ಮೌನವೇ ನುಡಿಯುತ್ತದೆ!

13 ಏಪ್ರಿಲ್ 10

ನನಗೆ

ನಿನ್ನೊಡನೆ

ಮಾಮೂಲಿಗಿಂತಲೂ

ಹೆಚ್ಚು ಮಾತನಾಡುವ

ಬಯಕೆ ಆದಾಗಲೂ

ಕೆಲವೊಮ್ಮೆ

ಒಂದೇ ಒಂದು

ಮಾತನ್ನೂ

ಆಡಲಾಗದೇ

ನಾನುಳಿದು ಬಿಟ್ಟಾಗ

 ನನ್ನ ಮೌನವೇ

ನುಡಿಯುತ್ತದೆ:

“ನನಗೆ ನಿನ್ನೊಡನೆ

ಬಹಳಷ್ಟು ಮಾತಾನಾಡುವುದಿದೆ”!

*****

 


ಅದು ಪ್ರೀತಿಯ ಕುರುಹು!

12 ಏಪ್ರಿಲ್ 10

ನಿಂತಲ್ಲಿ ಕೂತಲ್ಲಿ

ಹಗಲಲ್ಲಿ ಇರುಳಲ್ಲಿ

ನಿನ್ನ ದಿನಚರಿಯ

ಪ್ರತಿ ಗಳಿಗೆಯಲ್ಲೂ

ನನ್ನ ನೆನಪೇ ನಿನ್ನನ್ನು

ಕಾಡತೊಡಗಿದಾಗ

ಅಲ್ಲಿ ನಡೆಯುವ ಚಿಕ್ಕಪುಟ್ಟ

ವಿಷಯವನ್ನೂ ನನ್ನೊಡನೆ

ಹಂಚಿಕೊಳ್ಳಬೇಕೆಂದು

ನಿನಗಿಚ್ಚೆ ಆಗತೊಡಗಿದಾಗ

ನೀ ಮೌನವಾಗಿದ್ದಾಗಲೂ

ನನ್ನೊಡನೆ ಸಂಭಾಷಣೆಯಲಿ

ಸದಾ ನಿರತಳಾಗಿರುವೆಯೇನೋ

ಎಂದು ನಿನಗನಿಸತೊಡಗಿದಾಗ

ಅರಿತುಕೋ ಸಖೀ ನಿನ್ನೊಡಲ

ಕೊಡದಲ್ಲಿ ನನಗಾಗಿ ಪ್ರೀತಿಯ

ಅಮೃತ ತುಂಬಿಕೊಂಡಿಹುದೆಂದು!

*****


ಯಮನ ಜೊತೆಗಿಲ್ಲದ ಸಲುಗೆ!

09 ಏಪ್ರಿಲ್ 10

ಸಖೀ,

ನೀನು

ಕರೆದಾಗ

ನಾ ಓಗೊಟ್ಟು

ಬರಲಿಲ್ಲವೆಂದು

ಮುನಿಯದಿರು

ನೀನೀ ಪರಿ;

 

ಆ ಯಮನ

ಜೊತೆಗೆ

ನನಗಿಲ್ಲದ

ಸಲುಗೆ

ನಿನ್ನ ಜೊತೆಗೆ

ಇದೆಯೆಂದು

ತೋರಿಸಿಕೊಂಡೆ

ನಾನು ಅಷ್ಟೇ

ನೀನಿದನು ಅರಿ!

*****

 

 


ಅಯ್ಯೋ, ಪ್ರೀತಿಯ ಮಾತಂತಿರಲಿ!

09 ಏಪ್ರಿಲ್ 10

ಸಾಕಿನ್ನು ಈ ದೂರ

ಬಂದು ಬಿಡು ಬೇಗನೇ

ಎಂದು ನೀವನ್ನುತಿರುವುದು

ನನ್ನ ಮೇಲಿನ

ಪ್ರೀತಿಯಿಂದಲೇ ಅಲ್ಲವೇನು

ಎಂದು ನೀನೆನ್ನ

ಕೇಳುತಿರುವೆಯಲ್ಲೇ?

 

ಅಯ್ಯೋ,

ಪ್ರೀತಿಯ ಮಾತಂತಿರಲಿ

ನೀನಲ್ಲಿ ನನ್ನನ್ನು

ನೆನಸಿಕೊಂಡಾಗಲೆಲ್ಲಾ

ಇಲ್ಲಿ ನನ್ನನ್ನು

ಬಿಡದೆ ಕಾಡುವ

ಬಿಕ್ಕಳಿಕೆ, ಆಕಳಿಕೆ,

ಒಂಟಿ ಸೀನುಗಳಿಂದ

ನಾನು ನೊಂದಿರುವೆನಲ್ಲೇ?!

*****

 

 

 


ನೆನಪಿಸಿದಾಗೆಲ್ಲಾ ಅವ್ಯಕ್ತ ನೋವು!

08 ಏಪ್ರಿಲ್ 10

 

ಕೆಲವೊಮ್ಮೆ

ನನ್ನೊಳಗೆ

ಅದ್ಯಾವುದೋ

ಅವ್ಯಕ್ತ ನೋವು,

ನಿಜಹೇಳಿ

ಆಗೆಲ್ಲಾ ನನ್ನನ್ನು

ನೆನಪಿಸಿ

ಕೊಳ್ಳುತ್ತಿರುತ್ತೀರಾ

ನೀವು?

 

ನಾನು ನಿನ್ನನ್ನು

ನೆನಪಿಸಿಕೊಂಡಾಗೆಲ್ಲಾ

ನಿನಗಾಗುವ ಆ

ಅವ್ಯಕ್ತ ನೋವು,

ಅದು ನಿಜಕ್ಕೂ

ನೆನಪಿಸುತ್ತಿದೆ

ದೂರ ದೂರ

ಬೇರೆ ಬೇರೆ

ಆದರೂ ಒಂದೇ

ಎಂದು ನಾವು!

*****

 

 


ಶಿವರಾಜ ಪಾಟೀಲರಿಂದ ಚಿದಂಬರಂ ಕಲಿತ ಪಾಠ!

08 ಏಪ್ರಿಲ್ 10

 

ಅಂದಿನ ಗೃಹಮಂತ್ರಿ

ಶಿವರಾಜ ಪಾಟೀಲರನ್ನು

ಮನೆಗೆ ಕಳುಹಿಸಿದ್ದರು

ಬಾಂಬು ವಿಸ್ಫೋಟಿಸಿದಾಗ

ತನ್ನ ಬಟ್ಟೆ ಬದಲಾಯಿಸಿ

ಬಂದಿದ್ದರೆಂದು;

 

 ಇಂದಿನ ಗೃಹಮಂತ್ರಿ

ಚಿದಂಬರಂ ಬಲುಜಾಣ

ಆತ ಸದಾ ತೊಡುವುದು

ಬರೀ ಬಿಳಿಯ ಉಡುಗೆ

ಬದಲಾಯಿಸಿದರೆ ಯಾರಿಗೂ

ಗೊತ್ತಾಗದೇ ಇರಲೆಂದು!

******


ಚಿದಂಬರಂ, ಪಂಚೆ ಎತ್ತಿಕಟ್ಟಿ – ಯುದ್ಧಕ್ಕೆ ಕರೆನೀಡಿ!

07 ಏಪ್ರಿಲ್ 10

 

ಸುದ್ದಿ: “ಮೇರೆಮೀರುತ್ತಿರುವ ನಕ್ಸಲ್ ಚಟುವಟಿಕೆಗೆ ಆಕ್ರೋಶ ವ್ಯಕ್ತಪಡಿಸಿರುವ ಕೇಂದ್ರ ಗೃಹ ಸಚಿವ ಪಿ. ಚಿದಂಬರಂ, ಮಾವೋವಾದಿಗಳು ದೇಶದ ಮೊದಲ ಶತ್ರು ಎಂದು ಗುಡುಗಿದ್ದಾರೆ. ಮುಂದಿನ ಎರಡು ಅಥವಾ ಮೂರು ವರ್ಷಗಳಲ್ಲಿ ನಕ್ಸಲ್ ಚಟುವಟಿಕೆಯನ್ನು ಬುಡಸಮೇತ ಕಿತ್ತುಹಾಕುವುದಾಗಿ ಘೋಷಿಸಿದ್ದಾರೆ.”

http://thatskannada.oneindia.in/news/2010/04/06/naxalism-is-the-first-enemy-of-the-country-chidu.html

ನಮ್ಮ ದೇಶದ ಮೊದಲ ಶತ್ರುವನ್ನೇ ಬುಡಸಮೇತ ಕಿತ್ತು ಹಾಕಲು ಮೂರು ವರುಷದ ಅವಧಿ ಬೇಕೆನ್ನುತ್ತೀರಾದರೆ, ಗೃಹಮಂತ್ರಿಗಳೇ,  ಇನ್ನು ನಮ್ಮ ಶತ್ರುಗಳ ಪಟ್ಟಿಯಲ್ಲಿ ಎರಡನೇ, ಮೂರನೇ, …. ಸ್ಥಾನದಲ್ಲಿರುವ ಶತ್ರುಗಳನ್ನು ನೆಲಸಮ ಮಾಡಲು ಪಂಚವಾರ್ಷಿಕ ಅಥವಾ ದಶವಾರ್ಷಿಕ ಯೋಜನೆಗಳೇ ಬೇಕಾಗಬಹುದೇನೋ ಅಲ್ಲವೇ?

ಅಷ್ಟರೊಳಗೆ ಮತ್ತೊಂದು ಮಹಾ ಚುನಾವಣೆ, ಮತ್ತೊಂದು ಹೊಸ ಸರಕಾರ, ಮತ್ತೋರ್ವ ಹೊಸ ಗೃಹಮಂತ್ರಿ, ಮತ್ತೊಂದು ಹೊಸ ಘೋಷಣೆ…. ಅಲ್ಲವೇ… ಚಿದಂಬರಂ?

ಈ ಭಯೋತ್ಪಾದನೆ, ನಕ್ಸಲವಾದ ಇವುಗಳನ್ನು ಮಟ್ಟಹಾಕುವ ಕೆಲಸ ಕೊನೆಗೂ ಒಂದು ಚಿದಂಬರ ರಹಸ್ಯವಾಗಿಯೇ ಮುಂದುವರಿಯಲಿದೆಯೇ…?

ನಿನ್ನೆ ಛತ್ತೀಸಘಡದಲ್ಲಿ ೮೦ ಕ್ಕೂ ಹೆಚ್ಚು ಕೇಂದ್ರ ಮೀಸಲು ಆರಕ್ಷಕ ಪಡೆಯ ಯೋಧರು ಸಾವಿಗೀಡಾದರೂ, ಆ ನಕ್ಸಲರನ್ನು ಮಟ್ಟಹಾಕುವ ಕೆಲಸವನ್ನು, ಕೂಡಲೇ ವಾಯು ಮತ್ತು ಭೂಸೇನೆಗಳಿಗೆ ವಹಿಸಿಕೊಡಲು ನೀವು ಇನ್ನೂ ಮೀನ-ಮೇಷ ಎಣಿಸುತ್ತಿರುವುದೇಕೆ? ಇನ್ನು ಎಷ್ಟು ಯೋಧರ ಸಾವಿನ ನಿರೀಕ್ಷೆ ಇದೆ ನಿಮಗೆ?

ಸಾವು ನೋವುಗಳ ಲೆಕ್ಕಾಚಾರ ಹಾಕಿ, ವರ್ಷಗಳ ನಡುವಣ ತುಲನಾತ್ಮಕ ಹೇಳಿಕೆ ನೀಡಿದರೆ ಸಾಲದು, ಮಾಜೀ ಹಣಕಾಸು ಮಂತ್ರಿಗಳೇ. ಇದು ಆ ಲೆಕ್ಕಾಚಾರಗಳಿಗಿಂತ ಭಿನ್ನ. ಇಲ್ಲಿ ಬರಿಯ ತುಲನಾತ್ಮಕ ವಿಶ್ಲೇಷಣೆಗಳು ಕೆಲಸಕ್ಕೆ ಬಾರವು. ದಯವಿಟ್ಟು ತಮ್ಮ ಪಂಚೆ ಎತ್ತಿಕಟ್ಟಿ ಅಲ್ಲದೇ ರಕ್ಷಣಾ ಸಚಿವರಿಗೂ ತಮ್ಮ ಪಂಚೆಯನ್ನು ಎತ್ತಿಕಟ್ಟಿ ಯುದ್ಧಕ್ಕೆ ಸನ್ನದ್ಧರಾಗಲು ಕರೆನೀಡಿ.


“ಹಾಯ್”!

06 ಏಪ್ರಿಲ್ 10

ಅವರಿವರಿಂದ

ಬರುವ

ಸಂದೇಶಗಳನ್ನು

ನಾನೂ ನಿನಗೆ

ಮರು ರವಾನಿಸಬಹುದು

ಓ ನನ್ನ ಚೆಲುವೆ,

 

ಆದರೆ,

ನನ್ನತನವಿಲ್ಲದ

ಆ ಉದ್ದುದ್ದ

ಸಂದೇಶಗಳಿಗಿಂತ

ನಿನಗೆ ನನ್ನೀ

ಮನದಿಂದ ಬರುವ

ಎರಡಕ್ಷರಗಳ

“ಹಾಯ್”

ಬಲು ಇಷ್ಟವೆಂದು

ನಾ ಅರಿತಿರುವೆ!!!

*****