ನಾ ಹುಡುಗ ಸಾಗರವಲ್ಲ!

03 ಜನ 16
ಸಖೀ,
ನೂರಾರು ನದಿಗಳ ಸಂಗಮ ಅನ್ನುವರಲ್ಲಾ
ಅದಕೇ ಅಂದೆ ನಾನು ಹುಡುಗ ಸಾಗರವಲ್ಲ
 
ನದಿಯಂತೆ ಹರಿವ ನನಗೆ ನಿನ್ನದಷ್ಟೇ ಗಮ್ಯ
ಅನುಮಾನಿಸದು ನಿನ್ನ ಮನ, ಬಾಳು ರಮ್ಯ;
 
ನಿನ್ನನ್ನು ಯಾರೆಷ್ಟೇ ಇಷ್ಟಪಟ್ಟರೂ ಚಿಂತೆ ಇಲ್ಲ
ನಾನು ನಿನ್ನಲ್ಲಿ ಒಂದಾದರೆ ಅದಷ್ಟೇ ಸಾಕಲ್ಲಾ
 
ನನ್ನ ಪ್ರೀತಿ ಭಗವಂತನ ಮೇಲಿನ ಭಕ್ತಿಯಂತೆ
ಭಕ್ತರು ನೂರಾರು ನನಗೋರ್ವನೇ ದೇವರಂತೆ
 
ನೀನು ನನಗಾಗಿ ಕಾದೆಯೋ ಇಲ್ಲವೋ ಬೇಕಿಲ್ಲ
ನಾನು ನಿನಗಾಗಿ ಬರುವೆ ಸುತ್ತಿ ಈ ಜಗವೆಲ್ಲಾ!
 
#ಆಸುಮನ
 

 


ನದಿಯಾಗುವಾಸೆ!

03 ಜನ 16

ಸಖೀ,
ಕವಿಗಳು ಹೆಣ್ಣನ್ನು ನದಿಗೆ ಹೋಲಿಸಿದರು
ಮತ್ತೀ ಗಂಡನ್ನು ವಿಶಾಲ ಸಾಗರವೆಂದರು,

ನನಗಾದರೋ ನಿಂತಲ್ಲೇ ನಿಂತಿರುವ ಆ
ಸಾಗರಕ್ಕಿಂತ ಓಡುವ ನದಿಯಾಗುವಾಸೆ,

ನೀ ಸಾಗರವಾದರೆ, ನಾನು ಊರೂರು
ಅಲೆದು ಓಡೋಡಿ ನಿನ್ನನ್ನು ಸೇರುವಾಸೆ,

ಆ ಸೆಳೆತದಲಿ ತವಕದಲಿ ಇರುವ ಮುದ
ಕಾಯುತ್ತಿರುವುದರಲ್ಲಿ ಎಲ್ಲಿದೆ ಕೂಸೇ?

#ಆಸುಮನ


ಸಹಾನುಭೂತಿ ಇಲ್ಲ!

02 ಜನ 16

ಸಖೀ,
ನೋವುಂಡವರ ಬಗ್ಗೆ ಬರೆದೂ ಬರೆದೂ ತಿಂದದ್ದದೆಷ್ಟೋ,
ಅದರಲ್ಲಿ ನೊವುಂಡವರಿಗೆ ಆಗಿರುವ ಲಾಭವಾದರದೆಷ್ಟೋ;

ಬರಿ ಅನುಕಂಪದ ಮಾತುಗಳನಾಡಿ ಮೆಚ್ಚುಗೆ ಗಳಿಸುವಾಟ,
ಸಹಾನುಭೂತಿ ಕಿಂಚಿತ್ತೂ ಇಲ್ಲ ಬರಿ ಸ್ವಾರ್ಥದ ಮೋಸದಾಟ;

ಅಲ್ಲಾರೋ ಶಾಂತಿಯ ಪತಾಕೆ ಹಾರಿಸಿದರೂ ಹೊಟ್ಟೆಉರಿ,
ಸಮಾಜದ ಧೃವೀಕರಣಕ್ಕೆ ಪಣತೊಟ್ಟಿದ್ದಾರೆ ಇದನ್ನು ಅರಿ!

#ಆಸುಮನ


ಗಮನ ಇರುವುದಿಲ್ಲ!

02 ಜನ 16

ಸಖೀ,
ನೀನು ನನ್ನ ಕಣ್ಣಿದಿರು ಇರುವ ತನಕ
ನನಗೆ ಬೇರೆ ಯಾವುದರ ಬಗ್ಗೆಯೂ
ಗಮನ ಇರುವುದಿಲ್ಲ,

ನೀನು ಮರೆಯಾದಾಗ ನನಗೆ ನಿನ್ನದೇ
ಹುಡುಕಾಟ, ಇನ್ನಾವುದರ ಬಗ್ಗೆಯೂ
ಗಮನ ಇರುವುದಿಲ್ಲ!

‪#‎ಆಸುಮನ‬


ಅಧಿಪತ್ಯ!

01 ಜನ 16

ಸಖೀ,
ಕೆಲವು ಸಂಬಂಧಗಳು ಕೈಜಾರಿಹೋಗುತ್ತಿವೆ
ಅನ್ನುವುದರ ಅರಿವು ನಮಗಾಗುತ್ತಿರುತ್ತದೆ,

ಅದಕ್ಕೆ ನಾಳೆ ನಮ್ಮನ್ನೇ ಹೊಣೆಗಾರರನ್ನಾಗಿ
ಮಾಡಬಹುದೆಂಬ ಅರಿವೂ ನಮಗಿರುತ್ತದೆ;

ಆದರೇನು ಮಾಡೋಣ ಹೇಳು, ಅನುಮಾನ
ಪೂರ್ವಗ್ರಹಗಳೆಲ್ಲಾ ಬಲಿಷ್ಟಗೊಂಡ ಹಾಗಿವೆ,

ನಂಬಿಕೆ ದುರ್ಬಲಗೊಂಡಾಗ ಪ್ರಶ್ನೆಗಳೇ ನಮ್ಮ
ಮನದಲ್ಲಿ ಅಧಿಪತ್ಯವನ್ನು ಸ್ಥಾಪಿಸಿ ಬಿಡುತ್ತವೆ!

‪#‎ಆಸುಮನ‬


ನಾನು ನಿನಗೆ, ನೀನು ನನಗೆ!

01 ಜನ 16

ಸಖೀ,
ಗೋಡೆಯ ಮೇಲಿನ ಕ್ಯಾಲೆಂಡರ್ ಬದಲಾಯಿತಷ್ಟೇ
ನಮ್ಮ ಹಣೆಬರಹ ಹೀಗೆಯೇ, ನಿನಗಿದು ಗೊತ್ತಷ್ಟೇ?

ಕೊರಗುತ್ತಾ ಇರುವವರಿಗೆ ಇದೂ ದಿನ ಮತ್ತೊಂದು,
ಸಂತಸ ಪಡಲು ಕಾರಣಗಳಿವೆ ನೂರು ಮತ್ತೊಂದು,

ನಾಡಿನ ಎಲ್ಲಾ ಮನೆಗಳ ಒಳಗೂ ಕತೆ ಒಂದೇ ಐತಿ,
ನೀನು ನನಗೆ ನಾನು ನಿನಗೆ ಸುಖ ದುಃಖದ ಸಂಗಾತಿ,

ವರುಷ ವರುಷದ ನಂತರ ವರ್ಷ ಹೀಗೆ ಬರುತಿರಲಿ,
ಮನೆ ಮಂದಿಯ ಮನಗಳಲಿ ಹರ್ಷ ತುಂಬುತಿರಲಿ,

“ವರಿ” ಇಂದ “ಬರ”ದ ವರೆಗೆ ನಾವಿರೋಣ ಜೊತೆಗೆ,
ಹೇಳಲು ಇನ್ನೇನಿದೆ, ನಾನು ನಿನಗೆ, ನೀನು ನನಗೆ!

‪#‎ಆಸುಮನ‬


೨೦೧೬ರ ಹಾರ್ದಿಕ ಶುಭಹಾರೈಕೆಗಳು

01 ಜನ 16

ಹೊಸ ವರುಷವಿಡೀ ಹರುಷವಿರಲಿ,
ಈ “ವರಿ”ಯಿಂದ ಆ “ಬರ”ದವರೆಗೂ
ನಿಮಗ್ಯಾವುದೇ “ವರಿ” ಇಲ್ಲದೇ ಇರಲಿ,
ನಿಮ್ಮ ಹರ್ಷಕ್ಕೆಂದೂ “ಬರ” ಬಾರದಿರಲಿ,
ಆರೋಗ್ಯವು ಸದಾ ಉತ್ತಮವಾಗಿರಲಿ,
ಪ್ರತಿಯೊಬ್ಬರ ಮನ ಮನದೊಳಗೂ
ನೆಮ್ಮದಿಯು ಸದಾ ಮನೆ ಮಾಡಿರಲಿ!

ಎಲ್ಲರಿಗೂ ಹೊಸ ವರುಷ ೨೦೧೬ರ ಹಾರ್ದಿಕ ಶುಭಹಾರೈಕೆಗಳು.

‪#‎ಆಸುಮನ‬


ಹೇಳು ಹೀಗೇನಾ?

30 ಜುಲೈ 15

ಸಖೀ,
ಅನಿಸಿದೆ ನೀನು ನೆನಪಿಸಿದಂತೆ
ನನ್ನ ಹೆಸರ ಕರೆಯುತಿರುವಂತೆ,

ದೂರದಿಂದಲೇ ಮಾತಿಗೆಳೆದಂತೆ
ಮೌನದಿ ಸಂವಾದ ನಡೆಸಿದಂತೆ

ಕಣ್ಣಿದಿರಿಲ್ಲದಿದ್ದರೂ ಇದ್ದಿರುವಂತೆ
ಅಲ್ಲಿದ್ದರೂ ಮನದೊಳಿರುವಂತೆ

ಈ ಅನಿಸಿಕೆ ಈಗ ನನಗಷ್ಟೇನಾ
ನಿಜ ಹೇಳು ನಿನಗೂ ಹೀಗೇನಾ?


ಹೋರಾಟ ಬುವಿಯಲ್ಲಿ!

29 ಜುಲೈ 15

ಸಖೀ,
ಅಪರಾಧ ಶಿಕ್ಷೆ ಇವೆರಡೂ ಬರಿದೇ
ವಿಧಿಯಾಟ ಅಲ್ಲದೇ ಬೇರೇನಿಲ್ಲ,
ಎಲ್ಲಾ ಅಪರಾಧಿಗಳಿಗೂ ಶಿಕ್ಷೆಯು
ದಕ್ಕಿಯೇ ದಕ್ಕುವುದು ಎಂದೇನಿಲ್ಲ;

ಆತನ ಲೆಕ್ಕಾಚಾರದೊಳಗೆ ಸಿಲುಕಿ
ಚಡಪಡಿಸುವರು ಮನುಜರೆಲ್ಲರಿಲ್ಲಿ,
ಲೆಕ್ಕಾಚಾರದಿಂದ ಹೊರಗುಳಿದರೂ
ಅನುಭವಿಸಲು ಉಳಿದಿರಬಹುದಲ್ಲಿ;

ಸಾವು ಮನುಜನ ಪ್ರಸಕ್ತ ಜೀವನದ
ಒಂದು ಅಂತ್ಯ ಅಷ್ಟೇ ವಾಸ್ತವದಲ್ಲಿ,
ಮತ್ತೊಂದು ಜನ್ಮಕ್ಕೆ ನಾಂದಿಯೂ
ಅಡಗಿಹುದು ಇಲ್ಲಿನ ಈ ಸಾವಿನಲ್ಲಿ;

ಅವನದೆನ್ನ ತಪ್ಪು, ನನ್ನ ತಪ್ಪು ಇನ್ನು
ಯಾರದೋ ಕಣ್ಕುಕ್ಕುವುದು ಸುಳ್ಳಲ್ಲ,
ತಪ್ಪು ಒಪ್ಪುರಹಿತ ಜೀವನ ನಮ್ಮದು
ಆದರಿದು ಜೀವನವೆಂದನಿಸುವುದಿಲ್ಲ;

ಇಂದಿರುವ ನಾನು ನಾಳೆ ಇದ್ದೇನೆಂಬ
ನಂಬಿಕೆ ಇಲ್ಲವೇ ಇಲ್ಲ ಈ ಗಳಿಗೆಯಲ್ಲಿ,
ಆದರೆ ಸಾವಿಲ್ಲದವರ ಬಾಳಿನಂತೆಯೇ
ಹೋರಾಟ ನನ್ನದೂ ಈ ಬುವಿಯಲ್ಲಿ!


ನನಗೇನಕ್ಕು?

23 ಜುಲೈ 15

ಸಖೀ,
ನೀನು ನಕ್ಕು ನುಡಿದರೂ ಅಕ್ಕು
ನೀನು ಬೈದು ನುಡಿದರೂ ಅಕ್ಕು
ನಾನಂದಾಗಿದೆ “ನೀನೇ ನನಗಕ್ಕು”
ಇನ್ನು ನೀನೇನಂದರೂ ನನಗೇನಕ್ಕು?