ನೋಬೆಲ್ ಪ್ರಶಸ್ತಿ ಒಬಾಮಾನಿಗೋ ಒಸಾಮಾನಿಗೋ…?!

12 ಆಕ್ಟೋ 09

ಪ್ರತಿಷ್ಠಿತ ನೋಬೆಲ್ ಪ್ರಶಸ್ತಿ ಅದೇಕೋ ಇಂದೀಗ

ತನ್ನ ಪ್ರತಿಷ್ಠೆಯನ್ನೆಲ್ಲಾ ಕಳೆದುಕೊಂಡ ಹಾಗಾಯ್ತು

ಒಬಾಮಾನ ಮುಡಿಯೇರಿದ ಈ ನೋಬೆಲ್ ಪ್ರಶಸ್ತಿ

ಪರೋಕ್ಷವಾಗಿ ಒಸಾಮಾನನ್ನು ಸೇರಿದ ಹಾಗಾಯ್ತು

 

ಒಸಾಮಾ ಮುಂದೆ ಮುಂದೆ ಸಾಗಿದ ಎಡೆಯೆಲ್ಲಾ

ಅಮೇರಿಕಾದ ಸೇನಾಪಡೆಗಳು ಸಾಗುತ್ತಲೇ ಇವೆ

ಶಾಂತಿ ಕೆಡಿಸಲಾತ ನಡೆಸಿದ ಹಿಂಸೆಯ ವಿರುದ್ಧ

ಇವರಿಂದಲೂ ಹಿಂಸಾಚಾರಗಳು ನಡೆಯುತ್ತಲಿವೆ

 

ಉಗ್ರರ ನಿಗ್ರಹಕ್ಕೆ ಪಾಕಿಗೆ ಒಬಾಮಾ ನೀಡುತಿರುವ

ನೆರವೆಲ್ಲಾ ನಮ್ಮ ನಾಡಿನ ಶಾಂತಿ ಕೆಡಿಸುತ್ತಲಿಹುದು

ಅದನಾತ ಅರಿತಿದ್ದರೂ ಪಾಕಿಗೆ ಆತನ ರಾಶಿ ರಾಶಿ

ಧನ ಸಹಾಯ ಸರಾಗವಾಗಿ ಮುಂದುವರಿದಿಹುದು

 

ಶಾಂತಿದೂತ ಮಹಾತ್ಮನ ನಾಮ ಸ್ಮರಣೆಯೊಂದೇ

ಪ್ರಶಸ್ತಿಗೆ ಕಾರಣವಾದಂತೆ ಕಂಡು ಬರುತಿಹುದಲ್ಲಾ

ಶಾಂತಿ ಸ್ಥಾಪನೆಯ ಹೆಸರಲ್ಲಿ ನಡೆದ ಎಲ್ಲಾ ಕೊಲೆ

ಅನಾಚಾರಗಳು ನಗಣ್ಯವಾದಂತೆಯೇ ಇಹುದಲ್ಲಾ

 

ಪರೀಕ್ಷೆ ಬರೆಯಬೇಕು ಎಂದೆಣಿಸಿಕೊಂಡಿದ್ದವನಿಗೆ

ಕರೆದು ಪದವಿ ಪ್ರದಾನ ಮಾಡಿದ ಹಾಗಿದೆ ಇದು

ಭರ್ಜರಿಯಾಗಿ ಭಾಷಣ ಮಾಡುತ್ತಾ ಇದ್ದವನನ್ನು

ಸಭಿಕರು ಚಪ್ಪಾಳೆ ತಟ್ಟಿ ನಿಲ್ಲಿಸಿ ಬಿಟ್ಟಂತಿದೆ ಇದು

 

ಏನಾದರೂ ಸಾಧಿಸಿ ತೋರಿಸುವ ಮೊದಲೇ ಹೀಗೆ

ಬಹು ಪರಾಕ್ ಘೋಷಣೆಯ ಅಗತ್ಯ ಏನಿತ್ತು ಹೇಳಿ

ಇನ್ನು ಸಾಧಿಸಲು ಏನೂ ಉಳಿದಿಲ್ಲದಿರಲು ಆತನ

ಒಳಗೆ ಇನ್ನು ಸಾಧಿಸುವ ಕಿಚ್ಚು ಉಳಿದೀತೇ ಹೇಳಿ

 

ಮನುಜನಿಗೆ ಬಾಳಿನಲ್ಲಿ ಅತೀ ಬೇಗ ಅತೀ ಹೆಚ್ಚು

ದೊರಯಬಾರದು ಎನ್ನುತ್ತಿದ್ದರಂದು ನಮ್ಮಜ್ಜಂದಿರು

ಒಂದೊಂದೇ ಮೆಟ್ಟಲೇರುವ ಶ್ರಮ ಅರಿತವನಿಗಷ್ಟೇ

ಅನ್ಯರ ಪರಿಶ್ರಮದ ಅರಿವೂ ಆಗಬಹುದೆಂದೆಂದರು


ತಾಲಿಬಾನಿಯೋರ್ವ ನೊಣವಾಗಿ ಬಂದಿರಬಹುದೇ..?!

18 ಜೂನ್ 09
ಆರ್ಥಿಕ ಹಿಂಜರಿತದ ಪರಿಣಾಮ ಹೀಗಾಗಬಹುದೆಂದು ಅರಿತಿತ್ತೆ ಜನ
ಅಮೇರಿಕಾ ಅಧ್ಯಕ್ಷ ಒಬಾಮ ಕೂಡ ನಿನ್ನೆ ಹೊಡೆಯುತ್ತಿದ್ದನಲ್ಲಿ ನೊಣ

ತಮ್ಮನ್ನು ಕಾಡಿದವರ ಬಿಡಲಾರೆವೆಂಬ ಮಾತನ್ನು ಒತ್ತಿ ಹೇಳುವಂತಿತ್ತು
ಅಲ್ಲಿ ಆ ನೊಣವನ್ನೂ ಚಾಣಾಕ್ಷತನದಿಂದ ಕೊಲ್ಲುವ ತಯಾರಿ ನಡೆದಿತ್ತು

ಯಾರಿಗೆ ಗೊತ್ತು ಆ ನೊಣದೊಳಗೆ ಯಾರ ಆತ್ಮ ಇದ್ದಿರಬಹುದೆಂದು
ನನಗನುಮಾನ ತಾಲಿಬಾನಿಯೋರ್ವ ನೊಣವಾಗಿ ಬಂದಿರಬಹುದೆಂದು

ನೊಣದ ಮೂಲಕ ಅಮೇರಿಕಾ ಅಧ್ಯಕ್ಷನ ಕೆಡಹಲು ಹೊರಟಿದ್ದಿರೋ
ನೊಣದಿಂದ ಕಡಿಸಿ ಆತನ ದೇಹಕ್ಕೆ ವಿಷವೇನಾದರೂ ಉಣಿಸಿದ್ದರೋ

ನೊಣವೇನೋ ತನ್ನ ಮಹತ್ಕಾರ್ಯವನು ಮುಗಿಸಿ ನೆಲಕ್ಕುರುಳಿ ಬಿತ್ತು
ಪ್ರಾಣಿದಯಾ ಸಂಘಟನೆಗಳಿಗೆ ಅಲ್ಲಿ ಈಗ ಹೊಸ ವಿಷಯ ಸಿಕ್ಕಿ ಬಿಡ್ತು

ಒಬಾಮಾ ವಿರುದ್ಧ ಇನ್ನು ಊರೆಲ್ಲಾ ಘೋಷಣೆಗಳು ಕೇಳಿಬರಬಹುದು
ನೊಣ ಹೊಡೆದುದಕೆ ಪ್ರಾಯಶ್ಚಿತ್ತ ಮಾಡಿಕೊಳ್ಳಬೇಕಾಗಿ ಬರಬಹುದು

ವಿಶ್ವದೆಲ್ಲೆಡೆಯಿಂದ ನೊಣಗಳ ದಂಡುಗಳೆ ಹೊರಟು ಬಿಟ್ಟಿವೆಯಂತೆ
ಶ್ವೇತಭವನದಲಿ ಧರಣಿ ನಡೆಸಿ ಆತನಿಂದ ನ್ಯಾಯ ಕೇಳುತ್ತಾವಂತೆ

ಕಾರಣವಿಲ್ಲದೆ ಯಾರೇ ಆದರೂ ನೊಣ ಕೊಂದರದು ಅನ್ಯಾಯ
ಸುದ್ದಿ ಮಾಡಲೆಂದೇ ನೊಣವನು ಬಿಟ್ಟಿದ್ದರೆಂದರೂ ಯಾವ ನ್ಯಾಯ

ಆರ್ಥಿಕ ಹಿಂಜರಿತದ ಪರಿಣಾಮ ಹೀಗಾಗಬಹುದೆಂದು ಅರಿತಿತ್ತೆ ಜನ
ಅಮೇರಿಕಾ ಅಧ್ಯಕ್ಷ ಒಬಾಮ ಕೂಡ ನಿನ್ನೆ ಹೊಡೆಯುತ್ತಿದ್ದನಲ್ಲಿ ನೊಣ


ಜರ್ದಾರಿ-ಒಬಾಮಾ ಸಂವಾದ…!!!

28 ಏಪ್ರಿಲ್ 09
ಜರ್ದಾರಿ: ಒಸಾಮ-ಬಿನ್-ಲಾಡೆನ್ ಜೀವಂತವಾಗಿಲ್ಲ.
ಒಬಾಮಾ: ನಾವು ಇದನ್ನು ನಂಬೋಲ್ಲ.
 
ಜರ್ದಾರಿ: ನಿಜವಾಗಿಯೂ ಆತ ಜೀವಂತವಾಗಿಲ್ಲ.
ಒಬಾಮಾ: ನಿಜವಾಗಿಯೂ ನಾವು ಇದನ್ನು ನಂಬೋಲ್ಲ.
 
ಜರ್ದಾರಿ: ಒಸಾಮ ಸತ್ತು ತಿಂಗಳುಗಳೇ ಆಗಿವೆ.
ಒಬಾಮಾ: ಒಸಾಮ ಸತ್ತ ಸುದ್ದಿ ನಮಗೆ ದೊರೆತೇ ಇಲ್ಲ.
 
ಜರ್ದಾರಿ: ಒಸಮಾ ಸಾವಿನ ಸುದ್ದಿ ನಿಜಕ್ಕೂ ನಂಬಲರ್ಹ.
ಒಬಾಮಾ: ನೀವ್ಯಾರೂ ನಂಬಲರ್ಹರಲ್ಲ, ಆ ಸುದ್ದಿಯೂ ಕೂಡ.
 
ಜರ್ದಾರಿ: ನಮ್ಮನ್ನು ನಂಬಬೇಡಿ, ಆದರೆ ಈ ಸುದ್ದಿಯ ಮೂಲವನ್ನಾದರೂ ನಂಬಿ.
ಒಬಾಮಾ: ಹೇಗೆ ನಂಬಬಹುದು ಆ ಸುದ್ದಿಯ ಮೂಲದ ಬಗ್ಗೆ ನಮಗೆ ಗೊತ್ತೇ ಇಲ್ಲ.
 
ಜರ್ದಾರಿ: ನಮಗೆ ಗೊತ್ತಿದೆ ಆ ನಂಬಲರ್ಹ ಮೂಲ ಯಾವುದೆಂದು. ದಯವಿಟ್ಟು ನಂಬಿ.
ಒಬಾಮಾ: ಹೇಗೆ ನಂಬಬಹುದು ಸ್ವಾಮೀ, ಯಾವುದದು ಅಷ್ಟು ನಂಬಿಕೆಯ ಮೂಲ?
 
ಜರ್ದಾರಿ: ಹೀಗೆಯೇ ಬನ್ನಿ, ಅಲ್ಲಿ ಒಳಕೋಣೆಯಲ್ಲಿ ಇದ್ದಾನೆ, ಈ ಸುದ್ದಿಯ ನಂಬಲರ್ಹ ಮೂಲ.
ಒಬಾಮಾ: ಯಾರವನು ನಿಮ್ಮ ಒಳಕೋಣೆಯಲ್ಲಿ ಕುಳಿತಿರುವವನು, ಅಷ್ಟು ನಂಬಿಕೆಯ ವ್ಯಕ್ತಿ?
 
ಜರ್ದಾರಿ: ನೀವು ಅವನ ಮಾತನ್ನಲ್ಲದೆ ಇನ್ಯಾರ ಮಾತನ್ನೂ ನಂಬೋಲ್ಲ ಅಂತ ಗೊತ್ತು. ಹೋಗಿ ಅಲ್ಲಿದ್ದಾನೆ ನೋಡಿ ಒಸಾಮಾ-ಬಿನ್-ಲಾಡೆನ್. ಅವನೇ ಹೇಳ್ಸಿರೋದು ನನ್ನಿಂದ ಇದನ್ನೆಲ್ಲಾ…
🙂