ಕಣ್ಮುಚ್ಚಿ ಪ್ರಾರ್ಥಿಸಲು ಮೂರ್ತಿ ಏಕೆ ಬೇಕು?!!

29 ಆಕ್ಟೋ 09

ನ್ಯಾಯಾಧೀಶ ಮತ್ತು ಜನ ಸಾಮಾನ್ಯರ

ನಡುವೆ ನ್ಯಾಯವಾದಿಗಳು ಇರುವಂತೆ

ದೇವರು ಮತ್ತು ಜನ ಸಾಮಾನ್ಯರೆಲ್ಲರ

ನಡುವೀ ಪೂಜಾರಿಗಳು ಇರಬೇಕಂತೆ

 

ಕಾನೂನಿನ ಕ್ಲಿಷ್ಟ ಭಾಷೆಯನು ಅರಿಯದ

ಮುಗ್ಧರಾದ ಜನ ಸಾಮಾನ್ಯರಿರಬಹುದು

ಜನ ಸಾಮಾನ್ಯರ ಸರಳ ಭಾಷೆಯನೂ

ಅರಿಯದ ನ್ಯಾಯಾಧೀಶರು ಇರಬಹುದು

 

ದೇವರನು ನೆನೆ ನೆನೆದು ತಮ್ಮ ಮನದ

ಮಾತುಗಳ ಒಪ್ಪಿಸಲಾಗದ ಜನರಿಹರೇ

ಜನ ಸಾಮಾನ್ಯರ ಮನದ ಮಾತುಗಳ

ಅರ್ಥೈಸಿಕೊಳ್ಳಲಾಗದ ದೇವರು ಇಹರೇ

 

ಈ ತರ್ಕವ ಮುಂದಿಟ್ಟ ಆ ಪೂಜಾರಿಗಳು

ನಿಜವಾಗಿಯೂ ದೇವರನ್ನು ಅರಿತಿಹರೇ

ಆ ದೇವರನ್ನು ನ್ಯಾಯಾಧೀಶರ ಮಟ್ಟಕ್ಕೆ

ತಂದಿಳಿಸಿ ಅಗೌರವವ ತೋರಿಸುತಿಹರೇ

 

ಪ್ರಾರ್ಥನೆಯನು ಸಲ್ಲಿಸಲು ನಿಜವಾಗಿಯೂ

ಕಣ್ಣುಗಳೆದುರು ದೇವರ ಮೂರ್ತಿ ಏಕಿರಬೇಕು

ಪ್ರಾರ್ಥಿಸುವಾಗ ತೆರೆದಿರದ ಕಣ್ಣುಗಳ ಮುಂದೆ

ಮೂರ್ತಿ ಬೇಡ ಮನಸ್ಸು ನಿರ್ಮಲವಿದ್ದರೆ ಸಾಕು