ದೇವರ ಹುಂಡಿಗಳನೆಲ್ಲಾ ಬಡವರಲಿ ಹಂಚಿಬಿಡಿ…!

04 ಜನ 11

 

 

ದೇವರುಗಳಿಗೆ ಭಕ್ತ ಜನರು ಸಲ್ಲಿಸುವ ಪೂಜೆ ಪುನಸ್ಕಾರಗಳಿಗೆ,
ಪೂಜಾರಿಗಳೇ ದರ ನಿಗದಿಮಾಡಿ ಕಿತ್ತುಕೊಳ್ಳುತ್ತಿಹರಲ್ಲಾ ಇಲ್ಲಿ;

ತಮ್ಮ ಪ್ರಿಯ ದೇವರುಗಳು ಇನ್ನೂ ಬಹು ಪ್ರಿಯರಾಗುತಿಹರೆಂಬ,
ಮೂಢನಂಬಿಕೆಯಲ್ಲಿಯೇ ಭಕ್ತ ಜನರು ಇನ್ನೂ ಇದ್ದಿಹರಲ್ಲಾ ಇಲ್ಲಿ;

ಮಧ್ಯವರ್ತಿಗಳ ಜೋಳಿಗೆಗಳ ನಾನು ತುಂಬಿಸಿದರೆ ಆ ದೇವರು,
ಒಲಿಯುವರು ಎಂಬ ಭ್ರಮೆ ನನ್ನಲ್ಲಿ ಎಳ್ಳಷ್ಟೂ ಇಲ್ಲವೇ ಇಲ್ಲ ನಿಜದಿ;

ನನ್ನ ನಡೆ ನುಡಿಯ ಸ್ವತಃ ತಾನೇ ಅರಿಯರಾದೊಡೆ ಆ ದೇವರು,
ನನ್ನನ್ನು ಕಾಪಾಡುತಿಹರೆಂಬ ನಂಬಿಕೆ ಹೇಗಿರಬಹುದು ಈ ಮನದಿ;

ನಮ್ಮ ಈ ನಾಡಿನ ಸಾವಿರಾರು ದೇವಾಲಯಗಳ ಹುಂಡಿಗಳಲಿ,
ಅದೆಷ್ಟೋ ಸಂಪತ್ತು ಕೊಳೆತುಬಿದ್ದಿಹುದಲ್ಲಾ ಈ ಪರಿ ವ್ಯರ್ಥವಾಗಿ;

ಆ ಹುಂಡಿಗಳ ಬಗೆದು, ಬಡವರ ಗುಂಡಿಗೆಗಳಿಗೆ ತಂಪನ್ನೀಯುವ,
ಕಾರ್ಯ ನಡೆಸಿದರೆ ಯಾರೂ ಉಳಿಯರೀ ನಾಡಿನಲಿ ಬಡವರಾಗಿ!
***************************


ಕಣ್ಮುಚ್ಚಿ ಪ್ರಾರ್ಥಿಸಲು ಮೂರ್ತಿ ಏಕೆ ಬೇಕು?!!

29 ಆಕ್ಟೋ 09

ನ್ಯಾಯಾಧೀಶ ಮತ್ತು ಜನ ಸಾಮಾನ್ಯರ

ನಡುವೆ ನ್ಯಾಯವಾದಿಗಳು ಇರುವಂತೆ

ದೇವರು ಮತ್ತು ಜನ ಸಾಮಾನ್ಯರೆಲ್ಲರ

ನಡುವೀ ಪೂಜಾರಿಗಳು ಇರಬೇಕಂತೆ

 

ಕಾನೂನಿನ ಕ್ಲಿಷ್ಟ ಭಾಷೆಯನು ಅರಿಯದ

ಮುಗ್ಧರಾದ ಜನ ಸಾಮಾನ್ಯರಿರಬಹುದು

ಜನ ಸಾಮಾನ್ಯರ ಸರಳ ಭಾಷೆಯನೂ

ಅರಿಯದ ನ್ಯಾಯಾಧೀಶರು ಇರಬಹುದು

 

ದೇವರನು ನೆನೆ ನೆನೆದು ತಮ್ಮ ಮನದ

ಮಾತುಗಳ ಒಪ್ಪಿಸಲಾಗದ ಜನರಿಹರೇ

ಜನ ಸಾಮಾನ್ಯರ ಮನದ ಮಾತುಗಳ

ಅರ್ಥೈಸಿಕೊಳ್ಳಲಾಗದ ದೇವರು ಇಹರೇ

 

ಈ ತರ್ಕವ ಮುಂದಿಟ್ಟ ಆ ಪೂಜಾರಿಗಳು

ನಿಜವಾಗಿಯೂ ದೇವರನ್ನು ಅರಿತಿಹರೇ

ಆ ದೇವರನ್ನು ನ್ಯಾಯಾಧೀಶರ ಮಟ್ಟಕ್ಕೆ

ತಂದಿಳಿಸಿ ಅಗೌರವವ ತೋರಿಸುತಿಹರೇ

 

ಪ್ರಾರ್ಥನೆಯನು ಸಲ್ಲಿಸಲು ನಿಜವಾಗಿಯೂ

ಕಣ್ಣುಗಳೆದುರು ದೇವರ ಮೂರ್ತಿ ಏಕಿರಬೇಕು

ಪ್ರಾರ್ಥಿಸುವಾಗ ತೆರೆದಿರದ ಕಣ್ಣುಗಳ ಮುಂದೆ

ಮೂರ್ತಿ ಬೇಡ ಮನಸ್ಸು ನಿರ್ಮಲವಿದ್ದರೆ ಸಾಕು


ಕರಾವಳಿಯ ಸಂಗ್ರಾಮದ ಕತೆ!!!

19 ಮೇ 09

ಕರಾವಳಿಯಲ್ಲಿ ಬಿಜೆಪಿ ಮತ್ತೆ ಈಗ ಜಯಭೇರಿ ಬಾರಿಸಿದೆ
ಪೂಜಾರಿ ಕಂಡ ಕನಸುಗಳ ಹೇಗೆ ನುಚ್ಚು ನೂರಾಗಿಸಿದೆ

ಮೊಯ್ಲಿ ಸೋಲುವ ಕುದುರೆ, ನಾನೇ ಗೆದ್ದು ಬರುವೆ ಎಂದಿದ್ದ
ಬಂಡು ಧೈರ್ಯಮಾಡಿ ಮತ್ತೆ ಅದೇಕೋ ಕಣಕ್ಕೆ ಧುಮುಕಿದ್ದ

ಮೊಯ್ಲಿ ಹಲವು ಬಾರಿ ಮಾಡಿದ ತಪ್ಪನ್ನೀ ಬಾರಿ ಮಾಡದಿದ್ದ
ಅದಕ್ಕೆ ಚಿಕ್ಕ ಬಳ್ಳಾಪುರದಲ್ಲಿ ನೋಡಿ ನಿರಾಯಾಸವಾಗಿ ಗೆದ್ದ

ಕ್ಷೇತ್ರ ಮರು ವಿಂಗಡಣೆ ಮಂಗ್ಳೂರಲ್ಲಿ ಗೌಡಂಗಾತಂಕ ತಂದಿತ್ತು
ಉಡುಪಿಯಲ್ಲಿ ಯಾವುದೇ ಶ್ರಮರಹಿತ ಗೆಲುವಿನ ನಿರೀಕ್ಷೆ ಇತ್ತು

ಜಯಪ್ರಕಾಶ ಹೆಗ್ಡೆಯ ಪರಿಚಯ ಉಡುಪಿ ಜಿಲ್ಲೆಯಲ್ಲಷ್ಟೇ ಜಾಸ್ತಿ
ಚಿಕ್ಕಮಗಳೂರು ಕಡೆಯ ಮತ ಪಾರ್ಟಿಯದು ಹೆಗ್ಡೆಯದಲ್ಲ ಆಸ್ತಿ

ಎಡರಂಗದವರು ಉಡುಪಿಯಲ್ಲಿ ಯಾಕೆ ಸ್ಪರ್ಧೆಗೆ ಇಳಿಯುತ್ತಾರೋ
ಅವರ ಬೇಳೆ ಬೇಯಿಸಲು ನೀರೇ ಸಿಗದು ಎಂದ್ಯಾರು ಹೇಳುತ್ತಾರೋ

ನಳಿನ ಕುಮಾರ ಹೊಸಬ ಅಲ್ಲಿ ಆತನಿಗಲ್ಲ ಅದು ಪಕ್ಷಕ್ಕೆ ಸಿಕ್ಕ ಮತ
ಮುಂದೆ ಗೆಲ್ಲಬೇಕಿದ್ದರೆ ಆತ ಮಾಡಬೇಕಿದೆ ಮಂಗಳೂರಿಗರಿಗೆ ಹಿತ

ಹಿಂದೂಗಳ ಪ್ರತಿನಿಧಿಯಾಗದೇ ಮಂಗಳೂರನ್ನೇ ಪ್ರತಿನಿಧಿಸಬೇಕು
ಅನ್ಯರಿಗೂ ಆತನ ಮೇಲೆ ಭರವಸೆ ಮೂಡುವಂತಾತ ದುಡಿಯಬೇಕು

ಮೊಯ್ಲಿ ದೊರಕಿಸಿಕೊಂಡಾನು ಮಂತ್ರಿಗಿರಿ ಯಾ ತಕ್ಕ ಸ್ಥಾನಮಾನ
ಪೂಜಾರಿಯ ಕೇಳುವವರಿಲ್ಲ ತವರೂರಲ್ಲೇ ಆದಮೇಲೆ ಈ ಅವಮಾನ

ಪೂಜಾರಿ ಮತ್ತು ಜಯಪ್ರಕಾಶ್ ಹೆಗ್ಡೆಗಿನ್ನು ನಿವೃತ್ತಿಯೇ ಒಳ್ಳೆಯದು
ಕೆಡುತ್ತಿರುವ ಆರೋಗ್ಯವ ಕಾಪಾಡಿಕೊಂಡು ಇರುವುದೊಳ್ಳೆಯದು

ಮಾರ್ಗರೇಟಳಿಗಿನ್ನು ಬೆಲೆ ದಿಲ್ಲಿಯಲಿ ಹಿಂದಿನಷ್ಟಿರುವುದಿಲ್ಲ ನೋಡಿ
ಸೋತು ಮರಳುತ್ತಿದ್ದಾಳೆ ಈಗ ಮೊದಲು ಬಾಯ್ತುಂಬಾ ಮಾತಾಡಿ

ಗೆದ್ದ ಅನಂತ ಕುಮಾರ ಹೆಗಡೆ ನಾಲಿಗೆಗೆ ಲಗಾಮು ಹಾಕಬೇಕು
ಬೇಕಾಬಿಟ್ಟಿ ಮಾತನಾಡದೇ ಕ್ಷೇತ್ರದ ಏಳಿಗೆಗಾಗಿ ದುಡಿಯಬೇಕು