ಸ್ವಪ್ನ ಲೋಕದಲ್ಲೂ ಒಂಟಿ!

22 ಏಪ್ರಿಲ್ 12

ತಪ್ಪು ಒಪ್ಪುಗಳ ವಿಮರ್ಶೆಯಲ್ಲಿ ಜೀವನವೇ ಸವೆದುಹೋಯ್ತು
ತಪ್ಪಾದಾಗಲೂ ಒಪ್ಪಿಸಿಕೊಂಡು ಹೊಂದಾಣಿಕೆ ನಡೆಸಿದ್ದಾಯ್ತು

ಗಾಯಗೊಂಡ ಅಂಗಗಳಿಗೆ ಮುಲಾಮು ಹಚ್ಚಿ ನೋಡಿದ್ದಾಯ್ತು
ಕಳಚಿದ ಅಂಗಗಳು ದೇಹದ ಅಸ್ಥಿತ್ವವನ್ನೇ ಅಲುಗಿಸಿದಂತಾಯ್ತು

ದೇಹವಿದೆ, ಬರಿಯ ಉಸಿರಿದೆ, ಕೆಚ್ಚು, ಹುಮ್ಮಸ್ಸೆಲ್ಲಾ ನಾಶವಾಯ್ತು
ಯಾರೋ ಹಿರಿಯರು ತನ್ನೆಡೆಗೆ ಕರೆಯುತಿರುವಂತೆ ಭಾಸವಾಯ್ತು

ಕರೆದವರ ಸೇರುವ ಯತ್ನದಲ್ಲಿ ಇತ್ತಲಿನ ಸಂಪರ್ಕ ಕಡಿದುಹೋಯ್ತು
ದಾರಿಯದ್ದಕ್ಕೂ ಒಮ್ಮೆಗೇ ಕತ್ತಲು ಕವಿದು ತಲೆ ಸುತ್ತಿ ಬಂದಂತಾಯ್ತು

ಸಾವರಿಸಿಕೊಂಡೆದ್ದು ಕಣ್ಣು ಹಾಯಿಸಿದಾಗ ಒಂಟಿತನದನುಭವವಾಯ್ತು
ರಾತ್ರಿ ಬೆಳಗಾಗುವುದರೊಳಗೆ ಲೋಕವೆಲ್ಲಾ ಸುತ್ತಾಟವಾದಂತಾಯ್ತು

ಕನಸು ಸತ್ಯದ ಮಾತಲ್ಲವಾದರೂ ಈ ಮನವನ್ನು ಕಲಕಿ ಇಟ್ಟಂತಾಯ್ತು
ಎಚ್ಚರಿಸಿದೆ ನನ್ನನ್ನು ಸ್ವಪ್ನ ಲೋಕದಲ್ಲೂ ನಾನು ಒಂಟಿ ಎಂಬ ಮಾತು!!
**************************************