ಈ ನರ್ಸಮ್ಮನ ಬಗ್ಗೆ ಮೊದ್ಲಿಂದಾನೂ ಅನುಮಾನ ಇತ್ತು ಕಣ್ರೀ!

14 ಏಪ್ರಿಲ್ 10

 

 ಈ ನರ್ಸಮ್ಮನ ಬಗ್ಗೆ ನನಗೆ ಮೊದ್ಲಿಂದಾನೂ ಅನುಮಾನ ಇತ್ತು ಕಣ್ರೀ**

ಮಾನ ಮರ್ಯಾದೆ ಮೂರಾಬಟ್ಟೆ ಮಾಡಿಕೊಂಡೀಗ ರಾಜೀ ಆಗಿದಾಳಲ್ರೀ

 

ದಾವೆಯಲಿ ಅವಗುಣವಾದರೆ ಸಚಿವರಿಗೆ ಸ್ಥಾನ ಕಳೆದುಕೊಳ್ಳುವ ಸಮಸ್ಯೆ

ನರ್ಸಮ್ಮನಿಗೆ ಮಾನ ಹೋದರೆ ಹೋಗಲಿ ಕಾಸಾದರೂ ಸಿಗಲಿ ಎಂಬಾಸೆ

 

ಮಠಾಧೀಶರು ಹೇಳಿದ ಕೂಡ್ಲೇ ಈ ನರ್ಸಮ್ಮನ ಹೋದ ಮಾನ ಬಂತೇ

ಅಲ್ಲಾ ಅಬಕಾರಿ ಸಚಿವರ ಕಡೆಯಿಂದ ಕೊಟ್ಯಾನುಕೋಟಿ ಕೈವಶವಾಯ್ತೇ

 

ಅಂದು ಜನತೆಯ ಮುಂದೆ ಗೋಳಾಡಿ ಈಗ ಗುಟ್ಟಿನಲ್ಲಿ ರಾಜಿ ಆಗಿದ್ದೇಕೆ

ಸಹಾನುಭೂತಿ ತೋರಿದ್ದ ಜನತೆಗೆ ಸಮಜಾಯಿಷಿ ನೀಡುತ್ತಿಲ್ಲವಲ್ಲ ಏಕೆ

 

ನ್ಯಾಯಾಲಯದಲ್ಲಿ ದಾವೆ ಹೂಡಿ ಈಗ ರಾಜಿ ಆಗುವುದೆಂದರೆ ಅದಕ್ಕೇನರ್ಥ

ದಂಡ ವಿಧಿಸಬಾರದೇ ನ್ಯಾಯಾಲಯದ ಸಮಯ ಮಾಡಿರುವುದಕ್ಕೆ ವ್ಯರ್ಥ

 

ದೂರದರ್ಶನದಲ್ಲಿ ಬಂದು ಕೂಗಾಡಿ ಗುಟ್ಟಲ್ಲಿ ರಾಜೀ ಮಾಡಿಕೊಳ್ಳುವ ಈ ಶೈಲಿ

ಹೊಸದೇನೂ ಅಲ್ಲ ಮೊನ್ನೆ ಮೊನ್ನೆ ಆಡಿದ್ದರು ಐಂದ್ರಿತಾ ರೇ ಮತ್ತು ನಾಗತೀಹಳ್ಳಿ!!!

*************

**ನರ್ಸಮ್ಮ ನಿಂದದ್ಯಾಕೋ ಅತಿಯಾಯ್ತು ಅಲ್ವಾ..?

 

 


ನಮ್ಮ ಬೆಂಗ್ಳೂರು ಮತದಾನದ ದಿನ “ಆಲಸಿ ಬೆಂಗಳೂರು” ಯಾಕಾಯ್ತೂ…?!

29 ಮಾರ್ಚ್ 10
 
 
 
ಮತದಾನದ ಮುನ್ನಾದಿನ:
 
“ಅಕ್ಕಾವ್ರೇ…ಅಕ್ಕಾವ್ರೇ…”
 
ನಮ್ಮ ಬಾಗಿಲಿನಲ್ಲಿ ನಿಂತು ಯಾರೋ ಕರೆಯುತ್ತಿದ್ದರು.
 
 
ನನ್ನಾಕೆ ಬಾಗಿಲು ತೆರೆದು ನೋಡಿದರೆ, ನೆರೆಮನೆಯ ಕೆಲಸದಾಕೆ ಮುನಿಯಮ್ಮ ನಿಂತಿದ್ದಳು.
 
“ಏನಮ್ಮಾ…? ಏನು ಬೇಕಿತ್ತು?”
 
“ಏನೂ ಇಲ್ಲ ಅಕ್ಕಾವ್ರೇ… ಅಲ್ಲಿ ಎಲ್ರಿಗೂ ಕಾಸ್ ಕೊಡ್ತಾವ್ರೇ…ನಾನೂ ಇಸ್ಕಂಡ್ ಬಂದೆ… ನಿಮ್ಗೂ ಹೇಳಾವ ಅಂತ ಕೂಗ್‍ದೇ..ಅಕ್ಕಾವ್ರೇ”
 
“ಹೌದಾ… ಎಷ್ಟು ಕಾಸು ಸಿಗ್ತು ನಿಂಗೆ?”
 
“ನನಗೆ ಒಂದ್ ಸಾವ್ರಾ  ಕೊಟ್ರಕ್ಕಾವ್ರೇ…ನಮ್ಮೆಜ್ಮಾನ್ರಿಗೆ…ಐನೂರ್ ಜಾಸ್ತಿ ಕೊಟ್ಟವ್ರೇ…”
 
“ಯಾವ ಪಕ್ಷದೋರಮ್ಮಾ…?”
 
“ನಿನ್ನೆ ಕೊಟ್ರಲ್ಲಾ ಅವ್ರು ದಳದೋರಂತೆ…ಅಕ್ಕಾವ್ರೇ…ಇವತ್ತ್ ಕೊಡ್ತಿರಾದು.. ಕಮಲ್ದ ಪಕ್ಷದೋರಂತೆ…”
 
“ಓಹೋ ನಿನ್ನೇನೂ ತಕ್ಕೋಂಡಿದ್ಯಾ…”
 
“ಕೋಡೋವಾಗ ಬ್ಯಾಡಾಂತ ಹೆಂಗನ್ಲೀ..ಅಕ್ಕಾವ್ರೇ?  ನಾವ್ ತಕ್ಕಂಡಿಲ್ಲಾಂದ್ರೆ ಅವ್ರೆಲ್ಲಾ ತಿಂದ್ ಹಾಕಾಕಿಲ್ವಾ…? ಅಲ್ದೇ ಈ ಕಮಲ್ದ ಪಕ್ಷ ಕೊಡ್ತಿರಾದ್ ಸರ್ಕಾರದ್ ದುಡ್ಡು…ಸರ್ಕಾರದ್ ದುಡ್ಡ್ ನಮ್ಮ್ ದುಡ್ಡೆ ಅಲ್ವಾ ಅಕ್ಕಾವ್ರೇ? ಅದೂನ್ನಾ ಬ್ಯಾಡಾನ್ನಾಕ್ಕಾಯ್ತದಾ?”
 
“ಸರೀನಮ್ಮಾ…ಒಟ್ಟ್ ಎಷ್ಟ್ ಕಾಸ್ ಬಂತು ನಿಮ್ ಮನೆಗೆ..?”
 
“ಎಲ್ಡು ಪಾರ್ಟೀದು ಸೇರ್ ನಾವ್ ಮೂರ್ ಜನಾಕೆ ನಾಲ್ಕೂವರೆ ಸಾವ್ರಾ ಬಂದದೆ ಅಕ್ಕಾವ್ರೇ…”
 
“ಸರಿ ಬಿಡು ಈ ಚುನಾವಣೆಯಿಂದ ನಿಮಗಾದ್ರೂ ಲಾಭ ಆಯ್ತಲ್ವಾ …?”
 
ನಕ್ಕು ನಡೆದಿದ್ದಳು ಮುನಿಯಮ್ಮ…
 
 
 
ಮತದಾನದಂದು ಸಾಯಂಕಾಲ:
 
ನೆರೆಮನೆಗೆ ಕೆಲಸಕ್ಕಾಗಿ ದಿನಾ ಬೆಳಿಗ್ಗೆ ಬರುತ್ತಿದ್ದ ಮುನಿಯಮ್ಮ, ಅಂದು ಸಾಯಂಕಾಲ ಬರುತ್ತಿದ್ದುದನ್ನು ಕಂಡು ನನ್ನಾಕೆ ಕರೆದು ಕೇಳಿದಳು
 
“ಏನ್ ಮುನಿಯಮ್ಮಾ…ವೋಟ್ ಹಾಕಿದ್ರೇನಮ್ಮಾ…?”
 
“ಇಲ್ಲಾ ಅಕ್ಕಾವ್ರೇ..”
 
“ಅದ್ಯಾಕ್ ಮುನಿಯಮ್ಮಾ… ಅಷ್ಟೊಂದು ಕಾಸು ತಗೋಂಡು ವೋಟ್ ಹಾಕ್ದೇ ಹೆಂಗಿದ್ರೀ ನೀವು?
 
“ಇಲ್ಲಾ ಅಕ್ಕಾವ್ರೇ ನಾನ್ ಹೋಗಾಣಂತಿದ್ದೆ… ನಮ್ಮೆಜ್ಮಾನ್ರೇ ಹೇಳಿದ್ರು… ಯಾರ್ಗೂ ಮೋಸ ಮಾಡ್ಬಾರ್ದೂ … ಎಲ್ಡು ಪಾರ್ಟೀಯವ್ರೂ ಕಾಸ್ ಕೊಟ್ಟವ್ರೇ…ಯಾರಿಗ್ ವೋಟ್ ಹಾಕಿದ್ರೂ…ಇನ್ನೊಬ್ರಿಗೆ ಮೋಸ ಮಾಡ್‍ದಂಗೇ… ನಮ್ಮನ್ನ..ನಿಯತ್ತ್ ಇಲ್ದೋರ್ ಅಂತಾರೆ… ಹಂಗಾಗಿ…ನಾವ್ ಹೋಗಾದೇ ಬೇಡಾ ಅಂದ್ಬಿಟ್ರು…”
 
“ಅಯ್ಯೋ ದೇವ್ರೇ…ಹೀಗೆಲ್ಲಾ ಮಾಡ್ಬಾರ್ದಮ್ಮಾ…ವೋಟ್ ಹಾಕ್ದೇ ಇರ್ಬಾರ್ದಮ್ಮಾ…”
 
 
“ನೀವ್ ಹೇಳಾದೂ ಸರೀನೇ ಅಕ್ಕಾವ್ರೇ… ಆದ್ರೆ ನಮ್ಮೆಜ್ಮಾನ್ರ್ ಮಾತ್ನ ಮೀರಕ್ಕಾಯ್ತದಾ? ಅಲ್ದೇ…ನಿನ್ನೆ ರಾತ್ರಿ ಕಾಂಗ್ರೇಸ್ ಲೀಡ್ರು ಗಿರೀಶಪ್ಪಾ ಮೂರ್ ಇಸ್ಕಿ ಬಾಟ್ಲಿ ಬೇರೆ ಕೊಡ್ಸಿದ್ರಾ… ಅದ್ರಾಗ್ ನಂಗೂ ವಸಿ ಬಗ್ಸಿ ಕೊಟ್ಟಿದ್ರು… ನಮ್ಮೆಜ್ಮಾನ್ರು. ಹಂಗಾಗಿ ಮುಂಜಾನಿಂದ ನಂಗೂ ತಲೀನೋವು ಅಕ್ಕಾವ್ರೇ…  ಹಂಗಾಗಿ ನಾನೂ ಮನೀಕ್ಕಂಡಿದ್ದೆ..  ಈವಾಗಷ್ಟೇ ಎದ್ ಈಕಡಿಗ್ ಬಂದೆ ಅಕ್ಕಾವ್ರೇ…..”
 
ಈವಾಗ್ ಕೇಳ್ತೀರಾ ನಮ್ ಬೆಂಗ್ಳೂರು ಮತದಾನದ ದಿನ “ಆಲಸಿ ಬೆಂಗಳೂರು” ಯಾಕಾಯ್ತೂ…ಅಂತಾ?
 
*********************
 
 
ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಚುನಾವಣೆ ನಿನ್ನೆ (೨೮ ಮಾರ್ಚ್ ೨೦೧೦ರಂದು) ನಡೆದಿತ್ತು.