ನನ್ನ ತಲೆಯಲ್ಲಿ ಬಿತ್ತದಿರು ಬೀಜ ನಾನೂ ಶೂದ್ರನೆಂದು
ನೆನಪಿಸದಿರು ನಾನು ಮರೆಯಲೆತ್ನಿಸುವ ಮಾತನಿಂದು
ನನ್ನನ್ನೂ ನನ್ನವರನ್ನೂ ಯಾರೋ ತುಳಿಯುತ್ತಿಹರೆಂದು
ಎದ್ದು ನಡೆದಿದ್ದೇನೆ ಒದ್ದು ನಡೆದಿದ್ದೇನೆ ಸದ್ದುಮಾಡದೇ
ಬದುಕಿದ್ದೇನೆ ಇಷ್ಟು ವರ್ಷ ಯಾರ ಹಂಗಿಗೂ ಬೀಳದೇ
ಕಂಡುಕೊಂಡಿದ್ದೇನೆ ಬಾಳಿನಲ್ಲಿ ನಾನು ದಾರಿ ನನ್ನದೇ
ನೀನು ಕಟ್ಟಿಕೊಡುವ ಬುತ್ತಿ ಬಾರದು ಬಾಳದಾರಿಗುಂಟ
ನಿಜವಾಗಿ ಇಲ್ಲಿ ಯಾರ ಮೇಲಾದರೂ ನಂಬಿಕೆ ಉಂಟಾ
ನಿನ್ನಲ್ಲೀಗ ಬರೀ ಸ್ವಾರ್ಥ ನನ್ನರಿವಿನರಿವು ನಿನಗುಂಟಾ?
ಬಂಡಾಯದ ಕೂಗು ನನ್ನ ಬಾಲ್ಯದಲೂ ಕೇಳಿಸಿತ್ತೆನಗೆ
ಅಂದೂ ಇಷ್ಟವಾಗಲಿಲ್ಲ ಹಿಡಿಸಿದ್ದು ನವೋದಯವೆನಗೆ
ಜಾತಿ-ಮತಗಳ ಬಿಟ್ಟು ನಾನಾನಾಗಿರುವ ಆಸೆಯೆನಗೆ!
Advertisements
