ಕಲಿಯುಗದ ಮಹಿಮೆ…!?

11 ಫೆಬ್ರ 11

ಮುಖವಾಡ ಹೊತ್ತವರೂ ಶಾಸ್ತ್ರಗಳ ಬೋಧಿಸಿದೊಡೆ
ನಗ್ನರಾಗಿ ನಿಂತವರೂ ಪರರ ಹಳಿಯ ತೊಡಗಿದೊಡೆ
ಕಲಿಯುಗದ ಮಹಿಮೆಯಿದು ಎಂದು ಅರಿಯಬೇಕಯ್ಯಾ!!

ಅಧರ್ಮಿಗಳ ಬೆಂಬಲಕೂ ನೂಕು ನುಗ್ಗಲು ಉಂಟಾದೊಡೆ
ಅನಾಚಾರಿಗಳ ಅಂಗಳದಲಿ ಜನ ಜಾತ್ರೆ ಸೇರಿ ಇರ್ದೊಡೆ
ಕಲಿಯುಗದ ಮಹಿಮೆಯಿದು ಎಂದು ಅರಿಯಬೇಕಯ್ಯಾ!!

ಲಂಗು ಲಗಾಮಿಲ್ಲದೇ ಸ್ವೇಚ್ಛಾಚಾರ ಮೆರೆಯುತ್ತ ಇರ್ದೊಡೆ
ಸ್ವಂತದಲಿ ನೈತಿಕತೆ, ಹಿರಿಯರಲಿ ಭಯ ಭಕುತಿ ಇಲ್ಲದೊಡೆ
ಕಲಿಯುಗದ ಮಹಿಮೆಯಿದು ಎಂದು ಅರಿಯಬೇಕಯ್ಯಾ!!

ನೈತಿಕತೆ ಅನೈತಿಕತೆಯ ಅಂತರ ಕಾಣೆಯಾಗತೊಡಗಿದೊಡೆ
ಹೆತ್ತಬ್ಬೆಯ ಅತ್ಯಾಚಾರಕ್ಕೆ ಮಗನೇ ಮನ ಮಾಡಿ ನಿಂದೊಡೆ
ಕಲಿಯುಗದ ಮಹಿಮೆಯಿದು ಎಂದು ಅರಿಯಬೇಕಯ್ಯಾ!!

**********************


ಭ್ರಷ್ಟಾಚಾರಿಗಳಿಗೆ ರಕ್ಷಣೆ ದೊರೆಯುತ್ತಿರುವುದು ಯಾರಿಂದ?

28 ಜನ 11

ಇದು ಇಂದು ನಾನು ಹೊಸದಿಗಂತ ದಿನಪತ್ರಿಕೆಯಲ್ಲಿ ಓದಿದ ಲೇಖನ.

ತಾವುಗಳೂ ಓದಿ ಎಂಬ ಇಚ್ಛೆಯೊಂದಿಗೆ ಇಲ್ಲಿ ತಮ್ಮೊಂದಿಗೆ ಹಂಚಿಕೊಂಡಿದ್ದೇನೆ:

ಸ್ಪಷ್ಟವಾಗಿಲ್ಲದಿದ್ದರೆ ಬರಹದ ಮೇಲೆ “ಕ್ಲಿಕ್” ಮಾಡಿ!


ಇನ್ನೆಷ್ಟು ಕಾಡಲಿದ್ದಾಳೋ ವಿದೇಶೀ ಪೂತನಿ…?

07 ಜನ 11

ನಮ್ಮ ಧ್ವಜವನ್ನು ಕಂಡು ಉರಿಯುವವರೂ ನಿಜದಿ ನಮ್ಮವರೇನ್ರೀ
ಈ ಕಾಶ್ಮೀರ ಭಾರತದೊಳಗಲ್ಲದೇ ಪರದೇಶದೊಳಗೆ ಇದೆಯೇನ್ರೀ

ನಮ್ಮ ದೇಶದ ವ್ಯವಸ್ಥೆ ಇಂದು ಯಾವ ಕೀಳು ಮಟ್ಟಕ್ಕಿಳಿದಿದೆ ನೋಡಿ
ರಾಷ್ಟ್ರಧ್ವಜವನ್ನೂ ವಿರೋಧಿಸುವವರ ಸಂಖ್ಯೆ ಇಲ್ಲಿ ಅದೆಷ್ಟಿದೆ ನೋಡಿ

ಗಣತಂತ್ರ ದಿವಸದಂದು ನಮ್ಮ ನಾಡೊಳಗೆ ರಾಷ್ಟ್ರಧ್ವಜ ಹಾರಿಸಬೇಡಿ
ಧ್ವಜವನ್ನು ಕಂಡು ಉರಿಯುವ ಬಂಧುಗಳನು ಸುಮ್ಮನೇ ಕೆಣಕಬೇಡಿ

ಎಲ್ಲರನೂ ಖುಷಿ ಪಡಿಸುತ್ತಾ ಖುರ್ಚಿಗೇ ಅಂಟಿಕೊಂಡು ಇದ್ದರಾಯ್ತು
ಪ್ರಗತಿ ಹೇಗಿರಲೇಕೆ ಭ್ರಷ್ಟಾಚಾರ ಮಾತ್ರ ತಾಂಡವವಾಡಿದರಾಯ್ತು

ಆಟ ಆಡಿಸಲು ಕೂತವರೇ ಮಾಡಿದ ನಷ್ಟ ಲಕ್ಷಾಂತರ ಕೋಟಿಯಂತೆ
ಆಟ ಮುಗಿದು ತಿಂಗಳುಗಳಾದ ಮೇಲೆ ಈಗ ತನಿಖೆಯ ನಾಟಕವಂತೆ

ಅರವತ್ತು ಕೋಟಿಯ ಬೋಫೋರ್ಸ್ ತನಿಖೆಗೆ ಖರ್ಚು ಶತಕೋಟಿ
ಅಷ್ಟಾಗಿಯೂ ಶಿಕ್ಷಿಸದೇ ಅಲ್ಲೆಲ್ಲರಿಗೂ ಅಪರಾಧಿಯಲ್ಲವೆಂಬ ಚೀಟಿ

ತನ್ನವರನ್ನೆಲ್ಲಾ ಪಾರು ಮಾಡಿದ್ದಾಳೆ ಹಗರಣಗಳ ತನಿಖೆಯಿಂದ
ಈ ನಾಡಿನ ಸರಕಾರ ನಡೆಸುತ್ತಾಳೆ ಪರೋಕ್ಷ ನಿಯಂತ್ರಣದಿಂದ

ಇನ್ನೆಷ್ಟು ವರುಷ ನಮ್ಮನ್ನೆಲ್ಲಾ ಕಾಡಲಿದ್ದಾಳೋ ವಿದೇಶೀ ಪೂತನಿ
ಬಾರದಿಹನ್ಯಾಕಿನ್ನೂ ಕೃಷ್ಣ, ಕೇಳಿಸದೇ ಆತನಿಗೆ ನಾಡ ಜನದನಿ?

**********************


ಕಡ್ಡಾಯ ಮತದಾನವೇ ಪರಿಹಾರವಲ್ಲ!

27 ಆಕ್ಟೋ 10

 

ಇಂದಿನ ಈ ಭ್ರಷ್ಟ ರಾಜಕೀಯ ವ್ಯವಸ್ಥೆಯಲ್ಲಿ ಏನಾದರೂ ಸುಧಾರಣೆ ಆಗಬೇಕಾದರೆ ಕಡ್ಡಾಯ ಮತದಾನದ ಕಾನೂನು ಜಾರಿಯಾಗಬೇಕು ಎಂಬ ಮಾತುಗಳು ಇತ್ತೀಚಿನ ದಿನಗಳಲ್ಲಿ ಬಹಳಷ್ಟು ಕೇಳಿಬರುತ್ತಿವೆ. ಆದರೆ, ಕಡ್ಡಾಯ ಮತದಾನದಿಂದ, ಈ  ಕುಲಗೆಟ್ಟ ರಾಜಕೀಯ ವ್ಯವಸ್ಥೆಯಲ್ಲಿ ಕಿಂಚಿತ್ತಾದರೂ ಬದಲಾವಣೆ ಆದೀತೆನ್ನುವುದು ಕನಸಿನ ಮಾತು. ವಿದ್ಯಾವಂತರು ಮತನೀಡದೇ ಉಳಿಯುವುದರಿಂದ, ಯೋಗ್ಯ ಅಭ್ಯರ್ಥಿಗಳು ಚುನಾವಣೆಯಲ್ಲಿ ಸೋತು, ಅಯೋಗ್ಯರು ಗೆದ್ದುಬಂದಿದ್ದಾರೆನ್ನುವುದು ಸತ್ಯಕ್ಕೆ ದೂರವಾದ ಮಾತು.

ಅದು, ಸದ್ಯಕ್ಕೆ ನಮ್ಮ ಮುಂದಿರುವ ಸಮಸ್ಯೆಯೇ ಅಲ್ಲ. ಮುಖ್ಯ ಸಮಸ್ಯೆಯೆಂದರೆ, ಯೋಗ್ಯ ಅಭ್ಯರ್ಥಿಗಳೇ ರಾಜಕೀಯ ಕಣಕ್ಕೇ ಧುಮುಕುತ್ತಿಲ್ಲ ಎನ್ನುವುದು. ಪಕ್ಷಭೇದವಿಲ್ಲದೇ ಎಲ್ಲಾ ಪಕ್ಷಗಳಿಂದಲೂ ಚುನಾವಣಾ ಕಣಕ್ಕೆ ಇಳಿಸಲ್ಪಡುತ್ತಿರುವ ಅಭ್ಯರ್ಥಿಗಳು ಒಂದೋ ರಟ್ಟೆ ಬಲವುಳ್ಳವರು ಅಥವಾ ಹಣಬಲವುಳ್ಳವರು. ಅಭ್ಯರ್ಥಿಗಳ ಆಯ್ಕೆಯಲ್ಲಿ ಯಾವುದೇ ಕನಿಷ್ಠ ಅರ್ಹತೆ ಅಥವಾ ಯೋಗ್ಯತೆಯ ಪರಿಗಣನೆ ಇರುವುದೇ ಇಲ್ಲ. ಯಾವನೇ ಅಭ್ಯರ್ಥಿ ಆಯಾ ಕ್ಷೇತ್ರದಲ್ಲಿ ಗೆಲ್ಲುವ ಕುದುರೆಯಾಗಿರಬೇಕು. ಅಲ್ಲದೇ ಗೆಲ್ಲುವುದಕ್ಕಾಗಿ ಸಾಕಷ್ಟು ಹಣ ಖರ್ಚು ಮಾಡುವವನಾಗಿರಬೇಕು. ಅಂಥ ಅಭ್ಯರ್ಥಿಗಳು ಪೈಪೋಟಿಗೆ ನಿಂತವರಂತೆ ತಮ್ಮಿಂದಾದಷ್ಟು ಹಣ ಖರ್ಚು ಮಾಡಿ ಚುನಾವಣೆಯಲ್ಲಿ ಗೆದ್ದು ಬರುತ್ತಿದ್ದಾರೆ. ಗೆದ್ದು ಬಂದನಂತರ ತಾನು ಖರ್ಚು ಮಾಡಿದ ಹಣದ ಹತ್ತರಷ್ಟು ಸಂಪಾದನೆ ಮಾಡುವುದೊಂದೇ ಆತನ ಮೂಲ ಉದ್ದೇಶವಾಗಿರುತ್ತದೆ. ಅದು ನ್ಯಾಯವೇ ಆಗಿದೆ. ಯಾವೊಬ್ಬನೂ ತಾನು ಖರ್ಚುಮಾಡಿದ್ದನ್ನು ವಾಪಾಸು ಗಳಿಸುವ ಪ್ರಯತ್ನ ಮಾಡದೇ ಉಳಿದರೆ ದಡ್ದನೆನಿಸಿಕೊಳ್ಳುತ್ತಾನೆ. ವಿದ್ಯಾವಂತ ಮತದಾರನ ಮಂದೆ ಹೆಚ್ಚಿನ ಆಯ್ಕೆಗಳೇ ಇಲ್ಲ. ಆತನ ಪಾಲಿಗೆ ಎಲ್ಲರ ಮುಖಗಳೂ ಒಂದೇ ತೆರನಾಗಿರುತ್ತವೆ. ಎಲ್ಲಾ ಪಕ್ಷಗಳೂ ಒಂದೇ ಆಗಿರುತ್ತವೆ. ಆತ ಯಾರಿಗೆ ಮತ ನೀಡಿದರೂ ಆತನ ಜೀವನ ಶೈಲಿಯಲ್ಲಿ ಹೆಚ್ಚಿನ ಬದಲಾವಣೆಯ ನಿರೀಕ್ಷೆಯೇ ಇರುವುದಿಲ್ಲ. ಇನ್ನು ಅವಿದ್ಯಾವಂತ ಮತದಾರರ ಪಾಲಿಗೂ ಆಯ್ಕೆಗಳಿಲ್ಲ. ಅವರ ಪಾಲಿಗೆ ಇರುವುದು ತಮ್ಮ ಕೈಗೆ ಸಿಕ್ಕಿದ ನೋಟಿನ ಮತ್ತು ಆ ನೋಟು ನೀಡಿದವರ ಗುರುತು ಮಾತ್ರ. ಪಕ್ಷ ಮತ್ತು ಅಭ್ಯರ್ಥಿ ಇವೆಲ್ಲ್ಲಾ ಅವರ ಪಾಲಿಗೆ ಗೌಣ.

ಹಾಗಾದರೆ ಇಂದಿನ ಆವಶ್ಯಕತೆ ಏನು? 

ನಮ್ಮ ನಾಡಿನಲ್ಲಿ ಮಾಮೂಲಿ ಜವಾನನಿಂದ ಮತ್ತು ಸೈನಿಕನಿಂದ ಹಿಡಿದು, ಯಾವುದೇ ಉನ್ನತ ದರ್ಜೆಯ ಕೆಲಸಕ್ಕೆ ಸೇರಬೇಕಾದರೂ ಕನಿಷ್ಟ ವಿದ್ಯಾರ್ಹತೆಯ ಅಗತ್ಯ ಇದೆ. ಹಾಗಾಗಿ ಯಾವುದೇ ಚುನಾವಣೆಯಲ್ಲಿ  ಅಭ್ಯರ್ಥಿಯಾಗಲೂ ಕನಿಷ್ಠ ವಿದ್ಯಾರ್ಹತೆ ನಿರ್ಧರಿತವಾಗಬೇಕು. ಅಂತೆಯೇ ನಿವೃತ್ತಿಗೂ ವಯಸ್ಸು ನಿರ್ಧರಿತವಾಗಬೇಕು. ಹತ್ತಾರು ಪಕ್ಷಗಳ ಪ್ರಸ್ತುತ ಪದ್ಧತಿಗಿಂತ ದ್ವಿಪಕ್ಷ ಪದ್ಧತಿ ಜಾರಿಯಾಗಬೇಕು. “ಒಂದೋ ಇಲ್ಲಿರು. ಇಲ್ಲಾ ಅಲ್ಲಿರು. ಎರಡೂ ಇಲ್ಲಾಂದ್ರೆ ತೆಪ್ಪಗೆ ತನ್ನ ಮನೆಯಲ್ಲಿರು”, ಅನ್ನುವ ಪದ್ಧತಿ ಬರಬೇಕು . ಚುನಾವಣೆಯಲ್ಲಿ ಒಂದು ಪಕ್ಷದಿಂದ ಸ್ಪರ್ಧಿಸಿದ ಅಭ್ಯರ್ಥಿ, ಕನಿಷ್ಟ ಮುಂದಿನ ಮಹಾ ಚುನಾವಣೆಯ ತನಕ ಅದೇ ಪಕ್ಷದ ಸದಸ್ಯನಾಗಿರಬೇಕು. ಆರಿಸಿ ಹೋದ ಅಭ್ಯರ್ಥಿ ತನ್ನ ಕ್ಷೇತ್ರದ ಜನರ ಎಲ್ಲಾ ಸಮಸ್ಯೆಗಳಿಗೆ ಉತ್ತರ ನೀಡುವವನಾಗಿರಬೇಕು. ತನ್ನ ಕ್ಷೇತ್ರ ಮತ್ತು ಪಕ್ಷಕ್ಕೆ ನಿಷ್ಠಾವಂತನಾಗಿರಬೇಕು. ಮುಂದಿನ ಮಹಾಚುನಾವಣೆಯ ತನಕ ತನ್ನ ಸ್ಥಾನಕ್ಕೆ ರಾಜೀನಾಮೆ ನೀಡಬಾರದು. ಹಾಗೊಮ್ಮೆ ನೀಡಿದರೆ ಮುಂದಿನ ಮೂರು ಮಹಾಚುನಾವಣೆಯಲ್ಲಿ ಸ್ಪರ್ಧಿಸುವ ಅರ್ಹತೆ ಕಳೆದುಕೊಳ್ಳಬೇಕು. ಇನ್ನೊಂದು ಪ್ರಮುಖವಾದ ಆವಶ್ಯಕತೆ ಏನೆಂದರೆ ಯಾವುದೇ  ಚುನಾವಣೆಗಳಲ್ಲಿ, ಯಾರಿಗೂ ಮತನೀಡದೇ ಎಲ್ಲಾ ಅಭ್ಯರ್ಥಿಗಳನ್ನು ತಿರಸ್ಕರಿಸುವ ಸೌಲಭ್ಯವನ್ನು ಮತದಾರನಿಗೆ ಒದಗಿಸಿರಬೇಕು. ಹಾಗೆ ತನ್ನ ಕ್ಷೇತ್ರದ ಮತದಾರರಿಂದ ತಿರಸ್ಕೃತರಾದ ಅಭ್ಯರ್ಥಿಗಳು ಮುಂದಿನ ಮೂರು ಮಹಾ ಚುನಾವಣೆಗಳಲ್ಲಿ ಸ್ಪರ್ಧಿಸುವ ಅರ್ಹತೆ ಕಳೆದುಕೊಳ್ಳಬೇಕು. ಓರ್ವ ಸದಸ್ಯ ಹಠಾತ್ ನಿಧನಾರಾದಾಗ ಅಥವಾ ಅನಾರೋಗ್ಯಪೀಡಿತನಾಗಿ ರಾಜಕೀಯ ನಿವೃತ್ತನಾದಾಗ, ಆತನ ಸಂಬಂಧಿಕರಿಗೆ ಅವಕಾಶವನ್ನು ಕಲ್ಪಿಸುವಾಗಲೂ ಅರ್ಹತೆಯ ಮಾನದಂಡವನ್ನು ಉಪಯೋಗಿಸಿರಲೇಬೇಕು. ಚುನಾವಣೆಯಲ್ಲಿ ಗೆದ್ದ ಎಲ್ಲಾ ಅಭ್ಯರ್ಥಿಗಳು ತಮ್ಮ ಆಸ್ತಿಪಾಸ್ತಿಗಳ ವಿವರವನ್ನು ಪ್ರತಿ ವರ್ಷ ಆಯಾ ಕ್ಶೇತ್ರದ ಮತದಾರರ ಮುಂದೆ, ಸೂಕ್ತ ದಾಖಲೆಗಳ ಸಮೇತ  ಬಹಿರಂಗಪಡಿಸಬೇಕು.

ಈ ಎಲ್ಲಾ ವ್ಯವಸ್ಥೆ ಜಾರಿಯಾದ ನಂತರ ಕಡ್ಡಾಯ ಮತದಾನದ ಕಾನೂನು ಕೂಡ ಜಾರಿಯಾಗಬೇಕು. ಮತದಾನ ಮಾಡದವರಿಗೆ ಶಿಕ್ಷೆ ವಿಧಿಸಬೇಕು. ಆಗಲಷ್ಟೇ, ಮತದಾನ ಮಾಡದ ವಿದ್ಯಾವಂತ ಮತದಾರರನ್ನು ಸಾರಸಗಟಾಗಿ ಎಲ್ಲರೂ ದೂರಬಹುದು. ಎಲ್ಲಿಯ ತನಕ ಈ ಭ್ರಷ್ಟ ರಾಜಕೀಯ ವ್ಯವಸ್ಥೆ ಹೀಗೆಯೇ ಮುಂದುವರಿಯುತ್ತದೆಯೋ, ಅಲ್ಲಿಯತನಕ, ಮತದಾನ ಮಾಡದ ವಿದ್ಯಾವಂತ ಮತದಾರರನ್ನು ಸುಖಾಸುಮ್ಮನೇ ದೂರಿ ಏನೂ ಪ್ರಯೋಜನವಿರದು.

*****

ಈ ಬರಹ ಉದಯವಾಣಿಯ ಮಣಿಪಾಲ, ಹುಬ್ಬಳ್ಳಿ ಮತ್ತು ಮುಂಬಯಿ ಆವೃತ್ತಿಗಳಲ್ಲಿ,

ಬುಧವಾರ, ೨೭ ಅಕ್ಟೋಬರ್ ೨೦೧೦ ರಂದು ಪ್ರಕಟಗೊಂಡಿರುತ್ತದೆ.


ಒಳ್ಳೆಯವರೆನಿಸುತ್ತಾರೆ ನನಗೆ ಆ ಪರದೇಶಿಗಳು!

13 ಆಗಸ್ಟ್ 10

ಪರದೇಶಿಗಳ ದಾಸ್ಯದಿಂದ
ಸಿಕ್ಕಿತೆನಗೆ ಅಂದು ಮುಕ್ತಿ,
ಕೊನೆಗೂ ಸಫಲವಾಗಿತ್ತು
ನನ್ನ ಎಲ್ಲಾ ಮಕ್ಕಳ ಯುಕ್ತಿ;

ನವ ವಧುವಿನಂತೆ ನನ್ನನ್ನು
ಶೃಂಗಾರ ಮಾಡಿದರಂದು,
ನನ್ನ ಮಕ್ಕಳ ಸ್ವಾಧೀನಕ್ಕೆ
ಒಪ್ಪಿಸಿಬಿಟ್ಟರು ನನ್ನನಂದು;

ಮುದುಕನಲ್ಲದಿದ್ದರೂ ಆತನಿದ್ದ
ಯುವಕನಾಗಿರದ ಸ್ಪುರದ್ರೂಪಿ,
ಗದ್ದುಗೆಯೇರಿದ ಮೇಲೆ ಅರಿತೆ
ಆತ ನಿಜವಾಗಿಯೂ ಬಹುರೂಪಿ;

ದಾಸ್ಯದಿಂದ ನನ್ನನ್ನು ಬಿಡಿಸಿದರೂ
ಸೋತಿದ್ದ ವಿದೇಶಿಯಳ ಲಾಸ್ಯಕ್ಕೆ,
ವಿಷಯ ಸಾರ್ವಜನಿಕವಾಗಿ ಆತ
ಆಗಾಗ ಒಳಪಟ್ಟಿದ್ದ ಅಪಹಾಸ್ಯಕ್ಕೆ;

ತನ್ನೆಲ್ಲಾ ಚತುರತೆಯಿಂದ ಆತ
ಮೆರೆದ ತಾನು ಸಾಯೋ ತನಕ,
ಆತನಳಿದ ಮೇಲೆ ಬಂದಿದ್ದ  ಲಾಲ
ಬಹದ್ದೂರ ಆತ ನಿಜದಿ ಜನಸೇವಕ;

ಆದರೆ, ಅಳಿದವನ ಮಗಳ ಪಾಲಿಗೆ
ಆಗಿತ್ತು ಆ ವಿಷಯ ಅಸಹನೀಯ,
ಹೆಸರು ಬಹದ್ದೂರನಾದರೂ ಆತ
ಸಾಯಬೇಕಾದುದು ವಿಶಾದನೀಯ;

ಬಹದ್ದೂರ ಅನುಮಾನಾಸ್ಪದವಾಗಿ
ಸತ್ತಿದ್ದು ದೂರದ ಆ ತಾಷ್ಕೆಂಟಿನಲ್ಲಿ,
ಈ ದೇಶದಲ್ಲಿ ಭ್ರಷ್ಟಾಚಾರದ ಬೀಜ
ಬಿತ್ತನೆಯಾಯ್ತು ಆ ವಿಷಗಳಿಗೆಯಲ್ಲಿ;

ಮತ್ತೇನಿಲ್ಲ,  ಶುರು ಆಯ್ತು ಅಲ್ಲಿಂದ
ಅಧಿಕಾರಕ್ಕೇರಿದವಳ ಸರ್ವಾಧಿಕಾರ,
ಒಳ್ಳೆಯದು ಕಡಿಮೆ, ಆಕೆ ಬೀಜ ಹಾಕಿ
ಹೋದ ಕೆಟ್ಟ ರೂಢಿಗಳೇ ಅಪಾರ;

ವಂಶವನು ಮೆರೆಸುವ ಹೆಬ್ಬಯಕೆಯಲಿ
ಆಕೆ ನನ್ನ ಕ್ಷೇಮಾವೃದ್ಧಿಯ ನಿರ್ಲಕ್ಷಿಸಿ,
ತಾಂಡವನೃತ್ಯವನೇ ಮಾಡಿದಳು ಈ
ನಾಡಲಿ ದುರ್ಗೆಯ ರೂಪವನು ಧರಿಸಿ;

ನ್ಯಾಯಾಂಗವನ್ನು ತನ್ನಡಿಯಾಳಾಗಿಸಿ
ಶಾಸಕಾಂಗವ ಅಮಾತಿನಲ್ಲಿಡಿಸಿದಳು,
ಕಿರಿಮಗನೊಂದಿಗೆ ಸೇರಿ ತನ್ನ ಮಿತಿ
ಮೀರಿ ಅನಾಚರ ನಡೆಸಿ ಮೆರೆದಳು;

ಅಂದಿನಿಂದ ಇಂದಿಗೂ ಮುಕ್ತಿ ಸಿಕ್ಕಿಲ್ಲ
ಭ್ರಷ್ಟಾಚಾರ ಮತ್ತು ಅನಾಚಾರಗಳಿಂದ,
ಏನು ಸಾಧಿಸಿದರೋ ಮಕ್ಕಳು ನನ್ನನ್ನು
ಬಿಡಿಸಿ ಆ ಪರದೇಶಿಯರ ದಾಸ್ಯದಿಂದ;

ಇಂದಿಗೂ ಇಲ್ಲಿ ಅಧಿಕಾರ ವಿದೇಶಿಯದ್ದೇ
ಆಕೆಯ ಸೆರಗಿನ ಹಿಂದೆ ಭ್ರಷ್ಟಾಚಾರಿಗಳು,
ಒಂಟಿಯಾಗಿ  ಅಳುತ್ತೇನೆ ನನಗಿವರಿಗಿಂತ
ಒಳ್ಳೆಯವರೆನಿಸುತ್ತಾರೆ ಆ ಪರದೇಶಿಗಳು!
******************

 


ಈ ದೇಶದ ನಾಯಕರೆಲ್ಲಾ ಭ್ರಷ್ಟರಾಗಿದ್ದರೆ ಆಕೆಗೆ ಆರಾಮ!

06 ಆಗಸ್ಟ್ 10

ನಿಜವಾಗಿಯೂ ಬಹಳ ಕಿಲಾಡಿ ಹೆಂಗ್ಸು ಕಣ್ರೀ ಈ ಪರದೇಶೀ ಗಾಂಧಿ

ನಮ್ಮನ್ನೆಲ್ಲಾ ಮಾಡಿದ್ದಾಳಾಕೆ ಭ್ರಷ್ಟಾಚಾರಿಗಳ ಅಸಹಾಯಕ ಬಂಧಿ


ದೇಶದ ಉದ್ದಗಲಕ್ಕೂ ಭ್ರಷ್ಟ ರಾಜಕಾರಣಿಗಳದ್ದೇ ಈಗ ಕಾರುಬಾರು

ಬಯಲಾಗುತ್ತಲೇ ಇರುತ್ತವೆ ಹೊಸ ಹೊಸ ಕಾಂಡ ದಿನವೂ ಐದಾರು


ಶಾಸಕಾಂಗ ಕಾರ್ಯಾಂಗ ನ್ಯಾಯಾಂಗ ಯಾವುದೂ ಉಳಿದಿಲ್ಲ ಈಗ

ಎಲ್ಲ ಕಡೆಯೂ ಭ್ರಷ್ಟರೇ ತುಂಬಿ ಹಾಳಾಗುತ್ತಿದೆ ಈ ದೇಶದ ಜನಾಂಗ


ರಾಜ್ಯಗಳಲಿ ಭ್ರಷ್ಟರಿದ್ದರೆ ರಾಜ್ಯ ಸರಕಾರಗಳು ಕಾರ್ಯ ನಡೆಸಬೇಕು

ರಾಜ್ಯ ಸರಕಾರಗಳೇ ಭ್ರಷ್ಟರಾದಾಗ ಕೇಂದ್ರ ಮಧ್ಯ ಪ್ರವೇಶಿಸಬೇಕು


ಕೇಂದ್ರ ಸರಕಾರದಲ್ಲೇ ಭ್ರಷ್ಟರಿರಲು ಜನ ಇನ್ನು ಯಾರನ್ನು ಕೇಳಬೇಕು

ಪ್ರಧಾನ ಮಂತ್ರಿಯ ಕೇಳಲೇ, ಛೇ.. ಇಲ್ಲ…  ಆತ ಆಕೆಯನ್ನೇ ಕೇಳಬೇಕು


ಪ್ರಧಾನಿಗಳಿಗೆ ಸಲಹೆ ನೀಡಲು ಮಂತ್ರಿಮಂಡಲ ಇರಬೇಕಾದ್ದು ಸಹಜ

ಆದರೆ ಮಂತ್ರಿ ಮಂಡಲ ಆಕೆಯ ಮಾತನ್ನೇ ಕೇಳಬೇಕು ಇದೂ ನಿಜ


ಎಂದೂ ಇದ್ದಿರದ ಈ ರಾಷ್ಟ್ರೀಯ ಸಲಹಾ ಮಂಡಳಿಯ ಅಧ್ಯಕ್ಷೆ ಆಕೆಯೇ

ಹಾಗಾಗಿ ದೇಶದ ಎಲ್ಲಾ ಭ್ರಷ್ಟರಿಗೂ ಸಲುಗೆ ನೀಡಿರುವವರೂ ಆಕೆಯೇ


ದೇಶದ ನಾಯಕರುಗಳೆಲ್ಲಾ ಭ್ರಷ್ಟರಾಗಿ ತಮ್ಮ ತಿಜೋರಿ ತುಂಬುತಿರಲು

ತಮ್ಮನ್ನೇನೂ ಮಾಡಲಾರಳು ಎಂಬ ದೃಢ ನಂಬುಗೆ ಇಹುದು ಎಲ್ಲರಲೂ


ಕೊಟ್ರ‍ೋಚಿ, ಆಂಡರ‍್ಸನ್ ರನ್ನೇ ಬಚಾವಾಗಲು ಬಿಟ್ಟ ಮನೆಯವಳು

ನೀವೇ ಹೇಳಿ, ಇನ್ನು ಇವರನ್ನು ಆಕೆ ಏಕೆ ತರಾಟೆಗೆ ತೆಗೆದುಕೊಂಡಾಳು


ಈ ದೇಶದ ನಾಯಕರೆಲ್ಲಾ ಭ್ರಷ್ಟರಾಗಿ ತಮ್ಮಲ್ಲೇ ಇದ್ದರೆ ಆಕೆಗೂ ಆರಾಮ

ಆಕೆಯ ಸುದ್ದಿಗೆ ಬಾರದೇ ಇದ್ದರೆ, ಆಕೆಯ ಕಾರ್ಯಗಳು ಸದಾ ಸುಕ್ಷೇಮ

**************


ಮಾನ್ಯ ಯಡ್ಯೂರಪ್ಪನವರಿಗೆ ದೊಡ್ಡ ನಮಸ್ಕಾರ!

28 ಜೂನ್ 10

ಮಾನ್ಯ ಯಡ್ಯೂರಪ್ಪನವರೇ,

ನಿಮಗೊಂದು ದೊಡ್ಡ ನಮಸ್ಕಾರ, ಅಲ್ಲದೇ ನಾನು ಹೃದಯನೊಂದು ತುಂಬಿ ಸಲ್ಲಿಸುತ್ತಿರುವ ಧನ್ಯವಾದಗಳು.

ನಮ್ಮ ಮನೆಯೊಳಗೇ ಸ್ವಾತಂತ್ರ್ಯಯೋಧರಾದ ಮತ್ತು ಭಾರತೀಯ ರಾಷ್ಟ್ರೀಯ ಕಾಂಗ್ರೇಸ್ ಪಕ್ಷದ ಸದಸ್ಯರಾಗಿದ್ದ ನಮ್ಮ ತಾತನವರು ಇದ್ದಿದ್ದ್ದರೂ, ಒಂಭತ್ತು ಹತ್ತು ವರುಷದ ಹುಡುಗನಾಗಿದ್ದ ನನಗೆ ಜನಸಂಘದ ದೀಪದ ಗುರುತಿನ ಮೇಲೆ ಅದೇಕೋ ಅವ್ಯಕ್ತ ಪ್ರೇಮ. ಮಾನ್ಯ ಡಾ. ವಿ. ಎಸ್. ಆಚಾರ್ಯರ ಚುನಾವಣಾ ಪ್ರಚಾರ ಕಾರ್ಯಕ್ರಮಗಳಿಗೆ ಬರಿಗಾಲಿನಲ್ಲೇ ಓಡಾಡಿ ನಮ್ಮದೇ ಕೊಡುಗೆ ನೀಡಿದ್ದ ನೆನಪು ಈಗಲೂ ಇದೆ. ಅದು ಸಾವಿರದ ಒಂಭೈನೂರ ಎಪ್ಪತ್ತರ ದಶಕದ ಆದಿ.

ಶ್ರೀಮತಿ ಇಂದಿರಾಗಾಂಧಿಯವರು ಮಣಿಪಾಲಕ್ಕೆ ಭೇಟಿ ನೀಡಿದಾಗ ಹೋಗಿ ಭಾಷಣ ಕೇಳಿಬಂದಿದ್ದರೂ, ಕಾಂಗ್ರೇಸ್ ನನಗೆ ಅದೇಕೋ ಹಿಡಿಸಿರಲಿಲ್ಲ. ವಾಜಪೇಯಿಯವರ, ಜಾರ್ಜ್ ಫೆರ್ನಾಂಡಿಸರ, ಮೊರಾರ್ಜಿ ದೇಸಾಯಿಯವರ, ಆಡ್ವಾಣಿಯವರ, ಭಾಷಣಗಳಿಗೆ ನಾನೂ ಕಿವಿಯಾಗಿದ್ದೆ ಆ ದಶಕದ ಉತ್ತರಾರ್ಧದ ದಿನಗಳಲ್ಲಿ. ಅದೇಕೋ ಏನೋ ನೆಹರೂರವರಿಂದಲೇ ಉತ್ತಮ ಭಾಷಣಕಾರ ಎಂದು ಹೊಗಳಿಸಿಕೊಂಡಿದ್ದ ಅಟಲ್ ಬಿಹಾರಿ ವಾಜಪೇಯಿಯವರನ್ನು ಒಮ್ಮೆ ಪ್ರಧಾನಿಯಾಗಿ ನೋಡಬೇಕೆಂಬ ಆಸೆ ಅಂದಿನ ದಿನಗಳಿಂದಲೇ ಮನದಲ್ಲಿ ಹುದುಗಿಹೋಗಿತ್ತು. ಅದರೊಂದಿಗೆ, ನಮ್ಮ ರಾಜ್ಯದಲ್ಲೂ ಭಾರತೀಯ ಜನತಾ ಪಕ್ಷದ ಸರಕಾರ ಅಧಿಕಾರ ನಡೆಸುವುದನ್ನು ನೋಡಬೇಕೆಂಬ ಆಸೆಯೂ ಕೂಡ. ವಾಜಪೇಯಿಯವರು ಪ್ರಧಾನಿಯೂ ಆದರು, ನೇಪಥ್ಯಕ್ಕೂ ಸರಿದರು.

ಕರ್ನಾಟಕದಲ್ಲಿ ಭಾಜಪ ಅಧಿಕಾರಕ್ಕೆ ಬಂದಾಗ ನನ್ನ ಎರಡನೆಯ ಆಸೆ ಕೈಗೂಡಿದ ಸಂತಸ ನನ್ನ ಮನದಲ್ಲಿ. ಆದರೆ ಕಳೆದು ಹೋದ ಏಳುನೂರ ಮೂವತ್ತು-ನಲವತ್ತು ದಿನಗಳಲ್ಲಿ ದಿನದಿನವೂ ನನಗೆ ಮತ್ತು ನನ್ನ ಸಹಮನಸ್ಕರಿಗೆಲ್ಲಾ ಅಘಾತವನ್ನೇ ನೀಡುತ್ತಾ ಬಂದಿರಿ ನೀವು. ರಾಜಕೀಯದ ಬಗ್ಗೆ ಆಸಕ್ತಿ ತೋರಲು ತೊಡಗಿದ್ದ ವಿದ್ಯಾವಂತ ಯುವಜನಾಂಗವನ್ನು ಮತ್ತೆ ಹಿಂದಕ್ಕಟ್ಟುವಂತೆ ಮಾಡಿಬಿಟ್ಟಿರಿ ನೀವು. ಚುನಾವಣೆಗಳಲ್ಲಿ ಮತದಾನಕ್ಕೆ ಯಾಕೆ ಹೋಗಬೇಕು ಎಂದು ನಮ್ಮನ್ನೇ ನಾವು ಕೇಳಿಕೊಳ್ಳುವಂತೆ ಮಾಡಿದಿರಿ ನೀವು. ಅದಕ್ಕಾಗಿ ಈ ದೊಡ್ಡ ನಮಸ್ಕಾರ ಮತ್ತು ಧನ್ಯವಾದಗಳು. ಇನ್ನು ರಾಜಕೀಯ ಬೇಡ ಸ್ವಾಮೀ … ರಾಜಕೀಯ ಬೇಡವೇ ಬೇಡ ನಮಗೆ.

ಅವರಿವರು ಆಡಿದಂತೆ ನಿಮಗೆ ನಡೆಯಲಾಗದಿದ್ದರೂ ನೀವು ನುಡಿದಂತಾದರೂ ನಡೆದು ತೊರಿಸಿದ್ದರೆ, ಮೆಚ್ಚಿಕೊಳ್ಳಬಹುದಿತ್ತು. ತನ್ನ ಸಂಪುಟದಲ್ಲಿದ್ದ ಇದ್ದ ಏಕೈಕ ಮಹಿಳಾಮಂತ್ರಿಗೆ ಅಗತ್ಯಕ್ಕಿಂತ ಹೆಚ್ಚಿನ ಪ್ರಾಶಸ್ತ್ಯಕೊಡುವ ಯತ್ನದಲ್ಲಿ, ಕಂಡವರ ಕಣ್ಣಿಗೆ ಮುಳ್ಳುಚುಚ್ಚುವಂತೆ ಮಾಡಿದಿರಿ. ನಂತರ ತಮ್ಮ ವಿರೋಧಿಗಳ ಮಾತಿಗೆ ಮನ್ನಣೆ ನೀಡಿ ಆಕೆಯನ್ನೇ ಮನೆಗೆ ಕಳುಹಿಸಿ, ಸಾರ್ವಜನಿಕವಾಗಿ ಕಣ್ಣೀರು ಸುರಿಸಿದಿರಿ. ಅಧಿಕಾರಶಾಹಿಗಳಲ್ಲಿ ಮತ್ತು ಭ್ರಷ್ಟಾಚಾರಿಗಳಲ್ಲಿ ತಮ್ಮ ನಿಯತ್ತನ್ನೇ ಅಡವಿಟ್ಟಂತಿರುವ ನೀವು, ಜನರೆದುರು ಮೊಸಳೆಕಣ್ಣೀರು ಸುರಿಸುವುದನ್ನು ಬಿಟ್ಟು ಬೇರೇನನ್ನೂ ಮಾಡಲಾಗದ, ಪಟ್ಟಭದ್ರಹಿತಾಸಕ್ತಿಯನ್ನು ಹೊಂದಿದ, ಗಾದಿಗೇ ಅಂಟಿಕೊಂಡು ಇರಲು ಬಯಸುವ, ಓರ್ವ ಬಲಹೀನ ಎಂಬುದನ್ನು ಮತ್ತೆ ಮತ್ತೆ ಸಾಬೀತುಪಡಿಸಿದಿರಿ. ತಮ್ಮ ರಾಜಕೀಯ ಜೀವನದ ಶವಪೆಟ್ಟಿಗೆತಯಾರಾಗಿದೆ. ಎಂದು ಪತನಗೊಂಡು ಅದರೊಳಗೆ ಮಲಗುತ್ತೀರೋ ನಿಮಗೇ ಗೊತ್ತು. ಆ ಶವಪೆಟ್ಟಿಗೆಗೆ ಹಲಗೆಗಳ ಮತ್ತು ಮೊಳೆಗಳ ಸರಬರಾಜು ಮಾಡಿದ್ದು ಬೇರಾರೂ ಅಲ್ಲ. ಸ್ವತಃ ನೀವೇ ಅನ್ನುವ ಸತ್ಯದ ಅರಿವು ನಿಮಗಿದೆಯೇ? ಈಗಲೂ ಎಚ್ಚೆತ್ತುಕೊಂಡು ಉಳಿದಿರುವ ಮುಂದಿನ ಮೂರು ವರುಷಗಳಲ್ಲಿ, ತಮ್ಮ ಸುದೀರ್ಘ ರಾಜಕೀಯ ಅನುಭವದ ಶಕ್ತಿಯನ್ನು ಬಳಸಿಕೊಂಡು, ರಾಜಕೀಯ ಭ್ರಷ್ಟಾಚಾರದ ಈ ಜಲಧಾರೆಗೆ ವಿರುದ್ಧವಾಗಿ ಈಜುವ ಮನಸ್ಸುಮಾಡಿ, ಜನರ, ಅದರಲ್ಲೂ ಯುವಜನತೆಯ, ಮನಸ್ಸುಗಳನ್ನು ಗೆಲ್ಲುವ ಪ್ರಯತ್ನ ಮಾಡಿ. ಇಲ್ಲವಾದರೆ ಮೂರು ವರುಷಗಳ  ಅಥವಾ ಅದಕ್ಕೂ ಬಹಳಷ್ಟು ಮೊದಲೇ ಬರಬಹುದಾದ  ಚುನಾವಣೆಯಲ್ಲಿ ನಡೆಯುವ ಮತದಾನ ಶೇಕಡಾ ಮೂವತ್ತರ ಆಸುಪಾಸಿನಲ್ಲೇ ಉಳಿದೀತು. ಮತ್ತು ನೀವು ಖಾಯಂ ಆಗಿ ಮನೆಯಲ್ಲೇ ಉಳಿಯಬೇಕಾದೀತು. ಜನರ ಮನದಲ್ಲಿರುವ ಪ್ರಜಾಪ್ರಭುತ್ವದ ಮೇಲಿನ ವಿಶ್ವಾಸ ಸಂಪೂರ್ಣ ನಾಶವಾದೀತು ಮತ್ತು ಅದರ ಶ್ರೇಯ ನಿಮಗಷ್ಟೇ.

ಲೋಕಾಯುಕ್ತರಿಂದ ಆಪಾದಿತನಾಗಿದ್ದ ಶಾಸಕ ಸಂಪಂಗಿಯವರನ್ನು ಸದನ ಸಮಿತಿ ನಿರ್ದೋಷಿ ಎಂದು ಸಾರಿದಾಗ, “ಮಾನ್ಯ ಲೋಕಾಯುಕ್ತರೇ ದಯವಿಟ್ಟು ರಾಜೀನಾಮೆ ನೀಡಿ” ಎಂದು ನಾನು ಇಲ್ಲೇ ಬರೆದಿದ್ದೆ. 

ಆದರೆ ಇಂದು ನಿಮ್ಮಲ್ಲಿ ರಾಜೀನಾಮೆ ಬೇಡುತ್ತಿಲ್ಲ. ತಪ್ಪುಗಳನ್ನು ಸರಿಪಡಿಸಿಕೊಂಡು, ಆಡಳಿತ ಶೈಲಿಯಲ್ಲಿ ಬದಲಾವಣೆ ತಂದುಕೊಂಡು ತೋರಿಸಿಕೊಡಿ ನಮ್ಮ ನಾಡಿನ ಜನತೆಗೆ, ಭಾಜಪಕ್ಕೂ ಆಡಳಿತ ನಡೆಸಲು ಬರುತ್ತದೆ ಎಂದು.

ಆಗ ನಾನು ಇಲ್ಲೇ ನಿಮಗೆ ಮತ್ತೊಮ್ಮೆ ದೊಡ್ಡ ನಮಸ್ಕಾರಮಾಡಿ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ.

*******************


ಈಗ ಮೂರೂ ಬಿಟ್ಟವರೇ ಅಧಿಕಾರದಲ್ಲಿರುವವರು!!!

24 ಡಿಸೆ 09

 

 

ಸ್ವಾಮೀ ನಾವೆತ್ತ ಸಾಗುತ್ತಿದ್ದೇವೆ ಅನ್ನುತ್ತಿರುವಿರೇಕೆ?

ನಾವೆಲ್ಲಿದ್ದೇವೆ ಈಗ ಎಂದು ನೀವು ಕೇಳ ಬಾರದೇಕೆ

 

ಅವರಿಗೆ ಮತದಾರನ ನೆನಪು ಚುನಾವಣೆ ಬಂದಾಗ

ಅಲ್ಲದೆ ಮತದಾರನೂ ಮರೆತಿರುವನು ಎಲ್ಲವನು ಆಗ

 

ಮತ ಹಾಕಿ ಪಡೆದು ಸರಕಾರವನ್ನು ಬೈಯುವ ಹಕ್ಕು

ಮುಂದೆ ಸರಕಾರದ ವಿರುದ್ಧ ಬಾಯಿಗೆ ಬಂದದ್ದನ್ನು ಕಕ್ಕು

 

ಮತ್ತೆ ಮತ ಹಾಕು, ಯಾಕೆಂದರೆ ಹಾಕದಿರುವುದಪರಾಧ

ಮತ ಗಿಟ್ಟಿಸಿಕೊಂಡವರು ಸದಾ ಮಾಡುತ್ತಿರಲಿ ಅಪರಾಧ

 

ಭ್ರಷ್ಟಾಚಾರ ಮತ್ತು ರಾಜಕೀಯ ಇವು ಎರಡು ಮುಖಗಳು

ನಾಣ್ಯ ಒಂದೇ ನಾಣ್ಯದ ಸಂಪಾದನೆಗೆ ಭಿನ್ನ ತಂತ್ರಗಳು

 

ಹೆಣ್ಣು ಹೊನ್ನು ಮಣ್ಣು ಇವು ಮೂರೂ ಈಗ ಚಾಲ್ತಿಯಲ್ಲಿವೆ

ಅವು ಇರುವಾಗ ಮತದಾರನ ನೆನಪಿಲ್ಲಿ ಹೇಳಿ ಯಾರಿಗಿದೆ

 

ಎಲ್ಲೇ ನೋಡಿ ಮೂರೂ ಬಿಟ್ಟವರೇ ಅಧಿಕಾರದಲ್ಲಿರುವವರು

ಮಾತೆತ್ತಿದರೆ ಜನಸೇವೆಗಾಗೆಂದು ದೇವರಾಣೆ ಹಾಕುವರು

**************************************