ಸ್ವಪ್ನ ಲೋಕದಲ್ಲೂ ಒಂಟಿ!

22 ಏಪ್ರಿಲ್ 12

ತಪ್ಪು ಒಪ್ಪುಗಳ ವಿಮರ್ಶೆಯಲ್ಲಿ ಜೀವನವೇ ಸವೆದುಹೋಯ್ತು
ತಪ್ಪಾದಾಗಲೂ ಒಪ್ಪಿಸಿಕೊಂಡು ಹೊಂದಾಣಿಕೆ ನಡೆಸಿದ್ದಾಯ್ತು

ಗಾಯಗೊಂಡ ಅಂಗಗಳಿಗೆ ಮುಲಾಮು ಹಚ್ಚಿ ನೋಡಿದ್ದಾಯ್ತು
ಕಳಚಿದ ಅಂಗಗಳು ದೇಹದ ಅಸ್ಥಿತ್ವವನ್ನೇ ಅಲುಗಿಸಿದಂತಾಯ್ತು

ದೇಹವಿದೆ, ಬರಿಯ ಉಸಿರಿದೆ, ಕೆಚ್ಚು, ಹುಮ್ಮಸ್ಸೆಲ್ಲಾ ನಾಶವಾಯ್ತು
ಯಾರೋ ಹಿರಿಯರು ತನ್ನೆಡೆಗೆ ಕರೆಯುತಿರುವಂತೆ ಭಾಸವಾಯ್ತು

ಕರೆದವರ ಸೇರುವ ಯತ್ನದಲ್ಲಿ ಇತ್ತಲಿನ ಸಂಪರ್ಕ ಕಡಿದುಹೋಯ್ತು
ದಾರಿಯದ್ದಕ್ಕೂ ಒಮ್ಮೆಗೇ ಕತ್ತಲು ಕವಿದು ತಲೆ ಸುತ್ತಿ ಬಂದಂತಾಯ್ತು

ಸಾವರಿಸಿಕೊಂಡೆದ್ದು ಕಣ್ಣು ಹಾಯಿಸಿದಾಗ ಒಂಟಿತನದನುಭವವಾಯ್ತು
ರಾತ್ರಿ ಬೆಳಗಾಗುವುದರೊಳಗೆ ಲೋಕವೆಲ್ಲಾ ಸುತ್ತಾಟವಾದಂತಾಯ್ತು

ಕನಸು ಸತ್ಯದ ಮಾತಲ್ಲವಾದರೂ ಈ ಮನವನ್ನು ಕಲಕಿ ಇಟ್ಟಂತಾಯ್ತು
ಎಚ್ಚರಿಸಿದೆ ನನ್ನನ್ನು ಸ್ವಪ್ನ ಲೋಕದಲ್ಲೂ ನಾನು ಒಂಟಿ ಎಂಬ ಮಾತು!!
**************************************


ನೆಲೆಯೊಂದ ಹುಡುಕುತಿಹೆ… ಗೂಡೊಂದ ಹುಡುಕುತಿಹೆ!

25 ಫೆಬ್ರ 11

 

ಈ ನಗರದಲ್ಲಿ ಒಂಟಿಯಾಗಿ, ಹಗಲಿರುಳೂ ನಾ ಅಲೆಯುತಿಹೆ
ನೆಲೆಯೊಂದ ಹುಡುಕುತಿಹೆ, ನಾ ಗೂಡೊಂದ ಹುಡುಕುತಿಹೆ||

ದಿನವು ಖಾಲಿ ಪಾತ್ರೆಯಂತಿದೆ, ರಾತ್ರಿಯು ಕತ್ತಲು ತುಂಬಿಹ ಬಾವಿಯಂತಿದೆ
ಕತ್ತಲುಗಟ್ಟಿರುವ ನನ್ನೀ ಕಣ್ಣುಗಳಿಂದ ಕಣ್ಣೀರಿನ ಬದಲು ಹೊಗೆ ಹೊಮ್ಮುತಿದೆ
ಬದುಕಬೇಕೇಕೆಂದೇ ತಿಳಿಯದಿರಲು, ಸಾಯಲು ನೆಪದ ನಾ ಹುಡುಕುತಿಹೆ||

||ಈ ನಗರದಲ್ಲಿ ಒಂಟಿಯಾಗಿ, ಹಗಲಿರುಳೂ ನಾ ಅಲೆಯುತಿಹೆ||

ಆಯುಷ್ಯಕ್ಕಿಂತಲೂ ಉದ್ದಗಿನ ಈ ರಸ್ತೆಗಳು ಗುರಿ ತಲುಪಿದುದ ನಾ ಕಂಡಿಲ್ಲ
ಹುಡುಕಾಡುತ್ತಾ ತಡಕಾಡುತ್ತಾ ಇರುವ ಇವು ವಿರಮಿಸಿದುದನೇ ನಾ ಕಂಡಿಲ್ಲ
ಈ ಅಪರಿಚಿತ ನಗರದಲ್ಲಿ ನಾನೀಗ ಪರಿಚಿತ ಮುಖವೊಂದ ಹುಡುಕುತಿಹೆ||

||ಈ ನಗರದಲ್ಲಿ ಒಂಟಿಯಾಗಿ, ಹಗಲಿರುಳೂ ನಾ ಅಲೆಯುತಿಹೆ||
*******************************

ಹಿಂದೀ ಚಲನಚಿತ್ರ ಗೀತೆಯ ಭಾವಾನುವಾದ

ಚಿತ್ರ: ಘರೋಂಡಾ
ಗಾಯಕ: ಭೂಪೀಂದರ್
ಸಾಹಿತ್ಯ: ಗುಲ್ಝಾರ್
ಸಂಗೀತ:
ಜಯದೇವ್

ಏಕ್ ಅಕೇಲಾ ಇಸ್ ಶಹರ್ ಮೆ, ರಾತ್ ಮೆ ಔರ್ ದೋಪಹರ್ ಮೆ
ಆಬೂದಾನಾ ಡೂಂಡ್‍ತಾ ಹೈ, ಆಶಿಯಾನಾ ಡೂಂಡ್‍ತಾ ಹೈ

ದಿನ್ ಖಾಲೀ ಖಾಲೀ ಬರ‍್ತನ್ ಹೈ ಔರ್ ರಾತ್ ಹೈ ಜೈಸೆ ಅಂಧಾ ಕುಂವಾ
ಇನ್ ಸುನೀ ಅಂಧೇರೀ ಆಂಖೋಂ ಸೆ ಆಂಸೂ ಕೀ ಜಗಹ್ ಆತಾ ಹೈ ಧುಂವಾ
ಜೀನೇ ಕಿ ವಜಹ್ ತೋ ಕೋಯೀ ನಹೀಂ ಮರ‍್ನೇ ಕ ಬಹಾನಾ ಡೂಂಡ್‍ತಾ ಹೈ
ಏಕ್ ಅಕೇಲಾ ಇಸ್ ಶಹರ್ ಮೆ|

ಇನ್ ಉಮ್ರ್ ಸೆ ಲಂಬೀ ಸಡ್‍ಕೋಂ ಕೋ ಮಂಜಿಲ್ ಪರ್ ಪಹುಂಚ್‍ ತಾ ದೇಖಾ ನಹೀಂ
ಬಸ್ ಡೂಂಡ್‍ ತೇ ಫಿರ್ ತೇ ರಹ್‍ತೇ ಹೈಂ ಹಮ್‍ ನೇ ತೋ ಠೆಹರ‍್ ತೇ ದೇಖಾ ನಹೀಂ
ಇಸ್ ಅಜ್‍ನಭೀ ಸೆ ಶಹರ್ ಮೆ ಜಾನಾ ಪೆಹ್‍ಚಾನಾ ಡೂಂಡ್‍ತಾ ಹೈ
ಏಕ್ ಅಕೇಲಾ ಇಸ್ ಶಹರ್ ಮೆ|


ಎಲ್ಲವೂ ರೂಢಿಯಾಗುತ್ತಿದೆ…!

14 ಡಿಸೆ 10

ಎಲ್ಲವೂ ರೂಢಿಯಾಗುತ್ತದೆ
ಇಂದಿನ ತನಕ ಏನೂ ಅಲ್ಲದ್ದು ನಾಳೆ ಜೀವಕ್ಕಿಂತ ಹೆಚ್ಚಾಗುತ್ತದೆ
ಇಂದಿನ ತನಕ ಜೀವವೇ ಆಗಿದ್ದದ್ದು ನಾಳೆ ಬರಿಯ ನೆನಪಾಗಿ ಉಳಿದು ಬಿಡುತ್ತದೆ

ಎಲ್ಲವೂ ರೂಢಿಯಾಗುತ್ತಿದೆ
ಜೊತೆಜೊತೆಗೆ ನಡೆದಿದ್ದ ಹಾದಿಯಲ್ಲೀಗ ಒಂಟಿಯಾಗಿ ಸಾಗಬೇಕಿದೆ
ದಿನವೆಲ್ಲಾ ಮಾತನಾಡುತ್ತಿದ್ದ ನಾವೀಗ ಮೌನಕ್ಕೆ ಶರಣಾಗಿ ಸುಮ್ಮನಿರಬೇಕಾಗಿದೆ

ಎಲ್ಲವೂ ರೂಢಿಯಾಗುತ್ತಿದೆ
ಬಿಟ್ಟು ಬದುಕುವುದೇ ಕಷ್ಟ ಎಂದೆಣಿಸಿದ್ದ ನಾವೂ ದೂರವಾಗಿರಬೇಕಾಗಿದೆ
ನೆನಪುಗಳು ನೋವಾಗಿ ಕಾಡುತ್ತಿದ್ದರೂ, ಆ ನೋವಿನೊಂದಿಗೇ ಬಾಳಬೇಕಾಗಿದೆ

ಎಲ್ಲವೂ ರೂಢಿಯಾಗುತ್ತಿದೆ
ಹೃದಯವನ್ನು ಕಲ್ಲಾಗಿಸಿ ಬಾಳುವುದೂ ನಮಗೀಗ ರೂಢಿಯಾಗುತ್ತಿದೆ
ಸಂಬಂಧಗಳ ಮೇಲಿನ ನಂಬಿಕೆಯ ತೊರೆದು ಬಾಳುವುದೂ ನಮಗೀಗ ರೂಢಿಯಾಗುತ್ತಿದೆ

ಎಲ್ಲವೂ ರೂಢಿಯಾಗುತ್ತಿದೆ
ಬದಲಾವಣೆಯೇ ಜಗದ ನಿಯಮ ಎಂಬ ಮಾತೆಮಗೆ ರೂಢಿಯಾಗುತ್ತಿದೆ
ಹೊಸ ಹೊಸತರ ನಡುವೆ ಹಳೆಯದನ್ನು ಕಳೆದುಕೊಳ್ಳುವುದೂ ನಮಗೀಗ ರೂಢಿಯಾಗುತ್ತಿದೆ

ಎಲ್ಲವೂ ರೂಢಿಯಾಗುತ್ತಿದೆ
ಏನೂ ಇಲ್ಲದ ಬಾಳಿನಲಿ ಬಂದ ನೀನೇ ನನ್ನ ಜೀವನವಾಗಿದ್ದಿದೆ
ಜೊತೆ ಇಲ್ಲದಿದ್ದರೂ ಒಬ್ಬರೊಳಗೊಬ್ಬರು ಇರುವೆವೆಂಬ ಭ್ರಮೆಯೊಂದಿಗೀ ಜೀವನ ಸಾಗುತ್ತಿದೆ
**************


ಸಂಗಾತಿ!

22 ಜೂನ್ 10

 

ಸಖೀ

 

ನನ್ನ ಈ

ಒಂಟಿ ಜೀವನದಲ್ಲಿ

ನನ್ನ ಜೊತೆಯಾಗಿರುವ

 

ನನ್ನನ್ನು ನನ್ನ ಮನಸ್ಸನ್ನು

ನನಗಿಂತ ಚೆನ್ನಾಗಿ ಅರಿತಿರುವ

 

ನಾನು ಬಾಯ್ಬಿಡುವ ಮೊದಲೇ

ನನ್ನ ಮನದಲ್ಲಿದ್ದದ್ದನ್ನೆಲ್ಲಾ

ಹೊರ ಹೊಮ್ಮಿಸುವ

 

ನನ್ನ ಮತ್ತು ಈ ಪ್ರಪಂಚದ

ನಡುವೆ ದೂತನಂತಿರುವ

 

ನನ್ನ ಎಂದೆಂದಿನ

ನಲ್ಮೆಯ ಸಂಗಾತಿ

ನನ್ನ ಈ ಒಂದೂವರೆ

ರೂಪಾಯಿಯ ಲೇಖನಿ!

*-*-*-*-*-*-*

(ಕೀಲಿಮಣೆಯ ಸಹಾಯದಿಂದ ಕವನ ಬರೆಯಲು ಆರಂಭಿಸುವುದಕ್ಕೆ ಮೊದಲು, ಅಂದರೆ ೬ ದಶಂಬರ ೧೯೮೪ರಂದು ಬರೆದ ಕವನ ಇದು)


ಅಯ್ಯೋ, ಪ್ರೀತಿಯ ಮಾತಂತಿರಲಿ!

09 ಏಪ್ರಿಲ್ 10

ಸಾಕಿನ್ನು ಈ ದೂರ

ಬಂದು ಬಿಡು ಬೇಗನೇ

ಎಂದು ನೀವನ್ನುತಿರುವುದು

ನನ್ನ ಮೇಲಿನ

ಪ್ರೀತಿಯಿಂದಲೇ ಅಲ್ಲವೇನು

ಎಂದು ನೀನೆನ್ನ

ಕೇಳುತಿರುವೆಯಲ್ಲೇ?

 

ಅಯ್ಯೋ,

ಪ್ರೀತಿಯ ಮಾತಂತಿರಲಿ

ನೀನಲ್ಲಿ ನನ್ನನ್ನು

ನೆನಸಿಕೊಂಡಾಗಲೆಲ್ಲಾ

ಇಲ್ಲಿ ನನ್ನನ್ನು

ಬಿಡದೆ ಕಾಡುವ

ಬಿಕ್ಕಳಿಕೆ, ಆಕಳಿಕೆ,

ಒಂಟಿ ಸೀನುಗಳಿಂದ

ನಾನು ನೊಂದಿರುವೆನಲ್ಲೇ?!

*****

 

 

 


ನನ್ನಾಕೆ ಇಲ್ಲದಾಗ ಮತ್ತೆ ಬರುವಿರಂತೆ ಈಗ ಹೊರಡಿ!!!

26 ಮೇ 09
ಜ್ವರ ಬಂದು ಹೋದ ಮೇಲೆ ಕೆಮ್ಮು ಈಗ ಉಳಿದಿದೆ
ತಲೆ ನೋವು ಕಾಡುತಿಹುದು ಮೂಗು ಮೋರಿ ಆಗಿದೆ
 
ಮೈಕೈ ಎಲ್ಲಾ ನೋವು ಯಾರೋ ಹಿಡಿದು ಗುದ್ದಿರುವಂತಿದೆ
ತುಂಬಿದ ಸಿಟಿ ಬಸ್ಸಲ್ಲಿ ನಿಂತೇ ಪಯಣ ಮುಗಿಸಿ ಇಳಿದಂತಿದೆ
 
ಬೆಂಗಳೂರ ಹವಾಮಾನದಲ್ಲಿ ಏರು ಪೇರು ಸಾಮಾನ್ಯಾನೇ
ಎಲ್ಲಾ ದಿನವೂ ಒಂದೇ ತೆರನಿರದು ಭಾವನೆಗಳೂ ಹಾಗೇನೇ
 
ವಿಷಯ ನೂರಾರು ಇದ್ದರೂ ಈಗ ಬರೆಯಲೇನೂ ತೋಚದು
ಮಾತು ಹೊರಬರುವ ಮೊದಲೇ ಕೆಮ್ಮು ಮಾತನೇ ತಡೆವುದು
 
ಶೀತ, ಜ್ವರ, ಕೆಮ್ಮು ಇವೆಲ್ಲಾ ಜೊತೆಜೊತೆಗೆ ಅಲ್ಲ ಬೇರೆ ಬೇರೆ
ಕೆಮ್ಮಗಿನ್ನು ನಾಲ್ಕುದಿನ ಮತ್ತದರ ದಾರಿ ಬೇರೆ ನಂದೇ ಬೇರೆ
 
ಒಂಟಿಯಾಗಿ ಬಾಳಲಾರ ಎಂದು ನನ್ನವಳಿಗೆ ತಿಳಿಸಲೇನೋ
ಆಕೆ ಇಲ್ಲದಾಗಲೇ ಕಾಡುವರು ನನ್ನ ಮೇಲೆ ವೈರವೇನೋ
 
ತವರಿಂದ ಆಕೆ ಮರಳಿ ಬಂದಾಯ್ತು ಇನ್ನಾದರೂ ಬಿಟ್ಟುಬಿಡಿ
ನನ್ನಾಕೆ ಇಲ್ಲದಾಗ ಮತ್ತೆ ಬರುವಿರಂತೆ ಈಗ ನೀವು ಹೊರಡಿ