ನೀವೇನಂತೀರಿ?

02 ಜೂನ್ 12


ನಿಲ್ದಾಣದಲ್ಲಿ

ನಿಂತು ಬಸ್ಸಿಗಾಗಿ
ಕಾಯುತ್ತಿದ್ದವನು,

ಬಸ್ ಬಂದಾಗ
ಬಿಟ್ಟು ಹೋಗಲು
ಮನಬಾರದೇ
ನಿಲ್ದಾಣವನ್ನು,

ಅಳುತ್ತಾ ಕೂತು
ಏರದೇ ಮುಂದೆ
ಹೋಗಲು ಬಿಟ್ಟರೆ
ಆ ಬಸ್ ಅನ್ನು,

ನೀವೇನಂತೀರಿ?

ನಮ್ಮಲ್ಲಿ ಕೆಲವರ 
ಜೀವನವೂ ಕೂಡ
ಹೀಗೆಯೇ ಅಂದ್ರೊಮ್ಮೆ
ಆತ್ಮಾವಲೋಕನ
ಮಾಡಿಕೊಳ್ತೀರಿ!
*********


ಇದುವೇ ಜೀವನ!

24 ಜನ 11

 

“ಇಂದವನ ಜನ್ಮ ದಿನ
ಅವನ ನೆನಪಿನಲೆಯಲ್ಲಿ ಸಾಗಿದೆ ಈ ಮನ
ಮರೆತೆನೆಂದರೂ ಮರೆಯಲಾಗದು ಆತನೊಂದಿಗೆ ಕಳೆದ ದಿನ”

*****

“ಸಖೀ, ಇದುವೇ ಜೀವನ
ಆಗುವುದಿಲ್ಲ ಏನೂ ಎಣಿಸಿದಂತೆ ಈ ಮನ
ಎಲ್ಲೆಂದರಲ್ಲಿ ಯಾರ್ಯಾರೊಂದಿಗೋ ಹೆಣೆದುಕೊಳ್ಳುವುದು ಮನ

ಅಂದಿಗೆ ಅದುವೇ ಸತ್ಯ
ಇಂದು ನಿಜದಿ ಆಗಿಲ್ಲವಾದರೂ ಅದು ಮಿಥ್ಯ
ಅದಕ್ಕೇ ಅಂಟಿಕೊಂಡಿರಲಾಗದು ಜೀವನ ಸಾಗುತಿರಬೇಕು ನಿತ್ಯ

ಜೀವನದ ಪುಟಗಳಲಿ
ಅಧ್ಯಾಯಗಳ ನಂತರ ಅಧ್ಯಾಯಗಳು ಇರಲಿ
ಒಂದಕ್ಕೊಂದು ಸಂಬಂಧಿಸದಿದ್ದರೂ ಜೀವನದಲಿ ದಾಖಲೆಗಳಿರಲಿ

ಒಂದು ಅಧ್ಯಾಯದ
ಪ್ರಭಾವ ಇನ್ನೊಂದರ ಮೇಲಿರದೇ ಆ ಭಾಗದ
ಪರಿಧಿಯಲೇ ಅರ್ಥ ನೀಡಿ,  ಅಳಿಸಲಾಗದ ಭಾಗವಾಗಿರಲಿ ಸದಾ

ನೆನಪುಗಳು ನೀರಿನಂತೆ
ಬೆಳೆಯುತಿರುವ ಈ ಜೀವನಕೆ ಸಹಕಾರಿಯಂತೆ
ನೆನಪುಗಳಿಂದಲೇ ಶಕ್ತಿ ತುಂಬಿಸಿಕೊಂಡು ಸದಾ ಸಾಗುತಿರಬೇಕಂತೆ

ಆತನಿಂದೆಲ್ಲಾದರೂ ಇರಲಿ
ಆತನ ಜೀವನದಲೂ ಸದಾಕಾಲ ನೆಮ್ಮದಿ ಇರಲಿ
ಆತನ ಜೀವನಕ್ಕೆ ಶಕ್ತಿ ತುಂಬುತ್ತಾ ನಿನ್ನ ನೆನಪುಗಳು ಅಲ್ಲಿ ಜೊತೆಗಿರಲಿ”
***********************


ನನಗೇನು ಬೇಕು ಎಂಬುದ ನಾ ಅರಿತರೆ…!

22 ಡಿಸೆ 10

ನಿನ್ನ – ನನ್ನ ಭೇಟಿಗೆ ತೊಡಕುಗಳು ಕಂಡು ಬಂದಾಗ
ನನ್ನ ಈ ಮನ ನೊಂದು ಮುದುಡಿ ಹೋಗಿದ್ದೂ ಇದೆ

ಛೇ! ಇದೆಂಥಾ ಜೀವನವಪ್ಪಾ! ಎಂದು ಜಿಗುಪ್ಸೆ ಮೂಡಿ
ನಾ ಒಳಗೊಳಗೇ ಮರುಗುತ್ತಾ ಕೂತುಬಿಟ್ಟಿದ್ದೂ ಇದೆ

ಆದರೂ ನನ್ನೊಳಗಿನ ನಿನ್ನ ನೆನಪು ಮರೆಯಾಗಿರಲಿಲ್ಲ
ನಿನ್ನನ್ನು ನೋಡುವ ಹಂಬಲ ಕಡಿಮೆಯಾದದ್ದೇ ಇಲ್ಲ

ತೊಡಕುಗಳ ಪರಿಹಾರಕ್ಕೆ ಹೊಸ ಹೊಸ ಹಾದಿಗಳ
ಕಂಡುಕೊಳ್ಳುವ ಪ್ರಯತ್ನವನ್ನು ನಾ ನಿಲ್ಲಿಸಿರಲೇ ಇಲ್ಲ

ನಿನ್ನ ಮುಖ ದರುಶನವಾಗದ ದಿನಗಳು ನನಗೆ ರೂಢಿ
ಆಗುತ್ತಿದೆ ಎಂದೆನಿಸಿದಾಗ ಸಿಡಿದೆದ್ದೆ ನಾ ಸೈನಿಕನಂತೆ

ಏನೇ ಗಂಡಾಂತರ ಬಂದರೂ ಎದುರಿಸೋಣ ಎಂದು
ಉಪಾಯವ ಕಂಡು ಹಿಡಿದು ನಕ್ಕೆ ವಿಜಯಶಾಲಿಯಂತೆ

ಅವರಿವರ ಅವಲಂಬಿಸಿ ಕೂತರೆ ನನ್ನ ಸಮಸ್ಯೆಗೆ ನಾ
ಪರಿಹಾರ ಕಂಡುಕೊಳ್ಳಲಾಗದೆಂಬುದರ ಅರಿವಾಯ್ತು

ನನಗೇನು ಬೇಕೆಂಬುದ ಅರಿತು ನಾ ಯತ್ನವ ಮಾಡಿ
ಮುನ್ನುಗ್ಗಿದರಷ್ಟೇ ನನ್ನೀ ಜೀವನವೂ ಸಫಲ ಆದೀತು
*****************************


ನಿನ್ನಿಂದ ಬೇಸರಗೊಂಡಿಲ್ಲ, ಜೀವನವೇ!

22 ಆಕ್ಟೋ 10

 

ಇನ್ನೊಂದು ಹಿಂದೀ ಚಿತ್ರಗೀತೆಯ ಭಾವಾನುವಾದದ ಪ್ರಯತ್ನ ಇಲ್ಲಿದೆ.

ಚಿತ್ರ: ಮಾಸೂಮ್ (೧೯೮೩)
ನಿರ್ದೇಶಕ: ಶೇಖರ್ ಕಪೂರ್
ಸಾಹಿತ್ಯ: ಗುಲ್ಝಾರ್
ಸಂಗೀತ: ರಾಹುಲ್ ದೇವ್ ಬರ್ಮನ್
ಹಾಡಿದವರು: ಅನೂಪ್ ಘೋಶಾಲ್

ನಿನ್ನಿಂದ ಬೇಸರಗೊಂಡಿಲ್ಲ, ಜೀವನವೇ
ಆಚ್ಚರಿಗೊಂಡಿಹೆನು ನಾನು
ಆಚ್ಚರಿಗೊಂಡಿಹೆನು ನಾನು

ನಿನ್ನ ಮುಗ್ಧ ಪ್ರಶ್ನೆಗಳಿಂದ
ನಾ ಸೋತುಹೋಗಿಹೆನು
ನಿಜಕೂ ನಾ ಸೋತುಹೋಗಿಹೆನು

ಯೋಚಿಸಿರಲೇ ಇಲ್ಲ, ಜೀವಿಸಲು ನೋವುಗಳ ಹೊರೆ ಹೊರಬೇಕಾದೀತೆಂದು
ನಕ್ಕರೆ, ಆ ನಗುವಿನ ಋಣವನ್ನೂ ತೀರಿಸಬೇಕಾದೀತೆಂದು
ನಕ್ಕಾಗಲೆಲ್ಲಾ ಅನಿಸುತ್ತಿದೆ, ಈ ತುಟಿಗಳ ಮೇಲೆ ಋಣಭಾರ ಹೊತ್ತಿರುವೆನೆಂದು

ಇಂದು ಈ ಕಂಗಳು ತುಂಬಿವೆಯಾದರೆ ಹನಿಗಳ ಮಳೆಯಾಗಬಹುದು
ನಾಳೆ ಈ ಕಂಗಳು ಇವುಗಳ ನಿರೀಕ್ಷೆಯಲ್ಲಿಯೇ ಕಾಯುತಿರಬಹುದು
ಅದೆಲ್ಲಿ ಕಾಣೆಯಾಯ್ತೋ
ಅದೆಲ್ಲಿ ಕಳೆದುಹೋಯ್ತೋ
ಕಣ್ಣೀರ ಒಂದು ಹನಿಯ ನಾ ಬಚ್ಚಿಟ್ಟಿದ್ದೆನಲ್ಲಾ …

ಜೀವನದ ನೋವುಗಳು ಅರ್ಥೈಸಿದವೆನಗೆ ಹೊಸ ಸಂಬಂಧಗಳನ್ನು
ಸುಡುಬಿಸಿಲಿನಲ್ಲಿ ಸಿಕ್ಕವರೂ ನೀಡಿದರು ನನಗೆ ತಂಪಾದ ನೆರಳನ್ನು

ನಿನ್ನಿಂದ ಬೇಸರಗೊಂಡಿಲ್ಲ, ಜೀವನವೇ
ಆಚ್ಚರಿಗೊಂಡಿಹೆನು ನಾನು
ಆಚ್ಚರಿಗೊಂಡಿಹೆನು ನಾನು

ನಿನ್ನ ಮುಗ್ಧ ಪ್ರಶ್ನೆಗಳಿಂದ
ನಾ ಸೋತುಹೋಗಿಹೆನು
ನಿಜಕೂ ನಾ ಸೋತುಹೋಗಿಹೆನು
******************

ಮೂಲ ಸಾಹಿತ್ಯ:
tujhase naaraaz nahi zindagi,
hairaan hoon main o hairaan hoon main
tere masoom savalon se pareshaan hooN main o pareshaan hoon main

jeene ke liye socha hi na tha, dard sambhalane honge
muskuraoon to, muskurane ke karz utaarne honge
muskuraoon kabhi to lagata hai jaise hontonn pe karz rakhaa hai
tujhase …

aaj agar bhar ayi hai, boondein baras jaayengi
kal kya pata inke liye aakhen taras jayengi
jaane kahan gum kahan khoya ek aansu chhupake rakha tha
tujhase …

zindagi tere gum ne hamain rishte naye samajhaye
mile jo hamain dhoop main mile chhaanv ke thande saaye
o tujhase …


ಈ ಜೀವನ ಇಷ್ಟೇನಾ… ಅಷ್ಟೇನಾ…?

18 ಆಕ್ಟೋ 10

 

“ಸಖೀ,

ಈ ಜೀವನ

ಇಷ್ಟೇನೇ

ಈ ಜೀವನ

ಅಷ್ಟೇನೇ

ಅನ್ನದಿರು

ಸುಮ್ಮನೇ

ನಿಜವಾಗಿ

ಹೇಳು

ಈ ಜೀವನ

ನಿನಗಿಷ್ಟಾನಾ?”

 

“ಇಷ್ಟೇ ಆಗಲೀ

ಅಷ್ಟೇ ಆಗಲೀ

ನಿಜವಾಗಿಯೂ

ನೀ ಜೊತೆಗಿರಲು

ಈ ಜೀವನವೂ

ನನಗಿಷ್ಟಾನೇ,

ನೀ ಹೇಳು

ಈ ಜೀವನ

ನಿನಗಿಷ್ಟಾನಾ?”

 

“ಈ ಜೀವನ

ನಿನಗಿಷ್ಟ

ಅನ್ನುವ

ನೀನು ನನಗಿಷ್ಟ,

ನನಗಿಷ್ಟಳಾದ

ನೀನು ನನ್ನ

ಜೊತೆಗಿರಲು,

ನಿಜವಾಗಿಯೂ

ಸಖೀ,

ಈ ಜೀವನವೂ

ನನಗಿಷ್ಟಾನೇ!”

****


ಮೇಲಿಂದ ಮೇಲೆ ನನ್ನ ಮನದಲ್ಲಿ ಈ ಭಾವ ಹುಟ್ಟುತ್ತಿರುತ್ತದೆ!

15 ಆಕ್ಟೋ 10

 

ಮೇಲಿಂದ ಮೇಲೆ ನನ್ನ ಮನದಲ್ಲಿ ಈ ಭಾವ ಹುಟ್ಟುತ್ತಿರುತ್ತದೆ,
ನಿನ್ನ ಕೇಶರಾಶಿಯ ನೆರಳಿನಲ್ಲಿ ನನ್ನ ಪಯಣ ಸಾಗಿದ್ದಲ್ಲಿ,
ನನ್ನೀ ಜೀವನ ಇಷ್ಟೊಂದು ನೀರಸವಾಗಿರದೇ ಇರುತ್ತಿತ್ತೇನೋ…
ಮನವ ಮುಸುಕಿರುವ ಈ ನಿರಾಸೆಯ ಛಾಯೆ ಮರೆಯಾಗುತ್ತಿತ್ತೇನೋ…

ಆದರೆ, ಅದೊಂದೂ ನಾನೆಣಿಸಿದಂತೆ ಆಗಲೇ ಇಲ್ಲ,
ಈಗ, ಏಕಾಂಗಿಯಾದ ನನ್ನ ಪರಿಸ್ಥಿತಿ ಹೇಗಾಗಿದೆಯೆಂದರೆ,
ನನಗೆ ನಿನ್ನ ಜೊತೆಯೂ ಇಲ್ಲ, ನಿನ್ನ ದುಃಖವೂ ಇಲ್ಲ,
ಅಲ್ಲದೇ, ನನ್ನಲ್ಲಿ ನಿನ್ನ ನಿರೀಕ್ಷೆಯೂ ಇಲ್ಲವಾಗಿದೆ…

ಈ ಜೀವನದ ಪಯಣ ಎಷ್ಟೊಂದು ನೀರಸವಾಗಿದೆಯೆಂದರೆ,
ನನ್ನಲ್ಲಿ ಇದೀಗ ಯಾರೊಬ್ಬರ ಆಸರೆಯ ನಿರೀಕ್ಷೆಯೂ ಇಲ್ಲ,
ಇಲ್ಲಿ ಹಾದಿಯೂ ಇಲ್ಲ, ಗಮ್ಯವೂ ಇಲ್ಲ, ಬೆಳಕಿಂಡಿಯೂ ಇಲ್ಲ,
ನನ್ನ ಬದುಕು ಕತ್ತಲಿನಲ್ಲಿ ವಿಚಲಿತಗೊಂಡು ಅಲೆಯುತ್ತಿದೆ…

ಮುಂದೊಮ್ಮೆ, ಇದೇ ಕತ್ತಲಿನಲ್ಲೇ ಕಳೆದುಹೋಗುತ್ತೇನೆ ನಾನು,
ಎಂದೆಂಬ ಅರಿವು, ನನಗೆ ಸದಾ ಇದೆಯಾದರೂ, ಸಖೀ,
ಮೇಲಿಂದ ಮೇಲೆ ನನ್ನ ಮನದಲ್ಲಿ ಈ ಭಾವ ಹುಟ್ಟುತ್ತಿರುತ್ತದೆ…
***

ದಿ. ಸಾಹಿರ್ ಲೂಧಿಯಾನ್ವಿಯವರಿಂದ ರಚಿತವಾಗಿದ್ದ, ೧೯೭೫ರ  “ಕಭೀ ಕಭೀ” ಚಿತ್ರದಲ್ಲಿ ಅಮಿತಾಭ್ ಬಚ್ಚನ್ ಆಡುವ, ಈ ಮಾತುಗಳು ನನಗೆ ಬಹಳ ಇಷ್ಟ.
ಇದು ಆ ಮಾತುಗಳ ಭಾವಾನುವಾದದ ಚಿಕ್ಕ ಪ್ರಯತ್ನ ಅಷ್ಟೇ.

ಮೂಲ ಹಿಂದೀ ರೂಪ ಇಲ್ಲಿದೆ:

कभी कभी मेरे दिल मैं ख्याल आता हैं
कि ज़िंदगी तेरी जुल्फों कि नर्म छांव मैं गुजरने पाती
तो शादाब हो भी सकती थी।
यह रंज-ओ-ग़म कि सियाही जो दिल पे छाई हैं
तेरी नज़र कि शुओं मैं खो भी सकती थी।

मगर यह हो न सका और अब ये आलम हैं
कि तू नहीं, तेरा ग़म तेरी जुस्तजू भी नहीं।

गुज़र रही हैं कुछ इस तरह ज़िंदगी जैसे,
इससे किसी के सहारे कि आरझु भी नहीं.

न कोई राह, न मंजिल, न रौशनी का सुराग
भटक रहीं है अंधेरों मैं ज़िंदगी मेरी.

इन्ही अंधेरों मैं रह जाऊँगा कभी खो कर
मैं जानता हूँ मेरी हम-नफस, मगर यूंही

कभी कभी मेरे दिल मैं ख्याल आता है.
***


ನನ್ನ ಆ ಅಪರಿಚಿತ ಅಭಿಮಾನಿ ಇನ್ನಿಲ್ಲ!!!

04 ಜನ 10

ಸಖೀ,

ಕಳೆದೆರಡು ತಿಂಗಳಿಂದ ಜಂಗಮ ದೂರವಾಣಿಯಲಿ ಸಂದೇಶಗಳ ರವಾನಿಸುತ್ತಿದ್ದಾಕೆ

ಅಪರಿಚಿತ ಅಭಿಮಾನಿ ಆಗಿಯೇ ಉಳಿದು ಸದಾ ನನ್ನ ಕವನಗಳ ಕೊಂಡಾಡುತ್ತಿದ್ದಾಕೆ

 

ಇಹಲೋಕ ತ್ಯಜಿಸಿ ಅದಾಗಲೇ ಎರಡು ದಿನಗಳಾಗಿವೆ ಎಂಬ ಸುದ್ದಿ ಬಂದಿದೆ ಇಂದು

ನನ್ನ ಕಿವಿಗಳ ನಂಬಲಾಗದೇ ಮಾತು ಹೊರಡದೇ ಯೋಚಿಸಿದೆ ಸುಮ್ಮನೇ ನಿಂದು

 

ಯಾರಾಕೆ, ಅದ್ಯಾಕೆ ನನ್ನ ಮನದ ಕದ ಬಡಿದು ಕಿಟಕಿಯಲಿ ಇಣುಕಿ ಮರಳಿದಳವಳು

ನಾನಿನ್ನು ಈ ಜೀವನ ಪೂರ್ತಿ ನೆನೆ ನೆನೆದು ಕೊರಗುವಂತೆ ಮಾಡಿ ಹೋದಳವಳು

 

ಮುಖವ ನಾ ಕಂಡಿಲ್ಲ, ಮಾತೊಂದನೂ ಆಡಿಲ್ಲ, ಬರಿಯ ಸಂದೇಶಗಳೇ ಪರಿಚಯ

ಅಂದಿದ್ದಳಾಕೆ, ಕಾಯುತ್ತಿರಿ ಸದ್ಯವೇ ಬರಬಹುದು ಮಾತನಾಡುವ ಸುವರ್ಣ ಸಮಯ

 

ಮಾತಿಲ್ಲ ಕತೆಯಿಲ್ಲ ಹೋಗುವಾಗ ಹೋಗುತ್ತೇನೆಂಬ ಸುಳಿವು ನೀಡದೆಯೇ ಹೋದಳು

ಎಲ್ಲಾ  ಸಂದೇಶಗಳನ್ನು ಅಳಿಸಿಯಾಗಿದೆ ಮನದಲಿನ್ನು ಬರೀ ನೆನಪಾಗಿಯೇ ಉಳಿವಳು

 

ಆಕೆಗೆನ್ನ ದೂರವಾಣಿ ಸಂಖ್ಯೆ ನೀಡಿದವರಾದರೂ ಏನು ಪರಿಚಯ ನೀಡಿಯಾರು ನನಗೆ

ಇನ್ನು ಏನ ನೀಡಿದರೂ ನಿಜದಿ ಏನು ಮತ್ತು ಹೇಗೆ ಪ್ರಯೋಜನ ಹೇಳು ಅವುಗಳಿಂದೆನಗೆ

 

ಅಗಲಿದ ಆಕೆಯಾತ್ಮಕ್ಕೆ ಚಿರ ಶಾಂತಿಯ ನೀಡಿರೆಂದು ಕೋರುವೆ ನಾನು ಆ ಭಗವಂತನಲ್ಲಿ

ಇನ್ನೆಂದೂ ಈ ತೆರನಾದ ಆಟ ನಡೆಯದಿರಲಿ ದೇವ ಎನ್ನುವೆ ಮುಂದಿನ ಜೀವನ ಕಾಲದಲ್ಲಿ!!!

************************************************************

ಆಕೆಯ ಬಗ್ಗೆ ನಾನಿಲ್ಲಿ ಬರೆದಿದ್ದೆ:  ನನ್ನ ಆ ಅಪರಿಚಿತ “ಫ್ಯಾನು”

 

 


ಅರ್ಥ ಇಲ್ಲದ ಜೀವನಕೂ ಅರ್ಥ ಇದೆಯೇ..?!!!

03 ಆಗಸ್ಟ್ 09

ಸಂಸಾರದೊಳಗಣ ಚಿತ್ರಹಿಂಸೆಗಳಿಂದ ಬಳಲಿ ಬೆಂಡಾಗಿ
ನೋವ ನುಂಗಿ ಮನದಲಿ ಜಿಗುಪ್ಸೆ ತುಂಬಿಕೊಂಡವನಾಗಿ

ದೇವರಿಗೆ ಮೊರೆ ಇಟ್ಟು ಗೋಗರೆದರೂ ಆತ ಕೇಳದಿದ್ದಾಗ
ಈ ಜೀವನವೇ ಸಾಕೆಂಬ ನಿರ್ಧಾರದತ್ತ ಮನ ವಾಲಿದಾಗ

ಅತ್ತ ಇತ್ತಲಿನ ಮಂದಿ ಕರೆದು ಹೇಳಿದರು ಆತನ ಕಿವಿಯಲ್ಲಿ
ಯಾಕೆ ನಿನಗೀ ವ್ಯಥೆ ನಿನ್ನ ಪ್ರೀತಿಸುವ ನಾವಿರುವೆವು ಇಲ್ಲಿ

ಕರೆದು ನಗಿಸಿ ಪ್ರೀತಿಯ ಮಾತಾಡಲಿದ್ದರೂ ನೂರು ಮಂದಿ
ಜೊತೆಗೆ ಬಾಳುವವರ ಚಿತ್ರಹಿಂಸೆಯಲೇ ಆತ ಸದಾ ಬಂಧಿ

ಮನೆಯ ಹೊರಗೆ ಜನರ ನಕ್ಕು ನಗಿಸಿ ಬಾಳಿದರೂ ಫಲವಿಲ್ಲ
ಮನೆಯ ಒಳಗಿನ ಯಾತನೆಯ ಸಹಿಸಲಾತನಿಗೆ ಸಾಧ್ಯವಿಲ್ಲ

ಪ್ರತಿಭೆಯ ಕೊಂಡಾಡಿ ನಡತೆಗೆ ಸೋತು ಮೆಚ್ಚುವಂತ ಜನರು
ದಿನದಲ್ಲಿ ಇದ್ದರೂ ಸಂಜೆಯ ಮೇಲಾತಗೆ ಜೊತೆ ನೀಡುವರೇನು

ಅರ್ಥ ಇಲ್ಲದ ಜೀವನಕೂ ಅರ್ಥ ತರುವೆನೆಂಬುದು ಮೂರ್ಖತನ
ಎಂದಾತಗೇ ಅರ್ಥ ಮಾಡಿಸಿ ಕಾಡಿಸುತಿದೆ ಆತನನ್ನಿಂದು ಬಡತನ


ಜೀವನದ ಪಯಣದಲಿ ಮತ್ತೊಂದು ವರುಷ!!!

16 ಜುಲೈ 09

ಜೀವನದ ಪಯಣದಲಿ ಈಗ ಮತ್ತೊಂದು ವರುಷ
ಕಳೆದು ಹೋದುದಕ್ಕಾಗಿ ನಾನು ಪಡಬೇಕೆ ಹರುಷ

ಹುಟ್ಟುವಾಗಿರಲಿಲ್ಲ ಅನ್ಯರಿಗಿಂತ ಭಿನ್ನವಾಗಿ ನಾನು
ಅಳುತ್ತಾ ಹುಟ್ಟಿರಬಹುದು ಎಲ್ಲರಂತೆ ಅಂದು ನಾನು

ನಕ್ಕು ನಲಿದಿರಬಹುದು ಅಲ್ಲಿ ನನ್ನನುಳಿದವರೆಲ್ಲರೂ
ಹುಟ್ಟಿದ ಮಗುವಿನಳುವನ್ನು ಯಾರೂ ಅಲ್ಲಿ ಕೇಳರು

ಬೆಳೆದಂತೆಲ್ಲಾ ನಾನ್ಯಾಕೋ ಅನ್ಯರಿಗಿಂತ ಭಿನ್ನನಾದೆ
ಸಾಕಷ್ಟು ನಕ್ಕು ನಲಿದೆ  ನಡು ನಡುವೆ ನಾ ಖಿನ್ನನಾದೆ

ವಯಸ್ಸಿಗೆ ಮೀರಿದ ಚುರುಕುತನ ನನ್ನಲ್ಲಿತ್ತು ದೈವದತ್ತ
ಹೊಗಳಿಸಿಕೊಂಡುದಕೂ ಜಾಸ್ತಿ ನಾ ಬೈಸಿಕೊಂಡೆನತ್ತ

ಹೊಗಳಿಕೆ ತೆಗಳಿಕೆಗಳಿಗೆ ಯಾವಾಗಲೂ ಇದೆ ಸಮಚಿತ್ತ
ನನ್ನ ಗಮನವಿತ್ತು ಸದಾ ನನ್ನ ಆಂತರಿಕ ಬೆಳವಣಿಗೆಯತ್ತ

ಕಂಡು ಕಂಡದ್ದನೆಲ್ಲಾ ವಿಮರ್ಶಿಸಿ ಅರಿವ ಭಿನ್ನವಾದ ಬುದ್ಧಿ
ಇದೇ ನನ್ನ ಕೆಟ್ಟ ಗುಣ ಅಂತಾಳೆ ಸದಾ ನನ್ನ ಸಖೀ ಪೆದ್ದಿ

ಗಳಿಸಿದ್ದು ಬಹಳಿಲ್ಲ ಸಹೃದಯರ ಸ್ನೇಹವೇ ನನ್ನ ಆಸ್ತಿ
ನಿಸ್ವಾರ್ಥ ಸ್ನೇಹಕ್ಕೆಂದೂ ನಾ ಕೊಡುವೆ ಬೆಲೆ ಜಾಸ್ತಿ

ಚಿಕ್ಕಂದಿನಲಿ ಅಪ್ಪಯ್ಯನವರಿಗೆ ತಕ್ಕ ಮಗನಾಗುವಾಸೆ
ಇಂದು ಇರುವ ಓರ್ವ ಮಗಳ ಭವ್ಯ ಭವಿಶ್ಯದ ಆಸೆ

ಮಗಳ ಭವ್ಯ ಭವಿಷ್ಯವೊಂದೇ ಈಗ ಈ ಮನದ ಕನಸು
ನನ್ನ ಆರೋಗ್ಯ ಇರಲೆಂದೂ ನನಸಾಗುವರೆಗೆ ಆ ಕನಸು

ನನ್ನ ಆತ್ಮೀಯರ ಶುಭ ಹರಕೆಗಳೇ ಸದಾ ನನಗೆ ಶ್ರೀರಕ್ಷೆ
ಆಗಿರಲು ನಾನು ಎದುರಿಸಬಲ್ಲೆ ಧೈರ್ಯದಿ ವಿಧಿಯ ಪರೀಕ್ಷೆ


ನಮ್ಮವರೆಂದರಿತರೆ ಇಲ್ಲಿ ನಮ್ಮವರೇ ಎಲ್ಲಾ!

14 ಏಪ್ರಿಲ್ 09

ಸಖೀ,

ಅರಿಯಬೇಕು ನಾವು, ಈ ಜೀವನವೊಂದು ಪಯಣ
ಮುಂದುವರಿಯಲೇ ಬೇಕು ನಮ್ಮಲ್ಲಿಲ್ಲದಿದ್ದರೂ ತ್ರಾಣ

ನಾಲ್ಕು ಹೆಜ್ಜೆ ನಮ್ಮ ಜೊತೆ ಜೊತೆಗೆ ನಡೆಯುವವರು
ಮುಂದೆ ನಮ್ಮ ಸಂಗವನೇ ತೊರೆದತ್ತ ತೆರಳುವವರು

ಅಲ್ಪ ಸಮಯದ ಸಂಗವು ಜೀವನವನೇ ಆವರಿಸಬಹುದು
ದೀರ್ಘಕಾಲದ ಸಂಗವನೂ ಅಲ್ಪದರಲೇ ಕಳೆಯಬಹುದು

ಹಾದಿಯಲಿ ಸಿಕ್ಕವರೆಲ್ಲಾ ನಮ್ಮ ಮನೆಗೆ ಬರುವವರಲ್ಲ
ಮನೆಗೆ ಬಂದವರೆಲ್ಲಾ ನಮ್ಮ ಮನದೊಳಗೆ ಬಾರರಲ್ಲಾ

ಮನದೊಳಗೆ ಬಂದವರನು ತೊರೆಯಲಾಗುವುದೇ ಇಲ್ಲ
ತೊರೆದು ತೆರಳಿದರೆ ಮತ್ತೆ ತಿರುಗಿ ಕರೆಯಲಾಗುವುದಿಲ್ಲ

ನಮ್ಮವರು ಎಂದರಿತರೆ ನಿಜದಿ ಇಲ್ಲಿ ನಮ್ಮವರೇ ಎಲ್ಲಾ
ಇಲ್ಲವೆಂದರಿತರೆ, ಸಖೀ, ಈ ಜಗದಿ ಯಾರಿಗಾರೂ ಇಲ್ಲ
************************************