಸಂಬಂಧ ಸೇರಿಕೊಂಡಿಲ್ಲ, ಕಳಚಿಕೊಂಡವು ಒಂದೆರಡು ಸದ್ಯ,
ಸ್ನೇಹಿತರ ಸಂಖ್ಯೆ ಹೆಚ್ಚಾಗಿ, ಅದರಲ್ಲಿ ಆಪ್ತರಾದರು ಹಲವರು ಈ ಮಧ್ಯ;

ಸಮಾಜ ಲಗಾಮಿಲ್ಲದೇ, ದಿನದಿಂದ ದಿನಕ್ಕೆ ಹದಗೆಡುತ್ತಲೇ ಸಾಗುತ್ತಿದೆ,
ಭ್ರಷ್ಟಾಚಾರ ಎನ್ನುವುದೇ ರಾಜಕೀಯಕ್ಕೆ ಪರ್ಯಾಯ ಪದವಾಗಿಬಿಟ್ಟಿದೆ;

ವರುಷದ ಬಹುಪಾಲು ನಮ್ಮ ನಾಡು, ಕಳೆಯಿತು ಅರಾಜಕತೆಯಲ್ಲಿಯೇ,
ಭ್ರಷ್ಟ ರಾಜಕಾರಣಿಗಳಲ್ಲೀಗ, ದುಸ್ತರವಾಗಿದೆ ನಿಷ್ಠಾವಂತರ ಆಯ್ಕೆಯೇ;

ಕಾಂಗ್ರೇಸಿನ ಅವಿವಾಹಿತ ಗೂಳಿ, ದೇಶದುದ್ದಕ್ಕೂ ಧೂಳೆಬ್ಬಿಸಿ ಸೋತಿತು,
ದೇಶೀಯರ ದೂಷಿಸಿ, ತಾನೊಬ್ಬ ವಿದೇಶಿ ಎಂಬುದ ಸಾಬೀತು ಪಡಿಸಿತು;

ದಿಲ್ಲಿಯಲಿ ಆಟ ಆಡಿಸಲು ನಿಂತವರೂ, ಕೋಟಿ ಕೋಟಿ ಕೊಳ್ಳೆ ಹೊಡೆದರು,
ಚೀನಾದಲಿ ಚಿನ್ನದ ಬೇಟೆಯಾಡಿ ಮರಳಿದರು, ಕನ್ನಡನಾಡಿನ ಕುವರಿಯರು;

ಎಲ್ಲರದೂ ಮುಖವಾಡ, ಹೇಳುವುದೊಂದಾದರೆ ಮಾಡುವುದು ಮತ್ತೊಂದು,
ಮಾಧ್ಯಮದವರು ಗುದ್ದಿದರು ಜನರನ್ನು, ದಿನವೂ ನೀಡಿ ಸುದ್ದಿ ಹೊಸತೊಂದು;

ಸತ್ಯಾಸತ್ಯತೆಯ ಬಗ್ಗೆ ತಲೆಕೆಡಿಸಿಕೊಳ್ಳಲು, ಅವಕಾಶವೇ ಇಲ್ಲವಾಗಿದೆ ಇಲ್ಲಿ,
ಒಂದರ ಹಿಂದೆ ಇನ್ನೊಂದು ಸುದ್ದಿ, ಸ್ಫೋಟಗೊಳ್ಳುತ್ತಲೇ ಇರುತ್ತದೀ ನಾಡಲ್ಲಿ;

ನಿತ್ಯಾನಂದ ಸ್ವಾಮಿಯ ಕಾಮಕಾಂಡದ ಮೇಲಿಂದ ಸರಿಯಿತು ಪರದೆ ಮೆಲ್ಲಗೆ,
ಪತ್ನಿ-ಮಿತ್ರನ ಅಕ್ರಮ ಸಂಬಂಧ, ಹಾದಿಯಾಯ್ತು ಅತ್ತ ಕೋಟಿಗಟ್ಟಲೆ ಸುಲಿಗೆಗೆ;

ಕನ್ನಡ ಪತ್ರಿಕೋದ್ಯಮದಲ್ಲಿ, ಸುಂಟರಗಾಳಿಯೇ ಬೀಸಿದಂತಾಯ್ತು ಒಮ್ಮೆಗೇ,
ಓದುಗರಿಗೂ ಬೇಸರವಾಯ್ತು,  ಭಟ್ಟರ ತಂಡ ವಿಕದಿಂದ ತೆರಳಿದಾಗ ಹೊರಗೆ;

ಸುಳ್ಳು ಅಪವಾದಕ್ಕೆ ಗುರಿಯಾದ, ಬೆತ್ತಲೆ ಜಗತ್ತಿನ ಸಿಂಹ ನೋಡ ನೋಡುತ್ತಲೇ,
ನೀತಿಯ ಪಾಠ ಮಾಡುತ್ತಿದ್ದ ರವಿಯ ಕಾಮ ಕಥೆ ಬಯಲಾಗಿ, ಆತನಾದ ಬೆತ್ತಲೆ;

ಹೊಸ ವರುಷ, ಹೊಸ ಹರುಷ ತರಲಿ, ನಮ್ಮೆಲ್ಲರ ಬಾಳಿನಲ್ಲೆಂಬುದೇ ಆಶಯ,
ಭ್ರಷ್ಟರ ದುಷ್ಟರ ಅರಾಜಕತೆ ಮುಗಿದು, ಜನ ಕಾಣುವಂತಾಗಲಿ ನೆಮ್ಮದಿಯ!

*************************************


ನೀ ಬೇಡವೆಂದರೂ ನಾನಿನ್ನ ಹಿಂದೆಯೇ ಇರುವೆ!

30 ಜುಲೈ 10

 

ಮಕ್ಕಳ ಮುಗ್ಧ

ಆಪಾದನೆಗಳಿಗೆಲ್ಲಾ ಅಪ್ಪಂದಿರು ಕೊರಗುವುದಿಲ್ಲ

 

ಅಪ್ಪನನೇ ಅಹಂಕಾರಿ

ಎಂದರೂ ಆತನ “ಅಹಂ” ಗೆ ಬಾಧೆಯಿಲ್ಲ

 

ಒಳಗೊಳಗೇ ನಗು

ನೀನಿನ್ನೂ ಮಗು ನಿನಗೆಲ್ಲಾ ಅರಿವಾಗುವುದಿಲ್ಲ

 

ಸಮಾಜದ ಕಾಟಗಳ

ಅರಿವು ಚೆನ್ನಾಗಿ ಇಹುದೆನಗೆ ಅದು ಸುಳ್ಳಲ್ಲ

 

ಅದನ್ನೆಲ್ಲಾ ಒಂದೊಂದಾಗಿ

ಬಿಡಿಸಿ ಹೇಳಲೂ ಮಗಳೇ ಇದು ಸಕಾಲವಲ್ಲ

 

ಬಿಸಿನೀರಿನಿಂದ ತನ್ನ

ಕೈಸುಟ್ಟುಕೊಂಡವ ತಣ್ಣೀರಿಗೆ ಭಯಪಡುವನಲ್ಲ?

 

ಹಾಗೆಯೇ ಎಲ್ಲರೂ

ಎಲ್ಲವನೂ ಅನುಭವಿಸಿಯೇ ಅರಿಯಬೇಕಾಗಿಲ್ಲ

 

ನಿನ್ನ ಆಸೆ ನಿನ್ನ ಛಲ

ಬೇಡವೆನ್ನಲಾರೆ, ಆದರೆನ್ನ ಮಾತನ್ನೊಮ್ಮೆ ಕೇಳಿ ಬಿಡು

 

ನೀ ಬೇಡವೆಂದರೂ ನಾನಿನ್ನ

ಹಿಂದೆಯೇ ಇರುವೆ, ಇನ್ನು ಹೇಳದಿರು “ಅಪ್ಪಾ … ದಾರಿ ಬಿಡು”!

**********************


ಪ್ರಕಾಶ ರೈಗಳಿಗೆ ತುಂಬು ಹೃದಯದ ಧನ್ಯವಾದ!

26 ಮೇ 10

 

ಪ್ರಕಾಶ ರೈಗಳಿಗೆ ತುಂಬು ಹೃದಯದ ಧನ್ಯವಾದ

ಬರಿಯ ಚಿತ್ರವಲ್ಲವದು ಒಂದು ಸುಂದರ ಸಂವಾದ

 

ನಾ ವೀಕ್ಷಿಸುತ್ತಿದ್ದಾಗ ಚಿತ್ರ ನಾನೂ ನನ್ನ ಕನಸೂ

ಮುದಗೊಂಡೆವು ಅಂದು ನಾನೂ ನನ್ನ ಮನಸೂ

 

ಒಂಟಿ ಮಗಳ ಅಪ್ಪ ನಾನೂ ಅಲ್ಲಿನ ಉತ್ತಪ್ಪನಂತೆ

ನನ್ನ ಮಗಳೂ ನನ್ನ ಕನಸು ಆತನ ಆ ಕನಸಿನಂತೆ

 

ನಮ್ಮದೇ ಚಿತ್ರ ಬಿಡಿಸಿಕೊಂಡಂತಾಗಿ ನನ್ನ ಕಣ್ಮುಂದೆ

ಸಂತಸದೊಂದಿಗೆ ಅಲ್ಲಿ ಕ್ಷಣ ಪ್ರತಿಕ್ಷಣ ನಾನು ನೊಂದೆ

 

ಹೆಣ್ಮಗಳ ಅಪ್ಪನಾಗುವುದು ನಿಜದಿ ಅದೆಂತಾ ಸೌಭಾಗ್ಯ

ನನ್ನದು ಅದು ನಿಜದಿ ಬಯಸಿ ಬಯಸಿ ಬಂದಂತ ಭಾಗ್ಯ

 

ಮೊನ್ನಿನ ತನಕ ಹೆಗಲೇರಿ ಕೂರುತ್ತಿದ್ದವಳು ಭಯವಿಲ್ಲದೇ

ಭುಜದೆತ್ತರಕ್ಕೆ ಬೆಳೆದು ನಿಂತಾಗಿದೆ ಈಗ ನನಗರಿವಿಲ್ಲದೇ

 

ಭವಿಷ್ಯದ ವಿದಾಯದ ಚಿತ್ರ ಕಣ್ಣೆದುರು ತೆರೆದುಕೊಂಡಾಗ

ಅನ್ಸುತ್ತೆ ಧೈರ್ಯ ತುಂಬಲು ದೇವರೇ ಬರಬೇಕಾದೀತಾಗ

*************************************


ಮಗಳ ಭವಿಷ್ಯಕ್ಕಾಗಿ ನಿಮ್ಮ ಹಾರೈಕೆಗಳಿರಲಿ!!!

25 ಆಗಸ್ಟ್ 09
 

ಇನ್ನು ನಾಲ್ಕು ದಿನ ನಾ ಬರುವುದಿಲ್ಲ ಇಲ್ಲಿಗೆ
ಹೊರಟು ನಿಂತಿಹೆನು ಕರಾವಳಿಯ ಊರಿಗೆ
 
ಮಗಳೀಗ ತನ್ನ ಜೀವನದ ಹೊಸ ತಿರುವಿನಲ್ಲಿ
ಇನ್ನವಳು ಇರಬೇಕು ಇಲ್ಲಲ್ಲ ವಸತಿ ಗೃಹದಲ್ಲಿ
 
ಹೊಸ ಊರು ಹೊಸ ಜನರು ಹೊಸ ಹುಮ್ಮಸ್ಸು
ಹೊಸತೆಲ್ಲವನೂ ಬರಮಾಡಿಕೊಂಬ ಆ ವಯಸ್ಸು
 
ಪುಣ್ಯಕೋಟಿ ಕರುವನು ಬಿಟ್ಟು ಹೋದ ಆ ಕವಿತೆ
ನೆನಪಾದರೂ ಅಷ್ಟೇನೂ ಇಲ್ಲ ಈ ಮನದಿ ವ್ಯಥೆ
 
ನಾಳೆಯ ದಿನಗಳು ಹೇಗೋ ದೇವರಿಗೇ ಗೊತ್ತು
ಮನದ ತುಂಬ ಆಶಾ ಭಾವನೆಗಳಿವೆ ಈ ಹೊತ್ತು
 
“ಡಾಕ್ಟ್ರ” ಮಗನೆಂದು ಕರೆಸಿಕೊಂಡೇ ಬೆಳೆದವನು
“ಡಾಕ್ಟ್ರ” ಅಪ್ಪನೆಂದು ಕರೆಸಿಕೊಳ್ಳಲು ಕಾಯುವೆನು
 
ನನ್ನ ಒಳಗಿರುವ ಅಪೂರ್ಣ ಆಶಯಗಳನು ನಾನು
ಆಕೆಯ ಮುಖಾಂತರ ಪೂರೈಸ ಹೊರಟಿಹೆನೇನು
 
ನನ್ನದೋ ಅವಳದೋ ಆಶಯಗಳು ಪೂರೈಸಲಿ
ಅವಳ ಭವಿಷ್ಯಕ್ಕಾಗಿ ನಿಮ್ಮೆಲ್ಲರ ಹಾರೈಕೆಗಳಿರಲಿ

 


ನಾನೀಗ ಏಕಾಂಗಿ!!!

14 ಮೇ 09
ಹಲವು ತಿಂಗಳುಗಳ
ನಂತರ ನಾನಾಗಿದ್ದೇನೆ
ಮತ್ತೀಗ  ಏಕಾಂಗಿ
 
ಏಕೆಂದರೆ ಮನೆಯಲ್ಲಿಲ್ಲ
ಈಗ ನನ್ನ ಮಗಳು
ಮತ್ತೆನ್ನ ಅರ್ಧಾಂಗಿ
 
ವರುಷವಾಗಿತ್ತು ನಮ್ಮ
ಮಗಳು ಊರತ್ತ
ಹೋಗದೇ
 
ತಪಸ್ಸಿಗೆ ಕೂತಂತಿತ್ತು
ಆಕೆ ತನ್ನ ಓದಿನಿಂದ
ಕಿಂಚಿತ್ತೂ ಬಿಡುವಿಲ್ಲದೇ
 
ಆಕೆಯಿಂದಾಗಿ ಆಕೆಯ
ತಾಯಿಗೂ ಹೋಗಲು
ಆಗಿರಲಿಲ್ಲ ಊರತ್ತ
 
ಏನೇ ಅವಶ್ಯಕತೆ
ಇದ್ದರೂ ನಾನೇ
ಓಡಬೇಕಿತ್ತು ಅತ್ತ
 
ಹಗಲು ಕಛೇರಿಯಲ್ಲಿ
ಹೇಗಾದರೂ ದಿನ
ಕಳೆದು ಹೋಗುತ್ತದೆ
 
ಮನೆಗೆ ಹೋದರೆ
ಅಲ್ಲಿಯ ಮೌನವೆನ್ನನು
ತಿನ್ನಲು ಬರುತ್ತದೆ
 
ಎಲ್ಲರೂ ಇಲ್ಲಿದ್ದಾಗ
ಹೆಚ್ಚು ಮಾತಾಡದೇ
ಮೌನವಾಗಿರುವಾಸೆ
 
ಯಾರೂ ಇಲ್ಲದಾಗ
ಯಾರಾದರೂ ಕರೆದು
ಮಾತಾಡಿಸಲೆಂಬಾಸೆ
 
ಯಾವುದನ್ನೂ ರೂಢಿ
ಮಾಡಿಕೊಂಡು ಬಿಟ್ಟರೆ
ಅದು ಬಲು ಕಷ್ಟ
 
ಯಾರ ಹಂಗೂ ಇಲ್ಲದೆ
ಬಾಳುವಭ್ಯಾಸವಾದರೆ
ಈ ಬಾಳಿನಲ್ಲಿಲ್ಲ ನಷ್ಟ