ಅಲ್ಲೇ ಇರಿ, ಮರಳದಿರಿ ಶಾಸಕರೇ!

06 ಸೆಪ್ಟೆಂ 12

ನಾನು ಒಂದು ಹೊಡೆದ ಹಾಗೆ ಮಾಡುವೆ
ನೀನು ಸುಮ್ಮನೆ ಅತ್ತಂತೆ ಮಾಡಿದರಾಯ್ತು
ನಾನು ವಾಪಾಸು ಕರೆದ ಹಾಗೆ ಮಾಡುವೆ
ನೀವೆಲ್ಲಾ ಆರಾಮವಾಗಿ ಮರಳಿದರಾಯ್ತು

ಶಾಸಕರು ವಿಮಾನ ಏರಿ ತೆರಳುವವರೆಗೂ
ಸುಮ್ಮನಿದ್ದ ಈ ಯಡ್ಡಿ ಮತ್ತು ಶೆಟ್ಟರ್ ಜೋಡಿ
ಇದೀಗ ನಾಟಕವಾಡುತ್ತಿದೆ ಅತ್ತ ದೆಹಲಿ ಮತ್ತು
ಇತ್ತ ಬೆಂಗಳೂರಿನಿಂದ ಹೇಳಿಕೆಗಳನ್ನು ನೀಡಿ

ಇನ್ನು ವಾಪಾಸು ಬಂದರೇನು ಬಾರದಿದ್ದರೇನು
ಬೊಕ್ಕಸದ ಹಣ ಪೋಲಾಗುವುದು ಆಗಿಯಾಯ್ತು
ಈ ಶಾಸಕರು ಎಲ್ಲಿದ್ದರೇನು ಅವರೆಲ್ಲಾ ಬಂದಿಲ್ಲಿ
ಘನಂದಾರಿ ಕೆಲಸ ಮಾಡುವುದೆಲ್ಲಿಯ ಮಾತು?

ಸದ್ಯ ಅವರಿಗಿಲ್ಲಿ ಕೆಲಸವಿಲ್ಲ ಇರಲಿ ಪರದೇಶದಲ್ಲಿ
ಪರದೇಶಿಗಳಾಗಿ ಮೋಜು ಮಸ್ತಿಯಲ್ಲಿ ಮುಳುಗಿ
ಮುಂದಿನ ಚುನಾವಣೆಗಾಗಿ ಮರಳಿ ಬಂದರಾಯ್ತು
ಮತ ಯಾಚಿಸಲು ಹಳ್ಳಿಗಳ ಬೀದಿಗಳಲ್ಲಿ ತಿರುಗಿ!
********


ಅನ್ಯಾಯ ಅಸಂವಿಧಾನಿಕ ಎಲ್ಲಾ ಮಣ್ಣಾಂಗಟ್ಟಿ!

13 ಆಕ್ಟೋ 10

ರಾಜ್ಯಪಾಲರು ತರಾತುರಿಯ ನಡವಳಿಕೆಯಿಂದ
ಈ ರೀತಿ ನಿಜದಿ ನಗೆಪಾಟಲಿಗೆ ಈಡಾಗಬಾರದಿತ್ತು

ಕಾನೂನು ತಜ್ಞನೆನಿಸಿ ರಾಷ್ಟ್ರಪತಿ ಆಳ್ವಿಕೆಗೆ
ಶಿಫಾರಸ್ಸು ಮಾಡಿ, ಈಗ ಮಾತು ಬದಲಿಸಬಾರದಿತ್ತು

ನಿನ್ನೆಯ ತನಕ ನಮ್ಮ ಮಾನ್ಯ ರಾಜ್ಯಪಾಲರು
ಕಾಂಗ್ರೇಸ್-ದಳದವರ ಪಾಲಿಗೆ ಆಗಿದ್ದರಲ್ಲಾ ದೇವರು

ಇಂದು ನೋಡಿದರೆ ಅದೇ ಹಂಸರಾಜರು
ಅವರೆಲ್ಲರ ಪಾಲಿಗೆ ಆಗಿಬಿಟ್ಟಿದ್ದಾರೆ ಕ್ರೂರ ಕಂಸರಾಜರು

ಮೊನ್ನೆ ಮೊನ್ನೆ, ಆತನಿಗಿರುವ ದೀರ್ಘ ಕಾನೂನು
ಅನುಭವವನ್ನು ಕೊಂಡಾಡಿ ಏರಿಸಿದ್ದರು ಆತನನು ಅಟ್ಟಕ್ಕೆ

ಈಗ ನೋಡಿದರೆ ಬೀದಿ ಬೀದಿಯಲ್ಲೆಲ್ಲಾ
ಜರೆದು ಏರಿಸುತ್ತಿದ್ದಾರೆ ಆತನನಿನ್ನೇನು ಜೀವಂತ ಚಟ್ಟಕ್ಕೆ

ಆತನ ಕಷ್ಟ, ಅಲ್ಲಿನ ಒಳಗುಟ್ಟು ಆತನಿಗೇ ಗೊತ್ತು
ಕೈ-ಕಮಾಂಡಿನ ಮಾತ ಪಾಲಿಸದೇ ಆತನಿಂದ ಇರಲಾಗದು

ಉತ್ತರ ಭಾರತದಲಿ ಚುನಾವಣೆಗಳಿವೆ ಹಾಗಾಗಿ
ಕಾಂಗ್ರೇಸಿಗೆ ಭಾಜಪ ಸರಕಾರವನ್ನು ಉರುಳಿಸಲೂ ಆಗದು

ಅನ್ಯಾಯ ಅಸಂವಿಧಾನಿಕ ಎಲ್ಲಾ ಬರಿ ಮಣ್ಣಾಂಗಟ್ಟಿ,
ಆ ಚುನಾವಣೆಗಳಷ್ಟೇ ಇವೆ ಈಗ ಕೇಂದ್ರ ಸರ್ಕಾರದ ದೃಷ್ಟಿಯಲ್ಲಿ

ಹಾಗಾಗಿ ಭಾಜಪಕ್ಕೆ ಕೊಟ್ಟು ಈ ಮರು ಅವಕಾಶ
ತಮ್ಮ ಬೆನ್ನನ್ನು ತಾವೇ ತಟ್ಟಿಕೊಳ್ತಾರೆ ಚುನಾವಣ ಪ್ರಚಾರದಲ್ಲಿ
******


ಪ್ರಜ್ಞಾವಂತ ಮತದಾರರದೇನೂ ತಪ್ಪಿಲ್ಲ!

12 ಆಕ್ಟೋ 10

 

ಇಂದಿನಾ ರಾಜಕೀಯ ಸ್ಥಿತಿಗೆ ಪ್ರಜ್ಞಾವಂತ ಮತದಾರರಷ್ಟೇ

ಕಾರಣವೆಂದು ದೂಷಿಸುವುದು ನಿಜವಾಗಿ ಎಷ್ಟು ಸರಿ ಹೇಳಿ

 

ಆಯ್ಕೆಯಾಗಿ ಹೋದವರು ಪ್ರಜ್ಞಾವಂತರಾಗಿ ಉಳಿಯದೇ

ಮತದಾರರನ್ನೇ ಮರೆಯುವುದು ಯಾಕೆಂದು ಅವರ ಕೇಳಿ

 

ನಮ್ಮ ನಾಡಿನ ಚುನಾವಣೆಗಳಲ್ಲಿ ಯಾವೊಬ್ಬ ಅಭ್ಯರ್ಥಿಯನ್ನೂ

ಆಯ್ಕೆಮಾಡದೇ ಸುಮ್ಮನಿರುವ ಅವಕಾಶ ಇರುವುದು ಸುಳ್ಳಲ್ಲ

 

ಆದರೆ ಯಾವುದೇ ಚುನಾವಣೆಯಲ್ಲಿಯೂ ಈ ಅವಕಾಶವನ್ನು

ಮತದಾರನಿಗೆ ಕೊಡಮಾಡದೇ ವಂಚನೆ ಮಾಡುತಿಹರಲ್ಲಾ?

 

ಮತದಾರರಿಂದ ತಿರಸ್ಕೃತನಾದ ಅಭ್ಯರ್ಥಿಗಳಿಗೆ ಮರು ಅವಕಾಶ

ನೀಡದೇ ಹೊಸ ಅಭ್ಯರ್ಥಿಗಳನಾರಿಸಿದರೆ ಬರುವುದು ಬದಲಾವಣೆ

 

ಒಮ್ಮೆ ಆರಿಸಿಹೋದವ ತನ್ನ ಪಕ್ಷನಿಷ್ಟೆ ಬದಲಿಸದಂತೆ ಅವಧಿ ಪೂರ್ತಿ

ಒಂದೇ ಕಡೆ ಇದ್ದರೆ ಆಗ ಮಾತ್ರ ತಪ್ಪಿಸಬಹುದು ಮರು ಚುನಾವಣೆ

                 ***********


ಮಾನ್ಯ ಯಡ್ಯೂರಪ್ಪನವರಿಗೆ ದೊಡ್ಡ ನಮಸ್ಕಾರ!

28 ಜೂನ್ 10

ಮಾನ್ಯ ಯಡ್ಯೂರಪ್ಪನವರೇ,

ನಿಮಗೊಂದು ದೊಡ್ಡ ನಮಸ್ಕಾರ, ಅಲ್ಲದೇ ನಾನು ಹೃದಯನೊಂದು ತುಂಬಿ ಸಲ್ಲಿಸುತ್ತಿರುವ ಧನ್ಯವಾದಗಳು.

ನಮ್ಮ ಮನೆಯೊಳಗೇ ಸ್ವಾತಂತ್ರ್ಯಯೋಧರಾದ ಮತ್ತು ಭಾರತೀಯ ರಾಷ್ಟ್ರೀಯ ಕಾಂಗ್ರೇಸ್ ಪಕ್ಷದ ಸದಸ್ಯರಾಗಿದ್ದ ನಮ್ಮ ತಾತನವರು ಇದ್ದಿದ್ದ್ದರೂ, ಒಂಭತ್ತು ಹತ್ತು ವರುಷದ ಹುಡುಗನಾಗಿದ್ದ ನನಗೆ ಜನಸಂಘದ ದೀಪದ ಗುರುತಿನ ಮೇಲೆ ಅದೇಕೋ ಅವ್ಯಕ್ತ ಪ್ರೇಮ. ಮಾನ್ಯ ಡಾ. ವಿ. ಎಸ್. ಆಚಾರ್ಯರ ಚುನಾವಣಾ ಪ್ರಚಾರ ಕಾರ್ಯಕ್ರಮಗಳಿಗೆ ಬರಿಗಾಲಿನಲ್ಲೇ ಓಡಾಡಿ ನಮ್ಮದೇ ಕೊಡುಗೆ ನೀಡಿದ್ದ ನೆನಪು ಈಗಲೂ ಇದೆ. ಅದು ಸಾವಿರದ ಒಂಭೈನೂರ ಎಪ್ಪತ್ತರ ದಶಕದ ಆದಿ.

ಶ್ರೀಮತಿ ಇಂದಿರಾಗಾಂಧಿಯವರು ಮಣಿಪಾಲಕ್ಕೆ ಭೇಟಿ ನೀಡಿದಾಗ ಹೋಗಿ ಭಾಷಣ ಕೇಳಿಬಂದಿದ್ದರೂ, ಕಾಂಗ್ರೇಸ್ ನನಗೆ ಅದೇಕೋ ಹಿಡಿಸಿರಲಿಲ್ಲ. ವಾಜಪೇಯಿಯವರ, ಜಾರ್ಜ್ ಫೆರ್ನಾಂಡಿಸರ, ಮೊರಾರ್ಜಿ ದೇಸಾಯಿಯವರ, ಆಡ್ವಾಣಿಯವರ, ಭಾಷಣಗಳಿಗೆ ನಾನೂ ಕಿವಿಯಾಗಿದ್ದೆ ಆ ದಶಕದ ಉತ್ತರಾರ್ಧದ ದಿನಗಳಲ್ಲಿ. ಅದೇಕೋ ಏನೋ ನೆಹರೂರವರಿಂದಲೇ ಉತ್ತಮ ಭಾಷಣಕಾರ ಎಂದು ಹೊಗಳಿಸಿಕೊಂಡಿದ್ದ ಅಟಲ್ ಬಿಹಾರಿ ವಾಜಪೇಯಿಯವರನ್ನು ಒಮ್ಮೆ ಪ್ರಧಾನಿಯಾಗಿ ನೋಡಬೇಕೆಂಬ ಆಸೆ ಅಂದಿನ ದಿನಗಳಿಂದಲೇ ಮನದಲ್ಲಿ ಹುದುಗಿಹೋಗಿತ್ತು. ಅದರೊಂದಿಗೆ, ನಮ್ಮ ರಾಜ್ಯದಲ್ಲೂ ಭಾರತೀಯ ಜನತಾ ಪಕ್ಷದ ಸರಕಾರ ಅಧಿಕಾರ ನಡೆಸುವುದನ್ನು ನೋಡಬೇಕೆಂಬ ಆಸೆಯೂ ಕೂಡ. ವಾಜಪೇಯಿಯವರು ಪ್ರಧಾನಿಯೂ ಆದರು, ನೇಪಥ್ಯಕ್ಕೂ ಸರಿದರು.

ಕರ್ನಾಟಕದಲ್ಲಿ ಭಾಜಪ ಅಧಿಕಾರಕ್ಕೆ ಬಂದಾಗ ನನ್ನ ಎರಡನೆಯ ಆಸೆ ಕೈಗೂಡಿದ ಸಂತಸ ನನ್ನ ಮನದಲ್ಲಿ. ಆದರೆ ಕಳೆದು ಹೋದ ಏಳುನೂರ ಮೂವತ್ತು-ನಲವತ್ತು ದಿನಗಳಲ್ಲಿ ದಿನದಿನವೂ ನನಗೆ ಮತ್ತು ನನ್ನ ಸಹಮನಸ್ಕರಿಗೆಲ್ಲಾ ಅಘಾತವನ್ನೇ ನೀಡುತ್ತಾ ಬಂದಿರಿ ನೀವು. ರಾಜಕೀಯದ ಬಗ್ಗೆ ಆಸಕ್ತಿ ತೋರಲು ತೊಡಗಿದ್ದ ವಿದ್ಯಾವಂತ ಯುವಜನಾಂಗವನ್ನು ಮತ್ತೆ ಹಿಂದಕ್ಕಟ್ಟುವಂತೆ ಮಾಡಿಬಿಟ್ಟಿರಿ ನೀವು. ಚುನಾವಣೆಗಳಲ್ಲಿ ಮತದಾನಕ್ಕೆ ಯಾಕೆ ಹೋಗಬೇಕು ಎಂದು ನಮ್ಮನ್ನೇ ನಾವು ಕೇಳಿಕೊಳ್ಳುವಂತೆ ಮಾಡಿದಿರಿ ನೀವು. ಅದಕ್ಕಾಗಿ ಈ ದೊಡ್ಡ ನಮಸ್ಕಾರ ಮತ್ತು ಧನ್ಯವಾದಗಳು. ಇನ್ನು ರಾಜಕೀಯ ಬೇಡ ಸ್ವಾಮೀ … ರಾಜಕೀಯ ಬೇಡವೇ ಬೇಡ ನಮಗೆ.

ಅವರಿವರು ಆಡಿದಂತೆ ನಿಮಗೆ ನಡೆಯಲಾಗದಿದ್ದರೂ ನೀವು ನುಡಿದಂತಾದರೂ ನಡೆದು ತೊರಿಸಿದ್ದರೆ, ಮೆಚ್ಚಿಕೊಳ್ಳಬಹುದಿತ್ತು. ತನ್ನ ಸಂಪುಟದಲ್ಲಿದ್ದ ಇದ್ದ ಏಕೈಕ ಮಹಿಳಾಮಂತ್ರಿಗೆ ಅಗತ್ಯಕ್ಕಿಂತ ಹೆಚ್ಚಿನ ಪ್ರಾಶಸ್ತ್ಯಕೊಡುವ ಯತ್ನದಲ್ಲಿ, ಕಂಡವರ ಕಣ್ಣಿಗೆ ಮುಳ್ಳುಚುಚ್ಚುವಂತೆ ಮಾಡಿದಿರಿ. ನಂತರ ತಮ್ಮ ವಿರೋಧಿಗಳ ಮಾತಿಗೆ ಮನ್ನಣೆ ನೀಡಿ ಆಕೆಯನ್ನೇ ಮನೆಗೆ ಕಳುಹಿಸಿ, ಸಾರ್ವಜನಿಕವಾಗಿ ಕಣ್ಣೀರು ಸುರಿಸಿದಿರಿ. ಅಧಿಕಾರಶಾಹಿಗಳಲ್ಲಿ ಮತ್ತು ಭ್ರಷ್ಟಾಚಾರಿಗಳಲ್ಲಿ ತಮ್ಮ ನಿಯತ್ತನ್ನೇ ಅಡವಿಟ್ಟಂತಿರುವ ನೀವು, ಜನರೆದುರು ಮೊಸಳೆಕಣ್ಣೀರು ಸುರಿಸುವುದನ್ನು ಬಿಟ್ಟು ಬೇರೇನನ್ನೂ ಮಾಡಲಾಗದ, ಪಟ್ಟಭದ್ರಹಿತಾಸಕ್ತಿಯನ್ನು ಹೊಂದಿದ, ಗಾದಿಗೇ ಅಂಟಿಕೊಂಡು ಇರಲು ಬಯಸುವ, ಓರ್ವ ಬಲಹೀನ ಎಂಬುದನ್ನು ಮತ್ತೆ ಮತ್ತೆ ಸಾಬೀತುಪಡಿಸಿದಿರಿ. ತಮ್ಮ ರಾಜಕೀಯ ಜೀವನದ ಶವಪೆಟ್ಟಿಗೆತಯಾರಾಗಿದೆ. ಎಂದು ಪತನಗೊಂಡು ಅದರೊಳಗೆ ಮಲಗುತ್ತೀರೋ ನಿಮಗೇ ಗೊತ್ತು. ಆ ಶವಪೆಟ್ಟಿಗೆಗೆ ಹಲಗೆಗಳ ಮತ್ತು ಮೊಳೆಗಳ ಸರಬರಾಜು ಮಾಡಿದ್ದು ಬೇರಾರೂ ಅಲ್ಲ. ಸ್ವತಃ ನೀವೇ ಅನ್ನುವ ಸತ್ಯದ ಅರಿವು ನಿಮಗಿದೆಯೇ? ಈಗಲೂ ಎಚ್ಚೆತ್ತುಕೊಂಡು ಉಳಿದಿರುವ ಮುಂದಿನ ಮೂರು ವರುಷಗಳಲ್ಲಿ, ತಮ್ಮ ಸುದೀರ್ಘ ರಾಜಕೀಯ ಅನುಭವದ ಶಕ್ತಿಯನ್ನು ಬಳಸಿಕೊಂಡು, ರಾಜಕೀಯ ಭ್ರಷ್ಟಾಚಾರದ ಈ ಜಲಧಾರೆಗೆ ವಿರುದ್ಧವಾಗಿ ಈಜುವ ಮನಸ್ಸುಮಾಡಿ, ಜನರ, ಅದರಲ್ಲೂ ಯುವಜನತೆಯ, ಮನಸ್ಸುಗಳನ್ನು ಗೆಲ್ಲುವ ಪ್ರಯತ್ನ ಮಾಡಿ. ಇಲ್ಲವಾದರೆ ಮೂರು ವರುಷಗಳ  ಅಥವಾ ಅದಕ್ಕೂ ಬಹಳಷ್ಟು ಮೊದಲೇ ಬರಬಹುದಾದ  ಚುನಾವಣೆಯಲ್ಲಿ ನಡೆಯುವ ಮತದಾನ ಶೇಕಡಾ ಮೂವತ್ತರ ಆಸುಪಾಸಿನಲ್ಲೇ ಉಳಿದೀತು. ಮತ್ತು ನೀವು ಖಾಯಂ ಆಗಿ ಮನೆಯಲ್ಲೇ ಉಳಿಯಬೇಕಾದೀತು. ಜನರ ಮನದಲ್ಲಿರುವ ಪ್ರಜಾಪ್ರಭುತ್ವದ ಮೇಲಿನ ವಿಶ್ವಾಸ ಸಂಪೂರ್ಣ ನಾಶವಾದೀತು ಮತ್ತು ಅದರ ಶ್ರೇಯ ನಿಮಗಷ್ಟೇ.

ಲೋಕಾಯುಕ್ತರಿಂದ ಆಪಾದಿತನಾಗಿದ್ದ ಶಾಸಕ ಸಂಪಂಗಿಯವರನ್ನು ಸದನ ಸಮಿತಿ ನಿರ್ದೋಷಿ ಎಂದು ಸಾರಿದಾಗ, “ಮಾನ್ಯ ಲೋಕಾಯುಕ್ತರೇ ದಯವಿಟ್ಟು ರಾಜೀನಾಮೆ ನೀಡಿ” ಎಂದು ನಾನು ಇಲ್ಲೇ ಬರೆದಿದ್ದೆ. 

ಆದರೆ ಇಂದು ನಿಮ್ಮಲ್ಲಿ ರಾಜೀನಾಮೆ ಬೇಡುತ್ತಿಲ್ಲ. ತಪ್ಪುಗಳನ್ನು ಸರಿಪಡಿಸಿಕೊಂಡು, ಆಡಳಿತ ಶೈಲಿಯಲ್ಲಿ ಬದಲಾವಣೆ ತಂದುಕೊಂಡು ತೋರಿಸಿಕೊಡಿ ನಮ್ಮ ನಾಡಿನ ಜನತೆಗೆ, ಭಾಜಪಕ್ಕೂ ಆಡಳಿತ ನಡೆಸಲು ಬರುತ್ತದೆ ಎಂದು.

ಆಗ ನಾನು ಇಲ್ಲೇ ನಿಮಗೆ ಮತ್ತೊಮ್ಮೆ ದೊಡ್ಡ ನಮಸ್ಕಾರಮಾಡಿ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ.

*******************


ನಮ್ಮ ಬೆಂಗ್ಳೂರು ಮತದಾನದ ದಿನ “ಆಲಸಿ ಬೆಂಗಳೂರು” ಯಾಕಾಯ್ತೂ…?!

29 ಮಾರ್ಚ್ 10
 
 
 
ಮತದಾನದ ಮುನ್ನಾದಿನ:
 
“ಅಕ್ಕಾವ್ರೇ…ಅಕ್ಕಾವ್ರೇ…”
 
ನಮ್ಮ ಬಾಗಿಲಿನಲ್ಲಿ ನಿಂತು ಯಾರೋ ಕರೆಯುತ್ತಿದ್ದರು.
 
 
ನನ್ನಾಕೆ ಬಾಗಿಲು ತೆರೆದು ನೋಡಿದರೆ, ನೆರೆಮನೆಯ ಕೆಲಸದಾಕೆ ಮುನಿಯಮ್ಮ ನಿಂತಿದ್ದಳು.
 
“ಏನಮ್ಮಾ…? ಏನು ಬೇಕಿತ್ತು?”
 
“ಏನೂ ಇಲ್ಲ ಅಕ್ಕಾವ್ರೇ… ಅಲ್ಲಿ ಎಲ್ರಿಗೂ ಕಾಸ್ ಕೊಡ್ತಾವ್ರೇ…ನಾನೂ ಇಸ್ಕಂಡ್ ಬಂದೆ… ನಿಮ್ಗೂ ಹೇಳಾವ ಅಂತ ಕೂಗ್‍ದೇ..ಅಕ್ಕಾವ್ರೇ”
 
“ಹೌದಾ… ಎಷ್ಟು ಕಾಸು ಸಿಗ್ತು ನಿಂಗೆ?”
 
“ನನಗೆ ಒಂದ್ ಸಾವ್ರಾ  ಕೊಟ್ರಕ್ಕಾವ್ರೇ…ನಮ್ಮೆಜ್ಮಾನ್ರಿಗೆ…ಐನೂರ್ ಜಾಸ್ತಿ ಕೊಟ್ಟವ್ರೇ…”
 
“ಯಾವ ಪಕ್ಷದೋರಮ್ಮಾ…?”
 
“ನಿನ್ನೆ ಕೊಟ್ರಲ್ಲಾ ಅವ್ರು ದಳದೋರಂತೆ…ಅಕ್ಕಾವ್ರೇ…ಇವತ್ತ್ ಕೊಡ್ತಿರಾದು.. ಕಮಲ್ದ ಪಕ್ಷದೋರಂತೆ…”
 
“ಓಹೋ ನಿನ್ನೇನೂ ತಕ್ಕೋಂಡಿದ್ಯಾ…”
 
“ಕೋಡೋವಾಗ ಬ್ಯಾಡಾಂತ ಹೆಂಗನ್ಲೀ..ಅಕ್ಕಾವ್ರೇ?  ನಾವ್ ತಕ್ಕಂಡಿಲ್ಲಾಂದ್ರೆ ಅವ್ರೆಲ್ಲಾ ತಿಂದ್ ಹಾಕಾಕಿಲ್ವಾ…? ಅಲ್ದೇ ಈ ಕಮಲ್ದ ಪಕ್ಷ ಕೊಡ್ತಿರಾದ್ ಸರ್ಕಾರದ್ ದುಡ್ಡು…ಸರ್ಕಾರದ್ ದುಡ್ಡ್ ನಮ್ಮ್ ದುಡ್ಡೆ ಅಲ್ವಾ ಅಕ್ಕಾವ್ರೇ? ಅದೂನ್ನಾ ಬ್ಯಾಡಾನ್ನಾಕ್ಕಾಯ್ತದಾ?”
 
“ಸರೀನಮ್ಮಾ…ಒಟ್ಟ್ ಎಷ್ಟ್ ಕಾಸ್ ಬಂತು ನಿಮ್ ಮನೆಗೆ..?”
 
“ಎಲ್ಡು ಪಾರ್ಟೀದು ಸೇರ್ ನಾವ್ ಮೂರ್ ಜನಾಕೆ ನಾಲ್ಕೂವರೆ ಸಾವ್ರಾ ಬಂದದೆ ಅಕ್ಕಾವ್ರೇ…”
 
“ಸರಿ ಬಿಡು ಈ ಚುನಾವಣೆಯಿಂದ ನಿಮಗಾದ್ರೂ ಲಾಭ ಆಯ್ತಲ್ವಾ …?”
 
ನಕ್ಕು ನಡೆದಿದ್ದಳು ಮುನಿಯಮ್ಮ…
 
 
 
ಮತದಾನದಂದು ಸಾಯಂಕಾಲ:
 
ನೆರೆಮನೆಗೆ ಕೆಲಸಕ್ಕಾಗಿ ದಿನಾ ಬೆಳಿಗ್ಗೆ ಬರುತ್ತಿದ್ದ ಮುನಿಯಮ್ಮ, ಅಂದು ಸಾಯಂಕಾಲ ಬರುತ್ತಿದ್ದುದನ್ನು ಕಂಡು ನನ್ನಾಕೆ ಕರೆದು ಕೇಳಿದಳು
 
“ಏನ್ ಮುನಿಯಮ್ಮಾ…ವೋಟ್ ಹಾಕಿದ್ರೇನಮ್ಮಾ…?”
 
“ಇಲ್ಲಾ ಅಕ್ಕಾವ್ರೇ..”
 
“ಅದ್ಯಾಕ್ ಮುನಿಯಮ್ಮಾ… ಅಷ್ಟೊಂದು ಕಾಸು ತಗೋಂಡು ವೋಟ್ ಹಾಕ್ದೇ ಹೆಂಗಿದ್ರೀ ನೀವು?
 
“ಇಲ್ಲಾ ಅಕ್ಕಾವ್ರೇ ನಾನ್ ಹೋಗಾಣಂತಿದ್ದೆ… ನಮ್ಮೆಜ್ಮಾನ್ರೇ ಹೇಳಿದ್ರು… ಯಾರ್ಗೂ ಮೋಸ ಮಾಡ್ಬಾರ್ದೂ … ಎಲ್ಡು ಪಾರ್ಟೀಯವ್ರೂ ಕಾಸ್ ಕೊಟ್ಟವ್ರೇ…ಯಾರಿಗ್ ವೋಟ್ ಹಾಕಿದ್ರೂ…ಇನ್ನೊಬ್ರಿಗೆ ಮೋಸ ಮಾಡ್‍ದಂಗೇ… ನಮ್ಮನ್ನ..ನಿಯತ್ತ್ ಇಲ್ದೋರ್ ಅಂತಾರೆ… ಹಂಗಾಗಿ…ನಾವ್ ಹೋಗಾದೇ ಬೇಡಾ ಅಂದ್ಬಿಟ್ರು…”
 
“ಅಯ್ಯೋ ದೇವ್ರೇ…ಹೀಗೆಲ್ಲಾ ಮಾಡ್ಬಾರ್ದಮ್ಮಾ…ವೋಟ್ ಹಾಕ್ದೇ ಇರ್ಬಾರ್ದಮ್ಮಾ…”
 
 
“ನೀವ್ ಹೇಳಾದೂ ಸರೀನೇ ಅಕ್ಕಾವ್ರೇ… ಆದ್ರೆ ನಮ್ಮೆಜ್ಮಾನ್ರ್ ಮಾತ್ನ ಮೀರಕ್ಕಾಯ್ತದಾ? ಅಲ್ದೇ…ನಿನ್ನೆ ರಾತ್ರಿ ಕಾಂಗ್ರೇಸ್ ಲೀಡ್ರು ಗಿರೀಶಪ್ಪಾ ಮೂರ್ ಇಸ್ಕಿ ಬಾಟ್ಲಿ ಬೇರೆ ಕೊಡ್ಸಿದ್ರಾ… ಅದ್ರಾಗ್ ನಂಗೂ ವಸಿ ಬಗ್ಸಿ ಕೊಟ್ಟಿದ್ರು… ನಮ್ಮೆಜ್ಮಾನ್ರು. ಹಂಗಾಗಿ ಮುಂಜಾನಿಂದ ನಂಗೂ ತಲೀನೋವು ಅಕ್ಕಾವ್ರೇ…  ಹಂಗಾಗಿ ನಾನೂ ಮನೀಕ್ಕಂಡಿದ್ದೆ..  ಈವಾಗಷ್ಟೇ ಎದ್ ಈಕಡಿಗ್ ಬಂದೆ ಅಕ್ಕಾವ್ರೇ…..”
 
ಈವಾಗ್ ಕೇಳ್ತೀರಾ ನಮ್ ಬೆಂಗ್ಳೂರು ಮತದಾನದ ದಿನ “ಆಲಸಿ ಬೆಂಗಳೂರು” ಯಾಕಾಯ್ತೂ…ಅಂತಾ?
 
*********************
 
 
ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಚುನಾವಣೆ ನಿನ್ನೆ (೨೮ ಮಾರ್ಚ್ ೨೦೧೦ರಂದು) ನಡೆದಿತ್ತು.
 
 

ಸೂತಕ ಕಳೆದು ಕ್ರಿಯೆ ಮುಗಿಸಿ ಆಗುವ ಮೊದಲೇ ಶುದ್ಧ!!!

16 ಸೆಪ್ಟೆಂ 09

ರಾಜಕಾರಣಿಗಳು ಸತ್ತಾಗ ಈ ಸರಕಾರ ರಜೆ ಸಾರುವುದೇಕೆ

ರಜೆ ಬೇಜಾರು ಎಂದು ಜನರು ಸಿನೇಮಾ ನೋಡುವುದೇಕೆ

 

ಗೌರವ ಸೂಚಿಸಲು ಆ ದಿನ ಮುಚ್ಚುವುದಾದರೆ ಎಲ್ಲವನೂ

ಮುಚ್ಚಬೇಕಾಗಿದೆ ನಿಜಕ್ಕೂ ಮನರಂಜನೆಯ ಕೇಂದ್ರಗಳನು

 

ಶೋಕಾಚರಣೆಯಲಿ ಜನರು ಮನೆಯೊಳಗೇ ಇದ್ದು ಬಿಡಬೇಕು

ಮನೆಗಳನು ಬಿಟ್ಟು ಹೊರಗೆ ಯಾರೂ ಬಾರದಂತೆ ಇರಬೇಕು

 

ಸತ್ತವನ ನೆನೆದು ಕಂಬನಿ ಮಿಡಿಯುವವರು ಯಾರೂ ಇಲ್ಲಿಲ್ಲ

ಮುಂದೆ ಸಾಯುವ ಮುದಿಯ ಯಾರೆಂದು ನೋಡುವವರೆಲ್ಲಾ

 

ಜೀವಂತ ಇದ್ದಾಗ ಹಾವು ಮುಂಗುಸಿಯಂತೆ ಕಾದಾಡುವವರು

ಸತ್ತಾಗ ಶವದ ಮೇಲೆ ಹೂಗಳನರ್ಪಿಸಿ ಕಣ್ಣೀರ ಸುರಿಸುವವರು

 

ಚುನಾವಣೆಯಲಿ ಸೋಲಿಸಲಾಗದವಗೆ ಬಂದರೆ  ಸಾವು ಸಹಜ

ವಿರೋಧ ಪಕ್ಷದವರು ಒಳಗೊಳಗೇ ಖುಷಿಪಡುವುದಂತೂ ನಿಜ

 

ಸ್ವಪಕ್ಷ ಬಾಂಧವರಿಗೆ ಒಂದು ಕುರ್ಚಿ ಖಾಲಿಯಾದುದಕೆ ಹರುಷ

ತನಗೆ ದೊರಕ ಬಹುದೇ ಆ ಕುರ್ಚಿ ಎಂಬ ಕಾತರ ಪ್ರತಿ ನಿಮಿಷ

 

ಸತ್ತವರ ಸೂತಕ ಕಳೆದು ಕ್ರಿಯೆ ಮುಗಿಸಿ ಆಗುವ ಮೊದಲೇ ಶುದ್ಧ

ಗದ್ದುಗೆ ಏರಿ ಕೂರಲು ಮನೆಯೊಳಗಿನ ಗಂಡಸು ಹೆಂಗಸರೆಲ್ಲ ಸಿದ್ಧ


ಈ ಸೋಲು ಮುಂದಿನ ನಿನ್ನ ಗೆಲುವಿಗೆ ದಾರಿ…!!!

24 ಏಪ್ರಿಲ್ 09

prithvi3

ಇಂದಿನ ಈ ಸೋಲು ಮುಂದಿನ ನಿನ್ನ ಗೆಲುವಿಗೆ ದಾರಿ

ಒಮ್ಮೆಲೇ ನಕ್ಷತ್ರಗಳ ಹಿಡಿಯಬಾರದು ಆಕಾಶಕ್ಕೆ ಹಾರಿ

ಸೋಲಿನ ರುಚಿ ಉಂಡವಗೆ ಗೆಲುವಿನ ರುಚಿ ಸಹನೀಯ

ಒಮ್ಮೆ ಗೆದ್ದರೆ ಮತ್ತೆ ಸೋಲುಂಬುದದೆಷ್ಟು ಅಸಹನೀಯ

ಪಕ್ಷ ಮತ ಜಾತಿ ರಾಜಕೀಯದದಿಂದ ಇರಬೇಕು ದೂರ

ಆಗ ನೀ ಆಗುವೆ ಜನರ ಹೃದಯಗಳನೇ ಗೆಲ್ಲುವ ಶೂರ

ಶಾಶ್ವತ ಅಲ್ಲ ಗೆಲುವು ಬುದ್ಧಿವಂತಿಕೆಯಿಂದ ಜನರ ಗೆದ್ದರೆ

ಶಾಶ್ವತ ಜನರ ಒಲವು  ಹೃದಯವಂತಿಕೆ ನಿನಗೆ ತಂದರೆ

ನಿನ್ನ ಭವ್ಯ ಭವಿಷತ್ತಿನ ಕನಸು ಕಾಣುತಿವೆ ನನ್ನ ಕಂಗಳು

ಮುಂದಿನದಕೆ ಭದ್ರ ಬುನಾದಿ ಇಂದಿನ ಏಳು ಬೀಳುಗಳು

ಮಾತಾಪಿತರ ಆಶೀರ್ವಾದ ಎಂತಿಹುದೋ ನಿನ್ನೊಂದಿಗೆ

ಅಂತೆಯೇ ನಾನೂ ಇರುವೆ ಸದಾ ನಿನ್ನ ಜೊತೆ ಜೊತೆಗೆ

**********************************

ಇಂದು ನಡೆದ, ಉಡುಪಿ ಬಾರ್ ಕೌನ್ಸಿಲ್ ಕಾರ್ಯದರ್ಶಿಯ ಚುನಾವಣೆಯಲ್ಲಿ

ಸೋಲುಂಡ ನನ್ನ ತಮ್ಮ ಪೃಥ್ವಿರಾಜನಿಗೆ.


ನನ್ನ ಮೂರ್ಖನನ್ನಾಗಿಸಬೇಡಿ!!!

01 ಏಪ್ರಿಲ್ 09
ಮೂರ್ಖರ ದಿನದಂದು ನನ್ನ
ಮತ್ತೆ ಮೂರ್ಖನನ್ನಾಗಿಸಬೇಡಿ
 
ನಿಮ್ಮ ಸಮಯ ನಿಮ್ಮ ಶಕ್ತಿಯ
ಹೀಗೆ ವ್ಯರ್ಥಗೊಳಿಸಲೇ ಬೇಡಿ
 
ಮೂರ್ಖನೇ ಹಿಂದಿನಿಂದಲೂ
ನಿಜ ಇಂದು ಉಳಿದಿಲ್ಲ ಬಾಕಿ
 
ಮೂರ್ಖನಾಗುತ್ತ ಬಂದಿದ್ದೇನೆ
ನಾಯಕರುಗಳಿಗೆ ಮತ ಹಾಕಿ
 
ನಮ್ಮ ತಲೆಗೆ ಹೊಸ ಹೊಸ
ಟೋಪಿ ಪ್ರತೀ ಚುನಾವಣೆಯಲ್ಲೂ
 
ನಮ್ಮದೇ ಪ್ರತೀಬಾರಿ ಸೋಲು
ನಮ್ಮ ನಾಯಕರ ಗೆಲುವಿನಲ್ಲೂ
 
ಮತ್ತೆ ಬಂದಿದ್ದಾರೆ ನಮ್ಮ ಮತ
ಯಾಚನೆಗೆ ಮೂರ್ಖರ ಮಾಸದಲ್ಲಿ
 
ನಮ್ಮೆಲ್ಲರ ಮೂರ್ಖರನ್ನಾಗಿಸಲು
ಮುಖದಲ್ಲಿ ಮಂದಹಾಸ ಚೆಲ್ಲಿ
 
ಒದ್ದು ಓಡಿಸಬೇಕು ದೂರ ಎಂದು 
ನನ್ನ ಮನದೊಳಗಿದೆ ಹಂಬಲ
 
ಯಾರಲ್ಲಿ ಹೇಳಲಿ ಯಾರು ಬಂದು
ನೀಡುವರು ನನಗೆ ಇಲ್ಲಿ ಬೆಂಬಲ
 
ಚುನಾವಣೆಗೇ ಹಾಕಬಾರದೇಕೆ
ನಾವೆಲ್ಲಾ ಈ ಬಾರಿ ಬಹಿಷ್ಕಾರ
 
ಎಂಬ ಕರೆ ನೀಡಿದರೆ ನನಗೆ ಸಜೆ
ಯಾಕೆಂದರದು ಸಂವಿಧಾನ ಬಾಹಿರ