ಕರಾವಳಿಯ ಸಂಗ್ರಾಮದ ಕತೆ!!!

19 ಮೇ 09

ಕರಾವಳಿಯಲ್ಲಿ ಬಿಜೆಪಿ ಮತ್ತೆ ಈಗ ಜಯಭೇರಿ ಬಾರಿಸಿದೆ
ಪೂಜಾರಿ ಕಂಡ ಕನಸುಗಳ ಹೇಗೆ ನುಚ್ಚು ನೂರಾಗಿಸಿದೆ

ಮೊಯ್ಲಿ ಸೋಲುವ ಕುದುರೆ, ನಾನೇ ಗೆದ್ದು ಬರುವೆ ಎಂದಿದ್ದ
ಬಂಡು ಧೈರ್ಯಮಾಡಿ ಮತ್ತೆ ಅದೇಕೋ ಕಣಕ್ಕೆ ಧುಮುಕಿದ್ದ

ಮೊಯ್ಲಿ ಹಲವು ಬಾರಿ ಮಾಡಿದ ತಪ್ಪನ್ನೀ ಬಾರಿ ಮಾಡದಿದ್ದ
ಅದಕ್ಕೆ ಚಿಕ್ಕ ಬಳ್ಳಾಪುರದಲ್ಲಿ ನೋಡಿ ನಿರಾಯಾಸವಾಗಿ ಗೆದ್ದ

ಕ್ಷೇತ್ರ ಮರು ವಿಂಗಡಣೆ ಮಂಗ್ಳೂರಲ್ಲಿ ಗೌಡಂಗಾತಂಕ ತಂದಿತ್ತು
ಉಡುಪಿಯಲ್ಲಿ ಯಾವುದೇ ಶ್ರಮರಹಿತ ಗೆಲುವಿನ ನಿರೀಕ್ಷೆ ಇತ್ತು

ಜಯಪ್ರಕಾಶ ಹೆಗ್ಡೆಯ ಪರಿಚಯ ಉಡುಪಿ ಜಿಲ್ಲೆಯಲ್ಲಷ್ಟೇ ಜಾಸ್ತಿ
ಚಿಕ್ಕಮಗಳೂರು ಕಡೆಯ ಮತ ಪಾರ್ಟಿಯದು ಹೆಗ್ಡೆಯದಲ್ಲ ಆಸ್ತಿ

ಎಡರಂಗದವರು ಉಡುಪಿಯಲ್ಲಿ ಯಾಕೆ ಸ್ಪರ್ಧೆಗೆ ಇಳಿಯುತ್ತಾರೋ
ಅವರ ಬೇಳೆ ಬೇಯಿಸಲು ನೀರೇ ಸಿಗದು ಎಂದ್ಯಾರು ಹೇಳುತ್ತಾರೋ

ನಳಿನ ಕುಮಾರ ಹೊಸಬ ಅಲ್ಲಿ ಆತನಿಗಲ್ಲ ಅದು ಪಕ್ಷಕ್ಕೆ ಸಿಕ್ಕ ಮತ
ಮುಂದೆ ಗೆಲ್ಲಬೇಕಿದ್ದರೆ ಆತ ಮಾಡಬೇಕಿದೆ ಮಂಗಳೂರಿಗರಿಗೆ ಹಿತ

ಹಿಂದೂಗಳ ಪ್ರತಿನಿಧಿಯಾಗದೇ ಮಂಗಳೂರನ್ನೇ ಪ್ರತಿನಿಧಿಸಬೇಕು
ಅನ್ಯರಿಗೂ ಆತನ ಮೇಲೆ ಭರವಸೆ ಮೂಡುವಂತಾತ ದುಡಿಯಬೇಕು

ಮೊಯ್ಲಿ ದೊರಕಿಸಿಕೊಂಡಾನು ಮಂತ್ರಿಗಿರಿ ಯಾ ತಕ್ಕ ಸ್ಥಾನಮಾನ
ಪೂಜಾರಿಯ ಕೇಳುವವರಿಲ್ಲ ತವರೂರಲ್ಲೇ ಆದಮೇಲೆ ಈ ಅವಮಾನ

ಪೂಜಾರಿ ಮತ್ತು ಜಯಪ್ರಕಾಶ್ ಹೆಗ್ಡೆಗಿನ್ನು ನಿವೃತ್ತಿಯೇ ಒಳ್ಳೆಯದು
ಕೆಡುತ್ತಿರುವ ಆರೋಗ್ಯವ ಕಾಪಾಡಿಕೊಂಡು ಇರುವುದೊಳ್ಳೆಯದು

ಮಾರ್ಗರೇಟಳಿಗಿನ್ನು ಬೆಲೆ ದಿಲ್ಲಿಯಲಿ ಹಿಂದಿನಷ್ಟಿರುವುದಿಲ್ಲ ನೋಡಿ
ಸೋತು ಮರಳುತ್ತಿದ್ದಾಳೆ ಈಗ ಮೊದಲು ಬಾಯ್ತುಂಬಾ ಮಾತಾಡಿ

ಗೆದ್ದ ಅನಂತ ಕುಮಾರ ಹೆಗಡೆ ನಾಲಿಗೆಗೆ ಲಗಾಮು ಹಾಕಬೇಕು
ಬೇಕಾಬಿಟ್ಟಿ ಮಾತನಾಡದೇ ಕ್ಷೇತ್ರದ ಏಳಿಗೆಗಾಗಿ ದುಡಿಯಬೇಕು


ಹನಿ ಹನಿಯಾದರೂ ಒಂದೇ ಕವನ!!!

18 ಮೇ 09

ಜನ ಜಾತ್ರೆಯ ನಡುವೆಯೂ ನನಗೆ
ನನ್ನ ಒಂಟಿತನ ಕಾಡುತ್ತಿದ್ದಾಗ
ಅಂದುಕೊಳ್ಳುತ್ತಿದ್ದೆ ನಾನು ನನ್ನ
ಅದೃಷ್ಟದಲ್ಲಿ ಜೊತೆಗಾರರಿಲ್ಲೆಂದು;

ಒಂದು ದಿನ ಆಕಸ್ಮಿಕವಾಗಿ ನಿನ್ನ
ಗೆಳೆತನವಾದಾಗ ಅಂದುಕೊಂಡೆ
ನಾನು ನನ್ನ ಹಸ್ತರೇಖೆಯಲೇ
ಏನೋ ವಿಶೇಷತೆಯಿರಬೇಕೆಂದು!!!

ಇಂದು ಯಾರದೋ ಹರಕೆಯ
ಕೊರತೆ ಇದೆ ನನ್ನೀ ಬಾಳಲಿ
ಅದಕೇನೋ ನೋಡಿ ಹನಿಗಳು
ತುಂಬಿವೆ ನನ್ನೀ ಕಂಗಳಲಿ

ಯಾರೋ ಇದ್ದಾರೆ ನನ್ನಿಂದ
ದೂರ ನನ್ನನ್ನು ಮರೆತು
ಆದರೂ ನನ್ನ ಹೃದಯದಲಿ
ಕೂತಿದ್ದಾರೆ ಇಂದಿಗೂ ಅವಿತು

ಜೀವನ ಎಲ್ಲಾ ಭಾವನೆಗಳನು
ಶಬ್ದಗಳಲಿ ವಿವರಿಸಲಾಗುವುದಿಲ್ಲ
ಶಬ್ದಗಳಂತೆಯೇ ಮೌನವೂ
ಕೆಲವೊಮ್ಮೆ ಶೋಭೆ ಕೊಡುವುದಲ್ಲ

ಆಗಸದಿಂದ ಬಿದ್ದ ಉಲ್ಕೆಯ ಕಂಡು
ನಾನು ಆ ದೇವರಲಿ ಪ್ರಾರ್ಥಿಸಿದೆ
ಮುರಿಯದಿರಲಿ ಈ ಸ್ನೇಹ ಸಂಬಂಧ
ಎಂದು ನಾ ಮನಬಿಚ್ಚಿ ಹಾರೈಸಿದೆ.


ಸಂಸತ್ತಿನಲ್ಲಿ ಅಪ್ಪ ಮಲಗಿದರೆ ಎಬ್ಬಿಸಲು ಮಗನಿರುತ್ತಾನೆ!!!

16 ಮೇ 09

ಇನ್ನು ಸಂಸತ್ತಿನಲ್ಲಿ ಅಪ್ಪ ಮಲಗಿದರೆ ಎಬ್ಬಿಸಲು ಅಲ್ಲಿ ಮಗನಿರುತ್ತಾನೆ
“ಅಪ್ಪಾ ದೊಡ್ಡಾಟ ಮುಗೀತು ಮನೇಗೆ ಹೋಗೋಣ ಬಾ” ಅನ್ನುತ್ತಾನೆ

ಇನ್ನೊಬ್ಬ ಅಪ್ಪನ ಮುಖಕ್ಕೆ ತನ್ನ ತವರೂರಿನಲ್ಲೇ ಆಯ್ತು ಮಂಗಳಾರತಿ
ಮತದಾರ ಕೇಳಿದ ಸಾಕಪ್ಪಾ ಸಾಕು ಇನ್ನೆಷ್ಟು ಬಾರಿ ಪಕ್ಷ ಬದಲಾಯಿಸುತ್ತೀ

ಭಾಜಪಕ್ಕೆ ಈ ಬಾರಿ ನೀಡಲಾಗಿದೆ ಸುಧಾರಿಸಿಕೊಳ್ಳಲು ಕೊನೆಯ ಅವಕಾಶ
ಗೆಲುವಿನ ಅಂತರ ಇದೇ ರೀತಿ ಕಡಿಮೆಯಾದರೆ ನೋಡಬೇಕಾದೀತು ಆಕಾಶ

ಕೆಂದ್ರದಲಿ ಒಂದು ಸುಸ್ಥಿರ ಸರಕಾರ ಇದ್ದರೆ ದೇಶಕ್ಕೆ ಒಳ್ಳೆಯದೇನೋ ಹೌದು
ಆದರೆ ಬಹುಮತದ ಕೊಬ್ಬಿನಿಂದ ಬೋಫೋರ್ಸಿನಂತ ಹಗರಣ ಆಗಲೂ ಬಹುದು

ಆಡ್ವಾಣಿಯವರ ಬಾಲಿಶವಾದ ಟೀಕಾಸ್ತ್ರಗಳು ಮಾಡಿದವೆಂತಹ ಆಧ್ವಾನ ನೋಡಿ
ಅವರ ಜೊತೆಗೆ ಕೈಕೊಟ್ಟದ್ದು ಮೋಡಿ ಮಾಡಲು ಹೊರಟಿದ್ದ ನರೇಂದ್ರ ಮೋದಿ

ಎರಡೆರಡು ಕಡೆ ಸ್ಪರ್ಧಿಸಿದ ಲಾಲೂ-ಚಿರಂಜೀವಿಗೆ ಒಂದೊಂದು ಕಡೆ ಸೋಲು
ಹೇಗೂ ರಾಜೀನಾಮೆ ಕೊಡುವರಲ್ಲಾ ಏಕೆ ಮಾಡಬೇಕು ಸುಮ್ಮನೆ ಹಣ ಪೋಲು

ಒಟ್ಟಾರೆ ಫಲಿತಾಂಶ ಬೊಟ್ಟು ಮಾಡಿ ತೋರಿಸುವಂತಿದೆ ದ್ವಿಪಕ್ಷೀಯ ಪದ್ಧತಿಯತ್ತ
ತೃತೀಯ ರಂಗ ಕಟ್ಟಲು ಹೊರಟ ಎಡಪಕ್ಷೀಯರನು ಸಾಗಹಾಕಿದಂತಿದೆ ಮನೆಯತ್ತ

ಆಂಧ್ರದ ಈ ಮೆಗಾಸ್ಟಾರ್ ಅದೇಕೋ ಜನರ ಮನ ಮತ ಗೆಲ್ಲುವಲ್ಲಿ ವಿಫಲನಾದ
ಎಂಜಿಆರ್ ಎನ್ಟಿಆರ್ರವರ ಹಳೆಯ ಕಾಲ ಬೇರೆಯಾಗಿತ್ತೆಂದು ಅರಿಯದೆ ಹೋದ

ಸಿದ್ಧಾಂತವಿರಬೇಕು ಬರಿಯ ಬಾಯಿಮಾತಿನ ಚಕಮಕಿ ಸಾಲದು ಮನ ಗೆಲ್ಲುವುದಕ್ಕೆ
ನೇತಾರ ನಂಬಿಗಸ್ತನಾದರೆ ಹೆಚ್ಚಿನ ಸಂಖ್ಯೆಯಲಿ ಬರುತಾರೆ ಮತ ನೀಡುವುದಕ್ಕೆ


ಒಬಾಮಾ ತಂದ ಬದಲಾವಣೆ ನಮ್ಮಲ್ಲಿ ಅಸಾಧ್ಯ!!!

15 ಮೇ 09
ಮತ್ತೆ ಬೇಡಿಕೆಯಲ್ಲಿದ್ದಾರೆ ಮಾಯಾ ಜಯಾ ಮತ್ತು ಮಮತಾ
ಇದೀಗ ನೆನಪಿಗೆ ಬರುತಿಹುದೆನಗೆ ನಮ್ಮ ಜಾರ್ಜರ ಸಮತಾ
 
ಚರಿತ್ರೆ ಪುನರಾವರ್ತನೆಯಾಗುವುದೆಂಬ ಮಾತು ಎಷ್ಟು ಸತ್ಯ
ಈ ನಾರೀಮಣಿಗಳು ತಯಾರಿಸೋ ಕಿಚಡಿಯೇ ಎಲ್ಲರಿಗೂ ಪಥ್ಯ
 
ನೂರು ಕೋಟಿ ಜನರಿಗೆ ನೂರಾರು ಪಕ್ಷಗಳು ನಮ್ಮ ದೇಶದಲ್ಲಿ
ಯಾರೆತ್ತ ವಾಲಿದರೂ ಬಹುಮತ ದೊರೆಯದು ಚುನಾವಣೆಯಲ್ಲಿ
 
ಚುನಾವಣೆಗೆ ಮೊದಲು ಬೀದಿ ನಾಯಿಗಳಂತೆ ಕಾದಾಡುವವರು
ಚುನಾವಣೆಯ ನಂತರ ಒಂದೇ ನಾಯಿಯ ಮರಿಗಳಂತೆ ಇವರು
 
ದೇಶದ ಸಿಪಾಯಿಯಾಗಲು ಇಲ್ಲಿ ನೂರಾರು ಅರ್ಹತೆಗಳ ಪಟ್ಟಿ
ಆದರೆ ಇರಬೇಕಾಗಿಲ್ಲ ಮಹಾದಂಡನಾಯಕನ ಆರೋಗ್ಯ ಗಟ್ಟಿ
 
ಸರಕಾರೀ ಅಧಿಕಾರಿಯಾಗುವುದಕೆ ಪಡಬೇಕಾದ ಶ್ರಮ ಅಷ್ಟಿಷ್ಟಲ್ಲ
ಅಧಿಕಾರಿಳ ಮೇಲೆ ಅವಿದ್ಯಾವಂತ ಗೂಬೆ ಬಂದು ಕೂರುತಾನಲ್ಲಾ
 
ಅಮೇರಿಕಾದಲ್ಲಿ ಒಬಾಮಾ ತಂದ ಬದಲಾವಣೆ ನಮ್ಮಲ್ಲಿ ಅಸಾಧ್ಯ
ಅಲ್ಲಿ ಎರಡೇ ಪಕ್ಷಗಳು ಇಲ್ಲಿ ಹಾಗಾಗುವ ಸೂಚನೇಯೇ ಇಲ್ಲ ಸದ್ಯ
 
ಅಲ್ಲಿ ಒಂದು ಪಕ್ಷದೊಳಗಣ ಅಭ್ಯರ್ಥಿಯನೂ ಜನರೇ ಆರಿಸುತ್ತಾರೆ
ಇಲ್ಲಿ ಹಾಗಲ್ಲ ಇರುವ ಮೂರ್ಖರಲಿ ಶತಮೂರ್ಖನನು ಹೇರುತ್ತಾರೆ
 
ಯಾವ ಸರ್ಕಾರ ಬಂದರೂ ಇಲ್ಲಿ ಬದಲಾವಣೆ ಆಗಲು ಸಾಧ್ಯವಿಲ್ಲ
ನಾಡಿಗೆ ಎರಡೇ ಪಕ್ಷಗಳು ಒಂದೇ ನಾಗರಿಕ ಸಂಹಿತೆ ಆಗಬೇಕಲ್ಲ

ನಾನೀಗ ಏಕಾಂಗಿ!!!

14 ಮೇ 09
ಹಲವು ತಿಂಗಳುಗಳ
ನಂತರ ನಾನಾಗಿದ್ದೇನೆ
ಮತ್ತೀಗ  ಏಕಾಂಗಿ
 
ಏಕೆಂದರೆ ಮನೆಯಲ್ಲಿಲ್ಲ
ಈಗ ನನ್ನ ಮಗಳು
ಮತ್ತೆನ್ನ ಅರ್ಧಾಂಗಿ
 
ವರುಷವಾಗಿತ್ತು ನಮ್ಮ
ಮಗಳು ಊರತ್ತ
ಹೋಗದೇ
 
ತಪಸ್ಸಿಗೆ ಕೂತಂತಿತ್ತು
ಆಕೆ ತನ್ನ ಓದಿನಿಂದ
ಕಿಂಚಿತ್ತೂ ಬಿಡುವಿಲ್ಲದೇ
 
ಆಕೆಯಿಂದಾಗಿ ಆಕೆಯ
ತಾಯಿಗೂ ಹೋಗಲು
ಆಗಿರಲಿಲ್ಲ ಊರತ್ತ
 
ಏನೇ ಅವಶ್ಯಕತೆ
ಇದ್ದರೂ ನಾನೇ
ಓಡಬೇಕಿತ್ತು ಅತ್ತ
 
ಹಗಲು ಕಛೇರಿಯಲ್ಲಿ
ಹೇಗಾದರೂ ದಿನ
ಕಳೆದು ಹೋಗುತ್ತದೆ
 
ಮನೆಗೆ ಹೋದರೆ
ಅಲ್ಲಿಯ ಮೌನವೆನ್ನನು
ತಿನ್ನಲು ಬರುತ್ತದೆ
 
ಎಲ್ಲರೂ ಇಲ್ಲಿದ್ದಾಗ
ಹೆಚ್ಚು ಮಾತಾಡದೇ
ಮೌನವಾಗಿರುವಾಸೆ
 
ಯಾರೂ ಇಲ್ಲದಾಗ
ಯಾರಾದರೂ ಕರೆದು
ಮಾತಾಡಿಸಲೆಂಬಾಸೆ
 
ಯಾವುದನ್ನೂ ರೂಢಿ
ಮಾಡಿಕೊಂಡು ಬಿಟ್ಟರೆ
ಅದು ಬಲು ಕಷ್ಟ
 
ಯಾರ ಹಂಗೂ ಇಲ್ಲದೆ
ಬಾಳುವಭ್ಯಾಸವಾದರೆ
ಈ ಬಾಳಿನಲ್ಲಿಲ್ಲ ನಷ್ಟ
 

ಸುದ್ದಿ ತಿಳಿದ ಕರಾವಳಿಯ ಹೆಣ್ಣು ಆತ ಹೊರ ಬರುವತನಕ ಕಾದಳು!!!

13 ಮೇ 09
ಕತ್ತಲಾದ ಮೇಲೆ ಪರಸ್ತ್ರೀಯ ಭೇಟಿಗೆ
ಯಾರೇ ಮುಖ ಮುಚ್ಚಿಕೊಂಡು ಹೋದರೆ
ಜನ ಸುಮ್ಮನಿರದೇ ಎಲ್ಲಾ ಅವರ ಮೇಲೆ
ಅಪವಾದಗಳ ಸುರಿಮಳೆ ಗೈಯುವವರೇ
 
ಅಪ್ಪ ಹೇಳುತ್ತಿದ್ದಾನೆ ನನ್ನದು ಅದೇ ಮಾತು
ನಮ್ಮದೊಂದೇ “ತರ್ಡ್ ಫ್ರಂಟೂ”
ಮಗನೂ ಆ ಮನೆಯಿಂದೀಚೆಗೆ ಬಂದು
ಅನ್ನುತ್ತಿದ್ದಾನೆ ನನ್ನದೂ “ತರ್ಡ್ ಫ್ರಂಟೂ”
 
ಅರ್ಧಂಬರ್ಧ ಸುದ್ದಿ ತಿಳಿದ ಕರಾವಳಿಯ
ಹೆಣ್ಣು ಆತ ಹೊರ ಬರುವತನಕ ಕಾದಳು
ಕೂದಲು ಕೆದರದೇ ಆತನ ಅಂಗಿ ಸರಿ
ಗಿದ್ದುದಕೆ ನೆಮ್ಮದಿಯಲಿ ನಗುತ್ತಿದ್ದಳು
 
ನಿನ್ನವನು ಯಾರದೋ ಕೈಯತ್ತ ವಾಲಿದ್ದಾನೆ
ಎಂದರೆ ಆಗಲೇ ಬೇಕು ಅನುಮಾನ
ಆದರೆ ನೀನು ಅಂದುಕೊಂಡಂತೆ ಆತ
ಹೋಗಿರಲಿಲ್ಲ ಅಲ್ಲಿ ಮಾಡಲು ಪಾಣಿಗ್ರಹಣ
 
ಹೌದು ಕಣೇ ಅವರವರ ಸಮಸ್ಯೆ ಅವರವರಿಗೆ
ಎಂದೂ ದೊಡ್ದದು ಅಲ್ಲದೇ ಮತ್ತಿನ್ನೇನು
“ತರ್ಡ್ ಫ್ರಂಟು” ಅನ್ನುತ್ತಾ ಮೂರನೇ
ಗೃಹಪ್ರವೇಶ ಮಾಡದಿರಲಿ ಅನ್ನುವೆಯೇನು
 
ನಮ್ಮೂರ ಸಮಸ್ಯೆಯ ಪರಿಹಾರಕ್ಕೆ
ಈ ಊರಲ್ಲಿರುವವರು ಯಾರೂ ಸಮರ್ಥರಲ್ಲ
ಅದಕ್ಕೇ ದೂರದೂರಿನ ಪರದೇಶಿಯ
ಸಲಹೆಯನು ಕೇಳಲು ಈತ ಹೋಗಿಹನಲ್ಲ
 
ಯಾವುದೇ ಸಿದ್ಧಾಂತವಿಲ್ಲದೇ ಇವರೆಲ್ಲಾ
ಮಾಡುತ್ತೇವೆಯೆಂಬರು ಸಮಾಜಸೇವೆ
ಇವರ ಸೇವೆಗಾಗಿ ಕಾಯದೇ ನಮ್ಮ
ಸೇವೆಯನು ಮಾಡಿಕೊಳ್ಳಬೇಕಾಗಿದೆ ನಾವೇ

ಮಾತಾಪಿತರಿಗೆ ಎಲ್ಲಿವೆ ಇನ್ನು ಇದಕ್ಕಿಂತ ಖುಷಿಯ ದಿನಗಳು!!!

11 ಮೇ 09
ಅಂದಿತ್ತು ನನಗೆ ಓದುಗರೇ ನಿಮ್ಮೆಲ್ಲರ ಹರಕೆಯ ನಿರೀಕ್ಷೆ*
ಏಕೆಂದರೆ ಶುರುವಾಗಿತ್ತಂದು ಮಗಳು ಸ್ಮಿತಾಳಿಗೆ ಪರೀಕ್ಷೆ
 
ಮಗಳು ಜಯಿಸಿದ್ದಾಳೆ ನಮ್ಮ ನಿರೀಕ್ಷೆಯ ಸುಳ್ಳಾಗಿಸದೇ
ಇಂದು ಹೇಗೆ ಸುಮ್ಮನಿರಲಿ ಖುಷಿಯ ನಾ ಹಂಚಿಕೊಳ್ಳದೇ
 
ನಿನ್ನೆ ೨೧ನೇ ವರುಷಕ್ಕೆ ಕಾಲಿಡ್ತು ನಮ್ಮ ದಾಂಪತ್ಯ ಜೀವನ
ಒಂದು ದಿನ ಮೊದಲೇ ಸಿಕ್ತು ಮಗಳಿಂದೆಮಗೆ ಬಹುಮಾನ
 
ನನ್ನವಳಿಗೆ ನಾ ಅಂದೆ ಇದೆಂತಹ “ಹ್ಯಾಪ್ಪೀ ಆನಿವರ್ಸರೀ!”
ಅಕೆಯೆಂದಳು ಮುಗುಳ್ನಕ್ಕು “ಕಣ್ಣಂಚಿನ ಆ ಹನಿ ಒರೆಸಿರೀ”
 
ಮಾತಾಪಿತರಿಗೆ  ಎಲ್ಲಿವೆ ಇನ್ನು ಇದಕ್ಕಿಂತ ಖುಷಿಯ ದಿನಗಳು
ನನ್ನೆಲ್ಲ ಓದುಗ ಬಂಧುಗಳಿಗೆ ನಮ್ಮ ಹಾರ್ದಿಕ ಧನ್ಯವಾದಗಳು
 
 

ಆಂಗ್ಲ: ೮೭
ಹಿಂದಿ: ೯೫
ಭೌತಶಾಸ್ತ್ರ: ೯೮
ರಸಾಯನ ಶಾಸ್ತ್ರ: ೯೬
ಗಣಿತಶಾಸ್ತ್ರ: ೯೦
ಜೀವಶಾಸ್ತ್ರ: ೯೩
ಒಟ್ಟು: ೫೫೯
ಶೇಕಡಾ: ೯೩.೧೬


ಹೊಸದನ್ನು ಹುಟ್ಟುಹಾಕುವ ಇಚ್ಛಾಶಕ್ತಿ ನಮ್ಮಲ್ಲಿಲ್ಲ!!!

08 ಮೇ 09
 

 

ಹೊಸದನ್ನು ಹುಟ್ಟು ಹಾಕುವ ಶಕ್ತಿ-ಯುಕ್ತಿ-ಇಚ್ಚಾಶಕ್ತಿ ನಮ್ಮಲ್ಲಿಲ್ಲ
ಅದಕ್ಕೇ ಹಳೆಯದನ್ನು ಕೆಡವದೇ ಉಳಿಸಿ ಎನ್ನುತಿರುವೆವೆಲ್ಲಾ
 
ಕೆಟ್ಟಿದೆ ಕಾಲ ಈಗ ಹೊಸದು ಅಷ್ಟು ಬೇಗ ಹುಟ್ಟುವುದೇ ಇಲ್ಲ
ಹುಟ್ಟಿದರೂ ಬೆಳೆದು ಮರವಾಗಲು ಅದಕೆ ನೀರೇ ಸಿಗುವುದಿಲ್ಲ
 
ಗಿಡಗಳನ್ನು ಪೋಷಿಸಿ ಮರಗಳನಾಗಿಸುವುದಕೆ ನಮಗೆಲ್ಲಿ ಸಮಯ
ಅದಕೇ ಹಳೆಯ ಮರಗಳನ್ನು ಅಪ್ಪಿಕೊಂಡು ನೀಡುತ್ತೇವೆ ಅಭಯ
 
ನಾವು ಎಲ್ಲದಕ್ಕೂ ರಸ್ತೆಗಿಳಿದು ಮಾಡುತ್ತೇವೆ ಪ್ರತಿಭಟನೆ ಚಳುವಳಿ
ವಿರೋಧಿಸುವ ಹಕ್ಕಷ್ಟೇ ನಮ್ಮ ಮಕ್ಕಳಿಗೆ ನಮ್ಮಿಂದ ಸಿಗೋ ಬಳುವಳಿ
 
ನನ್ನಪ್ಪಯ್ಯನವರ ಮಾತು ಎಲ್ಲಾ ದಾನಕ್ಕೂ ದೊಡ್ದದು ಸಮ್ಮತಿ ದಾನ
ಒಳ್ಳೆಯ ಕಾರ್ಯಗಳಿಗೆ ಯಾವಾಗಲೂ ವ್ಯಕ್ತಪಡಿಸಬೇಕು ಸಮಾಧಾನ

 

 


ಹಳೆಯ ಮೂರು ಕವನಗಳು!!!

08 ಮೇ 09
ಏರ್ ಕಂಡಿಷನ್ನರ್!
ಸಖೀ,
ಚಳಿಗಾಲದಲಿ
ಬಿಸಿಯಪ್ಪುಗೆಯನಿತ್ತು,
ಮತ್ತೆ ಬೇಸಗೆಯಲಿ
ತಂಪನ್ನೀಯುವ,
ನಿನ್ನ ಎದೆ
ಯಾವ ಏರ್ ಕಂಡೀಷನ್ನರಿಗೆ
ಕಡಿಮೆಯಾಗಿದೆ?!
*-*-*-*-*-*-*
೨೨ ಮಾರ್ಚ್ ೧೯೮೫
 
ರಾಗ!
ಇನಿಯಾ,
ನೀನು
ಅಂದು
ಮಿಡಿದು
ಹೋದ,
ನನ್ನ ಮನದ
ವೀಣೆ,
ಈಗ
ಹೊಮ್ಮಿಸುವುದು
ಒಂದೇ
ರಾಗ –
ಅನುರಾಗ!
*-*-*-*-*
೦೬ ಎಪ್ರಿಲ್ ೧೯೮೫
 
ಕಂಪು!
ನಲ್ಲಾ,
ನೀನು
ನಮ್ಮೂರ
ಜಾತ್ರೆಯಿಂದ
ತಂದಿದ್ದ,
ಮೈಸೂರ ಮಲ್ಲಿಗೆ,
ಈಗ
ಬಾಡಿದೆಯಾದರೂ,
ಅದರ ಕಂಪು,
ನನ್ನ
ಮನದಲಿರುವ,
ನಿನ್ನ
ನೆನಪಿನಂತೆ,
ಇನ್ನೂ
ಅಳಿದಿಲ್ಲ!
*-*-*-*-*
೦೬ ಎಪ್ರಿಲ್ ೧೯೮೫

ಹೃದಯವ ಕದ್ದವರ ಕಿವಿಗಳ ತಲುಪಬೇಕು ಮಾತು!!!

07 ಮೇ 09
ಉದ್ಯಾನ ನಗರಿಯ ಮರಗಳ ಉಳಿಸಲು ನಡೆದಿದೆ ಹೋರಾಟ
ಮತ್ತೆ ಮುಂದಿನ ಶನಿವಾರ ಜನ ಸೇರಲಿದ್ದಾರೆ ಬಿಡದಂತೆ ಹಟ

ಮರಗಳನು ಕಾಪಾಡಬೇಕೆಂಬುದಕೆ ತುಂಬುಮನದ ಬೆಂಬಲವಿದೆ
ಆದರೆ, ಕಿವುಡರಾಗಿರುವ ರಾಜಕಾರಣಿಗಳ ಮೇಲೆಲ್ಲಿ ನಂಬಿಕೆಯಿದೆ

ನಮ್ಮ ನಾಡಿನ ಮುಖ್ಯಮಂತ್ರಿಗಳ ಮನವೊಲಿಸುವುದೂ ಒಂದೇ
ಶ್ರವಣಬೆಳಗೊಳದ ಬಾಹುಬಲಿಯ ಮಾತನಾಡಿಸುವುದೂ ಒಂದೇ

ಮುಖ್ಯಮಂತ್ರಿಗಳ ಹೃದಯವನು ತಲುಪಬೇಕಿದ್ದರೆ ನಮ್ಮ ಮಾತು
ಅವರ ಹೃದಯವ ಕದ್ದವರ ಕಿವಿಗಳ ತಲುಪಬೇಕು ನಮ್ಮೀ ಮಾತು

ತಾನೇ ಸೋಲೊಪ್ಪಿಕೊಂಡವರ ಮಾತಿಗೆ ಕೊಡದಿರುತ್ತಾರೆಯೇ ಬೆಲೆ
ನಮ್ಮ ಕಾರ್ಯ ಸಿದ್ಧಿಯಾಗಬಹುದು ಅವರ ಮೂಲಕ ನೋಡಿ ಆಮೇಲೆ

ಬನ್ನಿ ನಮ್ಮ ಬೆಂಗಳೂರ ಶೋಭೆಯನು ಉಳಿಸಿ, ಶೋಭೆಯನು ಬೆಳಗಿ
ಬನ್ನಿ ನಮ್ಮ ಬೆಂಗಳೂರ ಶೋಭೆಯುಳಿಸಲು ಶೋಭೆಗೆ ಆರತಿಯ ಬೆಳಗಿ