ಪ್ರಭೆ-ಪ್ರತಿಭೆ!

26 ಜೂನ್ 12

ಸಖೀ,

ನನ್ನ ಕವನಗಳನ್ನು,
ನನ್ನ ಬರಹಗಳನ್ನು,
ನೀನು ಓದಿ, ಮೆಚ್ಚಿ,
ನನ್ನ ಪ್ರತಿಭೆಯನ್ನು
ಎಷ್ಟು ಹೊಗಳಿದರೂ,
ನಿಜ ಏನೆಂಬುದು,
ನನ್ನಂತೆಯೇ
ನಿನಗೂ ಗೊತ್ತು;

ನಿನ್ನ ಸಾಮಿಪ್ಯದ
ಈ ಸೌಭಾಗ್ಯ ಸದಾ
ಇರುವ, ನನ್ನೊಳಗಿನ
ಪ್ರತಿಭೆಯು ಹೊರ
ಹೊಮ್ಮುವುದು, ನಿನ್ನ
ಒಲವಿನ ಪ್ರಭೆಯ
ಪ್ರಭಾವದಿಂದಾಗಿ
ಮಾತ್ರ, ಯಾವತ್ತೂ!
**********


ನನಗಿಂದು ರಕ್ಷಣೆ ಬೇಕು!

24 ಆಗಸ್ಟ್ 10

 

“ರಕ್ಷಾಬಂಧನದ
ಈ ಶುಭ ದಿನದಂದು
ಹಾರ್ದಿಕ
ಶುಭ ಹಾರೈಕೆಗಳು,
ದೇವರು ಸದಾ
ಹೀಗೆಯೇ
ಹರಸುತ್ತಿರಲಿ”

ಇಂದು ಮುಂಜಾನೆ
ನನ್ನ ಪ್ರೀತಿಯ
ಸಹೋದರಿಯರಿಗೆಲ್ಲಾ
ನನ್ನ ಜಂಗಮ
ದೂರವಾಣಿಯ ಮೂಲಕ
ಈ ಶುಭ ಸಂದೇಶಗಳನ್ನು
ರವಾನಿಸಿ ಮುಗಿಸಿದ್ದೆನಷ್ಟೇ,
ಅತ್ತಕಡೆಯಿಂದ ಕರೆ ಬಂತು,

ನೋಡಿದ್ರೆ, ಆಕೆಯದು,
ಏನಿರಬಹುದು ವಿಶೇಷ
ಎಂಬ ಆಶ್ಚರ್ಯದಿಂದಲೇ
ಉತ್ತರಿಸಿದೆ,
ನಾನು “ನಮಸ್ಕಾರ”
ಅನ್ನುವ ಮೊದಲೇ
ಬೈಗುಳದ ಸುರಿಮಳೆ
“ಹೆಂಗಿದೆ ಮೈಗೆ
ತಲೆಗಿಲೆ ಕೆಟ್ಟಿದೆಯಾ?
ಇಷ್ಟು ದಿನ ಸಖೀ,
ಸಖೀ ಅಂತ ಕವನ
ಬರೀತಿದ್ದವರು
ಈದಿನ ರಾಖಿ, ರಾಖಿ
ಅಂತಿದೀರಲ್ರೀ
ಏನಾಗಿದೆ ನಿಮಗೆ?
ಯಾವಾಗ ಸಿಗ್ತೀರಾ
ಮಾತಾಡ್ಬೇಕು ನಿಮ್ಜೊತೆ…
……. …….. …..
……. …….. …..
……. …….. …..”

ಏನೋ ಎಡವಟ್ಟು ಆಗಿದೆ,
ಎಲ್ಲೋ ಕಥೆ ಕೆಟ್ಟಿದೆ,
ಎಂಬುದರ ಅರಿವಾಗಲು
ಹಿಡಿಯಲಿಲ್ಲ ಹೆಚ್ಚು
ಸಮಯ ನನಗೆ,
“ಹಲೋ… ಹಲೋ…
ಸ್ವಲ್ಪ ಇರು, ಆಮೇಲೆ
ನಾನೇ ಕರೇ ಮಾಡ್ತೀನಿ…”
ಅಂತ ಮಾತು ಮುಗಿಸಿದೆ.

ನನ್ನಿಂದ ರವಾನೆಯಾದ
ಸಂದೇಶಗಳ ಪಟ್ಟಿ
ನೋಡಿದಾಗ ಅರಿವಾಯ್ತು,
ನನ್ನೆಲ್ಲಾ ಸಹೋದರಿಯರ
ಜೊತೆಗೇ, ನನ್ನ
ಸಹೊದರಿಯ ಹೆಸರಿನ
ಸಾಮ್ಯತೆ ಇರುವ
ಆಕೆಗೂ ನನ್ನಿಂದ,
ಅನಾಮತ್ತಾಗಿ ಈ ದಿನ,
ರಕ್ಷಾಬಂಧನದ ಸಂದೇಶ
ರವಾನೆಯಾಗಿ ಬಿಟ್ಟಿತ್ತು!

ಸಂಜೆ ಭೇಟಿ ಆದಾಗ,
ಸಮಜಾಯಿಷಿ ನೀಡಬೇಕು,
ರಮಿಸಬೇಕು, ನನ್ನಲ್ಲಿರುವ
ಸಹನಶೀಲತೆಯನ್ನು
ಇಂದು ನಾ ಒರೆಗೆ ಹಚ್ಚಬೇಕು;

ಅದಕ್ಕಾಗಿ, ನನಗೆ
ನಿಮ್ಮೆಲ್ಲರ ಬೆಂಬಲ ಬೇಕು
ಶುಭ ಹಾರೈಕೆಗಳು ಬೇಕು
ರಕ್ಷಾಬಂಧನದ ಈ ದಿನದಂದು
ನನಗೆ ರಕ್ಷಣೆ ಬೇಕು
ನೀವೆಲ್ಲಾ ನನ್ನನ್ನು
ಹರಸುವಿರಲ್ಲಾ?
*********


ಒಳ್ಳೆಯ ಸುದ್ದಿಗಾಗಿ ಕಣ್ಣು ಕಿವಿಗಳು ಕಾದಿವೆ!!!

01 ಆಕ್ಟೋ 09

ಈ ವರುಷದ ಒಂಭತ್ತು ತಿಂಗಳುಗಳು ಬೇಗನೇ ಕಳೆದಂತಾಗಿವೆ

ಶುಭ ಘಟನಾ ಪ್ರಸವದ ಸುದ್ದಿಗೆ ಕಣ್ಣು ಕಿವಿಗಳು ಇನ್ನೂ ಕಾದಿವೆ

 

ಒಳ್ಳೆಯ ಘಟನೆಯೊಂದೂ ಘಟಿಸಿದಂತೆಯೇ ಇಲ್ಲ ಈ ವರುಷ

ಯಾವ ಸುದ್ದಿಯೂ ತಂದಂತೇ ಇಲ್ಲ ಯಾರ ಮನಕ್ಕೂ ಹರುಷ

 

ಚಂದ್ರನ ಮೈಮೇಲೆ ದೂರದಲಿ ಕಂಡಂತಾಯ್ತಂತೆ ನೀರ ಪಸೆ

ಅದರಿಂದ ನೀಗಬಹುದೇ ಇಲ್ಲಿ ನೀರಿಲ್ಲದೆ ಪರದಾಡುವವರಾಸೆ

 

ಪ್ರತಿ ದಿನ ಅದೇ ಕೊಲೆ ಸುಲಿಗೆ ಸಾವು ನೋವುಗಳದೇ ಸುದ್ದಿ

ಮತ್ತೆ ಮತ್ತೆ ಓದುವ ಸುದ್ದಿಗಳಿಲ್ಲದೆ ಪತ್ರಿಕೆಗಳೆಲ್ಲ ಆಗಿವೆ ರದ್ದಿ

 

ತಮ್ಮ ಗಾಂಭೀರ್ಯತೆ ಕಳೆದು ಕೊಳ್ಳುತ್ತಿವೆ ದಿನ ಪತ್ರಿಕೆಗಳು

ಸಂಪಾದಕೀಯದಲ್ಲೆಲ್ಲಾ ಅಂತರ್ಜಾಲದ ಹಾಸ್ಯ ತುಣುಕುಗಳು 

 

ಉಳಿದ ಮೂರು ತಿಂಗಳಲ್ಲಿ ಒಂದು ಒಳ್ಳೆಯ ಸುದ್ದಿ ಬರಲಂತೆ

ಈ ವರುಷವನು ಜೀವನಪೂರ್ತಿ ನೆನಪಿನಲ್ಲಿರಿಸಿಕೊಳ್ಳುವಂತೆ


ಹಿಂದೀ ಪಕ್ಷಾಚರಣೆಯಿಂದ ಕನ್ನಡಕ್ಕಿಲ್ಲ ಅಪಾಯ!!!

18 ಸೆಪ್ಟೆಂ 09

ಹಿಂದೀ ಪಕ್ಷಾಚರಣೆಯಿಂದ ಕನ್ನಡಕ್ಕೆ ಆಗದು ಏನೂ ಅಪಾಯ

ಕನ್ನಡವನ್ನು ಇಲ್ಲಿ ಬೆಳೆಸುವುದಕ್ಕೆ ಬೇಕಾಗಿದೆ ಹೊಸ ಉಪಾಯ

 

ಅನ್ಯರನು ದ್ವೇಷಿಸಿದರೆ ನಮ್ಮವರಿಗೆ ಆಗದು ಹೆಚ್ಚೇನೂ ಲಾಭ

ಹೆಚ್ಚು ಭಾಷೆಗಳ ಕಲಿತರೆ ಆಗದೇ ಇರಲಾರದು ನಮಗೆ ಲಾಭ

 

ಕೇಂದ್ರ ಸರಕಾರ ಹಿಂದಿಯನ್ನು ಹೇರುತಿದೆ ಎನ್ನುತಿರುವಂತೆ

ರಾಜ್ಯ ಸರ್ಕಾರವೂ ಕನ್ನಡ ಭಾಷೆಯನಿಲ್ಲಿ ಹೇರಿದರೆ ಏನಂತೆ

 

ಹೇರಿಕೆಯಿಂದಲೇ ಭಾಷೆಯನು ಜನರು ಬಳಸುವರೆಂದಾದರೆ

ಕನ್ನಡ ಹೇರಿಕೆಯ ಆದೇಶ ಹೊರಡಿಸಿದರೆ ಏನಿದೆ ತೊಂದರೆ

 

ವಿಧಾನ ಸಭೆಯಲಿ ಇರುವಂತೆ ಸರ್ಕಾರದ ಆ ಮುಖ್ಯಮಂತ್ರಿ

ಕನ್ನಡ ಪ್ರಾಧಿಕಾರದಲೂ ನಮಗೆ ಇದ್ದಾರೆ ಈ ಮುಖ್ಯಮಂತ್ರಿ

 

ಇಬ್ಬರು ಮುಖ್ಯಮಂತ್ರಿಗಳಿದ್ದೂ ಆಗದೇ ಇದ್ದರೆ ಭಾಷೆಯ ಏಳಿಗೆ

ತಿಳಿಯಿರಿ ಭಾಷೆಯ ಹೆಸರಲ್ಲಿ ತುಂಬಿಸಿಕೊಳ್ಳುತ್ತಿದ್ದಾರೆ ಜೋಳಿಗೆ

 

ಮನಮಾಡಬೇಕಿಲ್ಲ ವೇದಿಕೆಗಳನೇರಿ ಭಾಷಷಣ ಬಿಗಿಯುವತ್ತ

ಮನೆಮನೆಯಲ್ಲೂ ಕನ್ನಡದ ದೀಪ ಹಚ್ಚಲು ಇರಲಿ ನಮ್ಮ ಚಿತ್ತ


ಕೊಲೆ ಸುಲಿಗೆಗಳ ಉದಾಹರಣೆ ನೀಡಿದ್ದರೆ ಮೆಚ್ಚಬಹುದಿತ್ತು!!!

15 ಸೆಪ್ಟೆಂ 09

ಕಾನೂನು ವ್ಯವಸ್ಥೆ ಹದಗೆಟ್ಟಿದೆ ಎಂಬ ಛೀಮಾರಿ ಇಲ್ಲಿ

ಕಾನೂನು ಸುವ್ಯವಸ್ಥೆ ಕಾಪಾಡಿದುದಕ್ಕಾಗಿ ಪ್ರಶಸ್ತಿ ಅಲ್ಲಿ

 

ಬೆಂಗಳೂರಲ್ಲಿ ಕೊಲೆಯಾದ ಒಂಟಿ ಮಹಿಳೆಯರದೆಷ್ಟೋ

ಮಂದಿರಗಳಲ್ಲಿ ಘಾಸಿಯಾದ ನಿರ್ಜೀವ ಮೂರ್ತಿಗಳೆಷ್ಟೋ

 

ಜೀವವನೇ ಕಳೆದುಕೊಂಡವರಿಗೆ ಯಾರೂ ಮರುಗುವುದಿಲ್ಲ

ಮೂರ್ತಿ ಘಾಸಿಗೊಂಡಾಗ ಮಾತ್ರ ಸುಮ್ಮನೇ ಇರವುದಿಲ್ಲ

 

ಜೀವದೊಳಗಣ ಆತ್ಮಕ್ಕೆ ಎಳ್ಳಷ್ಟೂ ಬೆಲೆ ಕೊಡುವವರು ಇಲ್ಲ

ಮೂರ್ತಿಯೊಳಗಣ ಪರಮಾತ್ಮನಿಗಾಗಿ ಪರದಾಟವೇ ಎಲ್ಲ

 

ಮನುಜನ ಗುರುತು ಇಹುದು ಚುನಾವಣೆ ಬಂದಾಗ ಮಾತ್ರ

ಮಿಕ್ಕೆಲ್ಲ ದಿನಗಳಲಿ ಇವರಿಗೆ ಧರ್ಮ ದೇವರುಗಳದೇ ಮಂತ್ರ

 

ಕೊಲೆ ಸುಲಿಗೆಗಳ ಉದಾಹರಣೆ ನೀಡಿದ್ದರೆ ಮೆಚ್ಚಬಹುದಿತ್ತು

ಬರೀ ಘಾಸಿಗೊಂಡ ಮೂರ್ತಿಗಳ ಲೆಕ್ಕ ಕೊಡುವಗತ್ಯ ಏನಿತ್ತು

 

ದಿನ ಬೆಳಗಾದರೆ ಸದನದಲಿ ನಡೆಯುತಿಹುದು ದೊಂಬರಾಟ

ಜನರ ಮರೆತು ಮಾತಿನಲಿ ಪರಸ್ಪರರ ಗೆದ್ದು ಸೋಲಿಸುವಾಟ


ನೀ ಕಳ್ಳ ನನಗೆ ಗೊತ್ತು!!!

06 ಮೇ 09

(ಇದೀಗ ನನ್ನ ತಮ್ಮ ಆತ್ರಾಡಿ ಪೃಥ್ವಿರಾಜ್ ಹೆಗ್ಡೆ ಮೊಬೈಲ್ ಮೂಲಕ ಕಳುಹಿಸಿದ ಕವನ)

ನೀ ಕಳ್ಳ ನನಗೆ ಗೊತ್ತು
ಅದಕ್ಕಾಗಿ ಬರಿದಾಗಿಸಿದ್ದೇನೆ
ನನ್ನ ಹೃದಯ ಶ್ರೀಮಂತಿಕೆಯನ್ನು;

ನೀ ಸುಳ್ಳ ನನಗೆ ಗೊತ್ತು
ಅದಕ್ಕಾಗಿಯೇ ಮುಚ್ಚಿಟ್ಟಿದ್ದೇನೆ
ಮೌನದಲಿ ನನ್ನ ಮನಸ್ಸಾಕ್ಷಿಯನ್ನು;

ನೀ ಮೂರ್ಖ ನನಗೆ ಗೊತ್ತು
ಅದಕ್ಕಾಗಿ ಬದಿಗೊತ್ತಿದ್ದೇನೆ
ನನ್ನ ಔದಾರ್ಯವನ್ನು;

ನಾನೀಗ ಏಕಾಂಗಿ
ವಿರಾಗಿ-ತ್ಯಾಗಿ,
ನಾನೀಗ ನಾನಲ್ಲ
ಎಲ್ಲಾ ನೀನೇ ಆಗಿ!!!

 


ಸೆಳೆತ!!!

20 ಏಪ್ರಿಲ್ 09

ಸಖೀ,
ನಾವು
ಎದುರು
ಬದುರಾಗಿ
ಕೂತು
ಒಬ್ಬರನ್ನೊಬ್ಬರು
ಕಣ್ಣಲ್ಲಿ
ಕಣ್ಣಿಟ್ಟು
ನೋಡುವುದಕ್ಕಿಂತಲೂ,
ಸ್ವಲ್ಪ ದೂರ
ಪರಸ್ಪರ
ವಿರುದ್ಧ ದಿಕ್ಕಿನಲ್ಲಿ
ನಡೆದು,
ಒಮ್ಮೆಗೇ
ಇಬ್ಬರೂ
ಹಿಂತಿರುಗಿ
ನೋಡಿದಾಗ
ಆಗುವ
ಆ ಅನುಭವ
ಅದ್ಭುತ;

ಅಂತೆಯೇ,
ದಿನವೆಲ್ಲಾ
ಜೊತೆಗಿದ್ದು
ನಾವಾಡುವ
ಹತ್ತಾರು
ಮಾತುಗಳಿಗಿಂತಲೂ
ದೂರದೂರಿಂದ
ಕರೆ ಮಾಡಿ
ಆಡುವ
ಒಂದೇ ಒಂದು
ಪ್ರೀತಿಯ
ಮಾತಿನಲ್ಲಿದೆ
ಎಲ್ಲಿಲ್ಲದ
ಸೆಳೆತ!
****


ನಮ್ಮಮ್ಮ ಮಗುವಿನಂತೆ ಅತ್ತೇ ಬಿಟ್ಟಿದ್ದರು!!!

02 ಏಪ್ರಿಲ್ 09

amma07

ಅದೇಕೋ ಈ ಬಾರಿ ನಮ್ಮಮ್ಮ
ಮಗುವಿನಂತೆ ಅತ್ತೇ ಬಿಟ್ಟಿದ್ದರು
ಹೊರಟು ನಿಂತವನ ಮೈದಡವಿ
ಕೈ ಹಿಡಿದು ತನ್ನತ್ತಲೇ ಸೆಳೆದರು

ಕಳೆದ ಇಪ್ಪತ್ತೊಂಭತ್ತು ವರುಷಗಳಲ್ಲಿ
ಹೀಗಾಗಿದ್ದು ಇದು ಎರಡನೇ ಬಾರಿ
ಅಂದು ಅಪ್ಪಯ್ಯನವರ ಕ್ರಿಯೆ ಮುಗಿಸಿ
ಬರುವಾಗ ಮತ್ತೆ ಈಗ ಈ ಬಾರಿ

ಮೊನ್ನೆ ತನ್ನ ತಂಗಿಯನು ಕಳೆದುಕೊಂಡು
ಮನ ನೊಂದು ಬಡವಾಗಿದ್ದಿರಬಹುದು
ತನ್ನ ಮಕ್ಕಳೆಲ್ಲಾ ತನ್ನ ಜೊತೆಯಲೇ
ಇರಲೆಂಬಿಚ್ಛೆ ಮನದೊಳಗಿದ್ದಿರಬಹುದು

ಉತ್ತರ ಭಾರತದಲಿದ್ದಷ್ಟೂ ದಿನ ನನ್ನದು
ವರುಷಕ್ಕೊಂದೆ ಸಾರಿ ಊರ ಭೇಟಿ
ಬೆಂಗಳೂರಿಗೆ ಬಂದ ಮೇಲಷ್ಟೆ ಜಾಸ್ತಿ
ಆಯ್ತು ಇಳಿಯುವುದು ಈ ಶಿರಾಡಿ ಘಾಟಿ

ಆದರೂ ಪ್ರತೀ ಸಾರಿ ಹೊರಡುವಾಗಲೂ
ಇನ್ಯಾವಾಗಲೋ ಏನೋ ಎನ್ನುವ ಭಾವ
ನಾ ನೊಂದರೆ ಅಮ್ಮ ಅತ್ತು ಬಿಡುವರೆಂದು
ದುಃಖವನು ಮರೆ ಮಾಚುವ ಹಾವ ಭಾವ

ಹೆತ್ತ ಕರುಳಿನ ಕೂಗು ಇನ್ನೂ ನನ್ನ ಈ
ಕಿವಿಗಳಲಿ ಮಾರ್ದನಿಸುತಿರುವಂತಿದೆ
ಸಾಕು ಮಗೂ ನಿನ್ನ ನೌಕರಿಯ ಹಂಗು
ಬಾ ಊರತ್ತ ಎಂದೆನ್ನ ಕರೆಯುವಂತಿದೆ

ಮೀಸೆ ಹುಟ್ಟುವ ಮೊದಲೇ ವಾಯುಸೇನೆ
ಸೇರಿ ಸೈನಿಕನಾಗಿ ಹೊರಟು ಬಿಟ್ಟೆ ನೀನು
ಕೊನೆಗಾಲದಲ್ಲಾದರೂ ಜೊತೆಗಿರು ಎಂದರೆ
ನೌಕರಿಯ ಸಬೂಬು ನೀಡುತಿರುವೆಯೇನು

ಬಂದು ಬಿಡು ನಮ್ಮೂರಿಗೆ ನೀ ಪರವೂರ
ಆ ನೌಕರಿಯ ಎಲ್ಲ ಹಂಗನ್ನೂ ತೊರೆದು
ಎಂದು ನಮ್ಮಮ್ಮ ಊರ ಮನೆಯಲಿ
ಇಂದೂ ಕೂತಂತಿದೆ ನನಗಾಗಿ ಕಾದು

********************


ನನ್ನ ಜವಾಬ್ದಾರಿ ಜಾಸ್ತಿ ಆದಂತಾಯ್ತು!!!

12 ಮಾರ್ಚ್ 09

ಹದಿನೈದನೇ ವಯಸ್ಸಿನಲೇ
ಬರೆಯಲು ಆರಂಭಿಸಿದ್ದೆ
ಕವಿತೆಗಳನು ನಾನು

ಆದರೆಲ್ಲೂ ಪ್ರಕಟಿಸದೇ ನನ್ನ
ಜೊತೆಗೆ ಜೋಪಾನವಾಗಿ
ಕಾಪಾಡಿದ್ದೆ ಅವುಗಳನು

ಐದು ವರುಷಗಳ ಹಿಂದೆ
ಶುರುವಾಯ್ತು ಪ್ರಕಾಶಕ
ಜೊತೆಗೆ ನನ್ನ ನಂಟು

ಅಲ್ಲಿ ಬರೆದ ಕವನ ಬರಹ
ಓದಿದವರು ಪ್ರತಿಕ್ರಿಯಿಸಿ
ಮೆಚ್ಚಿದ್ದೂ ಉಂಟು

ಕನ್ನಡಧ್ವನಿಯಲಿ ನನ್ನ
ಧ್ವನಿಯೂ ಸೇರಿಕೊಂಡು
ಜಗಕೆಲ್ಲಾ ಕೇಳಿಬಂತು

ಸಂಪದದ ಸಹವಾಸದಲಿ
ಕವಿ-ಓದುಗನ ಸಂಬಂಧ
ಜೀವಂತವಾದಂತಾಯ್ತು

ವೈಯಕ್ತಿಕ ತಾಣದಲಿ
ಕೂಡಿಟ್ಟಾಗ ಹೊರಜಗಕೆ
ನನ್ನ ಪರಿಚಯವಾಯ್ತು

ಕನ್ನಡ ಪ್ರಭ ಮತ್ತು ಕೆಂಡ
ಸಂಪಿಗೆಗಳಲಿ ನನ್ನ ಕವಿತೆಗಳ
ಮೆಚ್ಚಿ ಬರೆದದ್ದಷ್ಟೇ ಸಾಕಾಯ್ತು

ನನ್ನ ಬಂಧು ಮಿತ್ರರಿಂದೆಲ್ಲಾ
ಅಭಿನಂದನೆಗಳ ಕರೆಗಳು
ಬರಲು ಆರಂಭವಾಯ್ತು

ಇದರಿಂದ ನನ್ನ ಓದುಗರ
ಸಂಖ್ಯೆ ಜಾಸ್ತಿ ಆಗಿದೆ
ಅದು ನನಗೆ ಗೊತ್ತು

ಹಾಗಾಗಿ ಈಗ ನನ್ನ
ಜವಾಬ್ದಾರಿಯೂ ಸ್ವಲ್ಪ
ಜಾಸ್ತಿ ಆದಂತಾಯ್ತು!!


ರೈತರ ಮೇಲೆ ಪ್ರಮಾಣ ಮಾಡಿದವರು ಮೋಸ ಮಾಡಲಾರರೇ?

11 ಮಾರ್ಚ್ 09

ರಾಜಕೀಯದಲ್ಲಿ ಯಾರು
ಯಾರೊಂದಿಗೆ ಬೇಕಾದರೂ
ಮಾಡಿಕೊಳ್ಳುತ್ತಾರೆ ರಾಜಿ

ಸ್ವಾರ್ಥದ ಚಿಂತನೆಯಷ್ಟೇ
ತುಂಬಿಹುದು ದೇಶದ ಭವಿಷ್ಯದ
ಬಗ್ಗೆ ಇಲ್ಲ ಎಳ್ಳಷ್ಟೂ ಕಾಳಜಿ

ನಿನ್ನೆ ತನಕ ಮುಖ ಕಂಡರೆ ಹರಿ
ಹಾಯುತ್ತಿದ್ದವರು ಒಂದಾಗಿದ್ದಾರೆ
ನಗುನಗುತಾ ನೋಡಿದರೆ ಇಂದು

ವೈರಿಯ ವೈರಿ ಆದುದಕಷ್ಟೆ ಆತ
ಆಗಿದ್ದಾನೆ ಅಗತ್ಯ ಇಲ್ಲದಿದ್ದರೂ
ಇಂದು ತನ್ನ ಆತ್ಮೀಯ ಬಂಧು

ರಾಜ್ಯಪಾಲರ ಪಕ್ಷಾತೀತ ಹುದ್ದೆ
ಅಲಂಕರಿಸಿ ಬಂದವರೂ ಈಗ
ಇಳಿದಿದ್ದಾರೆ ಪಕ್ಷ ರಾಜಕೀಯಕ್ಕೆ

ಆಶ್ಚರ್ಯ ಪಡಬೇಕಾಗಿಲ್ಲ ನಾಳೆ
ಒಂದು ವೇಳೆ ರಾಷ್ಟ್ರಪತಿಗಳು
ಇಳಿದರೂ ಚುನವಣಾ ಕಣಕ್ಕೆ

ತಂದೆ ಮಕ್ಕಳ ರಾಜಕೀಯವನು
ವರ್ಷಾನುಗಟ್ಟಲೆ ಮಾಡಿದವರು
ಊರೆಲ್ಲಾ ಲೇವಡಿ

ತನ್ನ ಮಗನ ಸರದಿ ಬಂದಾಗ
ಸೀಟು ದೊರಕಿಸಿಕೊಂಡರು
ತನ್ನೆಲ್ಲ ನಾಯಕರ ಬೇಡಿ

ದೇವರಾಣೆ ಹಾಕಿದವರು
ದೇವರನೇ ಮರೆತವರಂತೆ
ಮಾತಾಡುತಿರಲು ಇಂದು

ಹೇಗೆ ನಂಬಲಿ ರೈತರ ಮೇಲೆ
ಪ್ರಮಾಣ ಮಾಡಿದವರು ನಮಗೆ
ಮೋಸ ಮಾಡದೇ ಇರಲಾರರೆಂದು